728x90 AdSpace

Hot
Menu
Zon-ol na Donate

Latest News

A MANPHA KHANGNO. Hau Za Cin (Ph D) Phuitong Liim

A MANPHA KHANGNO
Hau Za Cin (Ph D)
Phuitong Liim

Photo : Zomi Siamsin Kipawlna Medical Trip' Haicin Khua
Photo credit : Dr. Siambawi

“Khangnote dong un. Na khempeuh thei uh hi
(Ask the young. They know everything).”
- Joseph Joubert (1754-1824), French Moralist

Thei kim takpi uh hi, dong un!
I pian pan kum 20 sung pen mihing nuntak sungah sawt a kisapen hun hi. Khangno hun khatvei bek kituakkha a, kum 40 pen khangnote upat kum hi a, upate’ naupang kum hi. Khangno lai-in kimangmat a, upat ciang kitheisiam pan hi. Hauh nadinga hun hoihpen hi a, zawn nadinga hun hoihpen zong ahi hi. A manpha mahmah hun ahih manin siatcip theihna hun hi a, nopsak theihna hun zong ahi hi. Khangno hun cih ciang kum tam le kum tawm thu hikhin loin mihing lungsimah a om ngaihsutzia tawh zong kiteh thei hi. A ngaihsutna khangno peuh leh a kum a tam hangin a nasep liau veve a, a tup a sawmna tung veve ding hi. Nang ngaihsutna a naupang hiam? Khango bangin na ngaihsun hiam? Khangno lungsim na nei hiam?

A khangto gamte ah nainganzi (politics) hita leh, khantawn nekzonna ding hita leh, mailam vai khatpeuh lunglut tak, hanciam taka septheih nadingin khangno lai-in pantah uh hi. Sangnaupang makai kiteelin politics lunglutte in zom pah a, laigelh siam kidemin khangno lungsim hatte in thu lianpipi ngaihsunin thu limci tampi gelh uh a, pilna siamna kidemin khangnote kitaiteh uh hi. Thuthei thuciamteh ding kidemin khangnote mah kidem toto uh hi. A nuntak sungun a manpha khangno ahih nading uh hanciamna hi. A kidem nuam lo, a om hithiat, a tu hithiatte kuamah in konlawh loin taisan uh a, khua a phawk uh ciang a lawmte nung delh ding uh hi. Tua manin ahun omlai-a khuaphawk pah pen khangno vai mahmahin, etteh taak mahmah hi.

Khangnote pen suakta uh hi cih a kitheih kul hi. Mi khempeuh in ki-it, kipakta hi cih zong a theih uh kisam hi. Manpha mahmah ahi cih a kitheih kul a, manpha takin a nuntakna zong zang thei hi cih le, kha le pumpi ah picin mahmah ding kisam hi cih a theihtel mahmah ding zong kisam hi. Tua mah bangin siamna gina taka neih zong kisam hi cih a theih kul hi. Tua siamna gina a neih nak leh amah in midang tawh kidemna khatpeuh ah a siampen ahih den loh hangin lungnuam takin mite tawh kalsuan khawm thei ding hi. Siamna pilna gina a neih nak leh ama ading le midang ading sem thei in inn sung, khua sung, veng sung, pawl sung le minam le gam adingin zong na manpha tampi sem thei ding hi. Tua bang kivakna khat neih ding hanciam hun pen khangno hun ahi hi. Kum tam kum tawm tawh kisai loin ‘tu hun’ hi pah hi. Kum 60 a phak khit nung Mathematics a sinkik scientist minthang khat om hi. Tua pa na thei hiam?

Khangno cih a kiciaptehna khat pen cidam hi; lungnuam hi; lawhcing hi. Kum tam kum tawm gen kei, cidamna hoih tak kem hi. Lungnuam taka nuntak nadingin na hoih sem, mi tawh kilem, nekledawn a siangtho bek ne, mite pahtak loh dingin gamta lo, mi tawh kikhawl kim thei-in, a sepna peuh ah lawhcing hi. Lawhcing cih ciang a gah limci den cihna hi lo hi. Tuahpha den cihna hi lo hi. Mite gah sang ama gah lianzaw, mi tungah tuang cihna hi lo hi. A sep khat peuh ah lungkimin hahkat kuhkal takin a sep manin a ngah bangbang ah lungkim, lungdam, phun lo hi. Hau mahmah cih hi pah lo hi. Nuntak nuamsa-in nungta hizaw.


A manpha khangno in a sep theih thei ahih manin ngak loin sem pah a, kihilh leh zong mang pahin, kigen leh zong tel pah hi. Amah bek ki-en loin midang zong huh hi. Mite phattuam nading nasep nuamsa hi. Ama innkuan le a khua sung puahin kem hi. Kikhual takin gamtangin nuntak etlawmsak hi. Kikhual cih ciang a gam, a nam, a khua le tui, ama pumpi, ama innkuan huapin nasem tawntung cihna hi. Tua banga khangno a khantoh theih nadingin upa, kum ham le thutheizawte in makaihin pantah uh a, a kisam bangin huhin sinsak uh hi. Tua banga kipattah khangno pen ama nuntakna mahmah zong a kumkumin kilamdangin khangto hanhan, picing hanhan hi. Singno suan tui buah bangin khanghat hi. A manpha khangno khat in ama khanna ah a piakkik ding om hi cih thei a, lungdam lungnuamin a lungdamna lakkik teitei hi.

Nu le pa, le uzawte aw, khangnote ‘a manpha khangno’ a suah nadingin nang le kei in tavuan i nei hi. Pattah takpi ding kisam uh hi. Ei ut bang tenga gamta-in khangnote kiangah ‘ka cih bangin gamta un’ cih ziau tawh piang lo ding hi. Aisa nuta kikamhilh kibang bek ding hi. Ahoih apha i lahsiam kul a, a gamtatdan mahmah uh zong naungek pai kisin bangin i let kawmkawm maha paisak kul hi. Hehngawh le hansuaksa-a khangno pattah ding hi lo hi. Amau lungsim ah kimuanna omsa pen theihpiha lungduai taka pattah ding ahi hi. Thahat uh ahih manin kidemna tuamtuam ah kidemsak ding, gualzawhdan le guallelhdan zong sinsak ding hi. Thatang a hat mahmah uh hang sumlepai thatang nei nailo thei uh a, haksatna a tuah uh ciang bangci cih ding cih thakhauhna nei nai lo uh ahih manin thapiak mahmah kisam uh hi (moral support).

A manpha khangno in lawmlegual hoih nei-in a neih khat uh kip takin lenin khosak uh hi. Lungsim picingsak semsemin khantohna lam manawh semsem uh a, mi tuamtuamte ngaihsutna tuamtuam sangsiam uh hi. A kipumkhat khangno in nasep a neih uh ciang etlawmin ma-telh uh a, thahatin zong zawhthawh mahmah uh hi. A manpha khangno khat in ama pumpi hoih nading thei hi. Ama khandan thei hi. Anlim nek zah ding thei a, theigah, singgah nek ding tuamtuam thei hi. Ama manphatna theician mahmah a, mite muhna ah mipha ahih le misia ahih zong kithei hi. Ahoihzaw ding hanciam tawntung a, mite etna sangin ama hihna thupibawlzaw hi. Amah a it le a mah a it lo tel mahmah a, ama siamlam le ama mailam ding mukhol siam mahmah hi. A lawm a gual kuate hiam cih tel ahih manin a khankhiat ciangin a tun nading ciang zong mukhol thei hi. Ama siamna zah tawh kituak mawhpuakna lakdan siam a, kul lopi le duhhop manin minleza deih tuan lo hi. Mite gamtat luhek hoih le siangthote pakta-in ama nuntakna ah zat sawmin kisin a, mi etteh huaite tawh kihodan siamin mite nuntakna pan ama nuntakna bawlpha-in puahpha hi. Mi thupite’ thu a zak ciang ama nuntakna ah na bulh pahpah siam a, ama kisapna ah guangin na metpih hi. Mihoih etteh mahmah napi misiate mudah tuan loin hopihdan ding thei lel a, a gina lo gamtatna le a gina lo gamtate tawh kipawl nuam lo pah hi. Ama pumpi cidam nading lim ngaihsut mahmah a, melhoih nading le thahat nading thupisak hi.

A khangto gam ah khangno a tamzaw in melhoih nading hanciam uh a, numei pasal in melhoih thupisa uh hi. Lungsim cidam nading hanciam uh ahih manin kuamah tawh kitawng ut loin kuamah tawh kinawngkaisak ut lo uh hi. Ahi thei tanin kilem ding ut uh hi. Kilemna deih mana mite in dawilok a cih ding leh kilai zong phamawh sa lo leuleu uh a, hangsan takin kilemna bawlngamzaw uh hi. Pilna ciimna zontawm theih hi cih thei uh ahih manin ama angsung ding siam takin khuat a, mipil misiam tawh kikhawlin thudong den uh hi. A nasep theih ding khat peuh ah hun beisak loin sem a, sum ngah nading ahi pah kei zongin sem ngei ing (experience) cih theih nadingin sem pah lel hi. Mihing nuntakdan kilawm le hoihte mangngilh loh ding hanciam den hi.

A manpha khangno in mite a haksatna uh huhin thapia a, panpihin khoi-in kem uh hi. Amah bek kien lo hi. Zahtakna mite tungah pia den a, amah a kizahtak ding lamenkik tuan lo hi. Ahi zongin mite in kizahtak siamna a neih ding uh deih ahih manin ama nuntakna tawh lak hi. Nu le pa le siate bek hi loin lawmlegual le naute tungah zong siam takin zahtakna lak den a, a kisam bangin kisin den ngap hi. Hun hoih a ngah nak leh na hoih sin ding ut a, thu hoih zak ding ngaklah hi. Kampau kilawma kihodan, a kilawma kikholhdan cihte thupibawl a, pheng gamtat loin mite lungsim ding ngaihsun kawmin gamta hi. A hun le mun ah a kisam bangin hanciam nuam den a, thudik thuman gum ama ngaihsutnate zong suahkhia ngam hi.

A manpha khangnote aw lungdam un. A manpha khangno na hih manin melhoih dingin kizem kipuah in. Kimuang in, hun lap in. Thusiam inla thumaan in. Citak inla mi huh in. Nasep thanuam inla kisin nuam in. Kipumpiak inla, na hun khempeuh ah na hatna khempeuh tawh hanciam in. Pilvangin navak inla, a kisam a om hiam cih lungngai tawntung in. A hoih lo nate lak pan na suahtak nadingin pilvang takin kalsuan den in. Lungdamin lungkim tawntung inla, lungnemin lungduai tawntung in. Cingh mahmah inla mite huh ding lunghiang kei in. Tangzang takin diangkhia inla, mi khempeuh sanga hoihzaw hih ding hanciam in. Muanhuai inla nang ‘cihdan’ (style) tuam khat nei in. A ettehhuai style khat nei inla (Gtn. sammetdan, puansilhdan, paudan, gamtat kilawm, adt.). Na minthan nading khat ngaihsun siam inla, mi khempeuh hihtheih loh khat hihtheih sawm teitei in. Ut mahmah khat nei tawntung inla, tua na ut mahmah tawh mite hoihna ding geel in. Nang hihna val hihsawm kei inla, uanglua kei in. Na hihna lopi tawh uang gamtat kei in. Pasal lungsim pua inla nang le nang na khe tawh din sawm in. Ziakai ngei kei in. A sang tun nading hanciam inla, hanciam keeikaai in. Thu khual inla, lungmuang takin gamta hiathiat in. A ngaihhuai-in om siam inla, nungak/tangvalte ngaih mahmah dingin om siam in. Lungdam luat ding kidawm inla, kam nemin pau hiathiat in. A hoih bek ngaihsunin a hoih ding bek hanciam inla, mite hoih nading bek ngaihsun in. Mi’ tungah hoihna na lah theih teng bek mah leitung ah na lawhtak nasep manpha hi. Lungduai inla, kigingsa-in om tawntung in. Lungdamna tawh a manpha nasep sep ding bek ngaihsun in. Tuate khempeuh nangma hoih nading hi. Khangno hun khatvei bek hi.*

*Khangnote aw, na khangnona uh nuamsa unla, na khangno lai-un lungdam un. Na hihnop peuhpeuh hih unla, na ut bangbangun gamta un. Ahi zongin na gamtatna tawh kizuiin Pasian in thu hong khen ding phawk gige un. Note kilunggimsak kei unla, na pumpi uh gentheisak kei un. Bang hang hiam cih leh na khangno hunsung uh sauvei lo ding hi. Na lungkham hun hong tun ma, “Nuntak nuamsa kei ing,” na cih ma hun, na khangno lai-in nang hong Piangsakpa phawk in. (Thuhilhna 11:9 - 12:1)

Na sep khempeuh Topa’ minthan nading hita hen. Topa minthang hen.

Source :
Khangno Lamhilh (Laibu)

A Hawmkhia : Youth Department Zomi Baptist Convention of Myanmar in Zomi eLibrary/Laibusaal aa koih dingin Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A MANPHA KHANGNO. Hau Za Cin (Ph D) Phuitong Liim Description: Rating: 5 Reviewed By: Cinpu Zomi
Scroll to Top