728x90 AdSpace

Hot
Menu
Zon-ol na Donate

Latest News

I LAI LE I PAU I THUPITSAK LEH. Agelh ~ Pa Thang Nen Pau @ Sia Pautawng

I LAI LE I PAU I THUPITSAK LEH.
Agelh ~ Pa Thang Nen Pau, BMin, M.Litt.
YANGON AWGING, FGA.


I lai le i paute i thupisak leh tua in i minam hong tawisang ding ahihna kei muhzia tawm hong gelh nuam ing. Kei tum takin i lai le i pau thupisak le’ng ka utna le kei nuntakzia Zangkong Awging sungah gelh dingin ka kithawi zel a, ki-awi lo ka hih manin ka khawl zel pen tu’n tawm hong gelh ning.

1968 kumin Kumpinu’ nasep ka kipan hi. Sanglam (Education Dept.) ah kum 26 (Tonzangah 1968-’76, Tedimah 1976-’94) sung ka sem hi. Ton-zang ka om sungin kumpi nasemte’ khasum tawh kisai theihhuai pawlkhat le thu tuamtuam pawlkhat kaikhawmin laibuno khat ka bawl ngei hi. Tedimah ka sep sungin khangnote theih dinga kilawm theihhuai nono(General knowledge) Zolai Kawllai Mikang laibu tuamtuam panin kaikhawmin (Zangkong Awging danin) laimai 20 ta bang bu 11 ciang ka bawl ngei hi.

Biakna Sungah Nasepna:
1994 kum kipat lamin FGA panin lai khat ka ngah a, tua zawh a sawt loin Sia Mungtawng (Rev Dam Suan Mung) in Kawlpi pan hong samin lailam sepkhop ding ka kikum uh a, khuan kha nih (1994, Feb+Mar) la-in Yangon FGA ah nasep ka kisin khit ciangin nasep khawlin 1-9-’94 ni a kipanin FGA hunbitin ka lut hi.

FGA ah ka sep zawh kum nih pawl ciangin Sia Mungtawng in “Ka khualzinna peuhah mi’n Zangkong Awging tungtawnin tha na ngah thei mahmah uh” hong cih ciangin kei zong “Sia aw, Kei pen tan 10 ong lo, Lai Siangtho sang zong kah lo, computer zong sin lo, Lungdamnathu tangkona ah lai nasepna tawh ma pang nuamin a ki-ap bek ka hi a, kei hih theih bangmah om lo hi, tua ahih manin hih pen Topa’ nasep hi,” ci-in ka dawng hi.

Zangkong Awging pen nih bek in ka sem uh a, innah gamah ka buai den uh hi. Tua kawmkalah i mipihten Lai Siangtho sunga thute a olno takin a et theih ding deihna tawh Lai Siangtho sunga “Topical Index” pen ei lai tawh letkhiain “Tongdot Bu” khatna ka bawl hi. Tongdot Bu nihna ding ka bawl laitak hi a, a sawt loin hong suak ding hi.

Tongdot Bu khatna sungah ‘I Zolai tawh laibu hoih nono tampi bawl zo le’ng, ... tua in i minam hong tawisang ding hi’ ci-in ka gelh hi. Zomibup zattang ding lai le pau ding i unau tengin i kituhtuh sangin ei lai tawh laibu hoih nono tampi na nei le’ng i sanggamte’n i lai i pau hong kan ding a, damdamin ei lai hong pidingto ding hi.

Zolai Gelhzia
            Zolai tawh kibawl laibu hong tam sim pian ta a, ahi zongin laimal gawm le khen pen kibang lo ahih manin mipite buai mahmah hi. Zolai tawh nasep pen ka uuk khat ahih mah mi tawh kiho kimlai a pau pawlkhat pen gawm ding pawl maw, khen ding pawl? cih khawng ka ngaihsun ta dihdih thei hi.


            pau ciangin i awsuah kibang napi’n a khiatna kibang vet lo ahih manin gawm loh phamawh le khen loh phamawh pawlkhat om hi. Tuate pawlkhat kaikhawmin (Awging Nov/’05 laimai 18) kei zatzia kong gelh hi. Gawm loh phamawh ka sak teng a nuai kong git hi. A hau a cithei tata in bangmah nei keng, ci thei uh hi.

A hau a cithei tata in bangmah nei keng, ci thei uh hi.
Ka khanlawh uh leh ka khuazangun khan lawh ung ei.
Khazih sungah pumkhat ihi hi. Lengmaw pum khat na ne dih aw.
Tedim a Mangpi’ pa Falam mangpipa kiangah hawh hi.
Na laphuah kisa thei gawp e, ahi zong na kisathei pah ke’n aw.
Hia nu bel hoih pen hoih mah, ahi zong leitung bupah a hoihpen ahi zo diam?
Siama, na pasal in sia mah sem lai maw?
Phulum phul na’ng leikha in petlet, ka puan lei a sia pi lei kha ing ei.
Tapidaw pawlkhat in pawl khat le pawl khat sutuahtuah hi.
1948 kumin Kawlgam suakta hi.
I tote tu’n i lawmte suak ta hi. Sahang ka kihta hi. Lulun in nau a paai ciangin nin hong kih ta hi.

Zopau
Kawlpau, Mikangpau banah Senpau, Japanpau… tampi thei le’ng pilna hi a, Zomi hi napi’n Zopau thei lo a i pau theih kei leh tua pen haina nam khat hi. Zogamah om lo a, Kawlpau kizatna mun a omten inn sungah ei pau i zat ding thupi hi. Kawlpi ah minamkim om ahih mah bangin khangno pawlkhat in pau namkim pau thei a, thupi mahmah hi. Zogam khanglam a i sanggamte’ pau i thei kei zongin i kianga i sang-gam Falam, Hakha le Mizote’ paute theihhuai hi. Ei zong ei pau bek ci tentan loin amau paute kanin sin ni, amau paute theih sawm ni.

Kawlte lakah siam lo pipi a Kawlpau tawh i kiho pen nuam sa lo ka hih manin ahi thei zahzahin ka pelh hi. Sanggam Falam Hakhate tawh ka kimuh ciangin Zomi ihih ciangin ei pau tawh kiho ni, Ko pau na theih kei leh no pau tawh kiho ni, ci-in Kawlpau ka zang nuam kei hi. Falampau Hakhapau pen annek theihna khop bek mah a thei bek ka hi hi. Biakna nasemte bang i zinna khuate’ pau tawh thuhilh thei pah le’ng, muibun zawkan ding hi hang.

Mi lakah ei pau tawh i pau pen i thusim genna khat hi gige hi. Khatvei Tedim lam pan sound box lei nuam pawlkhat tawh sumbukah ka vak kawikawi uh hi. Sumbuk khat ka tun uh ciangin ei pau tawh ka kiho uh pen sumbukpa’n ko theih dingin Kawlpau tawh kiho un, bangci sa, deih lo maw, ci-in lunghimawh mahmah hi. Minamdangte ei pau tawh hong pau ciangin ka nuamtuam hi. Monywa ah mivomte sumbuk khat in ei pau tawh, koi ah pai ding, an ne zo maw? hong ci a, ka nuamtuam mahmah hi. Sumbuk van la ding hi leng ama vante a kilei ding hi pah hi.

Tua ahih manin Zolai tawh laibu hoih nono tampi bawl ni. A diakdiakin pilna siamna nei khangnote’n laibu tampi hong bawl un. Sum tampi bei-in minamdangte’ pau sin hi hang, ei pau sin nading sum bei lo hi, i innah ei pau mah zang tek ni. Nidang peka Yangon ah a teeng Sente le mivomte amau pau tek tawh kihoin Kawlpau zang se lo uh hi. Koikoi ah i om zongin ei le ei, ei pau mah tawh kiho ni. I lai le i pau i thupitsak leh tua in i minam hong tawisang ding hi.

Source :
Phaiza Khua Magazine - Laibu


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: I LAI LE I PAU I THUPITSAK LEH. Agelh ~ Pa Thang Nen Pau @ Sia Pautawng Description: Rating: 5 Reviewed By: Cinpu Zomi
Scroll to Top