728x90 AdSpace

Hot
Menu
Zon-ol na Donate

Latest News

KHANGNO LE KAMPAU. Agelh ~ Rev. Lian Za Nang Yangon

KHANGNO LE KAMPAU
Agelh ~ Rev. Lian Za Nang
Yangon


Thubulphuh Lai Siangtho

“Kampauna in sihna ahi a, hinna ahi zongin piangsak thei a,
i kampauna bang a piangte san loh phamawh hi.”
(Pau 18:21).

“Na kampauna hangin nang hong kimanin,
na thuciamna hangin na awkkha hiam.”
(Pau 6:2).

Thupatna:
Pasian in vantung leitung le a sunga om na khempeuh kam khat a paukhiatna tawh a piansak ahi hi. Pasian in, “Khuavak om ta hen” ci hi. Tua ciangin khuavak a om pah hi (Pian 1:3). “Pasian in mihingte ama lim le mel sun a, a hong bawl ahi hi” (Pian 1:27). Tua ahih manin i kampaukhiatna sungah vangliatna koih hi.

Kampau vangliatna:
1. Kampau khat in mi khat kapsak thei a,
Kampau khat in mi khat nuisak thei hi.
2. Kampau khat in mi khat hencip thei a,
Kampau khat in mi khat suaktasak thei hi.
3. Kampau khat in mi khat haisak thei a,
Kampau khat in mi khat pilsak thei hi.
4. Kampau khat in mi khat sisak thei a,
Kampau khat in mi khat nungtasak thei hi.
5. Kampau khat tawh leitung galpi piang a,
Kammal khat tawh galpi veng hi.
6. Kampau khat tawh leitung ah a om ngei nailo khat (Khuavak) piang a, Kammal khat tawh leitung ah a kip mahmah khat (Jericho kulhpi) beimang thei hi.

Pau lohna tawh gualzawhna la in:
“Mihaite nangawn pau loin om leh a pil mahin kingaihsun hi. Thungaihsun thei na hihna a kilat nadingin pau loin om in” (Pau 17:28)

Pau loh ding hun:
1. Na lung a tom mahmah hun Paunak 14:17
2. Na heh a suak mahmah hun Paunak 12:6
3. A thu, a la na theihtel loh hun Paunak 18:13 4.
4. Asia le apha na khentel theih loh hun Paunak 18:17 5.
5. Mite’ mawhsakna na thuak hun Paunak 12:15
6. Mawhna lamah zolna na thuak hun Paunak 14:9 7.
7. Mi khatpeuh tungah na lungkim loh hun Paunak 9:13
8. Thu kantel lopi a, na gennop mahmah hun Paunak 6:2
9. Zuau phuak ding hong kihanthot hun Paunak 4:24
10. Pasian mawhsak ding hong kikuppih hun Paunak 19:3
11. Thuman lo mi khat panpih ding zolna na thuak hun Paunak 24:24
12. Nang tawh a kisai loh hun Paunak 5:15
13. Na gen bang teekteek nang tung hong tun hun Paunak 18:21
14. Na kampauna hangin mi khat lainatna a ngah ding hun Paunak 18:6
15. Na kampauna tawh maizumna na thuak ding hun Paunak 18:17
16. Mite’n hong telkhialh hun Paunak 13:3
17. Na kampauna hanga, mi khat thukhenna (mawhsakna) a thuak ding hun Paunak                 18:27
18. Na kampauna tawh mite kitelkhialhsak ding hun Paunak 16:28
19. Amanlo teci pan ding hong kizol hun Paunak 12:27
 20. Nasep hanciam ding hun Paunak 12:27

Thumanna ahih hangin gen loh ding:
21. Thuman ahih hang mi khat ading kimanna a om kei leh gen ke’n Paunak 8:6-9
22. Thuman ahih hang nang ading kimanna a om kei leh gen ke’n Paunak 10:12
23. Thuman ahih hang gen ding hun ahih nai kei leh gen ke’n Paunak 15:23

Kampau a hun a cin ciangin tangtung:
I kampau khiatte mangthang loin CD, VCD, EVDte sungah i khum bangin huih lompi sungah kikhum a, a sia ahi a, a pha ahi zongin nikhat ciangin i paukhiat bangbang tangtung teeiteei hi. Kampau mal pawlkhatte in mun tuamtuam nawkin huih lompi lakah vial pai kawikawi a, i tu i ta’ khang ah a tung pan zong om hi. I paukhiat kammal pawlkhatte a nitun zong om hi.

1.    Elisha
Kamsangpa Elisha in a nasempa Gehazi hih bangin hamsiat hi. “Tua ahih ciangin nangma tung le na suanlekhakte tungah Naaman’ phakna hong belh tawntung ta hen, a ci hi. Tua ahih ciangin ama omna panin vuk bangin kangin a phakin paikhia hi.” (2Kum 5:27) Elisha kampau Gehazi tungah minute khat sungin tangtung hi.

2.    Jacob
“Rachael in, a pa’ innsung pasiante gu hi.” (Pian 31:19) A lawmpa Jacob in a guk lam thei lo ahih manin Laban kiangah, “Na pasiante na muhna mi peuhpeuh nungta lo ding hi,” (Pian 31:32) ci hi. Jacob in hamsiatna kam a paukhiat khit kha khat sungin a zi Rachael nausuakin si hi (Pian 35:17-19).

3.    Joshua
Tua hun laitakin Jacob in amaute tungah thuciamna khat koih a, “Mi khat kipanin hih Jericho khuapi a lamkikpa in Topa mai ah samsiatna thuak ta hen.” (Joshua 6:26) BC 1300 hunin Joshua in Jericho khuapi lamkik nading tawh kisai hih bangin na hamsiat hi. BC 800 hong tun ciangin, Hiel in lamkik a, Joshua’ hamsiat kampauna a tate nih in thuak takpi hi. “Ama hun sungin Bethel mi Hiel in Jericho lam hi. Topa in Nun’ tapa Joshua tungtawnin a gen bangin amah in ta cil Abiram luang khamin a bulpi phut a, a tapa neupen Segub luang khamin a kongpite phut hi. (1Kum 16:34).

4.    David
“No Gilboa mualte aw, daitui ahi a, guah ahi zongin na tung uh ah omsak kei un, tui thukpi kilok zong omsak kei un. Bang hang hiam cih leh a vanglianpa lum nin hi. Saul’ lum sathau kinilh lo hi. (2Sam 1:21) Israel mite kum sim Gilboa mual ah singkung suan den a, tuni ciang dong po zo lo hi. BC 1000 a, David’ kampau, tu-in AD 2010 hi ta a, Kum 3000 bang sawt khin napi tangtung lai hi.

5.    Judah mite
“Pilat in kham zo lo tham loin mi gamlumna a khangto semsem a muh ciangin, tui la-in mi honpite mai ah a khut silin, “Hih mipa tungah ka mawh kei hi. Hih thu note thuthu hi ta hen,” a ci hi. Mi khempeuh in, “Ama si in ko tung le ka tu ka tate tungah om tawntung ta hen,” a ci uh hi. (Mat 27:24-25).

AD 30 huna Judah mite in Jesu thah nading tawh kisai a kiciamna kammal tu-in AD 2010 hita a, a suan a khak Israel mite tungah tangtung lai hi. Israel mite in gal bei cih hun nei ngei lo uh a, si luanna zong tu dong mahin om den lai hi. Judah mite’ hamsiat kiciamna, kum 2000 a pha ding hita a, tuni dong mah tangtung lai hi.

Nisim na kam tawh pulak den in:
“Mi khat in a kampauna bangin gilvahna ngah dinga, a thugenna hangin nuntakna ngah ding hi (Pau 18:20). Keimah in nungta ka hih mah bangin ka zakna ah na gente uh na tungah ka hong hih ding hi (Gam 14:28).

Pulak ding
1. Tuni pen kei ading Topa hong bawlsak ni thupi, ni manpha ni ahi hi.
2. Tuni ka thupha ngah ni, ka nopsak ni ahi hi.
3. Leitung nuntak nuam kasa mahmah hi.
4. Pasian’ piansaksa na khempeuh keima thupha ngah nading a kibawl ahi hi.
5. Kiimlepam thuppiang khempeuh keima hoih zawk nading vivea piang ahi hi.
6. Jesu sungah mi cidampa/nu ka hi hi.
7. Jesu sungah mi hau, mi nuamsa pa/nu ka hi hi.
8. Jesu sungah a gualzopente tungah a gualzopen pa/nu ka hi hi.

Thukhupna:
“Eite pen muhna tawh hi lo, upna tawh a kalsuante ihi hi” (2Kor 5:7 KJV). Ei Khristiante pen i kiim i pam thupiangte tungah kinga loin, Pasian’ kammal tungah kingak ding ahi hi. I zakna le i muhnate in hong khem thei ahih manin, Pasian’ kammal mitsuanin upna tawh nungta ding hi hang. Ei tungah hong tung leh i ut bang lian, nisimin i kampau paukhiat ding ahi hi.

Source :
(ZONU’ Tongluan, Hawm 26, July-Sep, 2010 sung pan hi a, laigelhpa’ phalna tawh a kiteisawn hi.
Khangno Lamhilh – Laibu,
Laibu bawl : KZBA Youth)

Photo Credit : 
essaytigers.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO LE KAMPAU. Agelh ~ Rev. Lian Za Nang Yangon Description: Rating: 5 Reviewed By: Cinpu Zomi
Scroll to Top