728x90 AdSpace

Hot
Menu
Zon-ol na Donate

Latest News

Tualpawl leh Tualleenphung Cidam Nading.

Tualpawl leh Tualleenphung Cidam Nading.
Agelh ~ Pu Zokhai


Zaan nitaak-a I-khahsa "Ngeina" paizia-tawh kop-in en lehang: Ngeina cih ciang-in mihing hihna, nuntaak kalsuanna, bangkim-ah sawl tangtang kuullo-a, neutuüng-a kipan muhna leh zaakna pan-a theihna leh saankipna hongpiang nuntaakpih zialehtong ahihi.

Minam khempeuh-in ngeina tuamciat nei-a, hih ngeina-pen "Mihing' Hihna (Identity)" ahihman-in khatle-khat kizahtaak sakding, kithusim sakding akuulzia adiak-in Social Science, Social Work, Health Science, Nursing leh Medical Study.... te-ah naakpi-in kimuam-hi.

Muam: cihciang-in "theihding, upding leh zuihding gatangkhiin (systematically)-a kihilh, kipantah cihna ahihi. Pupate' kampau hoih leh athuuk khat hi-a, pate-in tate akhangcin kuan takciang-in behsung phungsung thute ahilh-uhpen "thu muam" cise uhhi.

Tualpawl (Community)
Tualpawl acidam nading-in tualpawl a-om limlim kuul-a, tualpawl cih ciang-in ngeina, tawnzia, khuasakzia akinaaipen mi honkhat kipawlkhawm, adiak-in munlehmual bih-a kipawlkhawm mihonpi-pen tualpawl akici hi-in, ngeina tuamdang anei khatle-nih omthei-a, ahizong-in ataangpi-tawh aki-keelkii zahdong kidanna omlo-hi.

Adiak-in midang lak-ah Zomite atuntunna-a kipawlkhopna akibawl-pen tualpawl hi-a, hih tualpawl akiphuh theihna ataangpi-pen Zomi hihna, paukam zattaang neihna cihte abulpi ahihi. Hih tualpawl sung-ah mimal kimciat ngeina khat pan-a khangkhia khawm hilo-hi. Hih Zattaang Paukam (Common Language)-in tualpawl cidam nading thagui lianpen khat ahihi.

Paukam (Language)
Atelnoppen-in, gamdang-a Zomite' omnana-ah akinei tualpawl sung-ah kampheen kuullo kampau zattaangna aguipi ahih-tawh kituak-in tua paukam azangh khua tuamtuam kigawmkhawm hi-a, khua khatleh-khat akhankhiatpih ngeina atuamciat om diimdiam-hi. Ahizong-in ataangpi huam-a zattaang ngeina hualpi khat sung-ah akiluangkhawm tengmah tualpawl khat akici ahihi.

Kizopkhopna akipsak Ngeina gui lianpen-in "Paukam (Language)" ahihi. Alangkhat-ah, Zomite' neihtaang Ngeina Lianpen-in Zopau hi-a, hih Zopau sung-ah awsuah: Dim, Saáizaang, Teizaang, Sizaang, Losau, Khuano, Zo, Paite, Simte, Vaáiphei, Phaaileeng, Thado, Gangte, Ngawn,... cihteng kihel-hi.

Awsuah (Accent) kilamdan man-in "Namdang" asa, awsuah khat azangh lom-khatpen "Minam Khat" asa ki-om laai-a, mihing' nuntaak khuasakna paizia aki theihlohman ahihi. Beh khatbek-tawh enpak lehang: Sizaang awsuah sung-ah Samte beh om-a, Losau awsuah sung-ahzong om-in, Zo awsuah (Zohaám) sung-ahzong om-hi. Tua ahihman-in "Awsuah-in Namtuam Hihna Hilo" -hi.

Awsuah-pen munlehmual zil-a apiang hi-a, minam gui-khat hihna pan-a piang hilo-hi. Laaitui-ah tuma kum 50 kiim-a hong mothak Saáizaang Khua pan-a Saáizaang awsuah azanghte tu-in Dim Awsuah zangh uh-a, atu atate uhzong Dim Awsuah zangh uhhi. Kum 20 sung ciangciang ahihleh atate nangawn Saáizaang awsuah zangh uh-a, ahizong-in damdam-in hong kikheel toto-hi.

Omna, teenna tualleenphung (society) hualpi-ah akizangh awsuah-in damdam-in hong vuknelh ahihman-in "Awsuah-pen Munlehmual Zil-a Kikheel" ahihi. Uutthu leh uutlohthu hi khollo-in tualleenphung' huzaap-in tuabang-a thahaatna aneih angeina ahihi. Lamka-ah kum 3 bekbek ka-om sung-in ka' theihlohkaal mah-in Lamka Awsuah khenkhat ka' kam-ah nana teeng khiinkhian cihbang ahihi.

Tua ahihman-in "Paukam-in Zomite' Ngeina Lianpen" hi-a, hih ngeina sung-ah khua khat leh khat awsuah kibangkim lo-hi cihthu I-telleh "Sizaangte, Zote,...." cih kammal abei ziauding ahihi. Kei mimal' kam pan-in hihte abei-zawh asawt ahihi, banghanghiam cihleh Sizaang Awsuah lak-ah ka' behte om-a, Zohaám azanghte' lak-ahzong ka' behte om ahihman-in "Awsuah-in Minam Hilo" ahihlam tel cihtak-in ka-tel mahmahman ahihi.

Tualleenphung (Society)
Tuallenphung cihciang-in tualpawlte' dawnbang tuahkhopna minam hualpi genna ahihi. Atelnop penpen ding-in: Laaitui Khua-ah tualpawl tuamtuam om-a, aveengveeng ahihkeileh behlehphung ahihkeileh biakna pawlpi zuui-a kipawlna tuamtuam omhi. Hih tualpawl tuamtuam khempeuh avekpi-a huam-a genna-pen Tualleenphung (Society) ahihi.

Tualleenphung-pen tualpawl tuamtuam-tawh akilam inn-bang ahihi. Akhuam-pawl, hiangzawl-pawl, innkam, innsun, suutpi, suutkhil, innkaán, zuak, sual, tungkhuh .... cihte-tawh akilam takciang-in akibeelthei inn hongsuak-hi. Tua-tawh kisuun-in tualleenphung acidam nading-in tualpawl tuamtuamte-in amau' dinna ciat-ah acidam leh akipding athupipen ahihi.


Tualpawl tuamtuamte' pankhopna (collaboration)-in Tualleenphung' thahaatna hi-a, tualpawl tuamtuamte' kigawmkhopna (unity)-in tualleenphung' gualzawhna ahihi. Hih tualpawl tuamtuamte khut kileenkhawm-a pankhopna aneih theih nading-in tualpawl leh tualleenphung paizia theihtelna-in azangno (trigger) ahihi. "Azangno" cihciang-in thau akilot nading ameekna hi-a, tua thau-zangno meek loh-in thauging theilo-hi.

Tualpawl leh Tualleenphung paizia theihtelna cihciang-in tualpawlte-pen tualleenphung' hiang tuamtuamte hi-a, tualpawl khat' ngiimna leh tupna (aim & objective)-teng aneng-atawng-a tualleenphung-in saanpih, seppih ding-a deihna-in tualleenphung cina/dammawh sak-hi, banghanghiam cihleh tualpawl tampi-tawh akilam tualleenphung sung-ah tualpawl khat' thulehla aneng-atawng-a tualpawl dangte-in saang-a zuuiding cih-pen apiang theilo thu ahihi.

Hih thupaizia akitheihloh man-in Zomi thulehla asuut sunsunte-in amau' tualpawl kheng-a tualleenphung ahuam genna sakna nei-siam hetlo-in, amau' tualpawl tanzil (level)-tawh thugen lasak hongneih niloh man-in tualpawl khatle-khat kihualna (harmony), kigawmkhopna (unity), kipumkhatna (oneness) cihte kam-tawh akigengen hang-in apiangtheilo thu ahihi, banghanghiam cihleh azangno kimeek lo ahihman ahihi.

Tua-tawh kizuui mah-in, tualpawl khat sung-a upa makaaite-in tualleenphung sung-a vaaihawmna hualpi-ah akiseh thulehlate amau' tualpawl ngiimna leh tupna sung-ah akihelloh man-in tualleenphung-tawh mapan khopding lungsiit thei-a, tua-in tualleenphung cina/dammawh sakpah-hi. Tualleenphung' cidam nading leh dammawh nading-pen tualpawlte' kizopna tung-ah kinga-hi.

Lahpakding-in, Laaitui Khuazaang buppi' ading-in tui laak kuul-a, tuilam tawh kuul-hi, ahizong-in Luuipi kiim-a omte-in "Ko Luuipi tui khemlel nung-e" ci-in tua vaaihawmna-ah kihel nuamkeileh tua-pen tualpawl leh tualleenphung omzia, paizia theihlohna hi-a, midongkholhte, mi-tuamkaaite suak-in tualleenphung-ah tualtang nawnlo sak-hi. Tualleenphung-ah tualpawl khempeuh atualtan loh ciang-in tualleenphung adammawh, ahiangsamh ahihi.

Zomi minam buppi kalsuanna ahzong minam cidamna leh minam dammawhna alawhpen hihbang thulehlate ziakmah ahihi. Minam huam-ah: Tualpawlte-pen "khua tuamtuamte" hi-a, tualleenphung-pen Zomi (minam huampi-a genna) ahihi. Tua baan-ah, tualpawl tuamtuamte-pen kipawlna tuamtuamte: WZC, GZA, ZYA, ZNCM, ..US (Uplift Society khempeuh)-a kipan biakna tuamtuamte ahihi. Akitheimawh mahmah khat-ah: Zomi sung-ah political party tuamtuamte: ZCD, NLD, USDP.... cihte-zong tualpawlte vive ahihi.

Zomi tualleenphung sung-a tualpawlte khempeuh amau' hihna, pianzil (nature), zialehtong (character) akisuun gaisiat ahihi. Hih thugui akitheihloh man-in tualpawl khatle-khat ki-elna, kilangbawlna, kigaalbawlna tuni dongmah khauhtak-in kimu ahihman-in Zomi tualleenphung naakpi-in dammawh-hi, banghanghiam cihleh pumpi tung-a hiang tuamtuamte akitot akiseel nungsang pumpi-in bangmah seem theilo-hi. Pumpi tung-ah aluut vitamin khempeuh khe bekbek-in ne-nuam mawkleh adangte dammawh gaiding-hi.

Tua ahihman-in minam cidam nading-in tualpawl paizia leh tualleenphung paizia theihtelna-in azangno hi-a, hih azangno koi-ah om-a, koici meekding cih akitheih loh-in thauging thei ngeilo dinghi. Minam thau agin nading-in na' tualpawl vaaite minam buppi' vaai ding-a deihna, minam buppi vaaite na' tualpawl sung-ah akihelloh man-in "minam tuam bang-a kingaihsutna", tualleenphung pelhna cihte akinusiat peelmawhding ahihi.

Tualpawl tuamtuamte' hihna ciatciat ki-zahtaaktuah siam-a, khua khatle-khat ngeina leh awsuahte ki-thupibawl sak siam-a, hihte khempeuh pan-a minam buppi' ading-a akilawmte tualleenphung-ah puakluut siam-a, tualpawl khat' ngiimna leh tualleenphung ngiimna ahuamzia lampi tuamtuak ahihna theisiam-a aki-kalsuankhawm naakleh tualleenphung (minam buppi) damdam-in meimate amaa hong kihial-in apawn a-baang phial zong-in natna kiam-in hong cidam theiding-hi.

Hih-pen mimal thusinna: ka' mimal background - Social Science; Sociology, leh Social Work tungtawn-a minam cidam nading ka' sinkhaak thute sungpan-a kong khenkhiat hi-a, kipawlna leh pawlpi khatpeuh' thupiakna leh sawlna leh thukimpihpiakna kihel lo-hi.

Zomi Pasian' Thupha!


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Tualpawl leh Tualleenphung Cidam Nading. Description: Rating: 5 Reviewed By: Cinpu Zomi
Scroll to Top