728x90 AdSpace

Hot
Menu
Zon-ol na Donate

Latest News

A mi kap ken la, a thu kap in! Agelh ~ Dr. Sian Nun Siam

A mi kap ken la, a thu kap in!
Agelh ~ Dr. Sian Nun Siam
March 14, 2017
Nidanglai Kumpite hun lai in, gam khat le gam khat gal a piang thei zel hi. Tua hun ciang in galmai samai ah thupiangte Kumpi Innpi ah apuak ding in Kamtai (Messenger) te kisawl hi.

Khat vei, gal kidona ah, a mau lam pan gal lelh cipi in lel uh a, a Kumpi gam sung a om khua neu te khat khit khat a galte khut sung ah a khahsuah ta uh hi. Tua thu pen Gallak a om Galkapmang te in Kumpi Innpi dong ah thupuak in, a kisam bangbang vaihawm theih nading in Kamtai te sawl uh hi.

Kamtaite zong asun azan ci lo in, mual le kuam te kantan in Kumpi Innpi dong ah thupuak zawh nading hong hanciam uh hi. Lamkal ah gal ten na pang zel in, pawl khat sih lawh uh hi. Pawl khat pen gamlak ganhing gilo te tawh kituak in sih lawh uh hi. Pawl khat liamna natna tawh zui suak zo lo in lamkal ah awk uh hi. A tawpna ah,  Ni tampi, tai tampi a tai khit ciangin Kamtai sawltak khat bek Kumpi Innpi hong tung zo hi.

Mihing ngeina pen ei vaipuak lakna mun ah, thusia peuh mah kiza nuam lo in, thu hoih vive bek kiza nuam hi.


Kumpipa kiang ah a Thupuak pa in, a hi bangbang in hong pu lak hi. Kumpipa in tua thu a zak ciang in a gal lelhna heh lua mahmah in, tua thusia a puak Kamtai pa pen hong that kha hi.

Tua pan akipan in Kamtai te kap kha ken la (Don’t shoot the Messenger - DSTM), a thu kap zaw in. (Solve the message) cih thuciin kammal hong piang khia hi.

Tua mah bangin  Media nasep zong gamsung gampua ah thupiang te a om bangbang in Mipitangpi te, Mipi Palaite, Gam-uk Thunei te in, a hi bangbang in a theihna ding uh thupuak, thutangkona neih ding pen a mau nasep hi.

Myanmar belpawlgam ah, Galkap Mangpi te uk hun sung in Media khempeuh pen a mau deih thu te bek suak sak uh a, a mau deih loh te pen Censor bawl in khak cip uh hi. A gelh kha om leh zong lauthawng sak uh a, pawl khat te man in thong ah khum pahpah uh hi. Mipi in thupiang taktak a theih lohna ding in, Kumpi pan in a hawm khiat, Tadensa, TV te bek kihawm sak hi. Tua te ah gam sung thu taktak kihel ngei lo in, a mau nasepna, a mau hoihna vive bek suaksak uh a, mipi te khim cip uh hi. Gamvai thuneihna a sukha lo - Tuukpeeng (Football) kimawlna na ngawn ah Myanmar Team te in Gualzawhna hong ngah uh ciangin Tadensa te ah thupitak in suaksak uh a, hong gualleh uh ciang in mun kiu neu khat ah suaksak uh hi. Galkap Kumpi sung ah zong Makai tungsiah te kiang ah, thu man taktak kigen sak ngam lo in, a mau zaknop thu te bek kigen sak uh hi. Kumpi sung, Gam sung Na khempeuh  ah zong a sia peuh mah om lo in, a hoih vive in Galkap Mangpi te in za nuam uh hi. Tua hang in, hunkhat lai in Asia ah a hau pen lak ah kihel Myanmar gam pen leitung ah a zawng pen gam khat dong ah kikiam suk hi. A Kumpi hau in mipi te kizawng mahmah hi. 

Galkap sung, Kumpi sung bek hi lo in, mipi tangpi sung, tualsung kipawlna te ah zong hih lungsim pen hong kizeel sak zo uh hi. Tuni Democracy paizia tawh a kikal suan a, “Kikkhel Hun ta” cih thutawh hong kah NLD Kumpi hun sung ahi zong in, hih lungsim puak pen kikhel zo nai lo hi pen a munmun ah kimu thei lai hi.

         Leitung ah Pasian nasem minthang mahmah khat hi a, Laibu minthang “The Purpose Driven Life” (Zolai tawh kilet khin _ “Ngimna Tawsawn Nuntakna”) a gelh Rev. Rick Warren in “Do not attack the Person, attack the Problem” na ci hi.

         Media lam bek hi lo in, Gam le nam, khua le tui khantohna ding, Pawlpi sung, innkuan sung cidamna ding, kipawlkhawm thei in vai lianpi, nasep lianpipi te i sep zawh nading in zong hih thu pen kisam mahmah hi.

Don’t Shoot the Messenger – Solve the Message!

Do not attack the Person –attack the Problem!

*********************************************************************


from:Siam Bawi
to:Cinpu Zomi <cinpuzomi@gmail.com>
cc:Siam bawi 
date:Mon, Mar 13, 2017 at 3:16 PM

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A mi kap ken la, a thu kap in! Agelh ~ Dr. Sian Nun Siam Description: Rating: 5 Reviewed By: Cinpu Zomi
Scroll to Top