728x90 AdSpace

Hot
Menu
Zon-ol na Donate

Latest News

INN-AH CIAH NI. Agelh ~ Khoi Lam Thang

INN-AH CIAH NI
Agelh ~ Khoi Lam Thang

Joshua 24: 14-15
Tua ahih ciangin tu-in Topa zahtak un la, lungsim tak leh thumanna tawh ama na sem un. Na pu na pate un Gun gal leh Egypt gamsungah a biak uh pasian-te koihkhia un la, Topa' na sem un. Topa' na na sepnop kei uh leh, Gun galkhata a na na sepsak uh na pu na pate uh pasian ahi a, note' ten'na gam Amor mite' pasian ahizongin, a na na sepsak ding peuhpeuh uh tuni-in teel un. Ahih hangin kei leh ka innkuanpihte in ahih leh Topa' na ka sem ding uh hi, a ci hi.

Luke 8:38-39
Dawi a paikhiatna mipa in Jesuh kiangah, Kei zong hong zuisak in, ci-in a thum hi; ahi zongin Jesuh in,Na inn-ah ciah in la, Pasian in nang-a' dingin bangzah takin na hong sepsak hiam, cihna thu va gen in,ci-in a sawlkhia hi. A mipa ong ciah a, ama-a' dingin Jesuh' sepsakna thu khempeuh, khuasung engah a gengen hi.

Tedim mite thu thak a thei nuam phadiakte ci leng! 2005 Kumthak kiimteng ka thuzak khat gen dihdih ni. Kawlzang Zomite te'nna khua khat-ah lokho innkuan khat in anla khin in lo an piang teng lo (wvif;) ah a om laitak, a tapa tangvalpa in a zu leiba loh nangin a pa' kiangah buhhum ngen hi. A pa in kum khat tawntung a hanciam, a khawhsa buhhum teng innzong tun nailo a, sehsuah zong khennailo a, zu leiba loh nang a piakkhiat ding haksa sa hi. A lungsim nasa hi. Phallo hi. A tapa in a ngetnget zawh tawlkhat khit ciang cikze kilkel lo in a pa hei tawh to a, tuksuk pah hi. To thuahsuk in si hi cih thu kiza hi. Tapa in a pa that! That takpi!!! Manglam hi lo, tangthu hi lo. Mite zong hilo. Tulai Zomite' i innkuan dinmun lungngaih huai mahmah hi. A thak in lungngai in a bulpan pan ciat leeng cih lunggulhna tawh "Inn-ah ciah ni" ci'n hong zawn ing.A nuaia bangin thulu [(1) Innkuan thupisak ni, (2) Innkuan pan a bul phut ni, (3) Innkuan bulphuh in nasem ni] bulh-in kikum dihni.

(1)  Innkuan thupisak ni.
Innkuan i cih pen mihingte kipawlna lakah a bul pen a ciip pen a thupi pen leh a khauhpen ahi hi. Abul hong patsak Pasian hia, tua Pasian in ama minthanna dingin zang nuam hi. Manphasa hi. Thupisa hi. Dawmangpa in zong innkuan thupisa mahmah hi. Banghanghiam cih leh Pasian langpan nading phualpi innkuan hi cih phawk hi. Tua innkuan ah Jesuh Khrih lutang a, a kikoih khak ding patau mahmah hi. Innkuan sungah kikausiphum nuam den hi. Kisailasak nuam mahmah hi. Hih thu a telsiamlo innkuante khuasakna ah theihloh kal in dawimangpa hong lut ziauziau a, bangkua nuntakna kisongsawlawi lianlian hi. Innkuan i thupitsaklohna gu lel in Zomite sukpuk topuk i om hi.

Innkuan kithutuak liailiai te sangin a nuamzaw koi ah om hiam. Innkuan nuam leh leitung a nuam hipah lel hi. Neih bangbang huan a i nekkhop liailiai sangin an limzaw an om lo hi. Bangkua a nuamsak ding mihingte bawl inn hoih mahmah-te hi tuanlo hi. Innkuan ki-it leeng bukno khatzong lungnopna, luiging bekzong la ngaihpi suak hi. Pasian in van pan nuihmai in hong ensuk a, tua lai mun ah tawntung nuntakna thupha hong pia hi.

Khatvei ka pawlpi (Leipi) mite khat in "Siapa ka inn uh toi nasa na, ko zai sa peuhmah hi ve ung" hong ci dihdih hi. A taktak in, a inn uh bukno khat ahi hi. I hawhnop ciang lo lai kawmkil tawn in kilut hi. Innsung ah tutna leh sabuai banga a zatkhop uh singkuang lian khat om a, a mau innkuan 3 tawh lengla khan kidim hi. "Bangci in maw Pa Kam"  ka cih leh "Innkuan ki-it lingling peuh leeng inn zai mahmah lel mate" hong ci hi. Hi takpi sa ing. Taih inn lianpipi sungah om a, ihmu sip thei lo mi tampi om hi. Inn nuamsa lo a, vakvak om hi. Kihtak nei a, leitung nuntak a bubu te a dingin leitung toi mahmah hi. Innkuan sung pen  lungmuang taka i tenna a zai mahmah i leitung suaksak ni.

George Moore in "Mite in lungnopna zongin a inn uh nusia mah ta leh lungnopna taktak pen inn a tunkik uh ciang mu pan uh hi" ci hi. Innpan pusuak khia-in lungnopna na zon hang na mi kei ding hi. Mu ing na cihte zong ngawng tungsiah leh tawlkhat sung bek a kimang nopna hi ding hi. aysmf&TifrSKppftdrfwGif;Nzpf cih kammal thuk ngaihsut in nopna taktak innkuan bulphuh in zong ciat ni.

Zomite in nidang tawh kibang nawnlo hi hang. Khangto semsem khuapi zuan semsem ihih manin innkuan i bulphuh semsem ding kisam hi. Innkuan nuntakna i manphatsak semsem kei leh i biakna leh i ngeina tawh kigamla semsem ding hi hang. Inn pan sauvei pipi i vakkhiat ciangin pumpi bek vakkhia lo-in lungsim zong vakkhia pahpah thei hi. Gamdang pai innkuan tampite ah bangkua buaina om hi. A zinte a buai a om mah bangin, innngakte zong buai thei sem hi. "Gallu kikta gallutuakte" in "Hau nuam kisa a siphot zawzen" kha hi lo i hiam? Tu hun Lai Siangtho gelh hun hi leh "Gamdang pai a sum khempeuh na thalawh khin zongin na innkuan a kitap leh bang phattuamna om a hi hiam?" kici ding hi.

1992 Pawl US Embassy pan first secretary pa Bill North in Ko innkuan leh suahtakna mah thupi ngaihsut pen ung "We value family and freedom" hong ci ngei hi. Ka bilkha ah mang thei lo hi. Zomite in innkuan mah a thupisak ngetngeut dih ni.

(2)  Innkuan pan a bul phut ni.
Nupi papi khawng i suah khit ciang sun lak peuh in eikia om in lasa leeng, a neu lai a late mah hong phul masa pen hi. I Lai Siangtho kamngahte gen ni ci leng i nu hong hilh maw, Sunday School pen i theih maw hi pah lel hi. Sang masa penpen leh a hoih pen innkuan hi a, siama hoih penpen i nu hi. I nu’ angsung pan khantawn i khom ding upna hong pokhia ahi hi. Ka nu hng hilh ka la theih masak penpen "Mual tung khuadam lak ah migi tuucing a tuumang a zong hi ciah pih ding in" cih hi a, ka bilkha ah a mang ngeilo hi. Pasian nasem ka suah nading hong tawsawn la khat ahi hi.

Nupi khat in “Ka tate pen Pasian in ka kham lukhu dinga hong piak ahih manin, midangte in tua kham lukhu a ngah khak ding pammaih lua hi” ci hi. Camping leh crusade khawng pan tate kikhel hilo-in, innkuan pan piangthak hi leh deihhuai pen hi. Innkuan pansan khanlawhna kisam hi hang. D.L. Moody in "Ka nu hong kep bangin mi nu te'n a tate uh kem leh leitungah thong om lo ding hi" ci ngam zen hi. Tate adingin a piangthak nu le pa kisam hi. Piangthak-lo nu leh pa te pen ngawngah an gawina suang khih in tuipi thuk sung ah khiat ding a kicite tawh kinai mahmah ding hi. Tua bang nu leh pa te a dingin na tate hilhhilh hangin hilh banglo ding hi. Na hilhhilh teng na hilh loh, na hilhloh teng na hilhhilh suak ding hi. Na hih sim teng hong etteh ding a, na gengen teng gen banglo ding hi.

Tu in Zomite in kum 100 pawi bawl khin ta hi hang. I Khristian suahna khang thum khang li cing pan hi. Mikangte' lak ah: "A pu in Hebia kam in Lai Siangtho sim, a pa in French kam in thungen a, a tapa in thungen ngei nawnlo hi" cih paunak khat nei uh hi. Kiamsuk lam ah khangto mahmah ci ni. Eite zong, pute piangthak mahmah, pate'n pawlpi makai sem, tate biakinn pai ngeilo ahih khak ding lauhuai mahmah hi. Lei mong dongin lungdamna thu gen ding a hong sawlpa in khang khat pan khang khat dong a gen dingin hong sawl hi cih phawk ni.

January 24 pan February 4 sung Indonesia gam Bali tuikulh ah ka va zin pak hi. Bali mite a tamzaw Hindu biakna bia uh a, inn kim ah biakna tau nei uh hi. A milim pasian uh a sangpen ah koih in, a thupipen in a ngaihsutna uh ahih manin biakna taute  inn khum dawn sangin tawmkhat sangsak zaw hamtang uh hi.. A nungta Pasian a bia Zomite in i Pasian biakna tau koi ah koih i hiam? Mun khempeuh ah Pasian om ci in ut bangbang tat theih nading letmat ngah kisa kha kei ni. I Pasian thupi sim leng ei adingin hong thupi semsem ding hi. Pasian a lianbelsakte' innkuan sungah Pasian in thupha siit neilo hi.

Innkuan sung pan upna khaici a po khiat theih na dingin Innkuan kikhop neih den ding a bulpi khat ahi hi. Biakinn kikhop leh veeng kikhop (home cell) khawngte paulap in nei in, innkuan kikhop i nelhsiah khak ding lauhuai hi. Paunak in (22:6) Naupang khat a neu lai in lampi man tawnsak le cin a teek dongin lampial nawnlo ding hi ci hi. Tua naupang pattah nading mun pen Innkuan  ahi hi. Naupangte khuak pilna ding sum tampipi bei in tuition i kahsak mah bangin kha nuntakna ading tuition i lak ding kisam hi. A neulai kha ading na piak pen sumkhol (investment) na hi hi. Na bei ngam kei leh a golciang piakloh phamawh damiah bangin hong laksak ding hi.

Innkuan kikhop thupi mahmah hi. Dawi mangpa in zong a thupit lam thei ahih manin neih loh theihtheih ding hanciam hi. A hun a mun ciangtan in i sawm taktak kei leh a vak nuam, lai-en nuam, TV en nuam, lengla, phone cihte zangin dawimangpa in hong subuai nuam den hi. Innkuan pawlkhatte bangah innkuan thunget hun ding pen aMumfNim sung bek hi liang zen hi. Tua nangawn thunei pen khat in remode tawh khawlsak ziau in "Na thu uh ngen vou" ci lianmawk hi. Thungetsau leh man nailo in na hong sim thei lai hi. Hun tuam vilvel in la ding, mun tuam khat seh tuam ding, Pasian tawh kihona hun hisak ding hi hang. Haksa taleh kipan veve in. Khatvei zo phot le cin, a ban zawh nop ding hi. Bang mah a thei nailo taneute a dingin a mang nawnlo ding mualsuang gelhgelh na hi hi.

Communist gam khat ah Kenchick-te innkuan in innkuan kikhop nei den uh hi. Kumpi thuneite in kikhop nawn loh dingin thupia hi. Kikhawm teitei uh hi. Nikhat ni ciangin sum 10,000 liau sak giap uh hi. Kim leh paam in "Tu petpet ciang Kenchick-te'n innkuan kikhop khawlta buang in teh" acih  uh leh, a tawp sangsik in, "Khatvei kikhop 10,000 man ahih leh tuni a kipan nikhat nih veita kikhawm ni. Kiman lua" ci uh hi. Ei adingin sum piakkul lo hi. Hamtang ngaihsut dih ni.

Yangon a om innkuan khat thu hong hawmsawn nuam ing. Amau America tung khin uh hi. Tuma kum 15 lai pawl in a inn vuah ka hawh ciang "Thu ngen ni ei Pa Nang" ci leng, a zi a tate sam in a kim khit ciang kongkhak bell leh Telephone khak hi. Muh theihloh a siangtho Pasian tawh kiho ihih manin a pualam kizopnate khak ding hi hang ci hi. Pasian lianbelsak peuh leng adangte kikhaktan zo lel ding hi.

(3)  Innkuan bulphuh in nasem ni.
Innkuan pen pawlpi sang in om masa zaw hi. Zong thupi zaw hi. Pawlpi a bul in innkuan ahi hi. Tua ahih manin Pasian nasepna ding a phualpi taktak innkuan ahi ding kisam hi. Thu-um innkuan tuamtuam i kigawm ciangin Pawlpi a piang ahi hi. Innkuan hoih om lohna ah Pawlpi hoih om theilo hi. Innkim pan mission lungtang i neih leh pawlpi in mission sep ding haksa lo hi. A sia a pha innkuan pan kipan hi. Tua ahih manin innkuan ciat pan a bul phut ding hi hang.

I Lai Siangtho simna Luka 8 sungah: Gerasa gam dawi honpi veipa a dam ciangin Pasian min kiphat hi. Mite in lamdang sa mahmah hi. Jesuh vangliatna kilang hi. Dawi vei ngeipa zong nuam mahmah hi. Inn ciah kik nawn lo-in Jesuh nung a zuisawm leh Jesuh in “Na inn-ah ciah in la Pasian in nang a ding bangzahtak hong bawlsak hiam cih thu vagen in” ci in sawl hi. Innkuan nungngat Pasian nasep cihbang om theilo hi. Innkuan bulphuh in, tua lai pan a kuankhia dingte ihi hi.

Khat vei papi khat biakinn ah thu a hilh leh a zi' lungsim sukha mahmah hi. A pasal' thugen hoihsa lua hih manin biakinn pan khu vingveng in ciah a, a zanpuan leh umlebel teng la in pulpit phung ah va koih leetlaat hi. Bang ci na hiam, hihte sumpi ding na cih hiam a kicih leh, "Hi lo hi, hih lai mun-ah ka pa uh hoih lua hi, ko innkuan hiah teeng le ung nuam lua ding cih ka ngaihsut ciang tu thei nawnlo a, zanpuan leh umlebel teng a va la hing" ci hi. A pua lam gen ol a, a sung lam a gahsuah haksa hi. Sia, Upa, makai hihna peuh maituam (rsufemzkH;) in nei in, mite mai-ah kineih (o&kyfaqmif) siam mahmah na pi innkuan sunga kithuak zolo i hih khak ding dah huai hi. Khangno makai, lasak siam, choir sa den hihna peuh maituam in nei in, innkuan sunga kihilh theilo nungak tangval i hih khak ding dahhuai hi. A pualam a kineih nuntak tawh lungkim lo in, a sunglam a i neih nuntak tawh innkuan pan kipan ni. A pualam pan en leng Innkuan a sung lam ah lalkuan i hih khak ding dipkuathuai hi.

Pasian thugen minthang John Wesley' nu Susannah Wesley in "Satan in innkuan hong donate i zawh leh i suakta bek ding hi. Tua zawhna tawh innkuan sungah na ka sem dinga, tua in Topa'n kei hong sawl nasep ahi hi" ci hi. Innkuan sung pan haksatna leh ze-etna te zo in, Topa' a ding sep sawm ding hi hang. Tua in Topa' zia ahi hi.

Israel mite saltanna Izipt gam pan hong suakta uh hi. Sehnel gam tawn in haksatna tampi a phut khit ciang Kannan gam hong lut petpet uh hi. Moses zalaih Joshua in a mipih khempeuh Shekhem ah kaikhawm in Pasian ompihna tangthu sut hi. Phawksak kik hi. A nunung pen ah "… a na nasepsak ding peuhpeuh uh tuni in tel un. Kei leh ka innkuan pihte in ahih leh Topa na bek ka sem ding uh hi" (Joshua 24:15) ci hi. Hangsan takin a mipihte tawng hi. Khensatna kician tawh nuntak ding hanthawn ni. Bak bangin kaingawisak nuamlo hi. Vot leh vot vet, sa leh sa vet dingin zawn hi.

Hih thu tuni in i minam sungah kisam hi. Topa lam ah a ding ding innkuan kua teng i om hiam. Na dang khempeuh pel in Topa bek a bel ding innkuan bangzah i om hiam! Ki-encian ciat ni. Kithakpat ciat ni. Dawimangpa leh Pasian ki lungdamsak khawm theilo hi. Mi tampite lampial in utbang in a gamtat laitak in, "Kei leh ka innkuante" mah a ci ngeungeu ding Khristian kisam ta hi hang.

Hanciam nopna om nak leh Missionry a khah zo ding Zomi innkuan tampi ki-om ta hi. Topa adingin a huaiham mahmah Khristian innkuan kisam hi hang. Jesuh in Innkuan panin mapat ding hong deih hi. Tulai Khristian tampite in bangkua sungah gen lo in midangte tung ah gen ding manlang mahmah uh hi. Midangte tunga gen sangin innkuan sunga gen haksa zaw hi. Biakinn a teci pan sangin innkuan kikhop a teci pan haksa zaw hi. Innkuan sung pan kisuanna om kilkel lo, ki-apna tawh kimlepam ah khuavak a tangsak dingte ihi hi. Pasian in innkuan bulphuh Pasian nasepna thupi sa hi. Innah ciah kik ni.

Tua ahih manin ute naute aw;
Leitung nuntak haksa Tahan ah tai ning cih bangin ngaihsun leng a taktak in leitung i cihcih pen i innkuan na hi lel hi. Innkuan manphasak in i thupisak mateng lam man tung zolo ding hi hang. A nuam leitung-ah Pasian thupha tawh i nuntak theih na dingin "Inn ah ciah kik ni".

Innkuan panin Khristian upna khaici tuh ding dih ni. Tate naute innkuan sungpan piangthaksak dih ni. Ka nu leh ka pa hangin Pasian’ hong itna ka tel thei hi a ci khangthak te' aw lunggulh hang. I Khristian hihna khang nihna khang thumna hi pan hi hang. A khangkhang in a kizom Pasian minamte hih sawm ni. Innkuan ah ciah kik ni. Innkuan thupisak ni. Upna khaici kituh masakna mun siangtho suaksak ni.

Innkuan bulphuh in Pasian’ na sep sawn ding hi hang. Innkuan thukim liailiai a thungetna tawh Pasian nasemte suak ding hi hang. Joshua in a mipihte a na tawn mah bangin ei'n "Kei leh ka innkuanpihte in Topa na ka sem ding uh hi" ci in ki-ap dih ni.

Inn tawh kigamla Zomite inn-ah ciah kik ding hihang. Maizum nang om lo a, kisuan nang zong om kilkel lo hi. A tawntungin inn kong kihong hi. La sungah "Ka va gammang mualtung khuadam lakah inn pan gamlapi ka piak khin hi…" a cih bangin Zomite innpan gamlapi i pialna pan ciah kik ta ni. Ciah mengmeng ni.

INN-AH CIAH NI.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: INN-AH CIAH NI. Agelh ~ Khoi Lam Thang Description: Rating: 5 Reviewed By: Cinpu Zomi
Scroll to Top