728x90 AdSpace

Hot
Menu
Zon-ol na Donate

Latest News

KHANGTHAKTE LEH HUMAN RIGHT. Agelh ~ GSPau

KHANGTHAKTE LEH HUMAN RIGHT.
Agelh ~ GSPau


A Sunga Om Thute :
Human Right ii deihna bang?
1. Human Right leh biakna
2. Kizep kipuah dan
3. Nu leh pate kithusim nawnlo
4. Numei leh pasal kikholhdan
5. Zi leh pasal neihzia
6. Nupa kikal kizopna
7. Nu leh pate kepzia
Thukhupna

******************************************************************************

Human Right ii deihna bang?
            Human Right ii a deihna taktak pen mihing khempeuh in aituam suahtakna nei ding, mihing ciatciat kuamah a kisimmawh tuam om lo ding, cih deihna bulpi ahi hi.
           
Mihing pongpong pen ukcip ki-ut lo a, kisuakta nuam ciat hi. Tua hangmahin numei tawh kisai Human Right, naupang tawh kisai Human Right cih bangin ki-om sak hi. Hihte zatsiam le’ng, phattuamna tampi a om mah bangin, zangkhial le’ng zong siatna pawlkhat piang thei hi.

1.         Human Right leh biakna
            Nitumna gamte ah khanghamte bek kikhawm uh a, khangnote kikhawm nawnlo, ci-in kigen hi. Nipi ni ciangin biakinn pai nawnlo uh a, TV channel pan-a thuhilhnate inn pan ngai ziau lel uh hi. Ei’ kiangah zong nipi ciangin biakinn pai luanluan cih dan hong tawm pian ta hi. Khuapi semsem leh biakna ki-awlmawh lo semsem a, motor neih ciangin biakinn kitung zolo semsem zaw hi.
           
Tuhun ciangin numei pawlkhat in nipi ni pen niikhoih, puanhoih kidemna (Fashion show) peuh suaksak phialphial uh hi. Pawlkhat leuleu in motor hoih kidemna peuhin zang thei uh hi. Nipi ciangin biakinn a kipai pong hangin biakinn sungah kilususu lel a, pawlkhat in phone peuh kikhoih niloh lel hi. A khahaihai peuh zong ki-om hi. Biakinn sungah eima’ suahtakna dandan, eima’ nopsak dandanin ki-om ta mai hi. Sia leh makai lam pan tai leh hilh cih bang zong om thei tuanlo hi.
           
Nu leh pa in zong tate Sunday School kah ding leh kikhawm dingin kisawl nawnlo hi. Amau a kikhop leh lah pha, a kikhop nop kei uh leh zong amau’ thuthu kihi sak ta mai hi. Sum vive thupi kisa ahih manin nipi ni nangawnin sum kizong lel hi. 1/10 piak cihte pen khanglui vai lua leh khuata vailua kisa lel hi.
           
Biakna pen leitung kipawlna, sih kipawlna dan khatin kingaihsun ziau ta lel hi. Biakna kinte khawng a pil nailo, hun a lap lo, a teilah dan khatin kingaihsun ta lel hi.
           
A kipilsak leh a kiteisak khangno pawlkhat in Lai Siangtho pen tu ma kum 2000 lai pek-a kigelh ahih manin teek lua ta hi, Lai Siangtho sungah tuhun tawh a kituak nawnlo thu tampi kihel hi, ci-in gen uh hi. Pawlkhat leuleu in Lai Siangtho pen laibu mawkmawk lel dan khatin gen a, sim dingin zong ngaihsun lo uh hi. Lai Siangtho pan lam pial uh a, amau' ut bangin gamta uh hi.

2.         Kizep kipuah dan
         Tuhun teh kizep kipuahdan zong hong kilamdang hi. Puansilh niikteen’ zong ei' ut bangbang kisilh a, kuamah kikhaam theih omlo hi. Puansilh lamah Piancil hun lai, Adam leh Eve’ hun peuh kitung kik tawh kibang phialphial hi. Nungakte bang in nawi kidawk phialphial puan silhin, pheituam a kigaak geigai kiteeng se zen hi.
           
Sammeetdan zong a nam tuamtuam hong om a, numei leh pasal nangawn kikhen thei nawnlo hi. Numeite in sam kitom sak a, pasalte in sam kisausak zaw kik bilbel hi. Sam zong a meel tuamtuamin kinim hi. Kisansak zel, kivomsak zel, kikaangsak zel hi. A minthang zawdeuh piante in sam sausakin, sansak se uh a, puansilh zong a tumdang piante silh se uh hi. Numeite in pheituam tom kiteengin, khedap tulsang kibulh a, lim takin lam kipai theilo phial hi. Tua danin a kipuah a kizeemte pen hun zuisiam, kici zaw lai hi.
           
Mandalay AG pawlpi Rev. Challie Thein biakinn ah nipi ni khat, nungak khat in nawi kidawk phialphial puan silhin, pheituam kigaak geigai tawh pulpit tung pan la sa a, a aw bang hoih sim zawzen hihtuak hi. A lasak khit ciangin Siapa in, “Sanggam aw, mailam ah hih dan tawh la hong sa nawn kei in. La nong sak nop leh pulpit tawh kilawm kituak puante hong silh in,“ ci-in vaikhak giap, ci-in kigen hi. Pawlpi khempeih hih bang phialphial hi khinta mai hi.
           
Pasalte in a sam uh sansakin, tungto se uh hi. Pawlkhat in a sam uh lak meet gawp se uh hi. Pawlkhat in a sam uh sausakin, hen uh hi. Bilbah khawng bah se uh hi. Hihte pen World Cup bawlung suite' aa dan a ki-etteh hi pian hi leh kilawm hi.

3.         Nu leh pate kithusim nawnlo
          Lai Siangtho in, "Tapate tanute aw, thu khempeuh ah na nute, na pate uh thu na mang un. Bang hang hiam cih leh nu leh pa' thu man'na in Pasian' deihna ahi hi," ci-in hong hilh hi (Kol.3:20). Human Right ah tate kum (18) a phak nak uh leh mi picing khatin kingaihsun ta a, nu leh pate in amau' tungah thu nei thei nawnlo uh hi. Nitumna lam gamte ah nu leh pa in tate sat kha leh tate in phone nambat 911 meek ziau peuh palaikte hong pai-in, a nu leh pate man hiau uh hi.
           
Khatvei nupi khat in a mo dingin nungak khat hopih hi. Nungaknu in, “Kei' thu-in hong dawng ngam ke'ng, ka nu leh ka pate tawh hong kikum phot lai nung,” ci-in sang pak lo hi. Tua ciangin nupinu in, “Tuhun teh ei’ zi ding leh ei’ pasal ding khawng kuamah in nu leh pate kikuppih nawn kei, ei’ deih peuh tawh kiteen’ hun hi. Nang hunthak paizia zui siam kei teh,” na ci hi. Hih nupinu pen Pastor khat ii zi hi sawnsawn hi.
           
Tuhun ciangin kumpi lam pan ahi zongin, NGO lam pan ahi zongin, naupang pattahzia tawh kisai thusinnate ah, "Tate sat theilo ding," cih thu kinak hilh mahmah hi. Hih tawh kisai-in kam kiseelna (debate) zong om thei den hi. Hih pen Human Right bulphuh thusinna ahi hi. Hih in hoihna zong nei ding a, hoihlohna zong nei thei kha ding hi.
           
Khristiante in khathu leh leitung thu-ah Lai Siangtho vive a kibulphuh ahi hi. Lai Siangtho in, “Naupangte sat ding lunghiang kei in; satna hangin silo ding uh hi. Ciangduai tawh sat lecin nuntak lawh zaw ding uh hi,” ci-in nu leh pate in tate thuhilh ding, tai ding, sat dingin hong sawl hi (Pau.23:13,14).
           
Human Rigth leuleu ah nu leh pa in tate tungah thuhilh theihna leh sat theihna kinei lo hi. A zenzenin tate kisat hen la, amau zum ah hong khia le-uh, nu leh pate thong kikia ding hi. Tua hang mahin nu leh pa zahtakna kiam a, tate in nu leh pa kithusim nawnlo hi.

4.         Numei leh pasal kikholhdan
            Tuhun teh "Living together" ci-in nupa hilo napi, ut tanvei nupa bangin ki-omkhawm lel hi. Ni dangin nitumna gamte bek ah a om i sak leh tuhun teh Zomi sungah zong om tuak ta mawk hi.
           
Gamdang omte sung leh sum bawl-a zinsuk zintote sungah tua dan om kiukiu tuak mawk hi. A simthamin a gamta a om mah bangin, maizum lo takin a kilangtang mahin a gamta lel zong ki-om tuak ta hi.
           
Khatvei papi khat in tangvalpi khat kiangah, “Nang, na meel lah sia lo a, neih leh lam zong kicing lel hi ve cin, zi neih ding ngaihsun nailo maw?” a cih leh tangvalpa in, “Ni simin bawngnawi duh zahzah dawn zo den peuh le’ng, bawngpi khawi kul tuan lopi,” ci-in dawngkik hi. Tua tangvalpipa in zi a neihloh hang, nupa bangin kithuahpih nei den hihtuak hi.
           
1985 kum lai-in Rev. Son Kho Kham (1933-2009) in TBA General Secretary hihna tawh Zogam khanglam ah a kuankhia ding CCOC (Chin for Christ in One Century) palaite tungah a kam vaikhakna ah, "Na gim na tawl uh zongin numei leh pasal kimeek kha kei un. Na kimeek mawk uh leh cisa kah thei a, meeknopna mun hong kilaih thei hi. Tua ahih manin na kimeek uh leh pasal leh pasal, numei leh numei bek mah kimeek un." ci-in kam vaikhakna nei hi. Hih pen ciamnui tawh a kibat hangin thutak ahi hi.
           
Khatvei crusade khat panin nungak khat hong piangthak hi. Tua nungaknu in a kikheelna thu teci hong pan’ ciangin amah pen a upate khat tawh a simthamin a kinupa sim uh na hih tuak mawk hi.
           
Tuhun ciangin khami leh thusuak neite sungah  “Kha-nupa” cih peuh hong om thopthop mai hi. Hih kha-nupate cih pen nupa hilo napi, kha kingaihna pan kha-nupa a suak uh, kici mawk hi. Hih hangin mite in khamite neek hak hong sa uh ahi hi.
           
Gospel team sung leh Worship teamte sungah zong leitung gualnopna danin a zangkhial ki-om thei gige hi.
           
Nungak tangvalte in, "Kei' pumpi kei' thu, kuamah tawh kisai lo, numei leh pasal kithukim peuh leng mawhna hi kei," ci ziau lel uh hi. Hih panin paktatna leh pheng gamtatna hong om hi. Tua hangin nuntakna a kisiat lawh tampi mah ki-om thei hi.
           
I pumpi pen Pasian in nih vei hong nei hi. A masa-in Ama’ hong pian’sak ahih manin hong nei hi. A nihna-ah Jesu’ sisan tawh hong lei ahih manin hong nei leuleu hi. Tua ahih manin i pumpi pen ei’neihsa hilo a, Pasian’ neihsa hi, cih phawk ni.

5.         Zi leh pasal neihzia
            Lai Siangtho in nupa kiteen’na thupi ngaihsut dingin hong hilh hi (Heb.13:4). Tuhun ciangin nupa kiteen’na kithupi ngaihsut nawnlo hi. Zi leh pasal neih ciangin ngeina cing tawh kipi kiteeng cih dan om nawnlo a, biakinn ah siangtho kiteen'na cihte kizang nawn se lo lel hi. Pasian' naseemte sungah zong a genbaang kitam a, siangtho takin a kiteeng cih dan kitawm ta hi. A siang nawnlopi mah Pastor-te in siangtho kiteen'na pia lel uh hi.
           
Night Club khawng pan kiciahpih ziau, cih dan vive kizang hi. Biakinn ah siangtho kiteen'na cih dan kizang nawnlo a, a genbaang sa vive-in kiteengzaw hi. Thukhenmangte’ mai-ah kiteen’na letmat kithuh ziau a, mopawi pen Hotel khatpeuh ah kibawl ziau ta hi. Mopawi zong a uang theithei-in kibawl hi. Mopawi a uang bawlluate kikhen kik hamtang uh, ci-in kigen hi.
           
Kiteen’ ciangin zong khan’tawn nupa dingin kiteeng cih bang om nawn lo a, kum 5 sung, kum 10 sung khom dingin kiteeng lel uh hi. Khang khat sungin mopawi tam veipipi bawl lel uh hi. Nupate a kicimtaak uh ciangin kinusia-in, a thak zong tuak lel uh hi. Pasal’ adingin tu-a a kiteen’pih a zi pen a zi (7) na hi ta a, numei’ adingin a pasal (5) na cih khawng hi thei hi.                    Kiteen’ lam a kibaih ngaihsut mah bangin kikhen ding zong haksa kisa lo a, zi leh pasal kinei kikkik lel hi. Pawlkhat bang in zi leh pasal tam veipi neihna pen mite in hong ngai hi, ci-in gualtungtuan’na peuhin kinei zaw lai hi.
           
Lai Siangtho in numei leh numei, pasal leh pasal kiteen’ deihlo hi. Ahi zongin tuhun teh gam khangto i cihte ah Lot’ hun lai (Pian.19) danin numei leh numei, pasal leh pasal kiteeng ziahziah lel uh hi. Kumpi lam pan kiphal a, Pastor-te in zong Pasian’ min tawh biakinn ah kiteengsak lel uh hi. Internet sung khawng pan i mu thei zelzel hi.

6.         Nupa kikal kizopna
            Numeite pen pasalte a huh dingin Pasian in a pian'sak ahi hi (Pian.2:18). Bangzah takin a haizaw phial zongin pasalte pen numeite' lutang hi mawk uh hi (1Kor. 11:3). Tua ahih manin numeite in pasalte' ukna khempeuh a man' ding uh ahi hi.
           
Human Right ah, "Numei  leh pasal liangko kikim ding," cih khat kithupisak hi. Pasal in a zi a vuak leh a zi in zum ah khia leh a pasal' neihsa ii a lang (50%) ngah thei mawk hi. Tua hang mahin numei pawlkhat te in a pasalte uh zahtak nawnlo, thusim nawnlo, kihta nawnlo lel uh hi.
           
Mi khempeuh in suahtakna kinei ahih manin zi in pasal’ an neek ding thuksak cih zong om nawnlo a, ei' ading ciat kithuk hi. Kuang kisawpsak cih zong om nawnlo a, ei' kuang ciat kisawp hi. Puan kisawpsak cih bang zong om nawnlo a, ei’ puan ciat kisawp hi. Sum kituam neih a, ei’ ut bangin kizang ziau hi. Nupa hih hang kisaisai cih bang om nawnlo a, eima’ nopsak dandan ciatin kigamta hi.

7.         Nu leh pate kepzia
            Tuhun teh gam khangto i cihte ah nu leh pate a teek uh ciangin tate in keem lo uh a, Piteek puteek kepna (Nursing Home) ah koih ziau lel uh hi. Hih pen itna taktak om nawnlo, cihna ahi hi.
           
Tua hang mahin nupi papite in a thahat lai-un, a teek uh ciang-a Nursing Home ah a kikep zawh nadingun sum khol uh a, kiging khol uh hi. Tate in nu leh pate ki-it nawnlo, kivaak nawnlo, kidon nawnlo, kikeem nawnlo a, kinusia ziau hi. Tua hang mahin khangthakte in nu leh pa' thupha kingah lo a, kimaabing leh kikhan'tom peuh zong hi thei kha ding hi.
           
Lai Siangtho in nu leh pate a teek uh ciangin simmawh lo-in, lim takin keem dingin hong sawl hi (Pau.23:22). Zogam ah tu ciangciang Piteek puteek kepna cih bang om nai samlo a, ei’ nu ei’ pa ciat, ei’ pi ei’ pu ciat mah kikeem hi. Tua hang mahin Topa' thupha kisang ahi hi. Hih pen Lai Siangtho tawh kituak a, mailam ah a zop huai thu khat ahi hi.

Thukhupna
            Khangthakte in Human Right zatsiam mahmah ni. Human Right bulphuh lua le’ng, Lai Siangtho pan lam kipial thei tawntung a, Pasian zahtakna zong hong kiam hi.
           

   Tua ahih manin Lai Siangtho tawh a kituak ciang bek mah zang ni. Lai Siangtho tawh a kituak lote zang kei pah lel ni.

**********************************************************

Laigelh siapa in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGTHAKTE LEH HUMAN RIGHT. Agelh ~ GSPau Description: Rating: 5 Reviewed By: Cinpu Zomi
Scroll to Top