728x90 AdSpace

Hot
Menu
Zon-ol na Donate

Latest News

A NUNGTA MISI. Agelh ~ Dong Za Mung

A NUNGTA MISI.
Agelh ~ Dong Za Mung



Matthai 26: 13 Note kiangah a man tak-a kong genin-ah,
Keima hangin a piang lungdamna thu a kigenna leitung khempeuhah
hih numei kiphawkin a gamtatnate kigengen ding hi,’ a ci hi.

Thupatna
Leitung mihingte a si dingin kipianga, a nungta dingin kisi hi. I sih khit ciangin Hell khuk sungah maw; Vantungah maw, koi penpen hiam khat ah I nungta ding uh hi. Khutdawh ngenpa zong si dinga, sumhau pa zong si ding hi. Leitung a luah ding mihing tate sungah khat beek omlo hi. Mihingte nuntakna pen tom mahmah a, ni lim tawh kibang, meilum kaai pak tawh kibang, paakpalh tawh kibang hi, ci-in gentehna tuamtuamin kigen hi. Ahi zongin tua bangin a tom mahmah mitphiat kal tawh a kibang mihingte i nuntak sungin a a kisutsut ding tangthu I gelh ding kisam hi. Leitungah ei mah bangin tomkal a khualzinna uh zo in a huu san’ tawpna uh a saan’ khit uh hangin tuni ciang dong mah a nungta mi pawlkhat om hi. Tua bang mihingte pen ‘A Nungta Misi’ ci in mi’n i pia hi. Tua bang mite tangthu pen kisutsut khin a, kisutsut in, kisutsut lai ding ahi hi.

Tua bang mite pen mi tuam dang deuh aituam pian ngiat, tum dang diak cihte hituan lo uh a, eite mah tawh kibang nuntak khuasakna a neite mah ahi hi. Ahi zongin amaute in:

1.    Hehpihna le lainatna lungtang tawh nungta in kalsuan uh hi.
Mother Teresa:
Mother Teresa nuntakna en dih ni.  Amah pen August 26, 1910 in Albania gam khua neu khat ah suak hi a, a neu akipanin Pasian zahtakin Pasian gam le lei ading a kipia nuam mah mah khat ahi hi. Roman Catholic biakna zui uh a, nungak siangtho(nun) a sem hi. 1929 kumin ama nasepna tawh kizui in India gam hong tung hi. Tua bangin India gamah nasem in tawlpi khat a omna panin mizawngte, neek ding neilote, phaak natna veite, mite in mihing dinmun ah zong a koihloh tualniam mite, natna satna tawh kidim mite, meigong tagehte a muh ciangin hehpihna le lainatna lungtang paai ahih manin ama nasepna tawpsan in tua bang mite huh dingin 1948 kumin Missionaries of Charity cih min tawh nasep hong kipan khia hi. Tua bang a nasepna hangin mite in NU ci-in minpha pia uh a, Indiate bangin NU ci ngiat mawk uh hi. Mother Teresa makaihna tawh mite tungah hehpihna le lainatna hanga nuntakna kipumpiakin nasepna in leitung mun tuamtuam zelin lawhcing mahmah hi.

Amah ahih leh September 5, 1997 in a huu san’ tawpna saangin a tawntung mun ah tawlnga ta hi. Amah a sih zawh tu in kum tampi paita se mah leh tuni dongin a taangthu kigengen a, kigengen lai ding hi. Amah a sih khit zenzen hangin nungta lai hi. A nungta misi khat ahi hi.

2.    Angsung khuallo kipiakkhiatna tawh nungta in kalsuan uh hi.
Adoniram Judson: 
Kawlgam ah Pasian thu kiptakin hong phutkhia Kawlgam Tapidawte PA ahi hi. August 9, 1788 in America gam Malden khua ah suak a, a neutung akipanin a pil mahmah khat ahi hi. A sangkah ciangin zong pil tungtuang in pahtawina tuamtuam zong a ngah khat ahi hi. 1807 kumin B.A zo a, Plymouth Indepent Academy cih private sang phuanin, “Elements of English Grammer,” le “The Young Lady’s Arithmetic,” cih laibu bu nih zong gelhkhia in a hawmkhia hi.

Ama angsung khualin om hithiat nuam hileh nuam takin a nu le pa, a zi le ta, a u le nau, a khua le tui, a pawlpi tawh a om thei khat ahi hi. Ahi zongin angsung khuallo kipiakkhiatna hangin a nungta Pasian a theilo Kawlgam ah gentheihna tampi thuakin hong pai a, Pasian khuavak hong taang sak hi. Ama hangin Kawlgam in a nungta Pasian kithei in tuciang dongin  tua khuavak kizom pai suak hi.

Amah ahih leh April 12, 1850 kumin a na a sepsak Pasian kiangah a tawlnga khinzo hi. Amah a om nawnloh hangin ama thu kigengen dinga, kisutsut ding hi. Kawlgam Tapidaw tangthu kisut simin kisut dinga, American Baptist Foreign Missionary tangthu a kigen simin kigengen ding hi. Kigengen khinzo a, kigengen in, kigengen lai ding hi. Asih hangin a nungta lai ahi hi.

3.    Mite ading luangkham a kipiakhia tawh nungta in kalsuan uh hi.
Gam makai tuamtuamte:
Leitung gam tampite’n gamdang a thahatzawte ukna sung pan suahtakna a ngahna uh ahang a tamzaw in makai khat ii luangkhamna hang na hithei zaw hi. Kawlgam bang en pak leng Boyoke Aungsan in a luang hong piakkhiatna hangin Kawlgam in suahtakna a ngah ihi hi. Tua mah bangin gam tampite zong a makaite i pumpiakna hangin suahtakna ngah om hi. Gam mite adingin a luangkham in a kipiakkhiatna hangun a gamun suahtakna ngah a, tua suahtakna tangthu a kisut ciangin amaute tangthu kisutsut hi. Kawlgam suahtakna tangthu I sut ciangin Boyoke Aungsan tangthu kisutsut a, kisutsut in, kisutsut lai ding hi.

A inn ah a zi le ta, a nu le pa, a lawm a gual tawh nuamtak om hithiat thei himah tase leh midangte ading deihsakna hangin luangkham lianga akipiakkhiatna in a nungta misi khat a suaksak hi.

Thukhupna
I thulu tawh kimemat in gelh ding, gen ding a nungta misi tampi tak a om hi. Tuate khempeuh  i gelh khin pah zo kei ding hi. Ahi zongin i ki theihsaknop bulpi ahih leh mihingte tom kal nungta pakin i si a, pawlkhatte lei ah a kiphum ni mah in a tangthu maimang zia a, pawlkhatte ahihleh kum tul kum za a kivei zongin amau thu kigengen, kisutsut in mite lungsim, mite nuntak khuasakna ah nungta tawntung hi.

I Topa Zeisu mahmah zong nuam taka a om theihna a PA inn nuam panin lei mimawhte hehpihna le lainatna a neihna, ama angsung khual loin mite ading hong kipiakkhiatna, ama luangkhamin hong tatkhiatna hangin eite in vangam nuam i luah theihna lampi hong suak hi. Amah a sih khit hangin a tangthu kisutsut a, kisutsut lai in, kisutsut lai ding a, a tawntungin kisutsut ding hi.

Tua ahih manin i sih khit hangin a nungta misi khat i suah theih nadingin i damlai i nuntakna a manpha penpen in zang ciat ni..

Topa’n thupha hong pia ciat tahen!

Dong Za Mung (Mauvom)

Source :
Agape Tongdam Febraury 2017, Volume 15
Page 14-17

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A NUNGTA MISI. Agelh ~ Dong Za Mung Description: Rating: 5 Reviewed By: Cinpu Zomi
Scroll to Top