728x90 AdSpace

Hot
Menu
Zon-ol na Donate

Latest News

Zomi Innkuan Laibu 1973 (History of Zomi Family) azom - 7... Agelh - J. Gin Za Tuang

Zomi Innkuan Laibu (History of Zomi Family) azom - 7... 
Agelh - J. Gin Za Tuang



A sunga om Thulu note :
Lunmun Leh Sumniang Kido
Sumniang te’n Khuasak Beel
Tedim Le Lusi Kido      
Lusi Leh Meitei Kido
Gungal Gam Khua Satna
Kapteel Khua Satna
Kalzang le Siazang Kido
Tuithang Khuasatna

Lunmun Leh Sumniang Kido
Sihzang gam Thuklai khua ah, Lunmun leh Sumniang beh nam nih a teeng khawm uh hi. Tuate in ni khat ni in kiho thei lo un a kido uh hi.
           
Lunmun te in, Tuan Khan kiangah hong huh in, a ci hi. Tuan Khan in Za Pau leh Za Khai pawl cial in, Lunmun te huh ni, a ci hi.
     
Za Pau leh Za Khai in zong Tedim innpipa kiangah, Lunmunte huh ni ci-in a cial leuleu uh hi.
     
Tedim innpipa in zong, Phalam, Khuangli, Zahau, Hualngo mite kiangah, Lunmunte huh ni, ci-in gal a cial sawn leuleu hi.
      
Tua ciangin, Limkhai, Mualbeem, Tedim, Phalam, Khuangli, Zahau, Hualngo, Lunmun kop in Sumniang beh teng a sim uh-a, a zo gawp uh hi. Tua ciangin Sumniang teng Khuasak ah a tai uh hi.

Sumniang te’n Khuasak Beel
Sumniangte in Khuasak hausa Go Mang kiangah hong hon tan ci-in Khuasak a beel uh hi. Kuamah no hon kei in a cih hangun Go Mang in a mang nuam kei hi. Tua ciangin a langte a heh uh-a, Khuasakte khat a that uh hi. Khuasakte zong heh mahmah in Dal khua te khat a that leuleu uh hi.
       
Khuasakte in gal pan na ding kan hoih takin a to uh hi. Khuasak khua na sia tak in a sim kik uh hi. Ahih hangin ken hoih ahih man in Khuasak khua a la zo kei uh hi.
       
Khuasakte in, Phalam innpipa kiang ah, gal hong lem ta in, nong lep zawh leh, kum 3 sim in sialpi khat tawh kong lut ding uh hi, aci uh hi.
       
Phalam innpipa in zong, Mualbeem, Takzang, Buanman, Khuasak te kiang ah, “ Ki lem ta un”, ci-in gal a lep khit ciangin, a ki lem uh hi.


Tedim Le Lusi Kido
Kam Hau uk, gungal gam, Tang lui-leh Tiau kikal, “Keima gam hi”, ci-in Lusi hausa Van Nuai Lian in tua gam ah sa beng in, a ut ut in a vak kawikawi hi.
     
Ni Khat ni-in Kam Hau’ tapa, Hau Pum leh a lawmte 100, gungal gam ah sa beng dingin, a kuan uh hi.
     
Van Nuai Lian tawh a kituak uh hi. Hau Pum in, Van Nuai Lian kiangah “Hi gam, no Lusi te’ gam hi lo hi, ka pa Kam Hau gam hi. Tu lamgkhat siah hi gam sungah sa benga vak kawikawi kong muh uh leh kong dawm kei ding uh hi,” ci-in a sawlkhia hi, Van Nuai Lian pau ngam lo hi.
       
Ahih hangin, a khua a tum ciangin, Van Nuai Lian in a khuapihte kiangah athu teng a gen hi. Van Nuai Lian tapa, Do Thian leh Lal Tun in tua thu a zak ciangin a heh mahmah uh a, Tedim innpipa tungah hi bangin thu a za sak uh hi:
      
“Hih gungal gam, Phalam leh Zahau innpipa in hong piak ahih hangin, ko, no kong pia kei uh hi. Hi gam, ko gam hi na cih uh leh kisim ding hihang,” aci uh hi.
       
Kam Hau Innpipa in hih thu a ngah ciangin, heh mahmah in, hi bangin thu a za sak kik leuleu hi:
      
 “Na ngap uh leh, kisim mah ding hi hang,” a ci uh hi.
        
Tua bang thu a om laitakin, Lamzang khuate On Vial, Hong Tual leh adang mi khat, Lusi gam-a an taw, Sialte ah a giah laitak un, Lusi Van Nuai Lian khuate in, On Vial a na that uh hi. A lawmte nih suakta in, Kam Hau kiangah a kop ah uh hi. Innpipa a heh seemseem hi.
         
Thauvui, thautang kiging phitphet in, sial khat ho in, gal vai a hawm uh a, Mualbeem te in Khomleng khua sim ding, Tedim te in Lihli sim ding, ci-in a hawm uh hi.
          
Za Pau makai in khomleng khua sim in a za gawp uh hi. Gal 300 a hing in a man uh hi.
          
Kam Haut e a neu pen Khaw Chin a cina-a a ngim hun in kuankhia thei lo uh ahih man in, tua kal teng in Lihli khuate na taimang khin uh hi. A hih hangin, zam, khap 10 khat leh mi 2 a hingmat uh-a khat a that uh hi.

Lusi Leh Meitei Kido
Lusi gam, Tomphai khuate in, mivom numei khat buan gawp in khat khit ciang khat in a hih gawp khit uh ciangin that uh-a, ciamgzum dawn ah a suang uh hi.
          
Tua thu Meiteite in a theih uh ciangin a heh mahmah uh a, To,phai khua sim dingin Mualbeem leh Tedim cial in, a ni ding hun a kipia uh hi. Ahi zongin, Mualbeem leh Tedim in a ni kiciam hun uh tuat khial in, ni 6 a manlang zaw in a tung uh-a, a va sim uh leh lel in, Mualbeem te mi 7 a si uh hi. Ahi zongin, ni 6 a cin’ ciangin, mi vomte tung leuleu in, Tomphai a sim uh-a, a zo gawp dikdek uh hi. Lusi te zong tai mang in, Tan lui tung khin uh hi.

Gungal Gam Khua Satna
Mualbeemkhua Khan Hau in a khua ah a omom ding nop asak loh na khat a om ciangin, Phalam innpipa kiangah pai in, “Gungal gam Hazang-ngei gam ah khua hongsat sak in,” ci-in a nget ciangin, Phalam innpipa in zong na pia-a, “Hazang-ngai khua” ci-in a teeng pah hi.
       
A sawt lo in, Mualbeem leh Khuangli kisia in a kisim uh-a, Khuangli hausapa in Mualbeem tawh kilem na ding thu a gen dingin Hazang-ngai hausa Khan Hau a cial hi.
       
Mualbeem hausa Za Pau in, ama thu bek tawh kilem ding thu pia nuam lo in, Phalam innpipa kiangah thu dong dingin mi khat a sawl hi.
       
Thu dong dingin a upa pa Hau Khaw Thang, saiha khat tawh Phalam innpipa kiangah a sawl hi.
       
Ki lemna thu gen dinga kisawl kim laim Hau Khaw Thang in zuauphuak in, Gungal gam, Suangzang gam ah khua hong sat sak in,” ci-in saiha a va pia hi. Saiha deih mahmah Phalam innpipa zong lungdam in, Suangzang gam ah khua a sat theih na ding thu a na pia hi.
       
Hau Khaw Thang in, “Tu in Suangzang gam ah khua sat leng, Za Pau’ gam ahih ciangin, kei tungah heh ding hi. A heh-a hong bawlsiat leh hong hon in,” a ci hi. Tua khit ciangin ciah in Suangzang ah khua sat in, tua khua Suangzang khua mah a ci pah hi.
Kapteel Khua Satna
Gungal gam ah a teeng nuam peuh in, Phalam innpipa kiangah, kum sim in ngeina bangin siah pia peuh leh khua ki sat thei hi cih a kitheih ciangin, Saizang hausa Goih Pau’ tapa Thuam Thawng in zong Phalam innpipa kiangah gungal gam Kapteel gam khua hong sat sak in, ci-in a nget ciangin,”Ngeina bangin siah hong pia in la, sat tain” ci-in thu a pia hi.
        
Thuam Thawn in zong ngeina bangin siah pia in Kapteel khua a sat hi.
        
Losau Khan Lam in zong, tua bangthu hi thei a hih leh ci-in Seipei gam khua a sat theih na ding van gen in, a ngah ciangin khua sat-a, Seipei khua mah a ci pah hi.
        
Dimpi Pau Suang in zong, Laitui gam ah khua a sat theih na ding a van gen hi. Ahih hangin. Laitui gam pen Tedim innpipa Khaw Chin gam ahi hi. Khaw Chin in ngeina bangin siat a nget ciangin Pau Suang in a pia nuam kei hi. Khaw Chin zong heh mahmah in, Laitui khua upa Phut On man in a hencip hi.
         
Tua thu Pau Suang in a zak ciangin, azi Zuh Niang sawl in, Khaw Chin kiang ah, zu le sa tawh thuum sak in, “Nong nget, ngeina bang siah kong pia ding hi. Nong hehpihna in Phut On hong khahkhia in,” ci-in a van gen hi.
          
Ngeina bangin siah a piak ciangin, Phut On a khahkhia-a kum sim in ngeina bangin siah a pia uh hi.

Kalzang le Siazang Kido
Saizangte in Kalzangte kiangah Khuangli gal va sim ni, gal ahi zong, van ahi zong i ngah peuhpeuh, kihawm ni,” a ci uh hi. Tua bang ahih leh ci-in, Kalzangte in zong, amau khua-a gal siam, gal hang mahmah mi 5 teel in Saizang ah a pai sak uh hi.
      
Saizang a tun uh ciangin, sa gawh in, zu lup in, zu le sa kham sak in, tua khit ciangin a ihmu sak uh hi. A ihmut kal un, a gal hiam teng uh seelsim in akhut ache uh a hencip sak uh hi.
    
A khanlawh uh ciangin, “Tu in hong man khin hi ta ung, Kalzang dakbu leh khipivui tawh, thovai umpi dim khat tawh, gamsai lam 9 khat tawh nong ki tat zawh kei uh leh kong that ding uh hi,” a ci uh hi.
     
Kalzangte in tua bang thu teng a theih uh ciangin, theiba hut sunga thovai umpi khat dim a ngah uh-a, Thuamcing gei-a singhawm sung zui-a po gamsai khat a dawh uh leh lam 10 val pha khat a ngah uh ciangin, hi bangin thu a za sak kik uh hi:
     
“Na deih teng uh kong puak ding uh hi. Kalzang dakbu khumvum pan kong tum ding uh hi,” a ci uh hi.
      
Kalzangte zong kithawi in, Dakvombu leh Kalzang dakbu pua kawm in, khumvum ah Kalzang dak a tum khit uh ciangin inn lam ah puakkik in, dakvombu pen a pua suak uh hi.
      
Saizang a tun uh ciangin, “Tu ni na deih teng uh hong puak ung, ka mite uh hong khah ta un,” a ci uh hi. A mi mat teng uh khahkhia in, Kalzang lam ah a vek un a ciah uh hi.
       Kalzangte a ciah khit ciangin a van puak teng uh phel in a en uh hi. Ahih hangin, amau deih Kalzang dakbu lah hi lo, Kalzang khipivui lah hi lo a theih uh ciangin a heh mahmah uh hi.
       
Tua ciangin,Saizangte in, Kalzangte lo kuan, nupi khat leh naupang khat a that uh hi. Kalzangte in tua thu a theih ciangin heh mahmah uh-a, Saizang tawh a kido uh hi. Kalzangte in a zo hi.

Kalzangte in hi bangin la phuak uh hi:
(a)Saituite’ kimtang tungah henkol ka khai, tung sunni in vangkhua zong e ke’n zong maw’ng.
(b)Tun biak luang in sing-tunnu zin bang bia’ng e, angkawi luang in henkol anglai ah siang.

(a) Saitui kal ah thawl ten henkol hong bulh a kumvei ma’n puak sing bang thukkik ung,
(b)Awhkhi ngen e a hoihzaw ang ah siang e, ciandal ngem e a ngaihzaw kal khua lum.

Tuithang Khuasatna
Losau pan in Tuithamg khua kisat hi. Pau zong, Losau pau kici hi. Tuithang khua sat masa pawl:
On Neng      (Phiamphu)
Nok Khai      (Naulak)
Saun Ai        (Samte)
Tawn Vial     (Vang-aw)
Am Ngoih   (Biangtung)
    
Khawhsa kum khat a tun khit ciangin, a nuai-a teng in beel leuleu hi:
Khan Lam leh a ta Lam Khaw Thang leh Sing Kam. Khawksa kum 3 a tun khit ciangin, Phalam innpipa tungah dangka 991 lawhta tawh dong in, Tuithang gam teng a lei uh hi.
-Phil lui pan Vangpeng nuai siah Meitei gun dong-

Source :
Zomi Innkuan Laibu
(History of Zomi Family)
Agelh - J. Gin Za Tuang

Zomi eLibrary / Laibusaal in hanciam in aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Innkuan Laibu 1973 (History of Zomi Family) azom - 7... Agelh - J. Gin Za Tuang Description: Rating: 5 Reviewed By: Cinpu Zomi
Scroll to Top