728x90 AdSpace

Hot
Menu
Zon-ol na Donate

Latest News

Gam leh Minam a khangto sak Makai hoih. Agelh ~ Khup Lian Thang

Gam leh Minam a khangto sak Makai hoih.
Agelh ~ Khup Lian Thang


Daw Aung San Suu Kyi in “Tu zawh kum 20 teh Singapore ih makhelh ding hi, tua dingin ih hanciam ding hi” ci-in  30th Nov, 2016 kum in Singapore aa Kawlgam mite tawh kimuhna ah gen hi. Gamvai lam thukan ten bel tua dan ahih zawh nang baih paklo ding hi ci ciat uh hi. Tua leh hih zahin a khangto khin, DASSK in etteh dingin a gen Singapore gam thu lunglut huai leh etteh ding tampi om kha ding hi. Tampi tak etteh taak om ding himah leh abulpi  athupi mun pawl khat ngaihsun khawm dih ni.

Singapore gam ih cih
South East Asia sunga om gam neu mahmah khat hi in 714 Square Km bek pha a(Tedim Township 2409 Square Km)tuipi in kimkot hi. Malaysia, Indonesia tetawh  kigam veng hi. 1819kum in British minam Stamford Raffles in sumbawlna phualpi dingin hih tuikulh tungah na kipan in tua pan in Britishte’ ukna nuai ah tungsuak uh hi. 1942-1945kum sungteng Japante’ khutnuai ah om hi. Galpi nihna khit teh Mangkangte lutkik in 16th September, 1963kum ciangin British kumpi tungpan suahtaakna a ngah khitteh phet in Malaysia gam tawh kigawm hi (Zomite zong belpawl gam ah aki gawm dan).Singapore in State khat dinmun tawh kigawm in Malaysia te  neih State 14 lak ah khat in kihel hi. Amau bek hileh hamsa ding, galvai, sumbawlna vai, mipite mailam ding mah ngaihsutna tawh na kigawm uh ahi hi.

Ahih hangin Malaysia gamvai makaite in Singapore gam makaite na it zolo uh, tua hun sung mahin  Singapore gam sung aa Chinese leh Malay minam te minamvai buaina te hangin Malaysia gam makai te in, Singapore gam hawlkhia or deihnawnlo uh hi. Tua ahih manin ut le ut loh hilo in Malaysia gam panin inn atuan akl a ki hawlkhia suak hi. Tua ni pen 9th August, 1965kum hi in tuni dongin Singapore te National Day in ciamteh uh hi. Tua hun laitak in suahtakna angah gamte in lungdam mahmah leh a kipak mahmah uh cih pen  a ngeina ahih hangin, Singapore gam in suahtaakna angah ni in agam makaite aa dingin a dah penpen ni hi zaw bilbel hi. Malaysia gam pan in pai khia ding cih a theih ni-in a gam makaipi Mr.Lee Kuan Yew (1923-2015) bangin nasa lua mahmah ahih manin na kap ngeungeu hi. Lam-et bei, ki taisan, bangmah theilo mipi 2millions  makaih ding, a mipite mailam ding cihte a ngaihsut teh a lunggim leh a lungtang na lua mahmah ahih manin an ne zolo ihmu theilo in cinat lawh liang hi.


Lungkia lo in amau leh amau ding kik
Mr. Lee Kuan Yew leh apawl tengin khitui naptui bektawh ahun uh beisak lo, hehna thangpaihna, khasiatna tawh ahun uh bei saklo in, nasep maban dingte nawhsa takin sep kipan pah uh hi. Leitung gam thupi te, UNO cih dan kipawlna lianpi te in, Singapore gam pen gam khat in a ciapteh nangin hanciam masa pah uh hi. Tua hileh a gam uh maimang, ki nopneh gawp cih bang om nawnlo ding hi pah hi. Tua khitteh a gamveng te (Malaysia, Indonesia) in zong a nopneh theihloh nangin galkapte galvan te, British te’ tung mah pan huhna ngenin amau kamciamna angah zawhna dingin hanciam uh hi. Tua khitteh a thupi pen ahi mipite’ nasep silbawl ding, nek leh dawn dingte, lampi tuamtuam zongin nakpi takin hanciam mahmah uh hi. Gamdang Company lianpi te, sum nei mihau tampi takin Singapore gamah nasep akipat theih nangin nakpi takin zawl bawl uh a, Singapore kumpi lampan in zong, huh theih panpih theih aom bangbang tawh panpih ngiat uh hi. Gamdang mite in Singapore gam a lunglut nang, a muan mahmah nangin nakpi takin hanciam uh ahih manin, a sawtlo in gamdang Company lianpi te’ muanna ngahin manlang takin Singapore gam ong khangto hithit ziau hi. Kumpi sungah, U lian makai sungah golhguk nekna, a kilawmlo in gamtatna cih bang aom leh zong, maitang etna om vetlo in a kilawm a kituak bangin thu khen uh hi. Mr. Lee Kuan Yew in “Gamsung a daihna leh a khantoh na dingin thukhun khauhtakin zuihloh phamawh hi” ci ngait hi. 
                                                         
Pilna nei, nasem dingin Singapore gammi te a mi kicing lo ahih manin gamdang mun tuamtuam pan in mipil misiam tampi tak sam in, Singapore gam sungah lungnuam takin a om theihna dingin vaihawm sak uh hi. Pil leh siam a sakte uh gamsungah suakta takin teen theihan (PR-Permanent Resident) pia in, a gammi hihna (Citizen) nangawh zong pia lel uh hi. Zomi tampi tak zong Singapore PR leh Citizen om hi.

Gam mite’ kilem na, Singapore kumpi’ Policy
Gam sung buai theihna ding ahang tam mahmah ahih lam pen gam makaite in tellua ahih manin amasa in minam vai, biakna vai ah Policy thupi khat na kiplet masa uh hi. Tua policy pen “Minam, biakna, ngeina ki deidan lo in, gam leh mipite’ nuntak khuasakna a khantohna ding bek maingat in na sem khawm ding” cih ahi hi. Tua mah bulphuh in minam khempeuh ii a hihna te  zahtaak sak uh hi. Singapore gam sungah Sen(Chinese)minam 74%, Malay 13.4%, Indian 9.2% , Eursian leh a dang minam 3.3% cih bangin a teng khawm ahi hi. Biakna lam ah Buddist 33.2%, Christian 18.8%, Islam 14%, Hindi 5%, Tao leh Folk Religion 14% leh adang 18%  teng pen biakna upna kician a neilo, cih bangin tengkhawm ngeingai uh hi. Hih teng a kilem loh in, hih gam khangto lo ding hi cih pen Singapore gam makaiten na tel mahmah uh hi. A gam in pautang (Common Language) dingin Manglai mangpau zangin nasepna, sumbawlna leh kumpi zumte ah Manglai ki zang hi. Amau gam mite pianpih pau leh ngeina abei lohna dingin Chinese, Malay leh Tamil laizong official lai in ciamteh  veve uh hi. Gtn; Bus leh Meiling tung te ah lamlahna (sign, advertisement) te ah Manglai, Sen lai, Malay lai, Tamil (Indian) lai tawh namli in at diudeu lel hi. Mun la tuam, sum bei tuam mahmah kha ding hi. Ahih hangin, tua bang aa ahih tanghtanghna hang mahin minam vai kibuaina, ki telkhialhna tawm mahmah hi. Mipite in Kumpi makaite leh a makaihziate a muanna khauhsak semsem ahih manin sum bei tak mahmah na hi mawk hi.

Sang naupang te in Manglai ban ah Chinese, Malaly leh Tamil lai ci-in hih minam official lai te sung pan khat teitei sinloh phamawh hi.  Minam khempeuh in amau lai amau ngeina te amangthang lohna ding, kepcing theihna ding deihna ahi hi. Tua bek thamlo in a tunga minam Percentage zui in inn zong hawm uh hi. Gtn; Housing Block khat ah inn 100 bang aom ahi leh,  atunga minam Percentage zui in, Chinese ten in inn khan 74 lei thei, Malay ten inn khan 13 lei thei cih danin hawm in agam mi khempeuh ii a kizopna a kihual nang, minam khat leh khat kikal ki itna ki telsiamna a khang nangin gel in, kician takin vaihawm uh hi. Tua hang mahin in zong, suahtakna angah khit zawh 1969kum in khatvei bek minam vai in buaina om aa, tua nangawn zong Malaysia gam aa thupiang aki zom kha hi bek hi. Tunai 2013kum Little India vengah buaina om aa, ahih hangin minam bulphuh buaina hi lo hi.  

Tu laitak Singapore gam’ dinmun
British ukna nuai ah Singapore gam in amau leh amau ukna aneih hun, Mr. Lee Kuan Yew in 1959kum in Prime Minister asep kum (British te ukna nuai ah amau leh amau ki uk, 1963 kum dong) in gam mite kumkhat mimal sumlut $400 hi in, tua zawh kum 30 pawl 1990kum ciangin $12,200, 1999 kum ciangin $22,000 hi in, 2009kum ciangin $38,000 hi in, 2016kum ciangin $85,000 hi in leitung ah mimal in a ahaupen thumna in ki ciamteh hi.

Leitung gam khempeuh lak ah teenna dingin a nuampen gam khat in kihel hi. Cidam lam ah leitung ah ahoih pen 6th na bang hi in, gammi te’ a khansauna (Life Expectancy) pen 80-85kum hi in Kawlgam mite ahih leh kum 65 ahih manin, Kawlgam mite sangin kum 20 a khansau zaw mawk hi. Zomite ciapteh na bang hileh khang khat a khansau zaw suak mawk hi. A sanglai sin dan zong hoih mahmah in, Singapore sang naupang te pen a tuntun na ah mite sangin pilzaw siamzaw hamtang uh hi. National University of Singapore leh Nanyang Technological University pen leitung ah University hoih pente lakah zong kihel zo hi.

Kumsim in khualzin nangin  gam nuam pen, gam a siangtho pen, lung muanhuai pen cih bang te ah Top 5 sungah om den hi. Leitung ah sumbawlna lam ah, gam minthang tuamtuam tampi takte  a nungtolh hangin Singapore ahih leh haksatna tampi aom kawmkal ah nungkik lo in tangtakin ding zo veve hi. Mipi te sum nei in, nek leh dawn tawh lungkham ngaitlo uh hi. Mipi nuntakna pen tua bangin lungnop takin aom theih nangin a gam makaite’ hanciamna leh deihsakna hang ahi hi.

Mipite nuntak nuam ahih manin gamvai minam vai ah buaina, kumpi tung lungkim lohna cih bang pen kitam zakkhak hetlo hi. A omlo phial hi ci leng kikhial lo ding hi. Tua bangin agam sung buaina lungnop mawhna cih bang omlo ahih manin gamdang Company lianpipi te, mihau te in sum bawlna phualpi in dingin muang semsem uh hi. Tua ahih manin leitung mundang tampi tak ah sum bawlna lam ah, mipi sumlut a kiam hangin Singapore gam ahih tua bangdante in tam nawk kha lualo hi. A bank neih te ahi, DBS Bank, OCBC Bank, UOB Bank cihte pen leitunga Bank muanhuai pen te ah kihel hi. Tua bang hangteng mah in leitung ah sumbawl na dingin a nop pen, ahoih pen leh a lempen leh amuan huai pen gam in kiciam teh hi. Kawlgam bang pen sum bawl na dingin lem vetlo hi in, letung a a 170 valna bangah aom laitak hi. Khangtoh nangin aki sam ahi ki muanna, gam makai leh kumpi te muanhuai na, gam khuahun a muanhuaina lam ah Kawlgam pen niam mahmah lai mawk hi.(Tu aa dinmun leh kumpi kikhelna ciang tawh gamdang sum nei company liante ong lut pak nailo ding cihna hi)

1965kum lai in Malaysiate in kipawlpih dingin a deihloh, gammi pih dingin a it zawh loh uh Singapore ahi hi. Tu in ahih leh mi khempeuh, leitung gam khempeuh in a zahtaak, hunkhat lai in a nusia Malayisa te nangawn in sum thalawh dingin nisim in pai ziahziah in kileh ziahziah uh hi. Kawlgam mite, Zomite  nangawn ii nuntak khuasak zia zong, a khelzo gam khat ong suakta hi. 

Lee Kuan Yew’ kammal
A gam makaipi pa Mr. Lee Kuan Yew (1923-2015) in ama at laibu ahi From Third World to First;The Singapore Story (1965-2000) sungah “Bang hangin Singapore hih zahin khangto thei hiam? Kammal khat tawh dawngkik ding hi leng Mite’ muanna hang ahi hi” ci ziau hi. Mite’ muanna cih ciangin, akumpi amakaite pen gamdang panin sum a bawl dingte aa dingin muanhuai ngiat uh hi. Golhguk ne lo uh in, a sep ding tavuan te zo takin sem uh hi. Sumbawl dinga paite’ huhin panpih uh hi. Deihsakna leh thuman thutak tawh a gam aa dingin na sem ngiat uh hi.” cihna ahi hi.

Tua mah bangin a gam mite in, a makai kumpite muangngiat uh hi. A sepna a bawlna khempeuh ah nawngkai sak nimnum cih bang om lo hi. A thupi pen in ahih leh, hih bangin gam mite, gamdang mi sumbawl te, mi khempeuh ii muan dingin a makaite in thuman thutak tawh, deihsakna tawh, hanciam takin na a sepna hang ahi hi.

Zomi ten a etteh loh phamawh
Zomite in tu laitak a dinmun uh en in, a thanem na ding bang mah omlo hi. Singapore gam zong , bangmah lo panin dingto in leitung ah a khangto pen gam khat suak hi. Gam ki ukzia, gam paizia ah Kawlgam leh Singapore gam ki banglo kha mah ding hi. Ahih hangin gamvai makaite dinmun, minam makaite dinmun, kipawlna hita leh biakna makaite, makai ahihna dinmun ki bang veve hi. Singapore in Malaysia tawh kipawl ding a ut penpen uh ahi hi. A ut pen ngah khalo bek thamlo ki hawlkhia hi lai hi. Kha kunkun phunphun tautau lo in, a om bangbang tawh ama na nawt veve uh hi. Zomite zong Kawlgam, India gamah leh mun tuamtuam ah a om laitak in, gam ki ukzia gam kalsuan zia pen amau deih dan adeih penpen paizia hi hetlo ding hi. Ahih hangin tua tungah dinkhawl lo in, a septheih bangbang tawh Zogam leh Zomite nuntak khuasak zia a khantoh nangin mainawt to in, a kalsuan veve ding pen athupi penpen ahi hi.  Singapore makaite’ tungpan et-teh theih ding thu tampi aom ding kawmkal ah anuai aa bangin tawm gualsuk dih ni;

1) Singapore gam makaipi Lee Kuan Yew’ gen mah bangin “ na mipihte na makaihna ah a muanhuai, amuan taak, deih sakna man, thuman thutak alenkip makai khat na hi hiam? cih mimal kim khatvei khat vei  kisit kik huai mahmah hi.

2) Minam tuamtuam, pau leh ham, biakna ngeina cih dan ki deidanna tawh bangmah tangtung zolo ding cih telcian in khat leh khat kipawl theih ding abulphuh Singapore makaite’ kalsuanzia te et-teh huai mahmah hi. Singapore gam ii  gam leh minam kilam zia(mianm tampi, pau nam tampi, ngeina tuamtuam) pen Kawlgam pianza, Zogam kilam zia tawh ki bang mahmah hi. Singapore makaite in minam vai, gamvai, sepna bawlna ah, mi a tamte deihna zui ding, a tawmzaw te nenniam cip ding cih bulphuh lo in, gam aa ding a hoihpen ding siksan in kalsuan uh hi. Gtn; Singapore gam sungah Chinese mite a tam zawk hangin a Chinese te’ pau Mandarin(Sen’pau) bek ultung sak selo in kuama aa  ahilo Mangpau zang ziau lel uh hi. Kawl kumpi in, tuni dongciang a khialh bulpi pen tua mun lian ahi hi. Zomite in tua mun ah a khialh loh ding thupi mahmah ding hi.

3) Tu hun Zomite in, Belpawl gam a phut ahi a makai masa te, Insein gal a nawk Belpawlgam a honkhia Zomi galkap makaipi te’ dinmun pen, a telkhial a sangkhial tampi om lai hi. Singapore makaite in zong kipawl khawmna tawh a khantoh ding lampen, na tel mahmah uh ahih manin Malaysia tawh na kipawl masa uh hi. Mr. Lee Kuan Yew zong khial hi kici theilo hi. A tuntun na ah a dingtang makaipa ahih manin Malaysia ten a hawlkhiat hangin lungkia lo in, Singapore gam zong hih ciang dinmun a tungzo veve ahi hi. Malaysia tawh ki gawm hi zenzen leh zong, a Malaysia gam zong Japan gam dinmun bang tunpih zo veve lo ding kici thei tuanlo hi. Singapore gam makaite pen a tuntun na ah manawt a, mipi te’ aa ding deihsakna ngiat bulphuh in na a sem makai hoih te ahi hi. Kawlgam zong 1962kum dong nuamsa hi, ki zomsuak leh Korea, Japante zah bangin hau in khangto mahmah veve ding hi. Zomi makaite’ khialhna hilo zaw in tua hun laitak Kawlgam gamvai vaipuak neite paikhialhna hang hi zaw gige hi.

Singapore gam ii khantohna pen a makaite Muanhuaina, thuman cihtakna hang ahi hi. Tu laitak Zomite’ makaite leh mailam maikai dingte khempeuh in, Zomite’ khantohna dingin a muan huai, a belhtaak , a mite  ahuaizo, a mipihte’ nuntak khuasakna lamlak in a mapang zo ding makai hoih ahih kim ciat ding lunggulhna lianpi tawh hih thului hiah khawl bawl phot ni.

Source :
From:
Khup Lian Thang<thangliank@gmail.com>
to:
"zominam@yahoogroups.com" <zominam@yahoogroups.com>,
"tongsan@googlegroups.com" <tongsan@googlegroups.com>,
zomidaily@googlegroups.com,
Cinpu Zomi <cinpuzomi@gmail.com>

date:
Sat, Mar 18, 2017 at 3:12 PM
subject:
Gam leh Minam a khangto sak Makai hoih
mailed-by:
gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Gam leh Minam a khangto sak Makai hoih. Agelh ~ Khup Lian Thang Description: Rating: 5 Reviewed By: Cinpu Zomi
Scroll to Top