728x90 AdSpace

Hot
Menu
Zon-ol na Donate

Latest News

Zomi leh Zogam Makai Kiteelna Khat. Agelh ~ Go Sawm Khup

Zomi leh Zogam Makai Kiteelna Khat.
Agelh ~ Go Sawm Khup


Damzel hia!
A kuapeuh damin zingvai ahawm di’n ka hon’ gingta ahi…
Lamka pau keeita hang e…

Tuteng Manipur State Assembly Election (Gamkee Innpi Kiteelna) tawh kisai thu leh late nungzuih in, ka Facebook ah ka suangzel a, India gam sung a Zogam leh Zomi Makai ding Kiteelna khatin sang ka hih manin hih Kiteelna thupi ka sa mahmah hi. Hih Kiteelna tawh kisai keima mimal theihna leh ka muhnate, laizom u leh nau, lawm leh gualte in hong theihpih ding kilawm sa ka hih manin, bang hangin hizah in buaipih ka hi hiam cih thu, a kicing zawdeuh in hong gelh dihning.

Kiteelna:
India gam sung a Zogam ah Manipur Gamkee Innpi Kiteelna pen zan-in akibawl zo hita hi. A beisa hun in Kiteelna (10) vei kibawl zo a, tua Kiteelna khempeuh sung pan tutung Kiteelna pen:
·         Zogam sung a buaina tampite a kinawkkhak khitzawh hun a kibawl Kiteelna ahih manin in athupi mahmah khat ahi hi.
·         Adiak in Lamka khuapi ah 2015 kum a kipan Salpha (9) teng leh Bills (3) hangin taangpi taangta numei naupang lungkimlo in kongzing ah a kitom zawh ciang a kibawl Kiteelna ahi hi.
·         Tuaban ah, a beisa kum (10) sung teng Manipur Gamkee sung ah INC Party in Kumpi semin a omlai tankin, tu laitak a India gambup Kumpi asem BJP Party pawl in Manipur Gamkee ahzong amau Party in Kumpi za angahna ding ahanciam mahmah Kiteelnna hong suak hi.
·         Tu khang hun pen IT hun ahih bangmah in thu leh la kizakna leh kizopna tangzang mahmah ahih manin, Kiteelna tawh kisai thu la khenpeuh pen Zogam sungbek hilo leitung mun khempeuh ah a kiko, a kiza theita suak a, nidang hunlai a Kiteelnate bangin a diklo vaihawmnate, mipi lungkim lohna thu khat peuhmah a kitaklang, a kipholakkhia theita ahi hi.

Manipur Gamkee sung ah Bial (Constituency) mun (60) om a, Phase (2) kisuah in Kiteelna a kibawl hi a, Kawl gam leh Tuipigal khawk lam pan hih Kiteelna thu atheinuam Zomi-te in ih lunglutdiak Bialte ahi Lamka, Sing-at leh Thanlon Bial teng ah zan (March 3, 2017) ni in Kiteelna akibawl ahi hi. Vote simna leh teelcing MLA-te taangkona pen March 11, 2017 ni in kibawl ding hi.


Tuni Bangciang Tungta:
Social Media tungtawn in Kiteelna thu ih zakmah bangin Lamka Bial (Constituency) sung ah suakta leh thuman (Free and Fair) takin Kiteelna kibawl zo in kilungkim mahmah a, lamdang kisa mahmah hi. Ahi zongin, Sing-at leh Thanlon Bial ahbel nidang a Kiteelna bangmah in vaihawmna tuamtuam om a, Kiteelna kizokhin himah leh anung a thu tampi hong gingkhia hi.

Anung Thute:
Akua mahpeuh in a kitheisa ahih bangmah in Lamka, Sing-at leh Thanlon Bial teng ah, abeisa kum (10) val sungbang, Kiteelna tawh kisai in mipi thuneihna sang’in Gamnuai Pawlpite thuneihna kizui zaw hi. Gamsung kilemlohna leh thubuai tampite hangin hici bang a Gamnuai Pawlpite thu zuih ding a kisapna leh ahoih zawkna dinmin tampi kiphukha hi. Gamnuai Pawlpite cihciang in India Kumpi Galpate tawh Kilemna (Suspension of Operations – SoS) abawl, hih Bial teng ah akikhuasa Zomi min suang Pawlpi leh Kuki min suang Pawlpi hiding hi. Gam leh minam vai ah Zomi Pawlpi in adang pawl tuamtuam tawh kigawm in UPF Pawl in ding a, Kuki Pawlpi zong adang pawl tuamtuam tawh kipawl in KNO Pawl in ding uhhi. Hih thu ka gen ciangin, kuapawl kuapawl dik hi, diklo hi cih thu agennuam ka hikei a, Zogam tangthu ahih manin taangpi theih huai thu in ka ngaihsun hi. Keima mimal thu in, a Pawlpi nihtuak pan Makaipite tawh ka kitheingei a, a zahtak huai Makai thupite ahihna uh ka thei hi.

Koilam Ah!
Zomi Pawlpi lam pan ka zakna in, tutung Kiteelna ah Lamka leh Sing-at Bial pen suakta takin mipi kiteelsak ding a, Thanlon Bial ahbel deihsak Makai khat kigum ding hi cih thu ahi hi. Kuki Pawlpi lam pan ka zakna ahzong, tutung Kiteelna sung ah suakta takin mipi kiteelsak ding a, ahi zongin, Kuki Pawlpi ngimna a thukimpih Makai teng kipanpih ding hi ci uhhi. Tua tawh kizui in Lamka Bial ah mipi in suakta takin Vote akhia thei hi a, Sing-at Bial ahbel mun khatkhat simloh, buaina omlo in, mipi in suakta takin Vote khiathei hi.

Kuateng:
Hibang dinmun teng sung panin Thanlon Bial tawh kisai in bang thu om hiam cih thu alunglut huai khat hong suak a, kuamah mawhsakna leh diksakna diksaklohna hilo in, a thu om bangteng Zogam tangthu khat asuak ding a hihna tawh ciapteh dingin hoih ka sa hi. Thanlon Bial ahbel, MLA ding a Kuanglui (Candidates) pen azahtak huai Makai (5) om hi. Tua teng in;

  1. Pu Vungzagin Valte (Sitting MLA),
Bharatiya Janata Party (BJP), Kum (53), Sitting MLA with INC Party
(Zomi Pawlpi in gum hi).
  1. Pu Chinkholal Thangsing
Indian National Congress (INC), Kum (55), Medical Doctor
(Kuki Pawlpi in panpih hi).
  1. Pu Thangkhangin Ngaihte
Lok Janshakti Party (LJP), Kum (61), Post Graduate, Former ZNC Leader
  1. Pu P. Khamsanglian
Independent, Kum (32), Graduate
  1. T. Nengzakham Tombing
National Peoples Party, Kum (64), Grade 12th Pass.

Siksan leh Dinmun Pawlkhat:
Pu Vungzagin agum Pawlpi in, tutung a Kiteelna ah abeisa Term khat sung asem MLA-pu teelkik ding, Pawlpi tawh gam leh nam thu vaihawmkhopna mabante sunzom ding, BJP Party Ticket ngah ahih manin India Kumpi (BJP) tawh Zogam sung a buaina leh Pawlpi lunggulh thute kikuppih theihna ding cih thute siksan uhhi.

Pu Chinkholal a panpih Pawlpi in, tutung a Kiteelna ah Thanlon Bial pan maithak, Makai athak teel ding, alui MLA-pu in gam leh nam ading bangmah sem theilo ahihteh, mipil misiam khat teel ding, BJP Party pen singtangmite biakna tawh kituaklo pawl ahih manin, tualsuakmite agumden INC Party min tawh teelcing ding cih thute siksak uhhi.

Thanlon Bial pan Kiteelna atuh, Zogam leh Zomi Makaipi khat in akiciamteh, adiak in Kawl gam leh Tuipigal khawk a Zomi-te’n it in a deihsak mahmah, Pu Thang Khan Gin in, Zogam leh Zomi a’ding ka nuntakna khempeuh a kipiakhia ka hi a, Zomi-te kigawmkhopna dingbek hilo, Singtang mite tauna aw za in Singtanggam a ding asem ding, Nupite kahna khitui nul in Bills (3) tawh kisai India Parliament dong ah thu a sung thei ding, Zogam tulpan akaina pan a khangto gam asuahna dingin makai in pangin India Kumpi leh UN Zumpi dong ah thu asung zo ding keibek om ing ci a kithawi ahi hi.

Abeisa hun a, Zogam leh Zomi Movement ah mapang in ahat mahmahngei ZNC Party dingsakkik in, Indian Election Commission ah Zomi min tawh ZNC Party Registration bawlkik dingin nahanciam a, Pawlpi in phal nailo ahih manin, a kidinkhawlsak ahi hi. Tua hangin, Mipi Party kici LJP min tawh kuang alui hi ing ci hi. Pu Thang Khan Gin pen Zo Khan Khual min akipia khat ahih mahbang in, Zogam leh Zomi tawh kisai in ama mimal phattuamna ding, sum leh paai hauhna ding cihte lunggulhna in nei hetlo a, sak leh khang, sim leh mal a kikhen Zomi-te tuibang kigawmkhop theihna ding bulphuh a, kum tampi sung a nuntakna apiakhia Minam Makaipi khat in akiciamteh ahi hi. Manipur Gamkee sung a Kiteelna khempeuh leh teelcing Makai khempeuh in sum leh paai tawh thu gen uh a, gam leh minam kipuahlo, kizuunlo, taangpi lam ah kuamah in panglo, taangpi a gum ding Makai omlo ahih manin kei a kithawi hi ing ci hi.

Pu Thang Khan Gin pen Zomi Innkuan USA Kipawlna in Zomi Khawmpi Zinmangpi dingin cial in, US gam ah sam uh a, UN Zumpi ahzong Palai khatin apuak Makaipi khat ahi hi. Pu Thang Khan Gin inbel, MLA alui teng peuhmah in, abeisa hun sung a Bills (3) vai a kipan Singtanggam tawh kisai bangmah pau ngamlo, taangpi lam ah pangngamlo hi cih mipi in kitel mahmah ahihteh kei hong sawl un aci ahi hi.

Mimal Thukhupna:
Tutung Manipur Gamkee Innpi Kiteelna tawh kisai in keibek hilo, alunglut lawm leh gual, u leh naute tawh Social Media leh Telephone tawnin thukiza in ih kikupkhop theihpen hampha hihang cinuam ing. Tu khang hun ciangin, Sim leh Maal, Sak leh Khang, Tuipi Galkhat a om Zomi khempeuh in Zogam leh Zomi tawh kisai thu lianpite hicing bangin kithuza in ih kikup theih pen amanpha mahmah hamphatna hi a, leitung khantohna tawh kituak in gual ih bat zawhna ding kalpi khat hi ci in ka ngaihsun hi. Tu hun ciangin, Zogam leh Zomi tawh kisai thu peuhmah akilang akitel (Transparency) takin kimu thei, kiza thei, kikum theita ahih manin, hih dinmunte telsiam zangsiam a, Zogam leh Zomi tawh kisai Minam Maban ah ma apang Makaite, Pawlpite, Kipawlnate in pilvang tak, thukhual tak, thuman tak leh diktak in thu leh la vaihawm ding kisam mahmahta hi cih thu hong phawksak hi. Hih in leitung khantohna tawh kizui a thu leh la vaihawmna dinmun hi a, nidang bangin thu leh la kitheilo kimulo kizalo cihte om nawnlo ding hita hi. Tua dinmunte zangsiam in picing takin kalsuan lehang Zogam leh Zomi hong khangto semsemzaw ding hi cih thu ka um hi. Hibang in thu leh late kilangkhia sakin ka pulak manin, sandan kibatlohna hang ahi zong, theihna kicinlohna hang ahi zong, deihna kikumlohna hang ahi zong, mawhsakna a om a leh, gam leh minam itna tawh ahong kitelsiamna dingin ka thum hi.

Lungdamna:
Zogam leh Zomi Makai Kiteelna min tawh thu leh ka kizakpih lawm leh gualte, tualsung a thu leh la, dinmun tuamtuam ahong theisak lawm leh gualte, Pawlpite dinmun tawh kisai hong hilh zahtak Makaipite, MLA kuanglui (Candidates) Makaite khempeuh tung ah keima mimal dinmun panin lunggamna hong ko ing. Lam-etna leh deihsakna tawh Pu Thang Khan Gin a panpih ka hi a, Zogam leh Zomi a’ding khat vei hong kithawikik Pu Gin tung ah zahtakna tawh lungdamna ka ko hi. Zomi sung ah Minam Makai khatin ka ciamteh a, thupi ka sa mahmah hi. Tutung Kiteelna ah a hanciamna, a kipiakkhiatna leh Zogam a khualna mahmahzong zahtak huai ka sa khinta hi. A tung ka gen dinmun tuamtuamte sung panin, Pu Thang Khan Gin pen mipi atam zaw deihna tawh kiteelcing thei peuhmah ding hi cih thu ka um hi. A teelcing zawhna ding inzong thu ka ngetsak hi. Campaign bawl dingin Pu Gin vaidinna lampi tuamtuam pan apanpih lawm leh gualte tung ah lungdamna ka ko hi. Thungetna tawh apanpih laizom u leh nau khempeuh tung ahzong kilungdam mahmah hi.

Atawpna ah, tutung a India gam sung a Zogam ah Kiteelna pen lungkim huai takin akibawl zo in kiciamteh thei ahih manin, hiciang hong lamto anungta Pasian tung ah lungdamna ih ko hi.

Zogam leh Zomi a’ding gin-om gige;

Go Sawm Khup
Zogam (Tuipigal Khawk)

March 4, 2017.
Tulsa, Oklahoma.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi leh Zogam Makai Kiteelna Khat. Agelh ~ Go Sawm Khup Description: Rating: 5 Reviewed By: Cinpu Zomi
Scroll to Top