728x90 AdSpace

Hot
Menu
Zon-ol na Donate

Latest News

Laibu bukhat bup ka sim masak pen. Agelh ~ Deih Tung

Laibu bukhat bup ka sim masak pen.
Agelh ~ Deih Tung

Photo : Booker T. Washington

Sun ni samah mah nuai ah sangkah ding in ka pai a, Khualum lua mah mah a hih man in ka taltung pan in khua ul tui a tak dau dau hi. Sang inn ka tun tak teh ka lawm te khat tawh sang khaan sung ah ka lut uh hi. Sangkhaan sung ah na vot dik dek a hih man in minute 15 sung khawng teh ka khua ul khem peuh hong kam in ka om dan hong nuam mahmahkik hi. Ka lawm te tawh laisim na khan, Laibu saal(library) ah pai ni ka ci uh a ka va pai pong uh hi. Cik mah hun in laisim na khan sung ah paingei lo ka hih man in koi sim zaw ding cih thei lo in ka om bianbuang hi. Midang te muh na ah bang mah a thei lo lawm lawm a ka mawk om ding lah sang nau pang khat hi buang cih na tawh ka mai a zum hi. Lawm te tawh tut na ah ka tu uh a, Newspaper, Journal tuam tuam ka sim ding un sabuai tung ah om zih ziah hi. Mi a tam zaw in Journal sim uh a, laibu tuam tuam zong a sim om hi. Ken zong bang sim mawk ding ka hiam ci in ka lung ngaih ngaih kawm in ka mai a om khat la in ka sim hi.  Nai lang khawng ka sim khit ciang in ka lawm te tawh pai khia ta ni ki ci in ka tut na pan ka ding khia hi. Counter a tu nasem nu in laibu na kawm nuam uh hiam? Na kawm nop uh leh hih tak ah member card bawl un la kawm un ci a hih manin ka lawm te tawh member card bawl ka bawl uh hi. Card ka bawl khit uh ciang in lai bu kawm ding bang sim ding ka hiam ci in laibu ka zong zong hi. Laibu thu lu leh a nambat tawh ka zon zon leh lai bu tam lua mah mah a hih  man in ka sim zawk sak ding, ka kawm ding ka thei kei hi. Counter a tu nasem nu kiang ah bang kawm leng nong deih sak hiam ci in ka dot leh nang ut ut hi, a hi zong in bang mah a sim nai lo na hih leh miminthang te tangthu sim ma sa in hong ci a, hong hilh hi. Mimin thang te tang thu sim ding cih sam hang in kua minthang a, kua thu sim ding cih zong ka thei kei leu leuhi. Ka zon zon leh Up From Slavery a cih Booker.T.Washington lai bu ka mu a, tua kawm ding in ka la hi.

Ka sangkah cil pen pen ka tanlang lai in  bel  a hih leh abc, 123,…cih dan te zolai sim bute sang ah ka sim ngei zel hi. A hi zong in lai bu khat a bup in ka sim ka thei ngei kei hi. Tua  a hih manin tu tung a ka lai bu kawm pen a pat na pan a tawp dong sim pong pong dingin ka ngaih sun hi. Laibu saal pan in sangkhaan sung ah lut in sanglai ka sin uh a, sang tuah ciang in inn ka tun tak tua lai bu ka kawm pen ka sim hi. Ka sim leh ka lung sim hong sukha pian in hoih sa mah mah ka hih man in ka khawl thei nawn kei hi.
 
Booker. T. Washington a neu lai
Negro te in suah tak na a ngah ma un sila te hun sung in a piang a hihi. A pa kua hiam ki thei lo a, a nu tawh a mau unau thumpha uh hi. Sila te om na inn neu neu te ah khang khia uh a, silh leh teen, nek leh dawn mi te bang in om zo lo uh hi.A suah cil pan in sila in suak khia a, sila mah in  nung ta hi.Sila te sung ah thu bang ki za mun pen hiam cih leh tua To te in tua sila te bawlsia gawp a hih na thu bek bek ki za hi.A nu in anhuan meh huan tavuan a nei a hih man in an bel ngawl ngei sam lo in midang te sang in an nek tui dawn lam sang ah pha dawm zaw uh hi.Sila in kum 7 a phak tak teh negro te in suah tak na hong ngah uh a, a suak ta minam honghi khia uh hi.  Suakta cih thu pen a mau a ding in a ngaih sut zawh loh uh thu khat a hih man in  suahtak khit teh koi ah om ding, bang sem ding, koi ci nun tak ding cih pen ngaih sut na in nei ngam ngei lo uh a hih man in  a ngaih sut na uh zong niam mah mah hi. Suahtak na a ngah ma un Negro khem peuh in lai sin thei lo uh a, laisim thei khat zong om lo uh hi. Tu in a hih leh laisim theih na ding in koi cih ding, koi a paileng koi ci ding cih teng tawh a om na sila huang pan in a mau ut na tek ah pai khiamang uh a, a Tote  bang uh lung leng mah mah in pawl khat a ki it a ngai te bang a ki kap kap bang tam pi om uh hi.

 
Booker te inn kuan zong a om na pan un mun khat khit mun khat ah hong ki tuah koi koi uh a, nuntak hak sa pi pi in hong khang khia to to uh hi. Tawlkhat sung a om na vuah a u tawh suangmei hol tawh na ah sum hong tha lawh uh a, nau pang lai a hih hang in gim pi in na sem hi. A omna khua ah sang hong ki hong a, a mah pen sun in nasem a hih manin sang kah nuam mah mah ta se leh sang kah thei lo in nitak sangbek kah thei hi. Sang a kahna ah sang sia te in a min dong uh a, a ma min pen a mah leh a mah ki thei lo a hih manin gen pak ding thei lo hi. Bang hang hiam cih leh sila te in min nei lo uh hi. Booker zong a sangsia te in na min bang hiam ci in a dot teh Booker in zong  a gen pak ding thei lo a,kei ka min pen Book.T.Washington hi ing ci in dawng a hih man in a lawm te pawl khat in zah pih mah mah uhhi. Bang hang hiam cih leh Washington cih min men American kum pi masa pen min  a hih man  ahihi. Tua hun lai tak in Hih pa pen ni khat ni teh mipil minthang dinghi ci inkua mah in thei het het lo hi.
 
Sangkah na ah a lawm te in lukhu khat tek nei uh a, Booker zong a nukiang ah sang ah ka lawm te in lukhu khattek khu uh a, kei zong lukhu khat hong lei sak in ci in a nu kiang ah a nget leh a nu in ei sum nei lo lei zo lo ding a hi zong in na lu khu ding khat kong khui sak ding ci in a ih mut kal in a nu in ippi sia khat at tan in lukhu dingin an khuisak a , Booker zong lukhu nei a hih manin a lawm te lak ah mai zum nawn  hi.
 
University a kah na
Suangmeihol tawhna ah sum tha lawh lawh uh a, nitak ciang in sang kah kawm lai a hihman in nak pi in gim mah mah hi. Nikhat a lawm te ki ho sim zasim kiau a, a gei ah va naih in a va dot leh Mivom te a ding in sang lian pi khat ki hong ding cih thu a hihi. Booker in hih sang ki hong ding thu a zak ciang in om thei nawn lo a, tua sang ah sang kah in pai ding bek bek a lung simah hong om hi. A nu kiang ah nu aw sang va kah ning ci in a gen tak teh a nu in sum lah nei lo hang a, bang ci kah mawk ding na hia ci in heh nem hi. Bang bang hi leh tua sang kakahloh pha mawh hi ci a hih man in a it mah mah a sanggam te leh a nu nusia in a silh laitak puan khat, a teen lai tak pheituam khat, bang mah nei lo sa in a ma om na pan a ki gam lat mah mah na tai 500 val na ah a khe tawh hong pai hi. Lam pi ah meileng pai te ah bawm sim in gilkial dang tak sa in ninlak teng ah lum in tua bang teng tawh a lung gulh mahmahna sang inn pi hong tung hi. Tua sangpi ah sangsia pi nu in a muh teh lamdang sa lua mah mah a, hih zah a bang mah nei lo pi sang hongkah sawm pen mi mawk mawk hi kei in teh ci in lam dang sa mah mah hi. Tua sang ah sang kah khuan ngah na ding in thu dot te a ki dong ding hi a, a hi zong in Booker pen thu ki dong lo in sangsia pi nu in ka zum khaan sung va puah siang in ci in sawl hi. Booker zong sangsiapi nu cih bang mah in hoih tak in va puah a hih man in sangsiapi nu  in tua sang ah sangkah khuan pia hi. Hih sang ah sangkah khuan a ngah pen a ma a ding in Harvard University a sang kah khuan a ngah dan in nuam mah mah hi. Sang kah sungin sanginn siang tho na ding in na sem kawm a, lai sin to to thei hi.
 
A nasep na
Sang a man khit tak teh a sang sia te in Booker pen pil lah pil in mai lam a dingin Negro te a ding in na hoih hong sem zo ding hi ci in lam en uhhi. Tua  ahih man in a sang vuah sangsia a sem ding in deih uh a, sangsia sem sak uh hi. Booker in sang sia a sep a ki pat pen sanglai bek hi lo lokhawhdan,innlam dan,…thatang tawh na sep tuam tuam te zong sin sak a, nak pi tak in mivom te pan tah hi. Tua hunlai in a mau sang pan sang a man a hih nakleh lokhawhdan, inn lam dan, cidam na lam, …a tuam tuam a vek in athei sa uh hi pah hi. Tu huna danin subject tuam tuam ih ki khen dan hi lo uh a hih manin a mau hun lai a te in nakhem peuh a sin khawm uh hi hi. A sang inn ding uh lam thak in, mun tuam tuam ah Negro te a ding in sanginn hong beh lap lap a, tu  hun in  Negro te leitung a ki zel uh hi ta hi. Hih dan a ih mit muh theih in negro te sila pan in leitung ah mangkang te tawh a kiza kim in hong om ta uh hi. Leitung hong uk kik ta uh ki ci thei hi. Booker in hih zah in a minam a ding in pil na ah pan tah in na asep lam midang tam pi tak in atheih teh mun tuam tuam pan ah tawi na tam pi ki pia hi. Mun khat ah thu gen ding in ki sam a, a thu gen na ah “tu ma kum tam pi lai in hih pam a kuahawm ah ka giak ngei ci in a giah na mun gal kawk phei hi, bang hang hiam cih leh tua zan pen hih khua ah zinding in kei hong ki deih lo in hong ki sang lo hi” ci in gen ngei hi. Mivom te a ding in a deih sak na te piteek, put eek te in a theih uh ciang in thu pi sa lua uh a hih man in mun tuam tuam pan hong pai uh a, pah tawi na pia tek uh hi. Mun gam la pi tak pan in puteek mah mah khat hong pai a, Booker kiang ah thu gen hi. “Booker aw hi bang in ihminam sung ah laisimthei, mi tawh ki bang zo ding in cik mah in ka lam et zawh loh pen tu in ka mit in mu in ka mi pih te in lai sim thei, mi tawh ki gual kim thei cih ka theih teh lung dam lua in ka om na pan nithum khe tawh hong pai in aaktui kong puak hi. Kong pai lam in aaktui tangthum kong puak hi a, lam kal ah tangnih ki tam sak ing, tu in hiah khat bek hong tun zo ing, bang mah nei lo ka hih man in ka neih sun sun aktui tangkhat bek hong puak zo ing” ci in nuam na khi tui luang kawmin  Booker kiang ah gen hi.
 
Thukhup na
Booker tangthu ka sim khak pen kei a ding in ka lung sim hong sukha in in hoih ka samah mah hi.Nidang in lai tam pi ka sim loh bang ka hun pam maih ka sa mah mah hi. Hih lai bu ka sim a  ki pan kei in bang hi a, bang din mun tung thei ding ka hiam ci in ka ki thei a, tha ka la thei hi. Midang te sila in suak khia in lai khat zong sin thei lo, sum zong zong  thei lo  hi ta se mah leh tu hun teh a mau ei sang in pil zaw uh a, hau zaw ta uh hi, Hih pen bang hang hi mawk a hiam? Han ciam huai thu tam pi om in ka umhi. Hun tam pi tak sung ih kal suan nasa ah midang te a  ding deih sak na lian pi tawh na ih sep in bang hiam? Booker in a thu gen na ah “Leitung ah minuam sa pen pen ih cih te pen midang te a ding in thu tam ngaih sut pen in, na tam a sep sak pen pen te a hihi” na ci hi.
 
Kei mah in hih lei tung ah khat vei bek piang in  tom no khat sung bek a nungta ding ka hi hi. Tua a hih ciang azen zen in hih leitung ah It na, hehpih na nei in lah thei na ding (a hih kei leh)  deihtungLeitung a ding in nahoih khat peuh peuh sep theih na ding hun man pha ka neih leh itsik lo, zekai lo tak in tu mah mah in ka sem ding hi. Bang hang hiam cih leh ka nuntak na tom no sung bek a hih man in nidang ciang hih bang hun man pha ka ngah kik ngei loh ding lam ka ki thei hi.
 

Lunggulh na, tup na ki cian nei a a han ciam mi a ding in hih leitung ah a piang zo lo  ding  a om kei hi.  

Laigelh Deih Tung.

Source :
Vunghdeihtung/blog Tuesday, July 9, 2013

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Laibu bukhat bup ka sim masak pen. Agelh ~ Deih Tung Description: Rating: 5 Reviewed By: Cinpu Zomi
Scroll to Top