728x90 AdSpace

Hot
Menu
Zon-ol na Donate

Latest News

I NGEINA HOIHTE KEEMCING NI. Agelh ~ GSPau

I NGEINA HOIHTE KEEMCING NI.
Agelh ~ GSPau

Photo credit : Piang Suan Pau
           
A sunga om Thute :
1.    Bangkua neihna
2.    Thusa neihna       
3.    Tanu tapa koihna
4.    Mintap neihna
5.    Zin kitun'na
Thukhupna

         Zomite in ngeina hoih leh ngeina kician kinei a, i ngeina in i minam a man'than' loh nadingin na keem gige hi. Zongeina ah bangkua sung panmun gualhna bang hoih mahmah hi. Dah ni, nop ni ciangin kuama' sawlsawl kul tuan nawn lo-in, eima' panmun ciat kila pah diamdiam hi. Tua ahih manin dawi biakna tawh a kizom i ngeina hoihlote nusia-in, i ngeina hoihte lim takin i kep ding kisam hi.

1Bangkua neihna
Zo ngeina ah bangkua cih kinei hi. Thalloh a ci zong om hi. Bangkuate in nopna, dahna ah vangik hong puakpih uh hi. Mokhakna ah moman a kigen ciangin innteek in manpi sang uh a, bangkuate in mankang a cih pen sang uh hi. Hih pen a zenzenin innteekte in damloh man leh neih le lam kicin'loh manin mo khak zawhlohna khat a neih uh leh bangkuate in a bei teng sikh-in mo kha ngiat uh hi.
           
Bangkua dingin beh lam pan sanggam pasalte bek mah kiman thei hi. Bangzah takin i ki-it phial ta zongin nu ki-unau pih khawngte bangkua dingin kiman thei sam lo hi.
           
Bangkuate in dahna nopna ah amau' panmun tawh kizui-in zulaak leh vaidin'na tuamtuam nei uh hi. Amau' panmun tawh kizui-in satanh zong sang uh hi. Nopna mun ah bangkuate in sa-liang sang uh hi.

            Biakna a kihahkat sak pawlkhat in a bangkua dingin amau tawh si le sa lam ah kinaina a om kilkel lo Pastor khatpeuh, a pawlpi upate khatpeuh man mawkmawk thei uh hi. Hih pen i omna pawlpi hong kibang nawn kei leh hong buaihuai mahmah hi. Pawlkhat leuleu in bangkua dingin hau a sak uh khatpeuh, a maitang zahtak uh khatpeuh man mawkmawk thei uh hi. Hih mite in hong vaan zo kha mah ding uh hi. Ahi zongin si le sa kizopna om lo ahih manin hong thuklut thei tuanlo ding uh hi.

            Tua ahih manin bangkua ding pen a pil kei a, a zawng phial zongin, a kilawmte mah, ahi dingte mah mat ding hoih hi.


2. Thusa neihna
Zo ngeina sungah thusa kinei hi. Thusa pen sanggam thusa leh veeng thusa ci-in nih kinei hamtang hi. Nih sangin a tamzaw a nei zong ki-om hi. Sanggam thusa pen innteek behte sung pan hi a, veeng thusa leuleu pen i veengte sung pan i deih khatpeuh kiman hi. Thusate in innteekte tawh kisai vaite khempeuh innteekte' taangin vaihawm sak uh hi.  Khoh dingte kho uh hi. Zulaakte lai tawh khumin ciamteh uh hi. Mun khatkhat ah niangtui pen tanute in hawm uh a, mun khatkhat ah thusate in hawm thei uh hi.

Mi pawlkhat in thusa cih bang zanglo lel uh a, tei a sak pian uh mi khat leh nih peuh thusa danin zang ziau thei uh hi. Hih mite pen vaihawm khawng zong kiva kha thei mah ding a, ei' bangkua vai teng zong hong vaan zo kha mah ding uh hi. Ahi zongin u leh nau, veeng leh paam tawh kizopna hong kitat thei kha ding hi.

        Tua ahih manin Zo ngeina om bangin thusa mah kician takin neih ding thupi hi. Thusate pen a tei zong om ding a, a teilo leh a kizang theilo zong om thei kha ding hi. Bangbang ahi zongin hih pen tanaute leh veeng leh paam tawh kizopna ahih manin thupi ngaihsut ding hoih hi.
           
3. Tanu tapa koihna
Ulian pawlkhat  leh Pastor pawlkhat pen a pute' inn sung leh a sunghte' inn sungah tanu seemin gamtang nuamlo thei mawk uh hi. Tanu sep pen pil leh liat tawh kisai lo a, i panmun tawh kisai zaw hi.  "Kam Hau ukpipa Pu Hau Cin Khup nangawn a sunghte inn ah tanu seem hi," kici buang hi.

        Tanute sung panin tanupi om a, tuate pen "Haitawipi" kici hi. Haitawipite in nasep khempeuh tavuan la-in makaih uh hi. Tanute in dahna nopna ah amau' panmun tawh kizui-in zulaak nei ciat uh a, amau' panmun tawh kizui-in satanh zong sang ciat uh hi. Haitawipite pen dahna mun ah a gim a tawlpen ahihna uh tawh kizui-in a satanh uh lianpen pah hi.

            Mi pawlkhat in a tanute uh kizen sa zo lo-in, hawmthawh gawp uh ahih manin inn-ah hih khatpeuh a neih uh ciangin tanute zang lo uh a, anhuan siam, meh huan siamte sum tawh cial ziau uh hi. Kumpi lam ulian pawlkhat in amau' khut nuai mite, biakna makai pawlkhat in pawlpi khangnote khawng tanu-in zang ziau thei uh hi. Hih dan tawh vai lem pak thei kha mah ding a, anlim mehlim zong kine thei kha mah ding hi. Ahi zongin hih dan pen sawt kikhom lo ding hi.
           
Zomite in tanu tapa i neihna a hang taktak pen na seem ding cih ciang bek hi lo a, tanau sung kizopna a kitat loh nading deihna bulpi hizaw hi. Tanau sung kizop paisuak ding deihna hang tawh khang nih khang thum bang tanu-in a kiman zong ki-om hi. Tua hi a, bangkua sungah hih khatpeuh i neih ciang leh vai khatpeuh i hawm ciangin tanu tapate mah zat ding hoih hi. Tua mah sawt kikhom pen hi. Tua hi kei leh amau tawh damdamin i kikaak semsem ding hi.

            I tanute pen a kiguai, nitha a kipia hilo uh a, u leh nau itna tawh na hong seem uh ahih manin hawmthawh kha kei ni. Phunsan kha kei ni. Amau' thadah nading kamte pau kha kei ni. Amau' lungdam nading leh thalawp nading kamte bek mah pau ni.

4. Mintap neihna
Leitung ah mintap nei pen Tedim-Zomite khawng bek mah kihi kha thei ding hi. Mikaangte in innkuan min (Family name) cih khat nei uh a, ahi zongin mintap cih bang neilo uh hi. I Zomipih dangte in zong mintap nei khollo zaw uh a, mual min peuh, khua min peuh tap uh hi. Amau' sa mat peuh a tapsak zong om thei hi.

Zomite in mintap i piak ciangin ut peuh kimawk piak thei samlo a, paizia khat mah kizui hi. A ngah ding-a kilawmte bek mah kipia hi. A masa-in pasal' nu leh pa in ngah masa uh hi. Tua zom ah zi' nu leh pate in ngah leuleu uh hi. Tua zomah hong pian' lai leh bangkuate, haitawite, pute cih bangin a banbanin kipia hi. Tua ahih manin min zui-in khang kisim thei hi. Min in mintapte' pian'zia leh nuntakzia zong hong lak hi. Ka theih ngeiloh khangno khat in a min, a beh leh a khua hong gen peuh leh kua' mintap, cih ka gen ziau thei a, tua pen a tamzaw na maan takpi hi. Hih pen ngeina hoih khat hi a, kepcing huai mahmah hi.

            Mintap pen deih mawkmawk ding hilo hi. Hong kipia tah, ci-in san' pahpah ding zong hilo hi. Mintap hong kipiak khak zenzen leh hih pen kei' ngah dingin a kilawmna mun mah hiam, cih lungngai masa phot ni. Ngah dingin a kilawmna mun ahih leh sang ni. Ngah ding a kilawmna mun ahih kei leh sang kei ni.

            Pawlkhat in min a piak uh ciangin a nei, a lam piante mai-etna peuhin pia kawikawi mawk uh a, a ngah dingin a kilawm taktak ahi a pi a pute in ngah khalo thei mawk uh hi. Hihte pawl pen min zui-in khang kisim thei nawnlo hi. Hih dan pen hoihlo hi. Paizia ngeina mah zuih ding hoih hi.

5. Zin kitun'na
Zomite in khual i zin ciangin utna peuh ah zin kitung mawk lo a, sihna, man'na khatpeuh i neih khak leh i luang hong phaam ding i sanggam pasalte kiang mahah zin kitung se hi. Amau zong hong zin uh teh ei' kiang mahah zin hong tung uh hi. Hih in tanau sung ki-itna leh kizopna kipsak tuam hi. I sanggam taktak a om kei leh meeltheih tanaute kiang, khuapihte kiang, sangkahpihte kiang, lawm leh gual kiang cih bangin zin kitung pan hi. Hih pen ngeina hoih khat hi a, kepcing ding hoih hi.

            A beisa hun khat lai-in Yangon khuapi sungah Zomi a teeng kitawm lai hi. Tua ahih manin zin hau thei mahmah uh a, amau innkuan guak in an ne ngeilo uh hi. Zinte vanleeng tual ah, meileeng station ah, Cargate ah va dawn uh hi. Zinte ni tampipi sung taam uh a, a taam sung teng an vak uh hi. Zato kahpih uh a, sumbei teng sikh lai uh hi. Nasep maban kipelh liangin zum kahpih lai uh hi. Meeltheih sangnaupang ompih nei lai uh a, tuate' sangsum ding zong piaksak lai uh hi. Zin leh leeng hauhna hangin tate in limtakin lai a sim theilo zong om hi. Lungdamna a phawk pawlkhat a om mah bangin a phawk nawnlo zong pawlkhat mah ki-om veve mawk hi.

Tuhun ciangin zintunbuk (Hotel) vive ah zin kitung ziau hi. Hih pen sum kipia ahih manin kisuan' cih bang om lo a, innteekte aa-na cih bang zong om lo hi. Tedim ah zong kuamah kibuaisak nuamlo ciat ahih manin zintunbuk (Hotel) vive ah zin kitung zaw ta hi. Zindo siam leh zintun' siam kitam lo a, zintun'na innteekte in zong hong cimtaak thei uh ahih manin hih in lemna ciang khat nei bilbel hi. Ahi zongin hih in tanaute tawh ki-itna peengsak hi. Tua ahih manin a nuam a, a nuam kei zongin tanaute kiang mah ah zin tung tangtang ding hoih hi.

Thukhupna
Hih a tung-a i gensa om bangin ngeina in minam a man'than' loh nadingin keem ahih manin i ngeina lim takin keem ni. Tua hi peuh leh Zomite mangthang ngeilo ding a, leitung bei dongin ki-om paisuak ding hi.

Sia GSPau

*****************************************************

Sia GSPau in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

3 comments:

  1. Zomi te' ngeina hoih te nong gelh khiat man un lungdam mahmah hi. Ko khangno te a diakdiak in tulaitak khangno ten, ka theih uh tawm mahmah tamawk a, I ngeina hoih te pen lai ah I gelh sitset kei leh ni dang ciang ki buai mahmah ding hi. Topan thupha hong pia hen. Amen

    ReplyDelete
  2. Hih laibu kasim ciang, ei zomi te pen a thupi mahmah minam te ih hih na hong phawk sak.

    ReplyDelete
  3. This comment has been removed by the author.

    ReplyDelete

Item Reviewed: I NGEINA HOIHTE KEEMCING NI. Agelh ~ GSPau Description: Rating: 5 Reviewed By: Cinpu Zomi
Scroll to Top