728x90 AdSpace

Hot
Menu
Zon-ol na Donate

Latest News

ZYA TEDIM KIPHUAT KHIATNA LEH A NASEP. Agelh ~ Rev. Thang Van Lian

 ZYA TEDIM KIPHUAT KHIATNA LEH A NASEP
Agelh ~ Rev. Thang Van Lian
Secretary, ZYA – Tedim

Photo credit : The Tedim Post

1. ZYA – Tedim Tawphahte
Tedim khuapi sungah ZYA om leh hoih ding hi, cih lunggulhna pen Kawlpi a ZYA makaite lungsim ah hi ta leh kham lam a om khangnote sungah a om zawh sawt mahmah khin hi. Tedim khuapi ah khangno kipawlna kician mahmah Tedim Youth Fellowship (TYF) na om khin a, tua mah tawh kithuza-in khangnote sep theih bangbang lawp takin kisem zel hi. ZYA Kawlpi ate zong TYF makaite tawh kimu khawm zel, Tedim khuanu khuapate tawh zong kimu zelin ZYA vai kikupna om zelzel hi mah ta leh ZYA taktak dingkhia zo mahmah lo hi. Tua bang teng tawh Tedim khuapi ah anuai abangin vai thupi vai lian hong piang toto a, tuate in ZYA dinkhiat ding atawpha suak hi.

- 2010 ciangin Cope topa hong tun zawh kum za cin pawi kibawl. A zai tangzai zaw kipum khatna kinak deih semsem.
- 2013 ciangin TYF leh ZOZUUN makaih Zosuan Tuailai Khawmpi Khat veina kibawl. Zomi khangno sungah minam vai khanlawhna nasia semsem.
- 2014 ciangin Myanmar gambup census kibawl a, 914-ZOMI gelh ding GZA leh ZYA in hoih sa, mipite hanthawn. Makaipite khut le khe dingin ZYA kizang thei lianlian pah.
- GZA theihpihna tawh Census Committee kiphuan, thalawp takin kham le zangah 914-ZOMI gelh ding kihanthawn kawikawi. ZYA mah ana omnate ah a pidingin pang kawikawi thei den.

2. ZYA Phutkhia Taktak Ta
Hih a tung a thupiangte pen ZYA – Tedim pian nading a atawphahte ahi hi. Tedim khuapi huam sungah TYF banah veng sung khangno kipawlna 1) Sakollam Social Society (SSS), 2) Lawibual Khangno Kipawlna (LKK), 3) Leilum Youth Association (LLYA) leh 4) ZOZUUN kici Zosuan Tuailai Khawmpi vaipuapi kipawlna cihte kip takin a om zawh sawt ta hi. Hih kipawlna 5 teng in Tedim khuapi leh kimlepam en kawmin Zomi minpua khangno kipawlna neih loh phamawh hi, cih mu ahih manin Pawlpi kim Pastor-te leh Khangno makaite kisamin FBBC Meeting Room ah July 3, 2014 ni-in kimuh khopna lianpi kinei hi.

Hih meeting thukimna mah tawh Tedim Baptist Convention Hall ah July 7, 2014 ni-in Tedim khuapi sung vengkim a kipawlnate, biakna makaipite leh ahi theizah paikhawmin  ZYA kiphuankhia hi. ZYA nasep ding pen athu-in 914 – ZOMI vai zuau thu kigente mipi tungah hilhcianna piak ding, gam leh minam sungah vai lian khat peuhpeuh a om ciangin makaipite zat tang zang suak thei ding cihte banah a vengveng a omsa kipawlnate pankhopna a suak ding cih ngimnate nei-in akiphuankhia ahi hi. Makaipi ding leh nasep pah dingte anuai abangin thukimna kinei pah hi.

3. Makaipite Kiteel Pah:
Anuai abangin Sakollam pan Leilum dong enkawmin makaipi kiteel pah hi.

President: Pa Tuang Gin Mang (LKK)
Vice President: Pa Suang Za Nang (ZOZUUN)
Secretary: Rev. Thang Van Lian (Biakna lam)
Assistant Secretary: Tg. Khan Za Suan (LLYA)
Treasurer: Pa Gin Sian Khai (ZOZUUN)
Accountant: Pa Thang Pian Lian (SSS) Lia Hau Suan Huai (Khualai Veng)
Auditors: Lia Hau Suan Huai (Khualai Veng) , Pa Suan Lian Kim (Khualai Veng),
Advisors: Rev. Dr. Thuam Khan Thang, Rev. Vungh Suan Mung, Rev. Nang Lyan Kap

4. Tedim Post Weekly News Kihawmkhia:



1) Tedim Post Laihawm:
Tedim khuapi bulphuh thukizakna laihawm neih hamtang ding kithukim a, Zomi Post leh Tedim Post min 2 deihna om ahih manin vote tawh Tedim Post dingin kikipsak hi. Black and white, legal size tawh kaal khatin khatvei ta hanciam ding kithukim hi. President pan kipanin ZYA makaite in abanbanin hawmkhat Ks. 30,000 ta piakhia masa pah uh a, tua tawh laihawm kipan hi.

2) Tanu dingte:
Chief Editor: Rev. Thang Van Lian. Graphic Designer: Tg. Gin Kim Mang. Translator: Pa Kap Thawn Mung, Veng palaite: Pa Thang Pian Lian (Sakollam), Tg. Kam Suan Thawn (Khualai), Lia Man Huai Kim (Lawibual) leh Lia Cing Deih Nem (Leilum).

3) Registration:
Kumpi lam panin registration lo tawh kihawm thei nawn lo ding, cih thu a om ciangin Copyrights and Registration lamah “00996” tawh registration kibawl hi. Pa Hang Khan Lian leh Pa Khup Khawm Mung (a) Khawmlay, Singapore te in registration adingin Ks. 100000 tuak hong piakhia uh a, Dr. Khen Za Sian, Zo Aw Editor leh alawmte in vai teng hong vanpih uh hi. 

4) Tedim Post Facebook:
        Tg. Gin Kim Mang (a) Mangbawi hanciamna tawh a hun zui-in online ah sim theih dingin Facebook kibawl hi. Limlak tuamtuam leh video zong kimu thei pah ahih manin gamsung gampua a om khangthakte adingin thukizakna a lem mahmah khat hong suak hi.

5) Tedim Post sum muhna leh zatna:
Laisim mipite tung pan amau piak zawh zahzah pia dingin kingen hi mah ta leh laihawm hin zawh nading zahin bangmah kingha lo hi. Makaite in amau ip sung sawkin piakhia masa uh a, maingapte tungah huhna ngen tawmtawmin akihawm ahi hi. Kaal sim hawm zawh loh hun om zelzel bek tham lo tam simsim om thei zel hi. 

6) Maban ading ngimna:
Tedim Post sumbul neih ding lunggulhna lianpi kinei hi. Nget tawm tawh hunsau adingin baih lo ding ahih manin Tg. Cin Lian Khai in USA pan hong ciah ciang a hong piak Ks. 100000 kilimsit phot a, muan le suante kiangah sumbul ngenin amet tawh nipi kaal sim Tedim Khuapi bulphuh news hawm zawh ding kisawm hi.

7) Tedim Post Media min tawh laibu bawl ding:
Minam sungah laigelh kiva napi, laibu bawl nading sumbul neilo ahih kei leh haksatna tuamtuam nei khangthak mi om kawmkawm ta ahih manin tua bang mite tawh kiho a, laibu bawl ding zong ngimna kinei hi. Publising Registration zong akinei khin ahi hi.

5. PlanetShakers Crusade & Gospel Concert
Australia gam pan Apostle Tim Hall makaih Planetshakers Music Band & Gospel Team te pen Rev. Go Za Nang, AMC vaihawm siamna tawh Tedim khuapi hong pai uh ciangin ZYA in innteek dinmun kila a, khuapi sung Pawlpite tawh pang khawmin December 3, 2014 ni nitak CCJ Hall ah Gospel Concert leh Healing Crusade nopci tak kinei hi. Hong tun ni uh mipi 200 val in khuanawl mual Welcome Gate pan mawtaw 12 leh cycle 50 val tawh kidawn zihziah a, Rev. Kai Cin Mang in hanla sa teuteu hi.

Mipi in Mangla tawh Pasian phatna la kisa ziahziah cih pen nu le pate in lamdang sa mahmah uh hi. Khuapi sung a khangnote in kha 1 dektak bang la na sin khol uh ahih manin concert hunah la nuamtak sakpih thei uh ahi hi. Mipi 15000 bang pha dingin kilamen hi.

BAG Pawlpi in Kawlpi pan a hong pai sanggamte mi 16, Rev. Nang Lyan Kap in Mangkang bekbek mi 24, CMBC Pawlpi in Zawlbuk pan a Sound System set siate annek man ding Ks. 50000 cih bangin zindona sum bei khempeuh vai hong dinpih uh hi.  Tedim khuapi ah Gunkhawm tungsiah a music hoih pen zan khat Ks. 1,000,000 man akizat cilna hi a, meitang bekbek zong muhnop tham cing hi. Leitungbup a Pasian’ mizatte, music siamte leh kham le zang a om Zomi Pasian’ mizatte kithuahna khat zong suak ahih manin Tedim khuapi ah tangthu thak khat Topan hong gelhsak ahi hi.

6. Zomi Nam Ni – 2015
Tedim khuapi ah Zomi Nam Ni pen kumsinin kumpi nasemte makaihna tawh kibawl den zaw hi. Hih kum pen Hakha khuapi ah ulian atamzaw pai mang uh ahih manin ci-in ZYA makaihna tawh avengvengin nitak biak kikhopna leh thungetna tawh Zomi Nam Ni kibawl hi.

- veng teng Sakollam Tuiphum Biakinn ah. Thugenpi Rev. Dr. Pau Suan Kam.
- Lawibual veng teng Lawibual Tuiphum Biakinn ah. Thugenpi Rev. Nang Lyan                        Kap.
- Leilum teng Leilum EBC Biakinn ah. Thugenpi Rev. Thawng Mang.
- Khualai veng teng BAG ah akicisa pen innteek Pawlpi lam pan lemlohna hong om vat.

Zomi Nam Ni phawk nadingin khuapi sung zum inn, mipi omna cih bangte ah ninbung golte 50 val kikoih kawikawi hi. Mimal 38 tung pan hih ninbung lei nading sum kingen hi.

7. Mangkam Sinna – Zosuan Tuailai Khawmpi Malep
Singapore Zomi Innkuan leh Zomi Language and Literature Society vaihawm siamna leh hanciamna tawh Lamka khuapi pan College sang sia/siamahte mi 21 hong kuansuk uh a, Conerstone Academy, FBBC, BEHS No. 1 leh Teeklui khua cihte ah pawl kikhenin Mangkam sinna kinei hi. Nipi kaal nih sung khit ciangin Khawmpi ah Mahialna kibawl ding, ci-in lawp takin a ki om laitak thuneite tung leh news te kiangah Tedim khuasung mite mah hong heek om ahih manin Khawmpi ngak zo loin Lamka lam hong ciahsan kik phot uh hi. Tedim khuapi tangthu khat mah suak zel phot hi.

8. Zosuan Tuailai Khawmpi 2 Veina
April 23 – 26, 2015 sung teng ZYA in innteek leh tanu semin A 2 Veina Zosuan Tuailai Khawmpi kibawl hi. Hunthak sungah khangthak Zomite in abucing khantohna lamah manawt kim tek theih nading ngimna tawh akibawl hi a, gamsung gampua pan mipil tungtuangte in thusung uh hi. Sun hunin FBBC Hall ah, nitaak simin CMBC Biakinn ah Rev. Dr. JM Ngul Khan Pau in hanthotna nei hi. Khua 62 pan sun hun hong kihel minkhum 350 pha a, nitak sim kikhawm mi 1500 kimta pha den hi. Kawlpi pan lasiam Cingpi leh Zambawi, Tedim Icon Top 10 te in nitak simin la hong sa uh hi. Sun hun thukisung thulute leh thugenpite anuai abang hi.

1) Zomi, Zogam leh Zolei by Pa Hang Khan Lian
2) Makaih Pilna by Dr. Lian Muan Kim
3) A Citak Khangno Khangto by Rev. Dr. JM Ngul Khan Pau
4) Gambup ZYA Kipawlna by Sia Kham Do Dal
5) Pumpi Cidamna by Siamah Vung Deih Cing
6) Cihtakna Tawh Sum Zonna by Pa Thang Za Sing
7) Zomi, Zanni, Tuni leh Zingciang by Dr. Hau Za Cin
8) A Citak Siamsin Lawhcing by Dr. Chinkhanlun Guite
9) Jesuh Nei Khangno Khangto by Rev. Go Za Nang

9. Dongtuahpi Hunsung Nasepna – 2015
2015 July 20 pan ni 10 val sung guah nakpi-in hong zuk ciangin Zogam leh Myanmar gambup ah tuikhangin lampite kisia gawp a, mincimin mi tampi in dong kituak hi. (Mipi nasemte (Vuanthante) leh mipi tawh pang khawmin na tampi kisem hi. A diakin Tedim gam dongtuahnate sung pan:

1) Kahgen khua ah an nek ding bei, amau lah koimah hong pusuak thei lo, cih thu akizak ciangin nektawm ding pua-in kumpi leh mipi kopin hotkhiat nasep kisem pah a, khuazangin honkhia-in, Sakollam veng Tuiphum biakinn huangsungah kitun hi. TBC Makaite in TBC Zum inn nuai ah Dongtuakte Huhna Phualpi ci-in zum khat hong honsak pah uh ahih manin nasepna tampi nuamtuam pah hi.

2) Vongmual khua zong tua bangmah ahih manin khuazaang bupin kihonkhia a, Tedim khuapi Sakollam RC Biakinn huangah kitun hi.

3) Thenzang zong khuazang bup hotkhiat kul cih akizak ciangin amau khua mite lampi thei ngalhatte kicialin kihonkhia a, Sakollam tualpi kitun hi.

4) A silh aten ding uh khuapi sungah taangko in inn mite in hong puak ziahziah uh hi. A nektawm ding uh zong khuasung inn mite in hong puak ziahziah uh hi.

5) Akluai mincimpi hangin Tedim khuapi leh Tonzang khuapi uk gamah antang leh nektawm ding khempeuh bei mang hi. Mawtaw leh cycle zat ding sathau nam khempeuh zong beita hi. Hih thu hangin kumpite vaihawm siamna tawh tax om loin deih zahzah antang lak theih ding lampi hong honsak uh hi. ZYA in antang lei ding a om loh laitak antang lei ding omsak a, nek ding aleizolote kiangah man ngen loin kipia hi.

6) Taingen leh Tedim kikal lampi puah ding vaipuak neite kimu zo lo ahih manin ZYA leh khuasung mipite pangkhawmin JCB tawh nithum ni li sung mincim thai-in vai kikuan hi. Ulian pawlkhat in hong pakta mel lo a, ahi zongin Nay Pyi Taw pan a hong pai uliante bil ah atun ciangin vaipuak neite kimukhia zo ta a, lampi hong kibawlsak liamliam hi.

10. Zomite pen akikhual akidon taktakte ihihna hong kilang hi. Dongtuak Zomite huhna pen gamsung gampua Zomite kiang mah pan ahunlap leh atampen huhna hong pai hi. Kawlgam sumin dongtuak huhna Ks. Lakh 1000 val bang kum bei ciangin a kizeek kha ahih lam kilang hi. Mabanah media tungtawnin gambup level leh leitungbup level ah a hunlap thukizakna kitasam lai hang. Uliante kiang aphu tantan ngam ulian kisam mahmah lai hang.

11. Sisan Tawh Hotkhiatna Nasep
Meltheih neite adingin haksatna a om loh hangin khualamte leh meltheih neilote adingin sisan zonna ah haksatna lianpi om zelzel hi. Hih haksatna kantan nadingin ZYA in sisan kisamte leh sisan piate kikal ah 2015 pan kipan nasep kinei a, mi tampi in noptuampih mahmah uh hi.

12. David Lah Leh Alawmte Crusade:
Yangon khuapi a om TBCY hunbit Pastor Siamah Zen Dot Mang leh Tedim Christian Fellowship te kihona tungtawnin ZYA mah in sawl tangzang nasep kisem a, Tedim khuapi adingin khanlawhna lianpi khat mah hong suak hi. Tua bek tham loin Kum 100 Hall pi a kizo siang zo lo pen maban zop nadingin Pasian in David Lah zangin Ks. Lakh 200 bang hong piakhia a, tua tawh tu-in Cope topa hong tun kum 100 hall atung akikhuh zo suak hi.

13. Thukhupna:
Kham le zangah ZYA khua za val bang hong phak ciangin tukhang hun adingin Pasian in ZYA pen deihna nei taktak hi ding hi, ci-in ka ngaihsun hi. Sep pah zuahzuah atam kei phial zongin khuasung hausa upa makaite leh Pawlpite’ mitheek enkawmin na lianpi a sem thei ZYA ahih takpi lam mit tawh muh theih hong suak hi. Zomite khua khempeuh ah ZYA om hen la, ZYA omna khempeuh ah Pasian’ limlemeel  hong kilang semsem ta hen.

The Tedim Post Facebook Page https://www.facebook.com/thetedimpost/ 


**********************************************************************

Rev. Thang Van Lian

ZYA - Tedim Makaite tung ah Zomi eLibrary/Laibusaal in ZYA Tedim taangthu i ngetna tungtawn in Rev. Thang Van Lian in gelh in, ahong khak ahi hi.


from:Thang Van Liantvltawmbing@gmail.com
to:"cinpuzomi@gmail.com" <cinpuzomi@gmail.com>
date:Thu, Feb 2, 2017 at 11:04 PM
subject:THULUI KHAKNA
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZYA TEDIM KIPHUAT KHIATNA LEH A NASEP. Agelh ~ Rev. Thang Van Lian Description: Rating: 5 Reviewed By: Cinpu Zomi
Scroll to Top