728x90 AdSpace

Hot
Menu
Zon-ol na Donate

Latest News

Ki itmah taleh….. Ken Takakura & Chiemi Eri. Lailet ~ Nk Khanno (Zingsol)

Ki itmah taleh…..
Ken Takakura & Chiemi Eri
Lailet ~ Nk Khanno (Zingsol)


Amah pen Feb 16, 1931 kum in Japan gam ah suak hi. 1954 kumin Meiji University sanginnpi panin sangzo hi. Ama min pen Ken Takakura hi a, Japan gam ah aminthang mahmah kineihsiam pasal (actor) khat ahi hi. Amah akihelna ‘Kimi yo Fundo no Kawa o Watare’ cih film pen 1978 kum ngeina le minam itna acik mahmah communist kumpi makaihna Sen gam ah a kilak masa pen gamdang film ahi hi. Mipi te deih mahmah khat hi a, film 204 bang kizaih hi. Nov 24, 2014 akhankum 83 aphak hunin leitung nusia hi.

Amah pen adai dide, a kamtam khollo mikhat ahi hi. Limlakna lam ah bangzah ta in minthang mah taleh ama i nuntakna taktak pen mipiten kithei khollo hi. Japan lai gelh siamnu Mariko Hayashi gelh ahi ‘Tennessee Waltz’ cih laibu hong kibawlkhiat ciang bek in Kenta Kakura le azi lasiam minthang Chiemi eri te kikal aa innkuan sungthute kithei ngeingai pan hi.

Amau tegel kikal itna pen la dawngkhat tawh kipan in la dawng khat tawh tawp hi. Amau tegel nupa pen kum 12 ciang bek kipzo uhi. Limlakna ah a dahhuai, a khasiathuai limte ah kineih den ahih manin hih bangin ama tangthu taktak hong kigelh khiat ciangin a hitakpi mah ding hiam ci’n zong ki muangmawh koikoi hi.

Amau gel kimuh cilna
1954 kum in Meiji University panin Ken Takakura sang hong man hi. Tua hun laitak pen Japan gam gal lel in a zawnkhal laitak ahih manin a pianna khua Nakama Fukuoka ah ciahkik in a pa nasep huh hi. Hun hoih khomkhat mah hong hih ciangin a pa nasep ah amah a lunglut loh lam kitel in, nasep dang khat zong dingin hong kithawi hi. Tua bang teng tawh Tokyo khuapi lam hong zuankik hi. Alawmpa innsapna ah bel in nasep zon kipan hi. A sum puak teng bei khin in cimawh in a om laitak in Film Editing Company khat ah nasep hong ngah hi. Nikhat a naseppih a lawmte nih in limlak kineih siamna tintan kah dingin hong hanthawn uhi. Kineihsiamna lam a lunglut hetloh hangin a nuntakna ding kisam ahih manin a lawmte sawlna hong mang hi.

A kilak masak pen limlakna in ‘Lightning Karate Blow’ film hi a, tua hun laitak in amah kum 24 bek pha pan hi. Hih limlakna hangin Japan sum tul20 ngah hi. Hi bang teng tawh limlak na lam ah a lametna hong lian semsem in hong hanciam hi. Ama kihelna film te pen Japan gamsung ah hong thang pian zeuhzeuh ta hi.

Tua zawh a sawtlo in ‘Daigaku no Ishimatsu’ kici film zaih dingin kikun hi. Hih film ah a kithuahpih ding limlaknungak (actress) pen lasak siam minthang Chiemi Eri ahih lam a theih ciangin lamdang sa in, amah le amah nangawn ki umlo phial hi. Chiemi Eri late aman ngai ngei hi. Sang kahlai, a pianna khua ah a pa nasep ahuh lai, Tokyo khuapi sunga cimawh in a omlai hunte ah Chiemi Eri late in amah thalawpna, lametna te pia hi. Adeih mahmah lasasiamnu tawh maitang kimuh ciangin excite mahmah hi. Limlak laitak khat le khat kihona ‘dialogue’ munte ah amah a aw kiling simsim  hi. A te kikkek mittangte aman lim et ngamlo hi.

Chiemi Eri pianna nu pen ciamnuih limlak khat hi a, apa ahih leh la lam kiva khat ahi hi. Amah a suah zawh a sawtlo in a nu damlo in, a pa in nasep neilo hi. Zolai sang pilna (primary school) ciang bek sin in innkuan sung kivak nading in American galkapte leen ah lasa in om hi. Kum 15 aphak ciangin ‘Tennessee Waltz’ kici mangla khat Japan la in sakik in minthan lawh hi.

Ken Takakura tawh akimuh laitak in Chiemi Eri pen kum 21 bek pha pan hi. Japan gam aading a minthang mahmah lasasiam ahih hangin amah pen kiphasaklo, ki hisak lo hi. Ken Takakura i daih dide na, kamtawmna te pakta mahmah hi. Amah amai zumsak hi. Ama lampan in tua pa hopih masak kul den mawk hi.

Chiemi Eri omna  mun ah Ken Takakura in nuamsa hi. A gilo vatvat thei a lungsim pen Chiemi Eri kiang ah daidide hi. Limlak laitak in zong a mit hem tawh en gige in a kinbawl nate in neutung panin nulepa itna tam a ngah khalo Chiemi Eri pen noptuam sak hi.

Ken i kin bawlnate a thukkik na in a nih khop hun ciangin Ken i deih late Chiemi Eri in sak sak zel hi. Ken in a ngaih mun mahmah ahi “Tennessee Waltz’ la pen Chiemi Eri in sa kha thithe hi. A tung lai in lawmta nasepkhoppih bangin ommah taleh uh a tawpna lam ah amau tegel hong kingai uhi.

‘Daigaku no Ishimatsu’ film kizaihna aman khit hun ah amau tegel itna pen lian in kipkho mahmah ta hi. 1959 Feb 16, Ken kum 28 acinni in amautegel pumkhat suahna mopawi hong bawl uhi.

Nihgel Zaalmang
Chiemi pen lasakna tawh a minthan sam hangin numei khat ahihna tawh innkuan nuam, zi hoih ahih ding ut mahmah hi. A lungtang pen Ken angsung ah tawlnga sak hichiat in, ka pasal aading a hoihpen in sem ni’ng ci hi. Pasal aneih ma in, zuakphual zong pai ngeilo, an zong huan ngeilo khat himah leh pasal aneih khit ciangin inn nupi khat i vaipuak teng asep zawh nading hong hanciam hi.

Ken in an pen a pualam ah tam nek ngeilo hi. Ansai aa anlim kizuak te sangin inn sung ah sathau kihel lo meh ahiphial zong lim sa zaw ingh ci’n zong gen ngei hi. Tua ziak mah in zong Chiemi in ansai pan an vaikha lo in, ansai ah anne ding zong paikhia ngei nonlo hi. Japan nupite mah bangin innsung vaipuak a zawh nading hanciam hi.

Zingsang ciangin a pasal thawh ma in zing an ding a bawl in, a pasal gei ah puak zel hi. Nitak nasep man ciangin inn lam ah nawh ciah mahmah in nitak an huan saisai hi. “Ken hong ciah ciangin anbuk ah ka om lam hong mu peuh ta hen”, adang inn papite mah bangin Ken in anbuk ah a buai mahmah a zi mu nuam ding hi ci’n ngaih sun hi.

Anhuan ciangin a thu nengneng tawh buai zelzul thei zel hi. Akhut tem tawh at kha, sathau bung bua sak cih bang hi mah taleh a pasal a tun ciangin sabuai tungah nek theih dingin lui hi. Sang naupang khatin a laigelh bu Siamah nu kiangah a lak ding bangin a meh bawlte sabuai tung ah a lui khit takciang in dai khinkhian le dipkua pian litlit sa in a pasal en gige hi. A pasal in mehte a nek liahliah ciangin a lungsim sungah nuam sim khinkhian hi.

Ahi zongin hi bang hunte amaute in a zang den ahi kei uhi. Chiemi pen mun khat ah lasa pai, Ken pen mundang khat ah lim kizaih ding pai, a man hun uh kikal in phone tawh kiho kha thei pan uhi.

Khat vei Ken pen Kyoto ah film zaih ding in pai hi. A zi tawh kimu dingin nitak tawlngak hun ciangin Tokyo ah hong ciah kik vingveng hi. Zing phalvak madeuh in inn hong tung Ken pen Chiemi in puanza sung panin thokhia in hong delh khia hi. Amau tegel kikawi cip bikbek uh a, hibang hun ciangin a puam gimgem Ken maitang pen nuihmai hong suak zel hi.

Hun awng a ngah uh ciangin cinema en khawm ahizong bowling kimawl khawm ahizong khat le khat kithuah khawm uhi. Chiemi’ lathak te ngai ahkl Ken film thakte enkhawm uhi. Khat veivei ciangin Okaidu khua ah zin in tawldam sak hichiat uhi. Vuk kia in, a dai khipkhep inndei sungah puan tawh kituam in kikawi cip bikbek kawm in “I still remember that night and the Tennessee waltz…..” cih ladawng sa khawm hialhial zel uhi.

Dahna kipan
Nuntak zia, ukna, zia le tong aki banglo nupa tegel in innkuan nuam hong lamkhia uhi. A naseppih lawmlegual te in ‘a etlawm nupa, nupa kihualte’ ci’n ciamteh uhi. Ahi zongin tua innkuan nuam cihna sung ah ze-etna tuihual hong om zeuhzeuh zel hi.

A kiteen khitzawh uh kum 7 cin khit ah, director minthang khatin Ken pen a lamdang pasal pha dan in kineih dingin hong kun hi. Tua film min pen “Nihon Kyokaku-den’ cih hi a, a lungkialo akuhkal khattang pasal bangin a kineih ding ahi hi. Tua khit ah ‘Abashiri Bangaichi’ film kizaih suak in, tua mun ah namsau lek zialzial in lim hong lak hi. Ama kihelna film te hileh Cinema hall dim den hi. Ama sammet dan, puan silh dan akipan kampau dan, omdan te khangnote lak ah hong thang in ki eng mahmah hi.

Chiemi in a pasal minthanna kipak pih mahmah hi. Tu’n hileh Japan gam sungah Ken pen mikim in thei uhi. Ahi zongin ama kipahna pen hong bei kik hi. Producer te in Ken pen hong kun kawikawi uhi. Film khat khit khat kizaih hi. Film khat bekbek zaih nading pen kha khat bang hun bei mawk hi. Ken pen nasep hahkat micitak khat ahih na tawh tua a kizaih film tung bek ah a lungsim koih hi. Film khat kizaih khin mah leh tua sung aa a limlah kineih bangin a pua lam zong hun sawtpi mah omkha thei zel hi. Inn ah azi kiang ah om mah taleh amah limlah na bek a lunglut in kisin den hi. Laisimna inndei sungah amah bek sawtpi tak limlak kisin ahi zong, a lunglut phatdeuh ciang namsau khat tawh paak huan ah kisin thei zel hi. Hi bang hunsung te ah a zi Chiemi pen lungleng khua ngai in a na omden hi. Ken lungsim pen film in tuamcipta ahih lam Chiemi in hong tel semsem hi.

KEEN lungsim a tuamcip pen filmte bek hilo in, mipite’ deihluatna zong ahi hi. Keen pen pasalte aa dingin a etteh uh mikhat hi a, numei te zaalmang aa pasal melhoih khat zong ahi hi. Asih deih mipi pawlkhat te bangin, Keen a hawh a ciahna te ah sulzuih thei lai mawk uhi. Keen tungah zawllai akipan marn tampi kikhak in, amah amu nuam bekbek in a inn mai ah zong kingak ngeungau thei hi.

Chiemi pen dai takin om thei nonlo hi. Ken in ama tungah “a zenzen in Chiemi tawh om khawm khalo ding hileng ka nuntakna ka khuasak dingdan zong theizo keng” ci’n a gen kammal Chiemi in manggilh nailo hi. Ahi zongin Ken pen tampi tak na kikhel ta hi. Muanmawhna thulela tampi tak Chiemi lungsim sungah hong lut ziahziah ta hi.

Hi bang hun laitak ah, Chiemi in nau hong paai hi. Ken pen khua dang khat ah film kizaih dingin apai laitak ahi hi. Nau a paai lam Siavuante in a gen ciangin Chiemi pen nuam sek, dah sek in a om hi. Ken in naupang a deih lam aman thei hi. Amah zong nu cih dinmun a tun ding angaklah hun sawtta hi. Ahi zongin hi bang hun ah nau neih ding pen hitheilo hi ci’n hong ngaihsun hi. A zenzen in nau nei leh nau keem, nau nawi pia, nau khem cih tengtawh a hun beita ding aa, mipite in amah manggilh ta ding uhi ci’n hong ngaihsun ahih manin, a nau lakhia sak hi.

A tawpna ah a nau a lakkhiat lam Ken in hong thei hi. Tua zan Ken in a inn vuah zuthawl khat hong dawn hi. Chiemi kam khat zong hopih vetlo hi. Tua pen Chiemi in lau in dah mahmah hi. Ken tungah a thule la kicing in gen mah taleh Ken’i thusim lohna bek mah ngah hi.

Chiemi late zong kiatlam manawh diaidiai ta hi. Hanciam tentan mah taleh ama late pen mipi te in deih nawnlo uhi. Tua khit ah TV ah limlak dingin hong kikun bilbel hi. Mrs. Radish kici zatlan khat hong kizaih hi. Mipiten deih mahmah bilbel uhi. Chiemi cih min a kilawh ciangin nidang in aminthanna “Tennessee Waltz” tawh kitheii nonlo in Mrs. Radish tawh kithei zawta  hi.

Mipi te in Ken kiangah “na zi pen Mrs Radish kici, a hai milmul ciamnuih limlak pen ahia?” ci’n a dot uh ciangin Ken in a dawnkik nading theilo hi. Tua akipan Ken in mipite tawh kimuhna bawlsim in azi maitang lakkhia nawnlo hi. Chiemi in bangmah acilo khat bangin a omkek hangin a lungsim sungah nasa mahmah hi. Midang te genna aman a olmawh kholloh hangin a pasal na ngawn in ‘Mrs. Radish’ mun ah kineih aa lim alak pen a zumhuai in ngaihsun mawk ahih leh bang dingin aman hanciam in a pasal gei ah omom lai mawk ding…

Sam gi bang khenta
Chiemi nuntakna, nasepna te manawh ding omlo in lametna bei ta hi. Hi bang hun ah ta khat neih ding lam en mahmah hi. Tua hileh Ken tawh kikal ah kizopnate hoih kik in, tha hong guan ding hi ci’n ngaihsun hi. Ahi zongin a nau a lakkhiat (phiat) na hangin naupaai theih nading hong hamsa ta hi. Paak huan sung mun khat aa aphum, mipum asuak man nailo naungekno han ah sawtveipi tak tu in a om thei zel hi.

Ken tawh nihgel sinthu lel lel nuam mah leh, Ken pen a nasep tawh buai den hi. Tu sawng teng Ken in gennop khat nei leh kilawm den napi.. a tawpna ah paulo hamlo in aom zel hi. Ken pen film kizaih ding apai ciangin zekai thei hi. Ama limlak kineihna sungaa namsau tawi pasal pa bangin khattang lung len huai sim zel hi. Hi bangin Ken a omlam amuh ciangin Chiemi zong a lungnop tuanlo hi. Ahi zongin a cih nading theilo in a om thei zel hi. Nidang in nop asak hunluite lunggulh kik ngeungau hi.

Mite in Chiemi manggilh ta uh a, Ken ahih leh media te akipan mipi te in lunglut san ngeingai uhi. Ken nasep le silbawl dante amaute in a lunglut uh hilo zaw in, Ken mimal suahtakna, a khuasak dan peuh a lunglut uh ahi hi. Tua mun ah a naseppih numei te tawh mindai sak ngiingeei thei uhi.

Hi bang thute Chiemi in zong za zel hi. Khatvei concert khat ah a lawmkhat in Chiemi kiangah journal khat hong lak hi. Tua journal sungah Ken le limlak numeikhat sai khat panin a pusuah khop laitak uh a marn in a suaksak uhi. Amau gel bangzah ta in  ki it, ki ngai cihte at zihziah uhi. Chiemi in umzo lo phial hi. Hi bang thute a zak hangin a lawmpa in amah tungah citak ding hi ci’n a um hi. Ahi zongin amit tawh a muh thu in amah sibup sak zo hi.

Chiemi zong amah un a tun ciangin stage tungah hong kahto in la dawngnih tha san kawmin hongsa teta hi. Dawng thumna ding a sak sawm hangin sa zo nonlo hi. A tawpna ah aw ling kawmsa in “Ken tawh kikhen ta mai ning…… hong maisak un” ci’n a khitui tolh ngelhngel sa in hong genkhia hi.

Mipiten lamdang sa mahmah uhi. Tua concert (lasak pawi) apai meltheihte pawl khat in Ken kiangah phone tawh zasak pah uhi. A zingciang, Ken Tokyo hong tun ciangin thuthang te ah Ken le Chiemi kikhenta ding uh ci’n a ki suaksak ngeingai amu hi.

Ken hong dah mahmah hi. Hi bang zahdong piang dingin ummawh hetlo hi. Amah pen a lungsim veina, thuakna a genkhia pahpah thei nam hilo hi. Hi bang thuzuau, huihlomte azi tungah gencian ding ci’n a sawm det hangin, amau kikal ah kimuanmawhna, ki umlohna te hong khang semsem kha leh cizel in genkhia lo zel hi. Azi lungsim a nosuah kik nading in, a zi tungah hun tampi a piak theih nading in film zaih dingin akikun honkhat a nial hi. Azi tawh Okaiduo khua pai in, vuk lak ah kimawl kik nuam hi. Amau zintun nading inn khat zong aman khamkhol khin zo hi. Ahi zongin tun ahih leh a geelna teng tuisuak khin mang bek thamlo, azi zong lupna tungah puk dipdep ta hi.

Media te upmawh thu genna laite in a nungzuih theih ding thulelate ngaihsun kha hetlo uhi. Ken tungtang thu zuau tuamtuam tawh ki gen ngeingai in a ki-it, aki ngai mahmah nupa kikal ah samgi bang kikhenna hong tung sak zo hi. Bangzah ta in kimai sak in, a theilo kineih zel tamah leh media thuthang te suahsakna huzapna hangin Chiemi zong a puk dipdep ta ahi hi.

Hi bang thuteng a piankhit ciangin, nidang in Japan gambup aa lasiam minthang Chiemi Eri zong mipite muhna ah omlua nonlo in, hong mangcip ta hi. Ama la te mite’n manggilh khin ta uha, Mrs. Radish cih zong kua mah in phawkkha nonlo uhi. Amah pen limlak kineih siam minthang Ken Takakura zi ahih lam zong kithei kha nonlo hi.

1982 Feb 13 ni in, Tokyo khua taihkhan sung khat ah Chiemi luang hawm kimu hi. Zato lamte sitna tungtawn in Chiemi pen zu tampitak dawn in, lua khia a, a luak hak in husam in a si hi ci uhi. Amah asih hun in kum 45 bek pha pan hi. A sihzawh nithum ni in kivui hi. Tua ni kekkek pen Ken i suahni ahih mah bangin a kiteen ni uh zong ahi hi. Ama hankhuk phual ah a dah akap Ken pen mikim in mu uhi.

Kumsim kiteenni (wedding anniversary) atun ciangin paakkual khat tawh Chiemi han ah Ken hawh den hi. Ahi zongin kum khat, tua ni in tua hanphual ah paakkual ki koih nonlo hi. Mopuan silh kawmsa in sual tung ah amah lum dildial hi. A dai khipkhep inndei sungah la lui khat kihong hiauhiau hi. Tua la pen Chiemi la ahi hi.

“I remember the night… Yes, I lost my little darlin” the night they were playing….”
Innkuan kitapkhapna in Ken susia cip hi. Amah le amah nangawn numei le pasal ki itna thu gen dingin kicing lo in kingaih sun hi. Ahih hangin aman numeite a it/ngai theilo hi zenzen lo hi. Mi pawlkhatte in ama daih didena/ kamtawmna hangin nupa kaal kikhenna piang hi ci uhi. 1999 kum in akilakahi “Poppoya’ film ah “Tennessee Waltz” la hel uhi. Tua film sungah hih la a guanna enle hang Ken in a zi Chiemi bangzah tak in ngai hiam cih imu thei ding hi. Ama’n a gen ngei mah bangin

“Ka omkhop hun sung, kilemlohna zong om zel. Ahi zongin nih geel sinthu lel in nga bang lenkhop hun tomno sung, la thak sa in, khat le khat kinainate lahkhiatnate in kum tawn kha tawn dongmah hong lungleng sak hi”

Chiemi sih khit hangin Ken in a sih dongmah zi neikik nawnlo hi.

Xxxxxxxx


Khat le khat ki muanmawhna le ki uplohna te ah itna pen nungta theilo hi. Itna a nuntak theih nading, a kip nading in ah ki theihsiamna, lungduaina te akisap mah bangin khatlekhat kam kihona, thu le la kigenkhiatna cihte kisam hi. Khat le khat kikal ah itna tawh kidim kinken lungtang kisam hi. Nuamna lawpna tawh ki-it kim thei ciat ni.

**************************************************************

Laigelh Siapa Nk Khanno (Zingsol) @ Dr. Nang Khan Lian in Zomi eLibrary/Laibusaal ading in Phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. Na laite deih veng aw copy theih leh ut sing e.

    ReplyDelete

Item Reviewed: Ki itmah taleh….. Ken Takakura & Chiemi Eri. Lailet ~ Nk Khanno (Zingsol) Description: Rating: 5 Reviewed By: Cinpu Zomi
Scroll to Top