728x90 AdSpace

Hot
Menu
Zon-ol na Donate

Latest News

Chin Liberation Army / CLA Gen. Tun Kho Pum Baite Tangthu. Laigelh ~ Pau Mung.

Chin Liberation Army / CLA Gen. Tun Kho Pum Baite Tangthu.
Laigelh ~ Pau Mung.


A sunga om Thute :
Ø  Thupatna:
Ø  Pu Tun Kho Pum Baite Neulai Thu leh CLA Galkap A Phutkhiatna
Ø  CLA Galkapte In,Police Station A Kapna
Ø  Rangoon Ah Azinna
Ø  Pakistan Kumpipa Tawh Kimuhna.
Ø  CLA Te Leh ACFO Te Mapangkhopna.
Ø  Pu Tun Kho Pum Leh MNF Pu Laldenga Kimuhna
Ø  2nd Batch Training Paina Leh Saitual Agreement
Ø  Pu Tun Kho Pum Omlohkal Sialkaltangdung Ah MNF Te'n CLA Te Tungah Buaina Tuamtuam Abawlna
Ø  Pu Tun Kho Pum omloh kalin Champhai MNF DC te in Mizoram ah.
Ø  Pu Tunkhopum Baite leh CLA Te Huntawpna Lamte.
Ø  Pu Tun Kho Pum Luang Photkikna.

Ø  Thukhupna:

******************************************************************************

Thupatna:
Gam thum ah aki thehthaang Zosuan teng gam khat ah Iki gawmkhop kik theih na ding a ngimna hangin Pu Tun Kho Pum in 1962 kumin gamit, minam it, Zomi Salpha (Comrades) galkap 21 tawh (Chin National Liberation Army) CNLA thautawi kipawlna phutkhia in India Kumpi do kipan uh a, Pakistan kumpipa in galvan thauvui, thautang leh sum leh pai tawh na panpih hi. 1964 kumin Pu Tun Kho Pum makaih na tawh CLA galkapte in galsiam sin kawm leh galvan lakawm dingin East Pakistan gam ah napai uh a, aciah lam uh ciangin Pakistan Kumpipa in galvan tampi na pia hi. Pu Tun Kho Pum in ama ii tup leh ngim ahi Zosuan teng gam khat ah kigawm khawm ding cih ahih mah bangin tuahun lai a, Zosuan hiamtawi kipawlna MNF leh (ACFO/Pu Son Kho Pau leh Pu Thualzen te makaih) pawlte na kipawlpih in Kawlgam kumpi leh India kumpi doding iin (Chin United Government / Zo Kumpi) phutkhia ding cih danin vaihawm in nakpitak in panla in, gam leh minam adingin anuntakna piakhia in asem khia khat ahi hi.

Pu Tun Kho Pum Baite Neulai Thu leh CLA Galkap A Phutkhiatna
Tun Kho Pum Baite pen Nov 10, 1929 ni-in Chin State, Tonzang gam huam Singgial khua-ah suak hi. 1930 kumin a innkuan un India gam Manipur State Churachandpur District, Singngat Sub-Division Hiangtam khua ah hong pem (lal) uh hi. 1936 kum ciangin Singngat Sub-Division Muallum khua ah hong pem kik leuleu in Mata khua ah sang hong kah hi. 1948 kumin, a upa Thang Za Tun makai-in Panglian khua sat in Hausa sem uh hi. Tua hangin Panglian Hausa te aci zong om hi. Tua panin Pu Tun Kho Pum zong Panglian Mission Compound ah sang hong kahin Tan 8 ciang hong zo hi. 1958-1961 kum ciangin Tan kua leh Tan sawm Phaipi (imphal) ah kahin High school akah kawm mahin gam leh minam ading nasep hong ki-panin Hill Union kici kipawlna alawmte pawlkhat tawh phuan in ama’n President sem hi. 1961 kumin All Manipur Tribal League kipawlna phut leuleu in amah mahin President len leuleu hi. A High school kah hun sungin kipawlna tuamtuam te ah kihel in, tua kipawlnate ah President in pang ngitnget hi.


1961 kum tak ciangin Pu Tun Kho Pum in Highschool Tan 10 hong zo in,Tan 10 azawh khit 1962, July kha pawl ciangin Zosuan tate omna mun Manipur, Mizoram Sialkaltang dung leh Chin State te ah vakual zinin, Sihzang kual leh Hakha kual dong vapha hi. Manipur hong tungkik tak ciangin tua hun laitak, Chin State sunga, aom Zosuan tate kipawlna te Chin min tawh na kalsuan uh ahih manin tua siksan in CNLA-Chin National liberation Army(CNLA) kipawlna Dec. 2, 1962 kumin hong phut khia-in thu kizakna tuamtuamte ah suaksak pah uh hi. Hih (CNLA) kipawlna te ii tup leh ngim ahih leh (Chin re-unification) India leh Kawlgama,a om aki-thehthaang Zosuan tateng kigawm khawmin ki-ukna khat nuai ah om khawm ding (or) gamkhat in diing khawm ding cih ahi hi.Hih (CNLA) kipawlna pen a tamzaw in Chin Liberation Army (CLA) cih danin theizaw uh a, pawlkhat te leuleu in Chin Army aci ziau zong om hi. Hih (CNLA) kipawlna pen gam it, minam it Zomi salpha (Comrades) mi 21 tawh aki pankhia uh ahi hi.

CLA Galkapte In, Police Station A Kapna
Hih CLA kipawlna hong phot khiat zawh Kum khat acing khit 1963,26th Jan nitak nai 6 hun in CLA galkapte in Sugnu (police station) palik len buluh in palik te tawh nakpi takin hong kikap pah uh hi.Hih kikapna ah CLA galkapte in gualzo in galvan tampi tak la in,CLA Flag na khai pah uh hi.Tua hunlai in, CLA galkapte thau zat pen Rifle hi-in tua hunlai adingin a nasia lam pawl ahi hi.Hih kikapna ah CLA galkap salpha Major.Sonkhu in gam leh minam adingin a nuntakna napia khia hi.Hih kikapna ah hong gualzawh khit uh azing ciangin galdo hong zomto suak lai uh a,27th Jan zingsang 2:30 Am hunin Singngat Palik len buluh leuleu uh a,Palik khat kaplum in hih kikapna ah na gualzo leuleu uh a,CLA Flag na khai leuleu uh hi.Hih bangin CLA galkapte gamtatna hangin Manipur,India leh leitung gam tuamtuam te ah athu uh na kizel pahin cikmah a,Manipur kumpite apai ngeiloh na uh Sugnu leh Singngat khuate ah Kumpi ulian te leh galkap security honpi khat hong tung pah uh ahih manin CLA te gamtatna pen nakpi takin hong minthang vauvau pah hi.Hih buaina pianna ah India Kumpi ulian te’n na delh phei pah uh ahih manin tua hunlai a,India Newspaper minthang (Viz Amrita Bazar,Calcutta) cih Newspaper te ah hih buaina vai na suaksak pah uh ahih manin India pua lam Pakistan,China leh Kawlgam cih te’n India abil dawh mahmah hun laitak uh ahih man in tua gamte ah athu uh na kizel pah ziau hi.

Rangoon Ah Azinna
Hih bangin CLA galkap te’n Sugnu leh Singngat Palik lente akap khit zawh uh ciangin Pu Tun Kho Pum zong CLA te movement vai tawh kisai gamdang te panpihna zong dingin 1963,22nd July ni-in Manipur nusia in Kawlgam khuapi Rangoon ah vazin to hi.Rangoon hong tung tak ciangin China Embassy a,Embassador pa tawh va kimu masa a,ahizongin China te pen Communist ahih manin CLA te I gelna Liberated Chinland a Socialism phutkhiat ding vai pen China in hamsa sa ahih manin China tawh kizop ding vai pen hong lunglut zolo hi.Tua panin Pakistan Embassador pa tawh va kimu in,tualai ah Pakistan Embassador pa tawh hoih takin na ki-holim thei uh hi.Tua aki-holim theihna panin Pakistan Embassador pa in Pakistan President General Ayub Khan tawh Pakistan te khuapi (Rawalpindi) khuapi ah akimuh theihna ding leh Pakistan gam azin na ding dan te hilh in tuakhit banah Pakistan President pa kiangah alah ding lai thupi pawlkhat zong puasak in 10th Sept ni-in Pu Tun Kho Pum zong Rangoon panin Manipur na tungkik hi.(Hih Rangoon aom hun sungin Pu Cin Sian Thang Rangoon University ah Law sin in sang akah laitak tawh kituak ahih manin Pu Cin Sian Thang in zong avai tuamtuam te ah nabuai pih hi).

Pakistan Kumpipa Tawh Kimuhna.
Rangoon panin Manipur hong tungkik tak ciangin Laisiam pawlkhat leh hidan thu lamsamg alunglut te pawlkhat tawh Pakistan President pa kiangah piak ding (memorandum) Ngetna Lai draf hong bawl khia uh a,tua a laibawl uh azawh khit uh ciangin Pakistan President pa tawh kimu dingin hong kuankhia ta a,Manipur pan ding khia in Silchar khuapi na tung a,Silchar khuapi panin Meileng tawh Devagir na tung hi.Devagir panin khe tawh ni thum sung an nelo in napai gelhgelh in,zan khuamial ciangin Singkung tung leh Suangpi tungah na ngiak zel hi.Hih bangin gam sungah agiakna te ah Sahang in na giakpih zel a,tuabek thamlo-in meikai in,vanging ziahziah himah ta leh guahzu thuak kha vetlo hi.Khatvei Singkung tung pan khuadak in anuai aet suk leh anuai ah Sahang gol mahmah khat na kizel veva a,Sahang in azui zel ahih lam na thei panin,I Pu I pate’n gam sungah Sahang in hong cing thei cih thu hong phawk hi.Tua bangin khe tawh anne lo-in ni thum sung hong pai gelhgelh khit ciangin gua kisat dan aging khat naza in khua gamla nawmlo ding hi ci-in ava zuat pheiphei leh Vai Putek guasat khat tawh hong ki-tuakin tua panin Sahang in nazui nawmlo hi.Tua Vai Putek pa in khua sungah nalut pih a,amah zong a gilkial in a thabei lua mahmah ahih man in Vai Putek pa kiangah kanek ding an hong huan sakin ci-in na ngen a,Vai Putek pa in zong an na huan sak pah ahih manin Pu Tun Kho Pum in Vai Putek pa tungah an ahuan sak man Rs.5 na pia hi.(Tua hunlai-in Rs 5 pen tawmlo kha ding hi).Tua bangin an hong nek leh atha te hong hat kik in,tua khua panin Chittagong Hills lam manawh in pai-in tua panin East Pakistan gamgi hong tung zo ngawngaw hi.Tua panin amah adawn dingin aom,Pakistan gamgi cing Police te tawh hong kimu in,athu ala teng agen khit ciangin Pakistan Police te makaih na tawh East Pakistan khuapi (tu-in Bangladesh) Dhaka khuapi hong tung hi.

Dhaka khuapi ah ni tawm khat sung hong om khit ciangin Pakistan President Ayub Khan tawh kimu dingin Rawalpindi khuapi (tua hunlai a Pakistan khuapi) ah kimu dingin tuilam zui-in inTembaw tawh hong pai khia leuleu hi.Kum 1963 beikuan lam ciangin Rawalpindi khuapi ah Pakistan President Ayub khan tawh hong kimu thei taktak ta uh hi.Tua mun ah Pakistan President pa leh a nasep pih Ulian Sagih te’n interview na nanei uha Pakistan Ulian te’n Tun kho Pum Baite na hi hiam ci-in adot uh ciangin Pu Tun Kho Pum in zong himah ing ci-in na dawng pah hi.Tua panin Pakistan President Ayub Khan in a Sabuai nuai pan in,CLA galkapte in Singngat Police Station leh Sungnu Police Station te akap na uh India News Paper a,aki-suaksak akep khin khian pen nalak pah hi.Tua khit ciangin Pakistan President pa in CLA galkapte in Police Station te akap dan uh athu,ala teng Pu Tun Kho Pum kiangah nadong pah ahih manin Pu Tun Kho Pum in zong kician tak leh kitel takin na hilh pah hi.Tua panin President Ayub Khan leh Pu Tun Kho Pum hoih takin thu kikum khawm in a Policy uh hong holim khawm thei uh hi.

Tua bangin thu tuamtuam hong ki-holim khawm theih khit uh ciangin Pakistan President pa in Pu Tun Kho Pum ii gelna,a vaihawmna a Policy te na pom sakin,noih CLA te’n Chin mite kigawm na dingin na hong sem un la, CLA galkapte pen koih Pakistan Kumpi in training kongpia ding uh a,Sum leh Pai leh galvan thauvui,thautang te zong kong siik ding uh hi ci-in Pakistan President pa in Pu Tun Kho Pum tungah kamciam napia hi.Tua khit banah President Ayub Khan in lawmta hihna etsakna leh a itna alahna in Pu Tun Kho Pum Citizen nai khat leh Rolex nai Compass tawh akithuah khat amawkna in pia in,amin asap ciangin General Tun Kho Pum or General Baite ci-in na sam hi.

Hih bangin hong ki-holim khawm theih khit uh ciangin Pakistan President pa in,Zin hoih takin do nuamlua ahih manin noih mite in an nanek uh ciangin bang cih nanek vua ci-in na dong a,Pu Tun Kho Pum in Nahtangteh tawh an I nek agen nopna in an kanek sim un (Plate)Pakan nam tuamtuam tawh an kane uh hi acih leh Pakistan President pa in agen nopna na theilo ahih man in,Pakan namtuamtuam tawh pia-in gam khat Kumpi zindo mah bangin na bawl hi.Hih bangin Pu Tun kho Pum Pakistan kumpi pa tawh akimuh khit Rawalpindi khuapi sungah a om hun sung mah in MNF Pu Laldenga tawh hong kimu uh hi.Pu Laldenga zong MNF tangval te aa dingin training ngen dingin President Ayub Khan tawh a kimuh sawm a,apai hi a,ahizongin tua hun laitakin Pu Laldenga in bangmah sepkhiat nei nailo ahih manin President Ayub Khan in na ki muhpih nuamlo hi.Pu Tun Kho Pum zong President Ayub Khan tawh a kimuhna ah hong lawhcing khit ciangin Tembaw tawh tuilam zui-in East Pakistan lam zuan in tua panin Manipur hong tung kik thei hi.

CLA Te Leh ACFO Te Mapangkhopna.
Manipur hong tung kik khit zawh 1964 kum tak ciang in (Burma) Kawlgam lamah zong agam kumpi pa uh Gen.Newin in Burma Socialist Programme Party(BSPP) ki-ukna tawh agam uh uk cip in mipi neihsa Company,Setzong ,Sumbuksai,Lo-Leitang leh Sum (Dangka) cihte aanaa tawh nasut mang ahih manin tuavai hangin Kawlgam lam panin gam it,minam it Kawlgam Zomi te zong hiamtawi in Kumpi lehdo dingin India gam lam ah hong taito in ANTI-COMMUNIST FREEDOM ORGANISATION (ACFO) kipawlna hong phutkhia uh hi.Tua aphut khiat uh (ACFO) kipawlna pen Pu.Son Kho Pau,Pu Dam Khaw Hau ,Pu Mang Khan Pau,Pu Hrang Nawl,Pu Son Cin Lian leh Pu Thual Zen cih tengin makaih hi.Tua (ACFO) pawlte pen India kumpi in sumlehpai leh an nek tuidawm te pia in,gamgi (25 miles) Tai 25 kiimteng ah om theihna phalna napia uh hi.

Tua Kawlgam lam pan a,hong taito ahi (ACFO) kipawlna ah makai khat mah ahi Pu Son Kho Pau leh Pu Tun Kho Pum Mizoram Champhai ah hong kimu in tua hong kimuh khopna pan in hong ki-holim khawm thei uh hi.Tua hong ki-holim khawm theih na panin East Pakistan (tu-a,Bangladesh) gam ah galsiam sin dingin Kawlgam leh India pan a,Zogam tagval mi 57 te (first batch training) galkap training sin dingin Pu Tun Kho Pum leh Pu Son Kho Pau in makai in East Pakistan gam zuan in vapai uh a,lamkal panin Pu Tun Kho Pum leh Pu Son Kho Pau te hong ki-holim khop na pan un United Chin Government (UCG/Zo Kumpi) kipawlna hong phuan khia uh hi.Tua (UCG) kipawlna ah Pu Tun Kho Pum pen Prime Minister, Pu Son Kho Pau pen Defence Minister, Pu Hrang Nawl pen Foreign Minister cih bangin panmun kiguan uh hi.

Tua bangin galsiam sin dingin hongpai na uh panin East Pakistan gam hong tung ta uh hi.East Pakistan gam atung zawh uh ni thum khit ciangin President Ayub Khan leh Pu Tun Kho Pum a tuam vilvel in hong kimu uh a,tua lai ah President Ayub khan in PuTun Kho Pum pen numei leh sum leh pai ah acitak hiam ci-in nazia et masa in,muan cing tak sa ahih man in CLA galkap mi 50 val te kha 5 sung training na pia hi.Kha 5 sung training asin khit uh ciangin Pu Tun Kho Pum zong President Ayub Khan I piak sum leh pai, galvan nankim leh thau vui,thau tang honpi khat tawh Zogam lam zuan dingin hong kithawi ta uh hi.Tua bangin Pu Tun Kho Pum leh a galkapte Zogam lam zuan dingin hong kithawi tak uh ciangin Pakistan Official te’n Champhai a om Pu Thual Zen leh a lawmte thu na zasak in Pu Tun Kho Pum leh a galkapte Arakan Hills leh Chin Hills tawmin (Teikhang) Sialkaltang ah hong lut ding uh hi cih thu na zasak uh hi.

Tua ahih manin Pu Thual Zen leh Pu Hrang Nawl makai-in khen nih kisuah uh a,Pakistan gam a,Galsiam sin Pu Tun Kho Pum leh a galkapte nuamtak I gam ah honglut theih na dingin pan deihtak nala uh a, Pu Hrang Nawl makaih Zogam galkap mi 80 te’n Falam leh Hakha lam zuan in napai uh a,Kawl galkap platoon khat omna Rihkhawdar khua ciang baih takin na buluh zo uh a,Hakha khua la man loin na nungkik kik uh hi.Tua mah bangin Pu Thual Zen Commander-in-Chief makaih Zogam galkap mi 700 val te zong Tedim lam zuan in pai to uh a,Tedim leh Mualbem khua kikalah Kawlgalkapte tawh nakpi takin kikap uh a,Tedim Khuapi ladingin,tua khit ciangin Kawlpi lasuak ding cih danin gelna aneih sitset sa uh hi a,ahizongin Kawl Kumpi Gen.Newin Sawltak Col.Van Kulh leh Falam DC Pu Thawng Cin Thang te’n nanak khouhlua mahmah uh ahih manin Tedim khuapi lalo in na nungkik kik uh hi.Tuaci bangin ana buai vengvungh kawmkal un,Pakistan gam a,galsiam sin Pu Tun Kho Pum leh a galkapte Sialkaltang dung zui-in,nuam takin Zogam nalut thei uh hi.

Tua bangin Pu Tun Kho Pum leh a galkapte cidam,ludam takin Zogam hong tung khit zawh uh 1964 kum bei kuan lam pawl ciangin Zogam galkapte kimuh khopna khat hong nei khawm ngeingai uh a,tua kimuh khopna aneih khit uh ciangin Pu Son Kho Pau zong a Body Guards te tawh Naga National Council makai te tawh kimu dingin 1965,June kha pawl in Nagaland ah vapai uh hi.Nagaland apai na vuah lam kawmkal panin 7th Assam Rifles galkapte in na ambush in na man uh hi.Naga galkapte in dawn dingin gelna aneihsa uh ahih manin Pu Son Kho Pau in 7th Assam Rifles te pen Naga galkapte sakha ahih manin naleh dolo ahih manin 7th Assam Rifles te'n baihtak in na man thei ziau uh hi.

(Tua panin Pu Son Kho Pau pen India Kumpi-in kum khat sung Imphal thong ah khum uha 1966,10th August ni-in India Kumpi-in Kawlgam Kumpite kiangah ap uh ahih manin Kawlgam Kumpite in Mandalay thong ah na khum uh hi. 1970, April 21 pan 1971,Nov 7 ni dong Falam Thukhen Zumpi ah thusitna te aneih khit uh ciangin 1971,15th Feb ni-in Monywa Thongah na kituah sak leuleu uh hi.1974 kum tak ciangin Tawlanzi Council Kumpi-in gamvai nasepna hang tawh Thongkia te suahtakna apiakna vuah Pu Son Kho Pau zong suahtakna napia uh hi. 1974,3th Sept ni-in Thong pan hong suakta in a innkuanpihte tawh cidam,ludam takin hong kimu thei kik hi.Thong pan a suahtak khit ciangin apian na khua Thuklai khua ah cidamna lam tawh kisai tualsuak zatui bawl-in (Chin Taizin Sii) nasep hong sem hi.1977,14th Feb ni-in Tedim lampi bawlna ah nasep kuan dingin apai na ah lam kawmkal panin thakhat thu in a nuntakna hongbei vat ziau ahih manin Pu Son Kho Pau in leitung nusia ta hi).

Pu Tun Kho Pum Leh MNF Pu Laldenga Kimuhna
Pu Tun Kho Pum zong Pakistan gam panin hong ciah khit zawh a sawtlo in,Zogam galkapte anih veina traing sinna ding (2nd Batch training ) ding angaihsut na in Gungal lam ah khualzin in vapai in tua a khualzin kikal in MNF President Pu Laldenga in Sialkaltang,Lushai Hills lak a, Paite mite kiangah na kankan thapai hi.Tua hun laitak Pu Tun Kho Pum in Sialkaltang a nusiat sungin Pu Pau Kho Hau PA to President pen acting President in akoih ahi hi.A sawtlo in Pu Tun Kho Pum zong akhualzin na panin Sialkaltaang ah hong tungkik tak ciangin Pu Laldenga in ana zongzong ahih lam akigen tak ciangin Pu Tun Kho Pum zong Pu Laldenga tawh kimu dingin Imphal leh Silchar tawmin Aizawl ah Pu Laldenga tawh hong kimu uh hi.Tua akimuh khopna ah Pu Laldenga in MNF min tawh Pakistan gamah galkap training kapai sawm uh hangin kingah lo ahih manin CLA galkapte tawh pangkhawm in,MNF tangval atawm pen mi 80 kiim bang CLA min zangin Pakistan gamah training apaisak nadingin nangen hi.Pu Tun Kho Pum in zong Zosuan tetek ihih na tawh kizui in na hehpih ahih manin nathumkim pih hi.Ahi zongin Batch khat ah Training ding mi 50 sang atam zaw kingah lo ahih manin ,CLA galkapte 2nd Batch training apai ding uh ciangin,MNF mi 25 leh CLA mi 25 teng gawmin CLA min a training pai dingin nagel sak hi.Tua ahih manin MNF Lusei tangval mi 25 te min teng pen Zomi min tawh laihsak in,Lusei te min tawpna “a”cih azat te uh,azat khak hetloh ding uh Pu Tun Kho Pum in na hilh hi.Hih a kimuh khopna pan un (Agreement) thukimna khat nabawl uha Manipur leh Sialkaltang dung teng pen CLA ukna hidinga,adang mun teng pen MNF te ukna hiding in Pu Laldenga leh Pu Tun Kho Pum te'n ki-thukimna nanei uh hi.

2nd Batch Training Paina Leh Saitual Agreement
1966 kum kipat lam pawl ciangin CLA galkapte in 2nd Batch training pai dingin gelna nanei uh a,hih 2nd Batch training akuan khiat ma un CLA galkapte in anuai a,bangin panmun kivaipuak dan hong gual kik uh hi.
- Pu Pau Kho Hau, PA to President leh Incharge Medical lenkhawm ding,
- Pu Hang Kho Kam Brigadier,Pu Lam Kho Siam Major .
- Pu Paubul Baite Vice-President,Col.Son Kho Pau Suantak pen Chief of Army staff (hih hun laitak Pu Son Kho Pau Imphal thong ah aom laitak), Lt. Col. Ngul let Home Secretary , Capt. Tho Sei Guite, Finance Secretary cih danin panmun kiguan thak kik uh hi.

Tua khit banah hih 2nd batch training paikik na dingah PuTun Kho Pum leh Pu Pau Kho Hau in Pakistan khuapi Rawalpindi vapha ding cih danin CLA te’n gelsa in na koih uh hi.Hih bangin vai teng hong lemtang sitset khit tak ciangin East Pakistan ah training pai dingin CLA galkap mi 25 (Chin State pan mi 10 leh Manipur pan mi 15) teng pen East Pakistan ah training kuan dingin Jan 7,1966 in Minbung panin Aizawl lam zuan in hong kuankhia ta uh a,Jan 11,1966 nitak nai3 hunin Aizawl hong tung uh hi.Aizawl hong tung tak uh ciangin MNF te’n atung nading uh nagel sakin President Pu Tun Kho Pum pen MNF Fin.Secretary Pu Lalkholiana inn ah natung sak uh hi.Tualo adang teng pen Vaivakawn ah tungsak uh hi.Tua panin East Pakistan a training paiding teng pen group nih in khen in group khat pen Pu Vung Za Lian in makaih in,group dang khat pen Pu Neng Za Thang in makaih in amau teng napai masa uh a,Lunglei ah kituah kik dingin naki-thukim uh hi.

Tualo adang President Pu Tun Kho Pum, a bodyguardpa Captain Pa Tawng leh Pu Pau Kho Hau cih thum teng pen Aizawl ah na taam lai uh a,Jan 15,1966 ni-in Pu Tun Kho Pum bodyguardpa Captain Pa Tawng,Pu Pau Kho Hau,President Pu Tun Kho Pum cih teng leh MNF Pu Laldenga leh a Cabinet cih teng tawh mailam kalsuan ding dan leh panlak dan ding (Stratergy) tawh kisai thu kikup khopna khat hong nei khawm uh hi.Tua thu kikup khopna ah MNF lam panin thusungna nanei masa uha 1. Nam min dingin Mizo, 2.Khuapi dingin Aizawl,3. Zattang pau dingin Duhlian pau(tulai tak-a Mizo pau kici pen) ci-in thu nasung uh hi.Tua tawh kisai Pu.Tun Kho Pum in a dawn kikna 1. Mizo I cih pen tulaitak Lushai Hills District sunga teng bekin pom uha, pau dang zangh te'n pomlo uh hi. 2. Khuapi ding Aizawl cih pah mawk pen Independence (suahtakna) zong ki-ngah nailo ahih manin kikhen satthei nailo hi. Bang hang hiam cih leh Independence ngah khitteh Khuapi ding koi mun,kizop na dingin kolai laizang pen, lem pen hiam cih en-in Aizawl, Lamka, Tedim,Falam, Matupi etc, hisak ni. 3. Zattang pau ding pen Literature base a, mipi'n koi pen zangtam pen cih ah hong kinga dinga hong piankhiat hun hong om maiding hi,ci-in nadawng kik hi.

Hih bangin thukikup khopna hong neih khopna vuah hong ki-thukim theih loh uh ciangin bang le bang le ci-in Front khat tuak a pang ding, haksatnate ah kihuh ding, Sialkaltang dung tengah a tamzaw te'n Lushai Hills himah leh Chin pomzaw uh ahih manin tua kuam teng pen CLA te’n huam dingin MNF in na piakhia uh a,tuamah bangin MNF zong Manipur sungah a ut hunhun in suakta takin hawhthei ding,CLA te zong Mizogam sungah suakta tak mah a hawh thei dingin ki-thukim uha, tua pen Saitual Agreement kici hi.Tua thu kikup khopna panin Pu Tun Kho Pum in Pu Pau Kho Hau tawh Pakistan khuapi Rawalpindi ah Pakistan Kumpi pa Ayub Khan tawh kimu dingin pai dingin agelsa pen hong khel kikin,Pu Pau kho Hau tangin MNF makai khat mah ahi Pu Halleluijah tawh pai dingin na khensat kik hi.Hih bangin Pu Tun Kho Pum in thu akhel kik vat na ahang pen tutungin I lawm Mizo te tawh pangkhawm ding I hih manin amau lungkimna dingin MNF te makai Pu Halleluijah pen Rawanpindi ah nang tangin amah katonpih dinga,nang training sin ding te namakai ding hi ci-in Pu Tun kho Pum in Pu Pau Kho Hau kiangah nagen hi.Tua bangin thu kikup khopna aneih uh hong man khit lian leh MNF te sumkem pa zan nai 2Am kiim pawlin meeting na munah Mawtaw tawh hong tungin a zanzan in Pu Tun Kho Pum leh alawmte paikhiat pih in sun tawmtung hongtai khit zawh uh nitak nai 3 kiim pawlin Lunglei hong tung uh a,Traning sindinga,apaikhol masa galkapte tawh hong ki-tuntuah ngeingai uh hi.Tualai munah zan atam nop uh hangin Security muan huailo ahih manin nitak nai 8 hunin Pu Tun Kho Pum leh Pu Halleluijah te Demagiri ah pai-in tua panin Rawalpindi pai ding uh ahih manin Pu Pau Kho Hau tawh Lunglei panin hong kikhen ta uh hi.

Tua bangin hong kikhen khit uh ciangin Pu Pau Kho Hau in CLA galkap 25 teng makaih in Dirchungtlang ah MNF galkap 25 te tawh hong ki-mukhawm ngeingai uh hi.Tua bangin hong kimuh khop ngeingai khit uh ciangin East Pakistan gam lam zuan dingin 8 km kiim asau Phalva luidung hong zuito uh a, tua panin Lengtlang (East Pakistan tu-in Bangladesh tawh gamgi) akicihna mun ah hong zuito leuleu uh hi.Tualai panin gamlak mun khat ah MNF te min teng Zomi min in nakhel uh hi.Tua MNF te min teng hong khelkhit uh ciangin zan thapai in paito ngekngek lai uh a,East Pakistan gam Rangama district, Ruma Bazar akicihna mun hong tung uh hi.Tua Ruma Bazar mun hong tung tak uh ciangin Pakistan Forest Guard te’n na dawn tuah pah uh hi.Tua lai panin Pakistan Forest Guard te’n Barak lui akici Lui lianpi ngei khat a,gamsung Camp abawlna mun vuah na tungsak uh hi.Tualai munah Pu Pau Kho Hau in MNF galkap 25 leh CLA galkap 25 teng makaih in training sin na nanei uh hi.Tua a training sin na vuah an nek tuidawn leh zat ding vam kisam tuamtuam te Pakistan Kumpi in Boat tawh nisim in na puak den hi.

Hih bangin Zogam galkapte training sin in aom laitak uh Feb 15,1966 kum in MNF te’n Mizo Hills ah Kumpi do hong kipan ta uh a,Aizawl,Lunglei,Champhai cih mun a om India galkapte omna mun teng MNF te’n hong sim mang uh hi.Hih bangin hong sim na vuah MNF te’n India galkapte omna mun teng buluh zo bek thamlo in ,India galkap pawlkhat zong hong hingmat kha uha,Mizo Hills mun tuamtuam te ah MNF te Flag nakhai zo uh hi.Hih bangin MNF te’n gual zawhna hong ngah tak uh ciangin Mizogam pen Independence hita cih dan khawngin nagen ke ta uh hi.Tua bangin MNF te’n Mizo Hills sung tengah khakhat sung khawng hong gualzo vat uh a,tuazawh khakhat khit ciangin India Kumpi zong hong kipan kikin Mizo Hills sung mun tuamtuam tengah Jet Fighter vanleng tawh Bomb khia ziahziah uh ahih manin Inn leh Lo tampi hong kisia hi.Tua khit banah leilam pan a,asim India galkapte in numei,naupang kuamah dawm vetlo in Mizo hills sung teng hong simto mang uh ahih manin Mizo gam buaina pen hong khauhpai tetek ta hi.Tua bangin Mizo gam buaina hong khauhpai tetek tak ciangin India Kumpi in Mizo Hills pen Disturbed Area in ciamteh in,thuneihna sangpen tawh na uk uh hi.

Hih bangin Mizo gam sung hong buaigawp tak ciangin East Pakistan a galsiam sin MNF leh CLA pawl zong hong omkhong thei nawmlo ban vuah aciah na ding uh lamkal ah India galkapte tamin,Innlam zong lung himawh kawm uh ahih manin Kha 3 sung a training ding uh pen Kha khat leh alang kiim bek training in Innlam zuan dingin hong khensat ta uh hi.Tua bangin training sinpawl in Innlam ciah ding hong khensat tak uh ciangin Pakistan khuapi Rawalpindi a om Pu Tun Kho Pum leh MNF makai Pu Halleluijah te zong East Pakistan a, galkap training sinte kiangah hong ciahsuk ta uh hi.Tutung training sin pen ‘Tasken Declaration”acihna hang un galvan tam piak khol lo uh a,ahizongin sum pen a puak khop uh Ippi lian sim dim khat napia uh hi.Tua bangin ciahding hong kithawi tak uh ciangin Pakistan Kumpi in Bawng lian khat gawh in pawi lianpi khat nabawl sakin (Mangpha khakna) vai khakna na neih pih hi.

Tua panin East Pakistan gam a,galsiam sin pawl zong Inn lam zuan in hong ciahsuk ta uh a,March 13,1966 in Mizoram Lunglei hong tung uh hi.Lunglei hong tung tak uh ciangin akuan lam uh tawh naki bang nawmlo in mun khempeuh phial ah India galkapte tawh kidona vive hong om hi.Lunglei ah CLA galkapte ni 3 sung taam lai uh a,a ni 4 ni nitak lam ciangin India galkapte hong pai cihthu za uh ahih manin MNF Pu Laldenga ii khua ahi Pukpui lam manawh dingin hong dingkhia uh a,zingsang khuavak philphial hunin Pukpui khua hong tung uh hi.Pukpui khua hong tung uh ciangin tawmvei tawlnga uha,tua panin Sialkaltang lam manawh in hong pai suak uha March 29,1966 in Teikhang hong tung kik uh hi.Teikhang ah CLA galkap training sinte hong tung zawh uh ni nih khit ciangin Tuisanzang ah Baklui Camp na bawl uh hi.Tua bangin CLA galkap te’n ma nakek toto uh ahih manin Mualngat (Tengnoupal), Khaukhual (Churachandpur) leh Teikhang (Mizoram) cih Camp thupi te nanei ta in MNF te tawh zong kithutuak tak leh kithuhual takin hong kikhawl thei uh a,CLA galkapte in Sialkaltang dung tengah panla in nuam hong sa mahmah uh hi.Mipi te’n zong CLA galkapte muang uh ahih manin Chin mi teng kigawm khopna dingin na hong sem zo dingin na lamen tek uh ahih manin na panpih mahmah tek uh hi.(Hih kum sung 1966 kumin MNF te’n India galkapte Camp thupite akap nading uh thau kician neilo ahih manin Pu Laldenga in Pu Tun Kho Pum kiangah huhna nangen leuleu a,Pu Tun Kho Pum in zong Zosuan tetek ii hih na tawh na hehpih zela,galvan (Rifles 303 Lawng 500) na pia hi).

Pu Tun Kho Pum Omlohkal Sialkaltangdung Ah MNF Te'n CLA Te Tungah Buaina Tuamtuam Abawlna
Tua bangin CLA te’n Camp thupite nei-in,hong picing zawkdeuh tak uh ciangin Pu Tun Kho Pum in zong gal muanhuai kisa ta hiding hiven 3rd batch traing sinding angaihsutna in Teikhang nusia in Lamka lamah hong zinkhiata hi.Lamka lamah hong zinkhiat tak ciangin ama omloh sungin Sialkaltang thuneihna leh vaihawmna te Pu Pau Kho Hau tungah na ap hi.Tua bangin mipite in CLA galkapte in Chin miteng kigawm nadingin asem zo dingin amuang mahmah laitak uh Pu Tun Kho Pum khualzin kalin Sialkaltang dung ah MNF te’n hidan in thu buaina tuamtuam na zong uh hi.

(1) MNF Ngoupa Battalion te’n akisap uh annek,tuidawn leh vai tuamtuam te PNC Sialkal Block V/President Pu Suakdam kiangah nangen zel uh hi.Tua bangin anget uh ciangin Pu Suak Dam in koih PNC te’n CLA galkapte akem kahih man un MNF leh CLA galkapte kilemna bawlna tawh kizui in Sialkaltang dung pen CLA galkapte panlakna thuneihna mun ahih manin nakisap nong nget te uh kongpia zo kei ding hi ci-in nadawng kik zel hi.

(2) MNF te’n CLA Brigadier.Hang Kho Kam leh Major.Lam Kho Siam kiangah MNF leh CLA galkapte pangkhawm uh ahih manin noih Fund hong dong unla,sum leh pai nangah zahte uh hong ap un ci-in nagen uh hi.Tuahun laitak Pu Tun kho Pum tanga President alen pak Pu Pau Kho Hau pen Sadar Hills lam ah Fund zongin azin laitak ahi hi.Tua ahih manin Brigadier.Hang Kho Kam in akisap khak leh ci-in Fund nakhon uh a,ahizongin MNF te kiangah Fund sum dong teng ap ding pen buaina aom khak ding uh lau ahih manin amauthu in khensat ngamlo in aplo in nakem phot uh hi.Tua leh a sawtlo in Pu Pau Kho Hau zong akhualzin na pan hongtung kik ta ahih manin athu paizia teng nagen pah uh a,tuakhit ciangin avek un thukikup khopna khat nei-in MNF te kiangah Fund sum adong te uh aplo dingin khensat uh ahih manin na aplo uh hi.

(3) PNC Sialkal block a telcing thak Pu T. Thanghruai leh Pu Pau Kho Hau in PNC General fund sum dong dingin Daidou khua ah napai uh hi.Daidou khua atun uh ciangin Pu T.Thanghruai in hih Daidou khua sum dong ding pen CLA galkapte khon ding hi ci-in na nungkik kik hi.Tuazawh a sawtlo Dec 31,1966 ni-in CLA galkapte in Kholian khua ah Fund sum akhon uh leh a khuazangbup un napia ngai pah ziahziah uh hi.Tuakhit ciangin Tangnuam khua ah khon leuleu uh a,Zankhat thu in Tangnuam khuazangbup in napia ngai leuleu uh hi.Jan 1,1967 kum ciangin CLA galkapte in Daidou khua ah Kumthak nazang uha,tuakhit ciangin Fund sum nakhon uha, Fund sum akhon khit uh ciangin Daidou khua ah CLA galkapte ni 4 sung na taam uh hi.

Hih hunsung mah in MNF Commissioner Vanhela zong Kholian khua ah vapai in, Kholian khua mite in CLA galkapte in sum adong vai uh Pu Vanhela tung ah nagen uh hi.Tua panin MNF Commissioner Vahela in a Volunteer te sawl in Daidou khua a,aom CLA President Pu Pau Kho Hau Kholian khua ah nasam sak suk in,Kholian High School ah kimuhpih in thu kikupna khat nanei uh hi.Tua akimuh khopna vuah athu kikupte uh pen anuai a, dan ahi hi.

Commissioner Vanhela: Chin Liberation Army ah na dinmun bang hiam?
Pu Pau Kho Hau : P.A. to President ka hi. Nang e MNF ah bang na hia leh?

Commissioner Vanhela: Commissioner ka hi hi.
Pu Pau kho Hau : Commissioner a,napan zawh kum bangzah phakhin ta a?

Commissioner Vanhela: Kum 2 pha khin ta.Tua leh Kholian khua ah CLA galkapte in House tax khon hong kici a, na khon uh hia leh?
Pu Pau Kho Hau : He, ka Headquaters te thupiakna tawh kizui a,ka khon uh ahi hi.

Commissioner Vanhela : Hih mun Mizoram ahih manin, MNF te khutnuai ah om ahih manin na sum khonte uh VC te khut ah piakik unla, tuadan in alem theih kei dinga leh na sum khon nate mimalkim ciat tungah va piakik un,tuadan in na piakkik kei vua leh ka galkapte uh lungkimlo ding uh hi.
Pu Pau Kho Hau : Ken house tax ka khon pen, keithu a,ka khon hilo a,Ka Headquarters in a honsawl dungzui a thumangtaka thupiak sem ka hi hi.Tua ahih manin,hih sum te ka Headquaters ka tundiga nang tawh iki-muh thu zong kagen ding hi. Kei ka Headquaters te hong sawl ahih manin hih Fund sum te ka Headquaters ah katun masa phot ding hi.

Commissioner Vanhela : Eh!Tuadan ahih dinga leh ka galkapte lungkimlo ding uh hi.
Pu Pau Kho Hau : Eh! Nang na galkapte thu zuizaw na hi hiam? Ahihkeileh na galkapte in nang thu hong zuizaw uh maw?

Commissioner Vanhela : Kei thu hongzui zaw uh.
Pu Pau Kho Hau : En in, kei kagalkapte in kei thu hongzui uh a, tu-in kacih ciangin atu uh a, ding un kacih ciangin ading uh a, pai un kacih ciangin apai uh hi. A limlim in hih thu ah nang Commissioner kum 2 khawng semta cina, bangcihdan ahia MNF leh Chin Army te kizop dan sungthu phawk khalo tawh kibang kongsa hi.Tuma in Aizawl ah Pu Laldenga leh a cabinet te tawh CLA President leh Kei, banah President bodyguard pa tawh Pu Lalkholian inn ah kilemna akibawlthu phawk khalo na hi hiam.Tualai ah MNF leh CLA galkapte pangkhawm in nasem ding, Mizoram a Paite bial (Sialkaltang dung) teng Chin Army te thuneihna hi ding, tualo adang teng MNF te thuneihna hi ding cih ahi hi.Tua thu tawh kizui in Pu Laldenga in MNF tangvalte Pakistan ah training dingin hong tonkhop pih un ci’n na ngen a, koihzong “hi hen” ka ci uh a, MNF tangval te hon khat Pakistan ah ka lutpih uh hi.Tua ahih manin hih thukimna omsa tawh kizui in kisuanglah hetlo takin na asem mah ka hi hi.

Commissioner Vanhela : Ahihleh Pu a, tuzan hong giak phot lecin aive, Politics thu khawng ih kikum khawm kawm lodia.
Pu Pau Kho Hau : Kei tuacih danin hun zang manlo ding hing.Tuzan sung ka kikhin kul ding hi.

Commissioner Vanhela : Tua ahihleh CLA leh PNC aki lamdangna bang ahia?
Pu Pau Kho Hau : Ami kibang himahleh apawl pen atuam. Chin Army pen underground movement hi in, PNC pen Paite mite kizopkhopna ahi hi.

Tuahun laitak galvan lampan I et ciangin CLA galkapte 303 thaute tawi ta uh a, MNF ten 22 leh single barrel te bek atawi uh hi.Tua bangin holimna aneih khit uh ciangin Pu Pau Kho Hau zong agalkapte nih tawh Tangnuam khua ah hong giakphei suak uh in,Zingsang khuavak ciangin Daidou khua ah zing an nane phei uha January 5, 1967 in Daidou khua panin Mimbung ah hong tungkik ta uh hi.

4) Pu Tun Kho Pum omloh kalin Champhai MNF DC te in Mizoram ah.
Educational institution leh Office teng khempeuh khak dingin thupiakna nanei uh hi. Tuahun laitakin Pu Pau Kho Hau pen Manipur lama azin laitak ahi hi. Tua bangin MNF te’n thupiakna aneihna hang un Mimbung a ECC (tu-in EBC) Mission Jr. High School nagawm zong kikhak sak hi.Tuahun laitak tua ECC sangah siapi pen head master Rev. Kam Za Kham ahi hi.Hih Sang pen Pu V. Vungkhai,Pu Hang Za Dal leh midang pawlkhat kipawl in aphot khiat uh ahi hi.Tuazawh a sawtlo in Pu Pau Kho Hau zong akhualzin na panin hong tungkik ta a,MNF te’n sang teng khak mang dingin thupiakna aneih uh pen CLA te leh MNF te kilemna bawlna sa tawh kituak salo ahih manin Sangte hong ngaikik dingin thupiakna nanei in hih vai ah MNF te’n mat leh bawlsiat na khat ahong neih vua leh keiman tavuan kala ding hi ci-in Pu Pau Kho Hau in Siapi Kam Za Kham tungah nagen hi.

Tuazawh asawtlo in Khodungsei khua a MNF galkapte mi 15 khawng galhiam tawh Minbung ECC sang ah honglut in Siapi Kam Za Kham,Sia Hang Za Dal leh Khuasungmi sangsia 4 teng hong manin,sanghuang sungah nung leh hen in amai natuam sak uh hi.Tuathu Pu Pau Kho Hau tungah thupuak hong tungin Pu Pau Kho Hau in zong azakphet in vadelh to pah in,aphual atungphet leh nami mat te uh “phel un,phel un” ci-in MNF te kiang agen leh MNF galkapte in zong thumang takin naphel pah vanglak uh hi.Tua ciangin Pu Pau Kho Hau in MNF te kiangah hih Sang ahong Sia te’n amau thu a,ahong uh hilo a,kei thupiakna tawh ahong uh ahi hi.Tuakhit banah kei pen CLA te Administration vaipuak alen kahih banah President Pu Tun Kho Pum omloh kalin President vaipuak alen ahih na thute nagen hi.Tua ahih manin hih Sang hongsak kik na vai ah Sang Siate mawhna khat zong omlo ahih manin mat akul leh kei hong man unla,thah akul leh kei hong that un ci-in Pu Pau Kho Hau in MNF te kiangah a nagen leh MNF Commander pa in tungsiahte thupiakna tawh kizui-in hih Sangsia te pen tu-in Ngoupa Battalion ah puaksuk kul ding ahi hi ci-in nadawng hi.Tualeh Pu Pau Kho Hau in MNF te kiangah tuadan in Sang Siate Ngoupa ah napuak sawm vua leh ken zong Ngoupa ah kongzui ding hi ci-in agen leh MNF te’n nang nong zuih ding kisamlo hi ci-in naphal lo uh hi.Tuani pen guah phiin siuhseuh in nitumkuan himah leh Pu Pau Kho Hau in nazui teitei in Khodungsei atun uh ciangin khua mialta ahih manin tuazan pen Khodungsei khua ah avek un nangiak uh hi.

Tua Khodungsei khua ah angiak na vuah azan sung mah in MNF galkapte Pu.Pau Kho Hau kiangah Statement ladingin napai uh ahih manin Pu Pau Kho Hau in zong ahehsuak in MNF te Commander pa kiangah na (rank) zaa bang ahihiam ci-in adot leh MNF te Commander pa in Ngopa area ah MNF (Second-in-command) Duh Tatzin Hmu 05 Captain/Major rank ahihi ci-in nadawng a Pu Pau Kho Hau in tuadan ahih leh kei kiangah Statement la dingin na zaa neulua hi,kei pen CLA te President-in-charge ka hi hi ci-in agen leh MNF te zong bangmah apau ngam nawm kei uh hi.Tuazan bup pen MNF galkapte in amakai pa uh duty kilaih in acing na kikhel ngengek uh hi.Azing ciangin MNF galkapte in MNF Ngoupa Commissioner Chawngnuna inn ah Pu Pau Kho Hau leh MNF Ngopa Commissioner Pu Chawnghnuna te nakimu sak uh hi.Tualai ah Pu Chawngnuna in Pu Pau Kho Hau tawh kimu dingin misawl in MNF Home Minister pa asap sak uh leh Home Minister omna ngam lalua ahih manin napai thei lo hi.Tua bangin Home Minister pa apai theihloh tak ciangin Pu Chawnghnuna leh Pu Pau Kho Hau te hong kimu khawm uhhi.

Tua aki-muhkhopna vuah Pu Chawngnuna in Pu Pau Kho Hau kiangah nunglam in nang ii khualzin kalin,Brigadier Hang Kho Kam kiangah MNF Fund ding nakhon un ci-in thupiakna anei pen keimah hi ingh ci-in agen leh Pu Pau Kho Hau in tua bangin kei omloh kal sum khonin nasawl pen na gamtatdan dikhetlo hi ci-in nagen pah hi.Tuakhit ciangin Pu Pau Kho Hau in Pu Chongnuna kiangah MNF ah nasep zawh kum bangzah sawt ta hiam ci-in adot leh Pu Chawngnuna in MNF ah Commissioner kasep zawh kha 3 khawng pha pan hi ci-in nadawng kik hi.Tua bangin adawngkik tak ciangin Pu Pau Kho Hau in na Service a tawm luatna hangin thupaizia tamtel mello nahih manin hibangin agamta khial nahi vemaw ci-in Pu Pau Kho Hau in Pu Chawngnuna thuhilna nanei hi.Tuakhit ciangin Pu Pau Kho Hau in Pu Chawngnuna kiangah MNF President Pu Laldenga leh CLA President Pu Tun kho Pum te in Aizawl aa, kithukimna aneih na vuah Sialkaltang dung pen CLA galkapte thuneihna hi ding acihna tawh kizui in hih Sangte nagawm kahong sak kik uh hi in,tuakhit banah MNF Fund zong Sialkaltang dung ah nakhon loh ding uh ahi hi ci-in gen in Pu Pau Kho Hau in Pu Chawnghnuna thuhilhna nei in,tuakhit ciangin a gamtat khialhna teng namai sak hi.

Hih bangin MNF te’n Sangsia te amatna hang un CLA galkapte lungkimlo uh ahih manin MNF Senetor khat leh a nungzuipa Teikhang ah na man uh hi.Tua bangin CLA galkapte in MNF galkap 2 amat tak uh ciangin MNF galkap 2 kamtai in Pu Chawngnuna kiangah hong taito pah uh hi.Tua bangin MNF kamtaite Pu Chawngnuna kiangah hong tung laitak un Pu Pau Kho Hau leh Pu Chawngnuna akiholim laitak uh ahih man in Pu Chawngnuna in zong Pu Pau Kho Hau kiangah kamtai te gen teng nagen pah a,CLA galkapte mat MNF galkap 2 leh MNF te mat Sangsia te akikhek na dingin Pu Pau Kho Hau kiangah ngetna nanei pah hi.Pu Pau Kho Hau in zong Pu Chawngnuna ngetna thukim ahih manin CLA galkapte mat MNF galkap 2 te akhah kikna ding un lai nagelh sak pah hi.Hih bangin Pu Pau Kho Hau leh Pu Chawngnuna akiholimna vuah Pu Chawnghnuna in Pu Pau Kho Hau kiangah nung lam in Kholian tangdunga CLA galkapte in sum akhon na hang un MNF Commissioner Vanhela in CLA galkapte tungah pau khialh,hih khialh hong neihna te zong nong maisak nadingin kongthum hi ci-in Pu Pau Kho Hau kiangah nangen hi.Hih bangin Pu Chawngnuna leh Pu Pau Kho Hau te holimna hong neih theih khit uh ciangin Pu Pau Kho Hau zong MNF te mat Sangsia te tawh Ngopa panin Minbung lam zuan dingin nitak nai 4 pawl in hong ding khia ta uh hi.Hihbangin MNF te’n amimat uh Sangsia te asuahtak sak uh ciangin CLA Brig.Hang Kho Kam in zong ami mat uh MNF galkap nih te nasuakta sak uh hi.

Hih hun khawng pan kipan in CLA galkapte leh MNF te kikawm kal ah kitheih siam lohna hong kipan pan ta a,MNF te’n CLA galkapte kiangah “hua hong hih un,hua hongpia un”nong piak kei vua leh kong kap ding uh hi cihdan thute hong tam deuhdeuh ta in,himah leh CLA galkapte lam panin kinawknawk lohna dingin anem thei tawpin ana dawngzel uh hi.Hibang dan thu leh la tuamtuam teng hang tawh CLA galkapte leh MNF galkapte kikawm kal ah kilem lohna hong nasiat semsem tak ciangin akiphiin na un amau ii Camp ciat ah a galvan teng uh kaikhawmin thau na lawm ziahziah thei zel uh hi.Hih bangin MNF te leh CLA galkapte kikawmkal ah kilem lohna,kithu tuah lohna leh kitheihsiam lohna te hong nasiat semsem tak ciangin Sialkal tang dung ah MNF te leh CLA te aom khopna vuah kimuan lohna pen hong nasia tektek ta hi.

Pu Tunkhopum Baite leh CLA Te Huntawpna Lamte.
CLA President Pu Tun Kho Pum Baite zong 3rd batch trainig paikik na ding vai hangin khualzin na aneihna panin Jan 12,1967 ni-in Sialkaltang ah hong tungkik ta hi.Sialkaltang hong tungkik tak ciangin (Paite National Council) PNC te tawh maban paiding dan te kikup khopna hong nei khawm hi.Tuahun laitakin Sialkal Block ah PNC President alen pen Pu Suak Dam hi-in,Secretary pen Pu V.Vung Ngul ahi hi.Hih thu kikupkhopna ah CLA galkapte thukizak tuahna ding leh a kisapna mun vai tuamtuam te ah hoih takin pangkhawm theihna dingin Emergency/Information Office khat Teikhang ahih kei leh Mimbung ah kihong hen la hileh thugelna ding leh Sum leh Pai kepna ding zong lempah dinga,President Pu in Sum leh Pai te alom,atangin apaisuk,apaitoh na te ah Bag tawh kuah in apuakpuak zong kituahsia vat thei ahih manin Finance Secretary sum kempi ding khat kiseh in tua in Sumvai tawh kisai teng khempeh len leh cih thute kikuppi-in nei pen uh hi.Tuakhit ciangin Pu Tun Kho Pum in Pu Pau Kho Hau kiangah 3rd batch training bawl ding vai hangin Ngopa lam ah zinsawm kahih manin,Sialkaltang dung Murlen khua pan kipanin,I Politics te mipi tungah na gengen inla,CLA galkap ding zong mi nakai khawmkhawm kawmin ci-in kan vaikhakna nanei hi.

Hiteng agen khit azing ciangin Pu Tun Kho Pum zong amah guak Ngopa lam manawh in hong zinkhia ta a,hih pen Pu Pau Kho Hau leh Pu Tun Kho Pum te kimuh tawpna zong hong hipah ta hi.Pu Tun Kho Pum zong Ngopa hong tungtak ciangin Pu Pau Kho Hau kiangah laikhak khat na khak in tua laikhak na sungah kong vaikhak sa mah bangin I Politics te Sialkal tang dung pan Murlen dong napha inla,I Politics te nakpi takin nagen ding a,CLA galkap zong na kaikhawm kawmkawm ding hi ci-in lai na khak hi.Hih bangin Pu Tun Kho Pum in Pu Pau Kho Hau laikhak aneih zawh a sawtlo in Pu Tun Kho Pum pen MNF galkap Lamrima Battalion te in naman ta uh hi.Hih bangin MNF Lamrima Battalion te’n Pu Tun Kho Pum amatna uh ahang pen MNF President Laldenga thupiakna hang tawh amat uh ahi hi.MNF President Laldenga in Pu Tun Kho Pum amat nopna ahang ahih leh-

(1)CLA Chief of Army Staff Pu Son Kho Pau India galkapte in hong mat tak ciangin galvan,galvai tawh kisai bangci malak ding cih tawh kisai akiciamna uh Laite pen Pu Tun Kho Pum Baite tungah ap ahih manin tua akiciamna uh Laite pen MNF Pu Laldenga in deihgawh ahih man.

(2)MNF Pu Laldenga in Pu Tun Kho Pum ii paipih CLA Policy pen pompih zolo Chin tangin Mizo zang zaw leh ut.

(3)Pu Tun Kho Pum in Pakistan Kumpi tawh direct in kizopna nei-in galvan thauvui,thautang leh sum leh pai a kisap zahzah Pakistan Kumpi in cilbawl hetlo in,pia-in huh ahih manin tua pen MNF Pu Laldenga in haza in Pakistan tawh direct kizopna pen ama khutsung ah aom ding adeih man.

(4)Mizogam Sialkaltang dung ah CLA galkapte in phualsat in thuneihna nei uh ahih manin tua pen Pu Laldenga in deihlo in haza cih dan leh vai tuamtuam hang teng tawh Pu Laldenga in Pu Tun Kho Pum tawh aki kamciamsa thukhum te palsat in Pu Tun Kho Pum upmawh hetloh kalin matdingin MNF Commander te kiangah thupiakna khauhtakin napia ta ahih manin MNF galkapte in zong asun,azan cih omlo-in Pu Tun Kho Pum mat dingin na zongzong ta uha Jan,1967 kum khuavot mahmah hun laitakin MNF Lalrima Battalion te’n naman kha ta uh hi.MNF galkapte in Pu Tun Kho Pum amat khak tak uh ciangin a bulhlai Citizen nai leh a bulhloh Rolex nai te suhsak uh a,Citizen nai pen Adjutant General R.Sangkawia in tangin,Rolex nai pen MNF President Laldenga in tang hi.

MNF galkapte in Pu Tun Kho Pum hong mat khit zawh uh anung ciangin CLA te Baklui Camp buluh dingin MNF galkap mi 25 na kuan uh hi.Hih hun laitak Baklui Camp ah CLA galkap mi 15 thau hoih tak tawh na om uh ahih manin MNF galkapte in CLA galkapte ii lehdo kik ding lau uh ahih manin hih Baklui Camp buluh nading ah MNF galkapte in Pu Tun Kho Pum na tonpih in Baklui Camp atung uh ciangin CLA galkapte tawh thaulawng kingat tuak uh hi.Tualai ah MNF te’n CLA galkapte kiangah nong kap vua leh na makai pa uh kathat lum ding uh hi ci-in MNF te’n CLA galkapte vau uh ahih manin Pu Tun Kho Pum in CLA galkapte kiangah kei om kahih manin bangmah nacih kei un ci-in CLA galkapte thupia ahih manin CLA galkapte in zong athau uh lei ah khia uh a,tua panin MNF galkapte in CLA galkapte avek un nung leh hen in amai uh tuamsak uh a,Teikhang khualai zangah kai-in anung leh mai panin thau tawh cingin Teikhang khuataw lam a,Mission Sangah paipih uh hi.Tualai munah MNF galkapte in khuasung mite kiangah annek ding anget uh leh khuasung mite in pia nuamlo uh hi.Tua panin MNF galkapte in CLA galkap amat te uh tawh Selam khua lam manawh in pai uh a,Selam khua atung madeuh uh kenlak ah Brig.Pu Hang Kho Kam pen anung lam pian aa,apai ahih manin thakhat thu in kenlak ah ahih theih tawp in aki khuksuk gawp leh MNF galkapte in thau tawh na kapsuk pah ziahziah uha,ahizongin nakha lo uh ahih manin Brig.Pu Hang Kho Kam pen tuapan in Teikhang lam manawh in hong ciah kik thei hi.Tua panin MNF te’n CLA galkap amat te uh Selam khua ah zan giakpih uh a,Zingsang lam pawl ciangin MNF te’n Selam khuanawl ah Pu Tun Kho Pum Bodyguard pa Captain Pa Tawng na kaplum uh aa,aluang lamlai ah nusia in taisan ziau uh hi.

Tualo amimat adangte Champhai khua a,Phalva Camp Headquaters lam ah puak dingin paito pih uh a,tuasung pan pawlkhat asuakta om uh a,pawlkhat te ahih leh koilai tung cih kithei nawmlo in,Pu Tun Kho Pum ahih leh mundang Tuichang Camp ah puakin man uh hi.Tua Tuichang Camp ah MNF te’n Pu Tun Kho Pum pen Guapum akiziing takin aki-phan sung khat ah khum uh a,tua guapum tawh aki-phan Pu Tun Kho Pum omna pen lupla,lup theilo,dingla,kiding tang theilo khat in abawl uh ahih manin Pu Tun Kho Pum thuakna pen ahaksat ding dan mihing kam in gen zawh ding hilo hi.Tuakhit banah MNF te’n Guapum ziingtak tawh phan in akhum na sung vuah Pu Tun Kho Pum in asilh lai puansia pan dildel tawh January khuavot thuakin na om hi.Tuakhit banah Pu Tun Kho Pum pen Tuichang Camp sungah MNF galkap Section khat ta in cing den uh a,MNF President Laldenga in Pu Tum Kho Pum acingte kiangah thupiakna khauhtakin pia a,hih nami mat pa uh pen kua mah tawh kiho saklo ding leh hih na mimat pa uh na taisuah khak vua leh noih hong kithat lum ding hi cih danin thupiakna khauhtak tawh thupia ahih manin acing te’n sun leh zan in duty kilaih in hoihtakin nacing tinten den uh hi.Tualeh ni khat MNF galkap C.Vanlalrawna akici pa in Pu Tun Kho Pum kimat dan amuh ciangin hehpihhuai sa ahih manin na hopih sim a,Lawmpa bang na cizel a,ann na nethei hia ci-in ava dot leh Pu Tun Kho Pum zong aci liing kekeuh kawmsa in tu-in hong nehno in,khasialua zaw hiding hiven akhitui te hong tak kauhkauh in,apuan silh ninpi tawh a khituite hong nul in ki pasal sak takin tua MNF galkap pa thudotna te hong dawng hi.“hih ka dinmun hi a haksat leh a nop ding dan na theisiam mai ding hi” ci-in agen leh MNF galkap pa in zong Pu Tun Kho Pum dawng kikna pen hisa mahmah in a lungsim tawngah hehpih mahmah leh na lainat pih mahmah hi.Tua khit ciangin Mizo galkap pa in bangcih na om zel a,ci-in a dot phat kik leh Pu Tun Kho Pum in a mit hak gige kawm sa in Mizo galkap pa en in“kasi ding” hi ci-in na dawng ahih manin Mizo galkappa in zong na khasiat pih mahmah a,ahizongin Pu Tun Kho Pum aa dingin bangmah hih theih anei tuan kei hi.Hidan teng tawh Pu Tun Kho Pum pen akimatna Guapum kiphan sungah an zong nengei mello ahih manin vul ninnniang leh gawmgawp ta in sihding ngak bekin aom ahi ta hi.Tua leh Zingsang khat Feb5,1967 ni-in Tuichang lui dung pen a ngeina mah bangin mawkkai leh daitui te hong kia in,khuavak hun zong angeina mah bangin hong vak kik a,Pu Tun Kho Pum in Zosuan te aa dingin asep ding teng sem ngai man nailo pi- in, MNF galkapte in Zingsang nai 7 leh minutes 3 hun in cikziat huai takin Rifle thau tawh hong kaplup sak ta uh hi.

MNF te’n Pu Tun Kho Pum a thahlup khit zawh uh a sawtlo in Sialkal Block a, PNC President Pu Suak Dam tenna Teikhang khua ah MNF Ngopa Battallion te hawh in zankhat nangiak uh hi.Pu Suak Dam in zong asiam theih tawp in MNF te zin nado in aksa meh khawng na huan ke hi.Tua leh zingsang khuavak ciangin MNF te’n Pu Suak Dam kiangah nang sam dinga,hong pai kahi uh hi ci-in nagen ahih manin Pu Suak Dam in zong tua ahih leh ka nasep pih PNC Secretary Pu V.Vung Ngul zong kasam dinga,amah tawh kahong zui ding uh hi ci-in nadawng kikin,Pu Suak Dam leh Pu V.Vung Ngul zong MNF te sapna tawh kizui in MNF te nazui suk pah uh hi.MNF te’n Minbung lam manawh in paito pih pah uh a, km 3 kiim khawng apaikhit zawh uh Teikhang leh Hiangmun kikal atung uh ciangin MNF te’n Pu Suak Dam nung leh hen in Pu V.Vung Ngul ciahkik dingin sawl uh hi.Himah leh Pu V.Vung Ngul in MNF te gamtat zia aet ciangin ciahkik ding piang salo a,ahizongin MNF te’n nasih nop leh hongzui inla,nasih nop kei leh hong zuikei in ci-in navau uh ahih manin amah zong lungsim nuamlo pi-in Inn hong ciah kik hi.Inn hong tung tak ciangin Pu V.Vung Ngul in bangmah gen tuanlo-in,Pu Suak Dam pen mipil vang khat ahih manin hong kileh kik lel dingin kalam en hi ci hi.Ahizongin ama upmawh nabanglo-in Pu Suak Dam hong kileh kik nawmlo ahih manin alung uh patau uh a,khuasung miteng tawh kikum khawmin Pu Suak Dam hong zong uha,Pu Suak Dam luang pen Hiangmunte Khuakhung mun khat ah mihing khetlup na Khetbuk khat hong mu uh a,tua kiimteng aet pah vua leh sisan,naisan bebek na dim zihziah in,akhanga ken a,Singbul ah Pu Suak Dam luang namu uh hi.Tua ahih manin Pu Suak Dam pen MNF te’n Khetbuk tawh akhetlup khit uh ciangin Kenlak ah pai-in,tua panin Pu Suak Dam luang pen Singbul khat ah a awk hidingin um mawh uh hi. Tua ahih manin Pu Suak Dam pen Sialkaltang dung ah amipih Zomite a it man leh hangsan tak leh muanhuai takin na asep manin MNF te’n cikziatkhuai takin bawlsia in a thatlum uh ahi hi.

Hih bangin MNF te’n PNC President Pu Suak Dam athah lup khit zawh uh a sawtlo in MNF te’n Zomi makaite athahlupna uh pan khawl nai tuanlo in Tuisan zang a,Zaang lokho PNC Executive member 3 ahi Pu Vung Za Khai,Pu Lian Hnun leh Pu Pachung te na thatlum kik leuleu uh hi.Hih bangin Zomite in Zosuan teng gam khat ah kigawm khoptheih na dingin pan deihtak la-in asep uh pen MNF te’n Zomi makaipi teng hong thahlup sakna hang tawh Zomite sun mang Zosuan teng gam khat ah kigawm kik dingin mapangna anei CLA te sunmang pen maban abing hong suak ta hi.Hih bangin Mizogam Sialkaltang dunga, ateeng Zomite MNF te’n cikziathuai leh mulkimhuai takin a bawlsiat gawp tak ciangin Zomite zong Sialkaltang dung ah teeng gam nawmlo-in Manipur lam ah atai theiteng tai-in, Sinzawl, Thanlon, Mualnuam, Songtal, Kangkap, Singngat, Lamka, Imphal leh Assam a Karbi Anglong khua dong pha in hong lal khia mang uh hi.Hih hun lai-in Zomite in buaina athuap in kithuak kha a,India kumpi in Mizogam pen Disturbed Area in hong ciapteh tak ciangin Mizo te tawh imel,isa leh ihsisan kinai ahih manin Manipur gam Churachandpur dongah hong huam kha in India galkapte in Mizo te abawlsiat bangin Zomite zong hong bawlsia uh a,tua kawmkal ah MNF te’n cikziahetlo in Zomite bawlsia in,mulkimhuai takin Zomite tungah na tatsia uh hi.

Hih bangin MNF te’n Pu Tun Kho Pum hong thatlup sak khit uh ciangin CLA galkapte pen MNF te sim gawp na hang leh India kumpite mat na hang cih dan teng tawh hong kikhen kek mang uh a,tua dan teng hang tawh Pu Tun Kho Pum sihkhit zawh a sawtlo in CLA galkap te pen hong gamtang zo nawmlo uh ahi hi.

Pu Tun Kho Pum Luang Photkikna.
Pu Tun Kho Pum in adamlai-in kasih khit ciangin kaluang thupitakin kiphong kikding hi ci-in agen mah bangin asih zawh kum 47 acing khit (June,2014) kumin aluang Northern Mizoram Champhai District, Ngaizawl khua ngeia (MNF te Camp lui ) Tuichang lui ngei ah aki phumna kimu-in aluang thupi takin kiphong kikin a pianna khua Manipur gam Panglian khua ah kivui kik hi.Tuakhit banah Pu Tun Kho Pum phawkna in Lamka khuapi laizang mun Lamka Community Hall Campus, Hiangtam Lamka ah Pu Tun Kho Pum ii Liim (Statue) mualsuang pi khat kiphut in,hih (Statue) hoongna ah ZRO President Pu Thang Lian Pau Guite in hoongna nei-in,Dr.Pum Za Thang Tombing in Pasian kiangah apna nanei hi.

Thukhupna:
Pu Tun Kho Pum pen pil,ciim in gam leh minam ait mahmah leh Pasian aum,amuang leh kikhop bel mahmah khat hi-in adamlai-in Teikhang aa CLA te Camp sungah Late:23 sim in a galkapte biakpiakna naneih pih zel hi.Tuakhit banah Pu Tun Kho Pum pen Zogam leitang ngah kik na dingin thauvui,thautang tawh Kumpi te ado masa pawl hi-in,British gamkekte ii hong khen khat ahi gam thum ah aki-thehthaang Zosuan teng gam khat in I kigawm khoptheih na dingin panla in a it,a ngaih a nu,apa leh a Innkuanpih teng nusia in gam leh minam adingin a nuntakna piakhia in a sem khia khat ahih manin Zosuante adingin mi thupi leh mi manpha mahmah khat hi-in a tangthu pen leitung bei dongin bei ngeilo in aki gengen ding ahi hi.

Pu Tun Kho Pum Kammal Nunung pen :-

“A liangvai mahmah I gam leh I minam in ahong samkhia a, a nunghei thei kik kahi kei uh hi. Ko si mah le ung ka policy uh khang bangzah hiam khit ciangin kiphong kik veve ding hi; tua hun ding ka ngaklah mahmah hi.”

References:
1. Tunkhopum Baite and His Chin Liberation Army In The 1960s. (Written By/Dr.H.Thangtungnung)
2.     Former CLA Commander's Body Exhumed (Written By/S.Singlianmang Guite).
3.     Pu Thang Za Dal Hamburg,Germany I agelh -An Introduction to the Zo People of Bangladesh,Burma and India.
4.     Zolawkta Thucinbu Page 34 na aa,akigelh Pu Tun Kho Pum Baite Thu.
5. Phamsa Pu Tunkhopum Baite Sulnung & Zomi Political Movement. (By/V.Vungzamawi)
6.     Mangpha Gen.Tun Kho Pum Baite (By/Dr.Pum Za Thang Tombing).
7.     Gen. Tun Kho Pum Leh Col.Son Kho Pau kimuhna (By/Khambawi).
8.     Pu Gen. Tun Kho Pum sih dan.(By/Kham Bawi).
9.     General Tunkhopum Baite “Statue” Honkhiakhita. (The Lamka Post).
10.  Kei I Kagelh Lt.Col.Son Kho Pau Tangthu.

Photo Credit : FB Social Online Media.

Source :
from:Pau Mung plm.mung@gmail.com
to:Cinpu Zomi <cinpuzomi@gmail.com>
date:Fri, Mar 31, 2017 at 12:50 PM
subject:Pu Tun Kho Pum Baite tangthu laibusaal aa koih dingin hong khak ing.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Chin Liberation Army / CLA Gen. Tun Kho Pum Baite Tangthu. Laigelh ~ Pau Mung. Description: Rating: 5 Reviewed By: Cinpu Zomi
Scroll to Top