728x90 AdSpace

Hot
Menu
Zon-ol na Donate

Latest News

Na Ankam A Lim Hiam? (How is your appetite?). Agelh ~ Rev. Dr. J.M. Ngul Khan Pau

Na Ankam A Lim Hiam?
(How is your appetite?)
Agelh ~ Rev. Dr. J.M. Ngul Khan Pau


1989 kumin Mizogam ka hawhna ah papi khat in, “Sia Paupu, na thau si cia?” hong ci a, ke’n zong, “Ka ankam lim loh hun nei lo, ihmut nop loh hun om lo, tua ciang midang hazatna nei lo ka hih manin ka thau loh nading om lo hi,” ci-in ka dawng hi. Ankam lim manin thau ding cihna ahih loh hangin ankam limte thau baihzaw hamtang uh hi. I pumpi adingin huih, tui leh an kisam a, tuate ngah kei leng kisi ding hi.

Mi cidam khat adingin ankam lim loh hun om ngei lo hi. Ka mangngilh theih loh khat - 1976 kumin Sumchinvum ah Chin Baptist Association Gospel camp om a, tua lai-ah kei zong ka kihel hi. Siapi Shing Khan Thang zong “Kikhopna bang ci uk ding?” cih thugen dingin hong pai hi. Camp annek khit in amah hong tung hi a, anhuante’n an tam lo ahih manin kuang bang zah khawng ne ding hiam, cih kei hong dongsak uh hi. U Shing in, “Tulai lunat leh khuasik tawh dam lo ka hih ciangin kuang nih khawng hoih bek ding hi,” ci hi. Ken zong nui kawmkawmin, “Cidam hi leteh kuang bang zah ne ding?” ka cih leh, amah zong nui hiuhiau kawmin “Kuang li khawng bek kine ding hi,” ci hi. Hong ciamnuihpih ahih lam ka thei a, ahi zongin mi cidamte in an tam ne deuh uh cih kithei hi.

Pumpi ah an i duh loh ciangin a hang om na hi gige hi. Ankam lim lohna a hang tampi sung panin ahi thei ding pawl khat gen leng: (1). Dam lohna tuamtuam hang hi thei hi. (ii). Lungkham manin an duhna bei thei hi. (iii). Lungkiat luat manin an zong mangngilh theih hi. (iv). Kingaihpih numei leh pasal tawh thubuai hangin kikhen khak ciang. (v). Pumpi gimluat hun ciangin. (vi). I gilvah lua khin zong hi thei hi. Tua mah bangin khalam ah zong an duh loin ki-om thei hi. Pumpi ah an i kisap bangin khalam ah zong an i kisam uh hi. Kha an duh lo na hih leh na dinmun hoih lo cihna hi. Khalam ah kha an duh lote zong natna nei cihna hi. Tua ahih kei leh na gilvah khin zo cihna hi. Kha an hi lo bang an tawh na gilvah na hiam cih ngaihsuthuai mahmah hi. French Scientist Pascal in, “Mihing lungsim sungah Pasian bek om theih nading mun-awng (empty slot) om a, na dang khat peuhpeuh in luah thei lo hi,” ci hi. Pasian thu duhna nei lo na hih leh bang in hong luah dim hiam? Tua mah bangin St. Augustine in, “Topa aw, kote nang adingin nong bawl ka hi uh a, ka lungsim uh nangah a khawl mateng kitawlnga thei lo hi,” na ci hi. Topa in hong tawldamsak hi loin sum leh pai khawngin hong tawldamsak ahih ding lauhhuai mahmah hi.

Khalam an duhna i gen ciangin kumpi David mah lungsim ah hong suak hi. Kumpi ahihna, neih leh lam a hauhna, galte tungah a gualzawhna in khalam dangtakna beisak tuan lo hi. Ama tung panin Pasian ah gilkialna leh dangtakna leh gilvahna, lungkim nading nam guk khawngin en ni.

Six Satisfying Sources from the Psalms of David.
• Hunger for the person of God (Pasian mahmah deihna hangin gilkialna)
• Hunger for the presence of God (Pasian ompihna lunggulh mahmahna)
• Hunger for the praise of God (Pasian phatna leh pahtawi nop mahmahna)
• Hunger for the plan of God (Pasian gelna theih ding lunggulhna)
• Hunger for the precepts of God (Pasian thukhamte deih mahmahna) 
• Hunger for the people of God (Pasian mite tawh kikholh ding lunggulhna)


1.HUNGER FOR THE PERSON OF GOD: (Pasian mahmah deihna hangin gilkialna)
• Pasian aw, keima Pasian na hi hi. Nangmah kong zong a, ka lungsim khempeuh tawh nang kong deih hi. Tui om lohna gamkeu bangin ka pumpi bup in nang hong deih hi (Late 63:1).
• Sakhi in luitui luang sialsial a lunggulh bangin nang ka hong lunggulh hi, ka Pasian aw. A nungta Pasian kong deih hi. Cik ciangin kei hong pai-in Pasian maitang hong mu thei ding ka hi hiam? (Late 42:1- 2).
• Thungenin nang lamah ka khutte ka hong zan a, leikeu in tui a duh bangin nang ka hong duh hi. (Late 143:6).

2. H U N G E R F O R T H E PRESENCE OF GOD: (Pasian ompihna lunggulh mahmahna)
• Topa tung panin na khat ka ngen khin a, tua ngenin ka zon ding pen, Topa’ inn sungah ka khan tawntung om ding. Topa’ hoihna et ding leh ama biakinn sungah thudot dingte ahi hi (Late 27:4).
• Ka lungsim leh ka pumpi zawngkhal kha ding a, ahih hangin Pasian pen ka lungsim hatna leh keima a’ hi tawntung ding hi (Late 73:26).
• Vanglian Topa aw, nangma tenna mun bangzah takin etlawm ahi hiam? Ke’n ka lunggulh mahmah hi. Topa’ huangsung ka lunggulh mahmah a, ka lungsim leh ka pumpi a nungta Pasian’ tungah lungdam mahmah in la a sa hi (Late 84:1-2).

3. HUNGER FOR THE PRAISE OF GOD: (Pasian phatna leh pahtawi nop mahmahna)
• Topa ka phat tawntung ding a, amah phatna ka gengen ding hi. Topa ka phat ding a, gimna thuakte zasak unla lungdam uh hen (Late 34:1-2).
• Ka suah tung a kipanin nangmah kong bel a, ka nu gil sung panin hong lakhia pa na hi hi. Nangmah ka hong phat ngitnget hi (Late 71:6).
• Ka Pasian leh ka Kumpipa aw, nangmah hong pahtawi-in a tawntungin nangma min kong phatphat ding hi. Nisimin hong pahtawi-in a tawntungin nangma min kong phatphat ding hi (Late 145:1-2).

4. HUNGER FOR THE PLAN OF GOD: (Pasian gelna theih ding lunggulhna)
• Nang hong zahtakte adingin na koihsa na hoihte, nang hong belte adingin mite muhna ah na bawl nangma hoihna kicing a, mi khempeuh in thei uh hi (Late 31:19).
• Topa sungah lungkim in, amah in na deihna hong pia ding hi. Topa tungah na vaiteng ap in. Amah muang in amah in hong sem ding hi (Late 37:4-5).
• Nangmah hong muang ka hih manin zingsang simin na itna kip kei hong phawksak in. Nangma tungah thu hong ngen ka hih manin ka paina ding lampi hong hilh ta in (Late 143:8).

5. H U N G E R F O R T H E PRECEPTS OF GOD: (Pasian thukhamte deih mahmahna)
• Kham (gold) sangin ahi zongin kham hoih pen sang ahi zongin na thukhamte deihhuaizaw a, khuaizu leh khuailuzu taakte sangin zong khumzaw lai hi. Tua tham loin tuate’ hangin a nasempa in thuphawkna ngah a, tuate zuihna-ah noptuamna lian a om hi (Late 19:10-11).
• Ka lungsim khempeuh tawh nang ka hong zong hi. Na thupiakte panin kei hong pialsak kei in. Nangma tungah kong khialh loh nadingin ka lungsim sungah nangma thu ka khol hi (Late 119:10-11).
• Na kam sung pana thu pen kham leh ngun tul tampite sangin kei a dingin hoihzaw hi. Nangmah in kei hong piangsakin na hong bawl hi. Na thupiaknate ka sin theihna dingin thu theihtelna hong pia in (Late 119:72-73).

6. HUNGER FOR THE PEOPLE OF GOD: (Pasian mite tawh kikholh ding lunggulhna)
• Leitungah a om mi siangthote ahih leh amau nampi hi a, amaute sungah ka lungkimna teng om hi (Late 16:3).
• Leitungah a thuman mite kei tawh a om theihna dingin maipha ka pia ding a, paubanna a om loin a gamta mi in keima na hong sem ding hi (Late 101:6).
• En un sanggam bangin mite pumkhat suakin a tutkhawm uh ciangin bangzahin hoihin nuam ahi hiam? (Late 133:1).

David in Pasian loin nopna taktak omlo ahih lam hong phawksak a, ama dangtakna leh deihna in Topa bek mah ahi hi. Bernard Langer pen US ah Golf kimawlna a siam mahmah khat in kiciamteh hi. 1986 in US leh Leitung bup ah number 1na hi. Ama’n, “Golf kimawlna ah leitung continent ngaah a siampen hihna ka ngah ngei a, leitung ciamtehna ah number 1na ka hi hi. Zi melhoih tak ka nei a, sum ka dam sunga ka zat zawh loh ding ka nei hi. Ahi zongin ka nuntakna ah bang hiam a kim lo, kisap khat om hi” (Yet something is missing) ci hi. Pasian loin bang hiam khat kisam den hi.

Topa Pasian in na khalam gilkialna ah a beithei lo an lim penpen hong pia hen.

Source :
Lungdamna Aw
(An Organ of the Chin Baptist Association)
Vol. XLI No. 03

March, 20.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Na Ankam A Lim Hiam? (How is your appetite?). Agelh ~ Rev. Dr. J.M. Ngul Khan Pau Description: Rating: 5 Reviewed By: Cinpu Zomi
Scroll to Top