728x90 AdSpace

Hot
Menu
Zon-ol na Donate

Latest News

GALKAP MANG. Agelh ~ Col. Khen Za Moong (Retired)

GALKAP MANG
Agelh ~ Col. Khen Za Moong (Retired)


Mangkang ten India leh Kawlgam a lak khit a kipan galkap nam nih koih hi. British army leh India army. Kawlgalkap pen Indian army sungah kihel a, 1935 India leh Burma kikhen khit teh Burma Army suak hi. Bawk suang nam nih mah om hi. King’s Commission ci-in 2/Lt, Lt., Capt., Maj., Lt.Col, Brig, Maj. Gen, Lt.Gen, Hen, Field Marshall ci in a kangte adingin omsak a, a vomte za pen India ah Viceroy’s Commission (VCO) ci-in Kawlgam pan Govermor’s Commission GCO) ci hi. King’s Commission ngah dingte London khanglam Sandhurst khua Royal Millitary College ah kah hi. India, Dehra Dum khua ah 1932 ciangin, India Millitary Acedemy hong a, King’s Commission mah pia hi. Galpi om ciangin galkap tampi kibehlap ahih manin galkap maang kicing nawn lo a, OTS (Officer Training School) tampi kihong hi. Kha guk sung nasep, sinsak a, bawk suangsak in gal sung kuansak pah hi. IMA (Indian Millitary Acedemy) ah kha kua nasep sinsak in bawk pia hi.

Tua lai in King’s Commission ngahte mangza ngah, mang suak kici hi. GCE (Governor’s Commission) te bu suak kici hi. 1945 December 15 ni a kipan BC (Burma Commission) a kipiak a kipan, Kawlgam galkap sungah mang leh bu om nawn loin, a vekin bu kici hi. Jemadar, Subedar leg Subedar Major sung pan pawl khat in BC ngah a, pawl khat pensen la in tawp hi. Jemadar, Subrdar leh Subedar Major bei in 2/Lt, Lt, Capt, Maj, Lt.Col, Col, Brig, Maj.Gen, Lt.Gen, General om hi.

IMA ka tun phet a, ka muh ka ciapteh theih pah pen IMA motto (thuciin thukep) ahi hi. 1932 sang hon lai a Field Marshal Sir Phillip Chetwode thu genna sung pan a kila khia, thuciin thukep ding ahi hi.

“The safety honour and welfare of your country come first always   and every
time.”

The honour welfare and comfort of the man you command come next.
Your own case comfort and safety come last always and every time.”

* Na gam lungmuanna, minhoihna leh nopsakna atawntung in masa pen hi.
* Na khutnuai mite min hoihna leh nopsakna in zom hi.
* Nang nopsakna leh nang lungmuanna atawntung in nunung pen hi.

IMA a nasep sin pihte Kala namkim hi. Lai tampi athei a om zah khat in, galkap sung pan hong pai lai tampi athei lo zong om hi. IMA a siate pen Gawza stg. (Mangkang san thum) te vive ahi hi. Kei tun ni a tung sawm nih val khawng ka hi uh hi. Zum maiah hong kigualsak in, “dress up, dress up” hong ci hi. Ko atheisa ten ka tak lam en in, gual tang dingin ka en uh hi. Azaat lam pan a hong pai ten thei lo ahih manin a puan silhte uh bawlin kizem uh hi. Tua ni a Gawza Sgt. pa “litna hapna” tawh nasep ka kipan pah uh hi.

Ka vekun za khat khawng ka pha uh hi. Tua lakah aneu lam ka hi in (tu in 5’6” ), ka gikna pong za val khawng bek ahi hi. Ka suah kum sawm nih pha hi. Ka ci dam siang ta in tha zong ka nei mahmah hi. Puansilh leh van kisam ding teng ka thoh khit uh teh, natna kidalna zatui ki kisun uh hi. Tua teh nasep ka kipan pah uh hi.

A masa kha thum sung pen zingsang PT leh parade vive hi in, ni sa lakah kigim mahmah hi. Gawza sgt. ten lah hong dual loin khial leng khial kei leng hong ot san, hong lit hong hap tawntung hi. Lung kiat huai mahmah hi. Lungkia in a ciah kik tam! Ci a hong ze-etna zong hi ding hi. Kithuak kenkan tek hi. Pawl khatte left- right, left- right, ci a tang tak a lam pai thei lo zong om hi. Pawl khat ten a khut uh veei thei lo hi. Pawl khat ten a kalsuan teh a kalsuan khe lam khut vei khawm a pai thei bek zong om hi. PT pen kigim mahmah hi. Bangmah ommai ngei lote hehpih huai mahmah hi. Ahih hangin galkap thatang hat, thatang muancing hong suaksak hi.

Nitak lamin sang kikah hi. Manglai leh galkap nasep tawh kisai lai kisin hi. Nitak lam sang a siate pen Captain leh Major vive ahi hi. A kangte vive hi.

Kha thum khit teh England panin sawm guk val khawng hongtung a, kigawm in Coy khat in ka om uh hi. Amau pen akangte vive hi in England pan kha thum mah Pre-OTS sin khin a hong pai ahi uh hi. Gawza sgt. ten amau dawm tuan lo hi.

Kha thum khit teh tat ukdan leh adang galkap thu kisin hi. Mipung(map) zatdan leh R/T (Radio Telephone) a paudan zong ka sin uh hi. A masa in tan sungah lecture hong pia hi. Tuate mipung sungah ki sin hi. Tua pan gam sungah pai in kisin hi. Ko sung pan zong platoon leh Company uk ding kiseh in ko leh ko ka ki-uk uh hi. Platoon Comd. Leh Coy Comd zong ka sem hi.

Kha kua sungin galkap ngeina leh ki-ukna dang teng thei a gal sung a Coy dong uk thei a, mawtaw hawl thei, sakol tung tuang thei, R/T zang thei, First Aid thei, Meepite, Tankte, Engineerte tawh sem khawm thei leh lai tan sawm tawh kikim thei ding sin ka hi uh hi. Kha giat, kha kua pai a galsim kineih, asun azan khawl lo a nawh pai, gun kantandante ka sing uh hi. A pua lam pai a sinnate pen kigim mahmah napi kithanop suahin gualnopna hong suak hi. Kha kua khit teh atung a tangtak a lam pai thei lote nangawn hong etlawm mahmah hi.

Nitak simin ommaih om tawntung hi. Ommaihna khempeuh ah Coy. Teamah ka kihel hi. Bawhlung ah Coy. Captain ka hi hi. Bawhlung leh hocky ah ka gualzo mahmah uh hi. IMA bawhlung 1st eleven teamah zong sang tuah kuan teh ka kihel hi.

Coy leh Coy boxing kidemna hong om a, bantam weight acih a neu lam ading ko Coy sungah aom kei hi. PT hun in boxing zong kihel a, ka siam luat loh hangin boxing ka thuh thei gawp hi. Coy Comd. Pa Capt. Wood in hong thei a, kei min na pia hi. Kei sang a sangkhut sau zaw vive ahih teh thuh ngam keng, thuh nuam keng ci a ka vat hum leh, nang lo buang bantam weight ah kua mah om lo hi, ci-in hong leh thuum a, ka mang hi. Ka kithuh pih pa khut kei sangin sau zaw a, kei thuh khak sangin ama hong thuh khak tam zaw ahih manin ka lel hi. Ahi zongin, a kipat a kipan khawl lo a attack tawntung a, khawl lo a, lungkia lo a, atawp dong hahkat hi, ci-in best loser (alel hoih pen pa) min hong pia hi. Capt. Wood ka kiangah hong pai in “hoih mahmah teh,” hong ci hi. Ka kam pol gawpin ni sagih sung athak, a-al leh asa peuh mah ka ne thei kei hi.

Bawhlung ah Coy leh IMA team ah ka kihel huhau in tung siah ten theihnain hong nei in nasep sinna ah noptuam mahmah hi. Chief Instructor pa Col. King in Mr. Mung pen Kawlgam gal sung pan a hong pai hi in a theihsa vive hi, ci-in khat veivei jungle warfare ah kei peuh sia hong leh sep sak hi. IMA bawhlung team sungah England ah sum thalawh a sui (professional footballer) Capt. Gaulfield kihel hi. Centre forward hi in siam mahmah, hat mahmah, manlang mahmah in atai a suih dan lah hoih mahmah hi. Ka suih khop uh teh amah muhnop sa in keisuih ding lam zong ka mangngilh thei hi. Tua lai in right-inner leh right wingah ka sui hi.

OTS kahte OC (Officer Cadet) kici hi. IMA pan nidang min lui zui in GC (Gentleman Cadet) kici hi. Officer suah ma a Gentleman hi khin uh teh, cihna hi. Adang te tawh a kilam danna hi.

Kha kua cin teh laivuan kibawl in sang tuah pawi kibawl hi. Tualpi ah sang a Coy om khempeuh in alang tuak pan hong um a, sang tuak dingte alai ah om hi. Sang ukpipa Brigaderpa hong et khit, thu gen khit teh, sangband tawh march past bawlin sang ukpa kipahtawi hi. A manlang pai khat vei, a ol pai khat vei, nih vei kimarch past hi. Tua zawh teh thum ta kigual in kizui in sangpi sungah sang kongvang pi pan lutin kiciah hi. Tua nitak in Maang lam om hi. Zan 12 sat ma in meipi mit a, mei neu tawm taang nuai ah, nute pate ute naute ahih kei leh lawm nungak khat peuhpeuh in ip sung a kipua bawk thak suansak hi. Nai 12 lian teh meipi taang a, Auld Lang Sang la sa in kinam ngeingai, kinohset ngeingai in, nasep zote bawk khat ngah in galkap mang suak hi. Kei zong tua bangin galkap mang ka suak hi. Bawk hong suansak ding leh ka kinap pih ding om loin ka luppihpa in bawk hong suansak in hong nohset hi. Ama bawk a nungak lawmnun suansak hi. (Khan khatah nih ta ka lum uh a, ka luppih pa London khuate Bill Loftus ahi hi. Gal bei khit sawt dong lai ka kikhak khak uh hi. Gal bei teh aman Bank khatah Manager sem hi.)

Commission ngahna lai leh posting order (pai nading tat) kingah khin tekin tat a pai ma khuan ni sawm kingah hi. Van tek bawl in kinohset in kidding khia ngeingai hi. Hun nuam khat abei suak ta hi.

IMA ah ka om sungin ka nau Paupu Shillong pai in sang kah hi. IMA om sung Cadet kha sum Rs.150 ka sang a, Paupu sang vai ka huh zo thei hi. Commission ngah a galkap mang ka suah a kipan kha khat in ka nu Rs.100 ka pia hi. Ka bank (Lloyds Bank) ten kha simin, Tedim sikkhauto pan thoh dingin hong puaksak hi.

Dehradun pan meileeng tawh Calcutta, tua pan Temple Ghat leh Pandu dong, Brahmaputra gun kan in Gauhati ah, tua pan mawtaw tawh Shillong ka pai hi. Paupu omna Dr. Fook Lui nu leh pate inn ka tung hi. Amah tua lai in naupang lai hi. Shillong ah Paupu, Khenno, Song Za Tual, Lian Za Thawnte tawh cidam in ka kimu uh hi. Zomi sangnaupang dangte tawh zong ka kimu hi. Galtai Kayinte DFO (Division Forest Officer) U Tun Sheinte innah zong ka hawh a, an hong nek pih hi.

Shillong pan Hoshiarpur ka zuan kik hi. A masa in Indian Emergence Commission ka ngah a, Assam Rediment ah hong puak hi. ABRO (Army in Burma Reserve of Officer) Commission ka siau kik pah hi. Kakhuan om sungin ABRO ka ngahna leh BEC (Burma Regimental Centre) Hoshiarpur hong puakna lai ka ngah hi. Burma Regimental Centre ka tun teh platoon Officer in Zomite Coy ka tung hi. Zomi galkapte a ciah dingte lai leh a kisam dangte bawlsak in ka nitum hi. 1945 in gal bei hi. Kawlgam galkap Kawlgam ciah kik ding ngakin van bawl ding kisamte bawlin kiom dimdiam hi. Sawt loin Calcutta pan tembaw tawh Kawlgam ciah in 1946 kipat lamin Maymyo ka tung hi. Tua pan Meiktila a Burma Erinforcement Bn ka tung hi. Tua a Co (Commanding Officer) Maj. Blake(Brig.Blake) hi in, QM (Quarter Master) hong sem sak hi. Meiktila ah PBF pan a BC ngah bute leh PBF galkaplui pawl khat om in, tuate training ka pia uh hi. Tua Kawl bu lakah gal ma a Upper Burma Selected Col. Ba Shwe zong 2/Lt. in om in, Meiktila om sung bawhlung ka sui khawm uh a, ka gualzo mahmah uh hi. Col.Hla Aung, Col.Khin Nyo, Col. Ba Hante zong tua laiah 2/Lt. vive hi.

1946 March kha in Pinlong kikhopna (khat veina) a pai ding Tedim Ukpip Pum Za Mang, Halkha ukpi Kio Mang leh Lumbang ukpi Hlur Hmungte tawh Mandalay pan Meiktila dong meileeng tung ka tuang khawm uh hi. Matmyo sang kah pih Subedar Tai Kwel’ tapa Kawl Sum (nung lam teh amin Van Thang tawh khelin STE ah Manager dong sem) zong kam phen in kihel hi. Kawlgam Mualgamte mai lam ki-ukdan ding kikum ding a Shan sawbua ten Zomi leh Kachin uliante sam a, Mangkang minzi leh vuandokte sehna tawh Pinlong kikhopna a pai ding ahi uh hi. Tua lai in Mangkang ten Kawlgam zang lei (Pyima kici Ministerial Burma) leh Mualtunggam (Frontier Areas) khen nuam hi. Meikthila DC oa kiangah Kawl Sum paipih in athu teng ka gen uh hi. DC pantua lai a RTB (Road Transportion Board) te mawtaw vaihawmsak in tua mawtaw tawh Taunggyi kantan in Pinlon pai uh hi.

*************************************************************************


Zomi eLibrary/Laibusaal in Col. Khen Za Moong I laigelhte kaikhawm in aki type/tei kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GALKAP MANG. Agelh ~ Col. Khen Za Moong (Retired) Description: Rating: 5 Reviewed By: Cinpu Zomi
Scroll to Top