728x90 AdSpace

Hot
Menu
Zon-ol na Donate

Latest News

Galhang Jemadar Vum Kim (66033) Tangthu.

Galhang Jemadar Vum Kim (66033) Tangthu.


Jemadar Vum Kim pen 1920 kumin Tedim gam huam Khuasak khua ah suak hi. 1932 Kumin Chin Hills Battalion ah lut in Peengkul mut pawl ah kihel hi. Kum 12 aphak hun a kipan Chin Hills Battalion sungah lutin, Chin Hills Battalion sung pan a khangkhia khat ahih mah bangin a Battalion sung ah zong a Battalion pih te'n it in, zahtak ciat uh hi.

1939 kum, Kum 18 aphak tak ciangin Chin Hills Battalion sungah galkap in kisang ta hi. Amah pen Chin Hills Battalion sung panin a khangkhia khat ahih mah bangin a Battalion sung ah a kizang Hindi, Urdu leh English pau te hoihtak in kan in, na sin ahih man in hih pau nam thum te pau thei in, English tawh a kigelh news paper te zong na sim thei hi. Tuakhit banah a Battalion sung vuah Physical Training cih te kibawl zel ahih man in a ma ii hanciam na hang tawh Maymyo ah Physical Training sin dingin napai kha a, “Certificate of Qualification One” cih pahtawina nangah hi. 1941 kum ciangin Lance Naik (Lance Corporal) zaa hong ngah hi. Lance Coporal zaa hong ngah khit ciangin India gam Ambala khuapi ah galkap training vakah in, Ambala khuapi ah training kah aman khit ciangin Falam ah hong ciahkik in Havidar (Sergeant) ah a zaa hong kikhan hi.



Leitung galpi nihna hong piang tak ciangin (tulaitak a, Khai Kam Myo) Phatzang (No.2) camp ah camp cingin na om hi. 1942 kum Japan te'n Kalaymyo hong lak tak ciangin Chin Hills Battalion sung a,asem Sihzang galkap Commandos te tawh 1942, December kha in Kalaymyo ah Japan te sungthu kan dingin na pai uh hi. Kalaymyo ah Japan te sungthu a kan khit uh ciangin Zaa bung khat lei-in, tuakhit ciangin Zogam ah ciah kik dingin hong ding khia ta uh a, Kalaymyo pusuak na a tung uh ciangin (Bicycle) Setbing ahawl khat hong mu uh hi. Tua Setbing hawlpa pen Chin minam te hilo ding hi ci-in ummawh uh ahih manin alawm Sihzang galkap Commandos te tawh a thau puak uh pholh khia in tua Setbing hawlpa nung na zui pah uh a, tua Setbing hawlpa kiang ah nakhawl sin aw ci-in a ot san uh leh a Setbing hawlpa nakhawl nuamlo in nahawl suak teitei ahih man in Vum Kim in zong a lawmte tawh tua Setbing hawlpa nung na zuisuk pah uh hi. Tua Setbing hawlpa nung a zuih suksuk vua leh lamngei a, lui ngei panin Japan galkap honpi khat an ne in aom tawh hong kibing tuak vat uh a, a lang nih tuak un bang hih ding cih thelo in, a mit tangte uh hong ki sal lela tuak uh hi. Tua panin laam 5 na kiim khawng aki gamlaat na mun panin tua Japan te tawh hong kikap uh a, Vum Kim leh alawmte zong nungkim kawmin Japan galkapte tawh hong kikap uh hi. Tua panin (No.2) a Camp vuah hong tung kik uh hi. Hih kikap na ah Japan galkapte pawlkhat si-in, Vum Kim leh apawlte ahih leh asi kuamah omlo uh hi. Hih pen Sihzang galkapte leh Japan galkapte kikap masak na penpen zong ahi hi.

Hih Kalaymyo thukan na ah Japan galkapte tawh kibing tuak in a kikap na vuah asi kuamah omlo in, Camp ah hong tung kik theih uh pen Mikang galkap mang te'n lamdang sa in na pakta mahmah uh hi. Tua panin Vum Kim pen Jemadar ah azaa kikhan in Japan galkapte in Zogam alak ding uh ciangin British galkapte tawh Zogam panin India gam ah na nungkik khawm uh hi.



1944 kum tak ciangin (ေလထီးတပ္သား) ah sem in, Japan te tawh kido uh hi. 1945, march 29 ni-in Minbu Myone Ngakwe khua ah Japan te tawh nakpi takin kido uh a, hih kidona ah Vum Kim thaupi in kha ahih manin si hi. (A sihna vai tawh kisai 1945 kum a, Chin Hills Battalion te ciapteh na ah hidan in na kigelh hi. 1945 march 29 ni, nai 18 :00 (Ywathetkon) a, aom Japan galkapte Camp Vanleng tawh kikap in, tuakhit ciangin lei lam panin Company nih in Japan galkapte Camp Saingni, Kawton, Magyizu, Ngakwe cih camp te na do uh hi. Tuakhit ciangin Company nih te'n Ywathetkon mualtung a,aom Japan galkapte omna te nado suak lai uh a, tualai ah dum sung a panmun la in aom, Japan galkapte thaukapna mun hoih lua mahmah ahih manin Company nih te na nungkik uh hi. Tualai ah Motor thaupi tawh dum sung a,aom Japan galkapte kikap hi. Ei lam pan in a zaalian galkap mang Viceroy's Commissioned Officer (VCO) Jem. Vum Kim (66033), Sep. Hang Ko Thang (66747), Sep. Pau Chin Lian (66677) cih te si hi. Sep. Thu Ngam (66905), Sep. Hlun Ngam (69028) te in liamna ngah uh hi ci-in na ki cianteh hi.


Sihzang lam te ii ciaptehna ah ahih leh Jem. Vum Kim leh apawlte in Japan galkapte Motor thaupi tawh a kapna vuah Jem. Vum Kim in a Motor thaupi tang thuah khial ahih manin amah leh a lawmte galkap nih si uh hi cih dan in na cianteh uh hi. Jem. Vum Kim a sih khit ciangin British galkapte in Jem. Vum Kim a pahtawi na un Jem. Vum Kim lim, milim in nabawl uh hi. Tua Jem. Vum Kim milim pen Chin Hills Battalion Commander Major A. C. Moore in UK gam ah na ciahpih in, tuni dongin Major A. C. Moore innkuan pihte in tua Jem. Vum Kim milim pen na kem lai uh hi. Tuakhit banah British te'n Jem. Vum Kim a pahtawi na un Yangon khuapi sunga aom galpi nihna hun lai a,pahtawina angah galkapte kivui na han (ေထာက္ၾကန္႔စစ္သၤခ်ိဳင္း) ah Pu Vum Kim han zong na koih sak uh hi.

Laigelh ~ Pau Mung.

Referenes :
Salai Van Cung lian (UK) I agelh-
(1) အညတရ ခ်င္းသူရဲေကာင္း Jemadar Vum Kim (66033)
(2) အညတရ ခ်င္းသူရဲေကာင္းမ်ား ရွာေဖြျခင္း (Part 1,2).

Photo Credit : Salai Van Cung Lian (UK).


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Galhang Jemadar Vum Kim (66033) Tangthu. Description: Rating: 5 Reviewed By: Cinpu Zomi
Scroll to Top