728x90 AdSpace

Hot
Menu
Zon-ol na Donate

Latest News

A buaihuai simsim Mipilte le “I” Laimal. Agelh ~ Pau Sian Lian

A buaihuai simsim Mipilte le “I” Laimal.
Agelh ~ Pau Sian Lian

Laimal “I” pen mikang lai-in “kei” cihna hi-a hih laimal pen tu laitak leitung gamvai le sumbawlna vaite-ah a kiza mun simsim, a minthang diak mikang kammal pawlkhat ah na kihel lingleng thei sehi. Tua a kiza mun simpian, “I” laimal a kihel hamtang kammal pawlkhatte le thupiang pawlkhatte kong kumnuam hi. Tua kammal te-in, “ idiot, intellectual, inclusivity, information technology” cihte a hihi.

2016 beikuan in The Black Swan cih laibu gelh mipil Nassim Nicholas Taleb in “I” laimal kihel kammal lomkhat hong phuangkhia hi. Tua kammal in “Intellectual Yet Idiot” cih hi-in a tomin, “IYI” kici hi. Tua kammal deihna Zolai-in letkhia lehang, “A hai cimciam Mipilte” cihtheih ahihi. Hih kammal in tu lian laitak mipil kici honpi khatte’ dinmun hong kilang sak lua ahih manin kammal zatdan ki pakta simtek hi. Banghang in hih kammal (IYI) pen aki zakteh telnop kisa mahmah sehiam cih a nungsang tangthu pawlkhat sut masa dihni.

Galpi nihna pian khit-a kipan leitung ah gamlesa vai dipkuat mulkim huaite ven nading le gam khempeuh sumlepai khantoh khop semsem nading ngimna tawh US kumpi makai-in gam tuamtuam kumpi-te in Bretton Woods thukim na khat 1944 kumin hong neithei uhhi. Tuatawh ki meizom in leitung kiheizia thak (new world order) khat hong kipan khia-a leitung bup gamte kipawlna UN, sum-vai kipawlna World Bank, Asia Development Bank cih bangte kiphuan pah phangphang hi. Tua te tawh ki meizom in European Union (EU), NATO cihdan gamtuamtuam kipawlna dang honkhat in nungzuih pahhi.

Hih leitung bup kalsuan zia ding hong makaih kipawlna thak-te in a sawtlo-in mi pawl (class) thak khat hong phuang khia pah uhhi. Tua mi pawlthak-te pen a pilna sang sindiak pawl (technocrat class) ci-in kisam a, tangpi bup sang nuntak nuam zawdeuh, a pildiak, a siamdiak, thunei diak pawl tawmno, nuhthial-te (global elites) hongsuak uhhi. Leitung bup kalsuanna ah thunei diak hih nuhthial pawlte pen leitung bup-a university hoih pen ahi Harvard, Cambridge, Yale cihdan a minthang vangvang university lianpi-te pan sang mante hi-uh a, UN, WB, ADB, EU cih-a kipan leitung bup gam tuamtuam a kumpi makai 40% bang pen hih sangte pan a man khinsa te vive na hi-uh hi. Tua bek thamloh media minthang tuamtuam, NGO kipawlna teng mah zong amau khutnuai vive ah humsa ahihi.

Hih nuhthial pawlte pen leitung bup in ki pummuan ngiat a, a mau cihcih, amau gel bangbang mittaw sialkhau let bangin a ki zui ngeungeu a, amau sepkhiatna te a sitsak kik (check) ding mi muan dangzong ki neilo hi. Amau na sem maw/ semlo cih tehna bek mipite-in mau sepna gah-te mawhmat theihna (justification) ih neihi. Nuhthial-te siamna dandan tungtawn in hamphatna le hamsiatnate leitung bup-in a kithuak hong suakhi. George Friedman genna ah leitung bup-in makai nuhthial-te cih bangbang pummuan in ih zuih langlang laitak-in kuama upmawh kholh loh tuahsiat na lianpi nih kinawk khain, tudong mah ki buaipih mahmah laihi, cihi.


Tuahsiatna masa-penin 2008 kum-in leitung bup sumbawlna lam kisongsawlawi-na (economic crisis) ahihi. Leitung bup hong lok, hong pei gawppat in kibuai pih mahmah hi. Sunkhat, zankhat thu-in mi tampite nuntakna hong ki bungbu tun-in nasep neilo khutdawhngen hong ni khan ziahziah hi. Makai nuhthial te kuamah in hihbang ih tuahsiat dinglam genkhol theilo bek thamlo-in, amau mahmah angsum huaiham na hang-a leitung bupin a kituahsia mikmek hongsuak hi, ci-in George Friedman in na genhi.

Politic lamah zong makai nuhthial-te mahin leitung bup politic paizia pen damdam in hong kihual semsem in, a sawtlo-in leitung bupin liberal democracy cih kawl-lukhu nuai khat-ah vangam ih malep khawm dinghi, ciden uhhi. Leitung tangthu zong a thak gelhluat ding hong omlo in leitung bupin ngeina khat nuai-ah ankuang ki um khawm ding hi, a cihcih kawmkal laitak mahun, 2014 kum in Russia in a gam veng Ukraine-te zawhthawh bawl-in Crimiea gammeng  tuh ek uhhi. Arab gam tengzong liberal democracy ngei-na zui ding cih sangsik ISIS te a kipan Muslim luanglet tampi-in a ciangciang ah amau Muslim ngeina le upna ultun sakna tawh hong kilal sak mahmah uhhi. Leitung bupah liberal democracy hu hau-in daihna khangding cih thadah gam tampi ah ak ihmu bang-in ki patau zaw semsem hi. Leitung bup ah a hau pen ding leh thu nei pen ding khat-in kingap kingkeng China gam bang democracy system kul-a sa hiaulo communist kumpi makaih sa ahihi.

Makai nuhthial pawl-te a kihawmthawh mahmah na hang lianpi pen-in 2008 a sumbawl na tuahsiatna leh politic lam a ngongtat euheuh thei kumpi-te’ vaite a lemtang thei pen dingin ki koicih mahial bawl thei dinghiam cih dawnna (solution) tudong mahmah a muhzawh nailo uh hang hidiak hi. Dinesh DSouza genna-ah tu laitak leitung kihuang dan hong huzap diak thu thum om a tuate in gam tuamtuam sumbawldan (trade) hong khel globalization, gamdang pemna (immigration) le setkhuak pilna (technology) cihte hi-a, tua kikhelna te a lemtang theipen-in vaihawm taktak dingin nuhthial pawl-te kiging nailo uhhi, cihi. Kiging lobek thamlo amau aituam thu neihnate khauh semsem, kip semsem na dingin hih thu thum-te molhtum bangin zang uhhi ci-in mi tampi in mu-uh hi.

Leitung nuntakna hong pingpa vei kikhelna tuamtuamte’ gu a thuak taktakte pen nuhthial pawlte hi masa lo-in khua-ul luangin nisim lokuan nasem nautangte ahihi. Tu laitak mipite bangzah takin thasan in nasem tase mah leh uh a sum lut uh khancip mahmah in, mizawng mihau kilkhaihna (gap) uang tektek mawkhi. Koi gam-ah na om zongin a zawngsa nahih leh na zawngsuak dinghi, cih dinmun tungtahi. Michael Sandel genna-ah, leitung mun tuamtuam-ah nasem nautangte aw, lunggulhna, kipiakkhiatna, thupitna-te makai nuhthial pawlte-in ngailo, thupi simsak lo-bek thamlo-in thu theihetlo dan-in hawmthawh bawl-in amau sunmang ngaihsutna (ideology) tengpeuh hilh thapai nuam lai uhhi, cihi. Hih thuteng hangin tu laitak politic lam-ah kuamah up masak ngam het loh mipi-te thangpaihna hual (populist movement) hong hat semsem hi, ci-in genhi.

Hih bang leitung tuahsiat-na nianua teng hangin 2008 khit a kipan ni tumna lam gam lianpi-te politic nunzia thak huihdam hong nung hiauhiau khinhi. Gentehna khat en lehang, tangtawng a kipan England gam ah kiteelna omsim party lianpi nih (Labour Party, Conservative Party) te khutsung bekah thu neihna tungden taleh 2010 kum kiteel lai-in gambup thu neihna luah nading kisam zah meetang in kua party mahin ngahsiang zolo uh a, Conservative party te-in party neu Liberal Democrats kibelpawl khop ding a zolzawh bek uhteh gam uk theihna ngahzo pan uhhi. Tua hun laipek in England gammite-in party lian nih-te bek thuneihna piak thapaih ding cimtak mahmah ta cih kilang khin simsim hi. 2016 taktak teh leitung bup a makai nuthial a lom a tangin zol mah tase leh England gammite a tam zaw in European Union pan inntuan khiat ding khensat ek uhhi. Nuhthial-te ading mangsia pi khat hong suakin leitung bup hong kilat sak zohi.

Brexit tawh kisai a kantel England-te mipil Alexander Betts genna-ah, Brexit pianna ding a meetang khia a tamzaw-te omna khua-te ka kanteh EU ah innkuan khat hihna hangin a kingah hamphatna te a sang diak khuami-te hizaw lai uhhi. Ahi zongin gam makaihna ah tangtawng a kipan panmun a la thapai, ki-ukna innpi-te ah taw kheng liangin a tu mi tawmcik nuhthial- te cimtak lua mahmah ta uh a, mi huamkimna (inclusivity) lah omlo in gambup ai hamphat nateng makai nuhthial tengin amau tanau sungteng bek-ah humcip hi cih thangpaihna a khuah luatna hanghi Brexit a pianghi, na cihi. Gam ading bang hoihzaw a, bang sia zaw hiam cihte vei masa lo-in makai nuhthial te thu manglo limlim-in hemkhia ni, kikhelna khat bawlni, cih lungsim hang hihtuak pipen hi. Brexit pian nading makai-te in mipi nautangte lung kimlohna thei gige-uh ahih manun, hong ki guksak ih thu neihna lakik ding hihang (Take back control) cih tangkona tawh mipite hehna, thangpaihna le minam itna lungsim satsuah zo gawp uhhi.

2016 a piang gentehna kician mahmah dangkhat in Trump in US kumpi dinmun a ngahna thu ahihi. Trump in makaite-in thusimna ngahlo in pampaih thuak a kisa mipi lomkhatte’ lungkim lohnate tel sitset lua ahih man-in ih gam thuneihna teng a humcip nuam den, thu tuamtuam tawh  ih khuak hong nim cip, ih gam a su siasia nuhthial te hawlkhia ding hihang (drain the swam) cih tangkona hongnei hi. Zawhthawh nawlkhin thuak a kisa diak nasem nautang te leh Christian te phadiak lungkim sak zo mahmah pahhi. Politic ah kihel ngei ngiatlo Trump in Republican party ah kidem pih politic makai 16 te zo dipdep masa-a, a tawpna-ah nuhthial pawlte’ tonu Hilary zong zo laihi. Francis Fukuyama in bel a ki pampaih kha den nautang nasem mikang te lungsona gah ki nekha taktak himawk ei (the anger of the white working class), cihi.

Newt Gingrich in Trump pen president hihna ding kam kinialna (debate) a neih lai pekun nuhthial mipil leh nuhthial media te tampi-in thu theilo gensia-in a ko dikdek laitak un nuhthialte’ media ahilo mipi-te lungsim lahna (poll) dangte-ah mipi 70%-te pahtakna a ngahkhit lam kuaman phawk khalo in hai cimciam mahmah uhhi, cih gen ngeihi. Bangbang hileh Trump in Bush ukpi gui (Bush dynasty) le Clinton ukpi gui (Clinton dynasty) a sattat zo suak photphot hi.Democratic party sungah zong khangno tampi te-in nuhthial te paktat Hilary sangin gammi 1% -te humsa gambup hauhnateng sut khia kikin gammi khempeuh tungah hawm kik ding hihang aci Bernie Sanders pakta zaw uhhi.

Hih thupiang tuamtuam te ih et khitte Nassim Taleb in nuhthial te kona-in a gen, “A hai cimciam Mipil-te (Intellectual Yet Idiot)” cih kammal pen telnop mahmah ta hi. Nassim Taleb genna-ah hih a hai cimciam mipl ihcih nuhthial te pen laigelh siamin, laivuan na-ah mat hoih ngah te hi-uh a, a neulai vua kipan sang laivuan na-ah mathoih tawh gual zo toto-in, a simnop huai lai tuamtuam gelhgelh uhhi. Pil sinna ah zong Harvard university, Cambridge university cihte-ah amau danin laivuan na-ah mathoih ngah le laigelh siam professorte pattah na tawh lai hoih tampi a gelh khit uhteh gualzawhna lukhu nelkai hong ngah uhhi. Amaute pen kizep kithawi, gamtat kampau zong kilawm simtham uhin mipi te in lah ki pummuan a leitung bup makai ding, gambup vai thukhensat ding dinmunte-ah ih koih pah phanggphang hi. A taktak hih hih makai nuhthialte pen laigelh siam bek hi-in a pualam leitung nuntak na taktak, leitung thu taktak teltum meel khollo uhhi, na cihi. Taleb in a ko behna-ah hih a hai cimciam mipil te-in kawltu phung-ah kawltu zong a mu zolo-te hi-in, mailam thupiang ding amau genkhiat thusuak tesang pil sinna sang kician zong a kah khalo lam gei-a khutlam-en te’ upmawh thugen hoh man theizawnsop hi, cihsan laihi.

Etkak:
Alexander Betts, Why Brexit happened and what to  do next?
Francis Fukuyama, Is Democracy in Crisis?
George Friedman, The next 100 Years
Nassim Nicholas Taleb,The Intellectual Yet Idiot
Interview with Michael Sandel.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A buaihuai simsim Mipilte le “I” Laimal. Agelh ~ Pau Sian Lian Description: Rating: 5 Reviewed By: Cinpu Zomi
Scroll to Top