728x90 AdSpace

Hot
Menu
Zon-ol na Donate

Latest News

La in thu hi (1 – 4). Agelh ~ Zam Thuam

La in thu hi. (1 – 4)
Agelh ~ Zam Thuam


La in thu hi (1).

(a) Siah tang kaihna Teimei dong e, ka zialna zang tual hi....
(b) Kamkei bang mual sang tawn ing e, gam kuam kua ka pia diam!

A tung a la i muh ciang Kawlzang pan in Meitei gam dong siah akaipa hi ing a cihna i mu hi. Tua khit ciang khat vei hong kisial beh lai hi. Sahang bang mual sangbek na tawn ing, tua gam kuampi teng kuatung pia zen peuhmah ding ka hiam? ci beh lai hi. Tu hun kammal hi leh kihtak nei keng a ci hi mai hi. Hih la in a phuak pa Kam Hau bek hilo in Zomi bup tangthu a gelh na hi gige hi.

Meitei lengmangpa in Tedim sim dingin Kam Hau uk hun laitak hong kuan hi. Tedim a kigalmuhna munkhat ahi Nangcin mual dungah Tedimte pangin galphual sat uh hi. Tedimte a lutna ding kamtaisak ta leh lutlo in do hong sawm uh hi. Meiteite in ahih leh nong do uh hang na thau uh suak ken teh ci hi.
Tedimte in zong Lailo gam dungah takkung satleu in a mai hal uh a, meitei ten mitampi asa ding ci-in khembawl a sun in ahih leh galtai in bucip uh hi. Meitei lengmangpa khatvei Suangsuang mualdawn ah dingin gam a va en pen galvil ten, i thau a suak thei kei takpi hiam ci-in a kap leh lengmangpa hong kha mawk hi.

Tua ciang Meiteite kikhenthang ahihman Tedim ten delh in vado uh hi. Khuapi guahzuk tawh kisi sawnsawn in gunkhang a, gun kan na pan tampi si sawnsawn lai uh hi. Kam Hau in Meitei gam Tapei lui a kicina mun dong delhsuak in tua munah mualsuang phut in gallemna bawl a, siah kai pah hi.

Kam Hau in ahih leh kuamah bawlsialo in hoihtak gallemna a bawlna hang, tuni dongin Meitei te in Haumi (Kam Hau mite) ci-in hong zahta mahmah lai hi ci-in a gen zong om hi. Tapei lui gamgi suang pen a lim in “Tuck & Cary” gelh, Chin Hills Gagetteer Vol I ah kimu thei lai hi.

Tua hi in hih la in i Zogam pen bang cia hiam cih hong lak a thu taktak ahihna i mu thei hi.

(Tg Munei Thangdal) min tawh Siamsin Awging' Khol 4 Hawm9.

La in Thu hi (2)
Agelh ~ Zam Thuam

(a) Zangvui sai le lia kei sakduang, do tan sa bang hawm khawm e.
(b) A lawm nam maw gual aw e, nuai zin aw a lawm nam?

Kam Hau gualzawhna lapi i sim khit ciang, gualzawhna I nungah a om ding simmawhna le hamsatnate hih la in hong lak hi kong ci nuam hi. Hih la pen Pu Kam Hau zi Pi Ciin Gulh lapi hi in Meitei ten Tedim hong sim ciang akhasiatna a phuah la khat nahi hi. Hih la in a gualzo mikhat tungah a thuak phinna (challengce) hong musak ding in lamen ing.

Meitei ten Tedim khua hong umta hi. Zawhnading peuhmah lamet omlo, sun in gam sungbu in zan in mei peuh de in galte khembawl cihtawh hong om sung, Meitei ten Pu Kam Hau neih saihapakte a ngah tawm ding dan in honghawm khol liang uh hi. Saiha ciang ahawm uh ahihleh phamawh lua kei. A zi mel hoih, Pi Ciin Gulh a tenpih ding aktuhna a zakciang khasiatna ka galte kihawm kholzen a cih luangin (a) na a phuak hiding hi.

A mat uh ahilo a suakta khat pen hing hawm kholh cihzen, mihing ngaihsutin ngaihsun leng, kilawm hetlo, cizek huai mahmah hi. Tua a ngaihsut ciang lawmlegual aw nong hicihzawzen uh kilawm hiam? Kei muhloh a om thumana deih vangnei tuamtuamte aw kilawm peuhmah a hiam cihna tawh (b) na a phuak na hi leuleu hi.

Hih la en leng Pu Kam Hau hunin Tapei luidong I zawh toh Meiteite hong neu-et zia le hong muhzia mikim in muthei ding hi hang. Khat veivei i simpak ciang banghiam cih i theihloh hang a mamunpan i tangthu a ciaptehna la penthu taktak ahihna kimu khia thei hi.

Tg Munei Thangdal min tawh Siamsin Awging Khol4 Hawm9 sungah agelh.

*******************************************************

La in Thu Hi (3)
Agelh ~ Zam Thuam

(a) Namtem tawi khem kong sak leh, inn bang heh cia, i phung gualten a kungah khia tong ci..
(b) Do loh lal tang hive cia, lung nem hi cia, Bual khua in ning kung kuaihpih sa hi..

Bang thu hang cih i theihloh hang temtawi in sepkhat a neihna pan ciamnuih galsuak hiam? A hehna tawh la phuakpa i a lawm agualte in do in thehthang a, mancipsak ding lunggulh cih kimu thei hi. Aih hang a dawnlam ah “ki dolo pi in gallesa nong tang mawk a, nang a lungnem zaw nong hihbanah zu dawn khawm, zu peng khatpan atep khawm lawmlegualte hi hang na ci kik hi. A tangthu in enkik ni ci leng,,

Khuasak ah Thuam Son a mang hunlaitak, Tedim ah Hau Pum te a mang hun laitakin khamtung a simding Innwa pan kawlte hong kuanto uh hi. A mau nuai ah a lut dingin a sep hang kilungkimlo in Hau Pum le Thuam Son te kibelpawl in Kawlte hong do uh hi. Leisan mual dongah tuaksuk in dawntuah pah uh hi. Tua pan gal a zawh khitciang hong ciahh uh a, Lophei khua khungah avekun hong tawlnga uh hi.
Gal simte in a tawlngak kawmin Zomi sung galsiam pen ding hong tel uh hi. Pawlkhat in Hau Pum pia in pawlkhatte in Thuam Son pia uh hi. Akician lian ding omlo ahihman anih un galsim siamna hong kidem sak uh hi. Namsau tuaktawh om mai in hong siam mahmah tuak uh hi. Tawlkhat khit ciangin Hau Pum namsau Thuam Son in hong awt leh Hau Pum in sungkung khat hong sat kha a, thukpi hong lut hi. Tua a muh ciang Thuam Son in “I ciamnuih gal suakkha ni” ci in hong khawl uh hi.

Hau Pum lamte in “Thuam Son in lel ei” hong cih uh leh Thuam Son lamte hong heh leuleu uh a, “thukhual a akikhawl hiven… tua i cih leh kido leng aive” hong cita uh hi. Hih bang teng tawh Tedim le Khuasak kitawng uh a, hong kido sawm takpi uh hi. Kawlte gal a nangding khutkilenin nasepkhop laitak a mau le a mau gal hong suak uh hi.

Tua kawmkal teng tawh Hau Pum in Thuam Son tung zu lim mahmah bel khat le a tunga la vakhak hi. Thuam Son te pawlin zong tua la a zakciang a zu dawnin aheh hong dam uh hi. Minam ading galdo khawm kimlai amau le amau a kitelkhialhna uh hong kimu uh hi.

Tua hi in Zomite ading in La in Thu taktak ahihbekthamlo lam hong hilhna athupit nate hih tangthu sungpan kimu thei hi.

Tg Munei Thangdal mintawh Siamsin Awging Khol4 Hawm 10 sungah agelh.

***************************************************************

La in Thu hi (4).
Agelh ~ Zam Thuam

Khangtangthu i cihpen thuleng bangin ei deihna ah kikai theilo hi. A thu hong piang bangin khangsawnten a ciapteh ding hilel hi. Aih hang khangtangthute sungah aciapteh huai tampite mangcip khin a, tampipen thu in a om ding in, la tawh na kikem hi. Kawlgam khangtangthu ah hitaleh Leitung khangtangthu ah hitaleh la (poem) khat hang’ tangthu akilaihna mikimin mukhintek ding hi. Tu nipi adingin zong tangthu khat (history) a laih la khat i thu kikum ni.

(a) Mi a pau in na tongsuah ka ngaih nak, sak ciang vangkhua vaivut in leng vak ci….
(b) Sak ciang vangkhua vaivut in lengvak ci e , na sawn lal hen nuhpah ah pai aw                  ci…
(c) Sakciang vangkhua vaivut in a lengzongin, kasawn lal hen nuhpamah pai bua                  cingh..
(d) Ka sawn lal hen nuhpam ah pai bua cingh e, thang pan kawlni sak pan sialbang suak hen……

Khuasak panin sila pawlkhat taisimin Kawlkhua vabel uh hi. Tua thu a phawk ciangin a mankik ding Khuasakte hong kuansuk uh hi. A silate uh bukdan nasiam ahimanin hong man zolo hi. Tua laitak Falamte thum Kawlkhua (Thautcyiant) ah a pai tawh kituak kha uh a, tuate a sila uh hi in teh ci-in na man uh hi. Hun hong bei tawh kituakin a sila te uh na hilo takpi hi. Falam te in a khah kikna ding hong gen uh hi. Khuasak in ahihleh a matsa te uh hong khah sawm nawnlo hi. Tua kawmkalpan nupi khatin a tunga la na phuak a, tua la pen Falamte kiang na tung hi.

A la in ahihleh mipau miham ka ngaihciang Khuasak khua hong kido ding hi. Na tupa gal mat khah in, hong kici ta leh hong kisimzaw hen, khang pan asuak Kawl ni.. saklam pan hongsuak zongin khah peuhmah kei ning a cihna ahi hi. Hih la hangin Falam te heh mahmah uh a, Khuasak hong sim pah uh hi. Khuasak in zong hong nang a, a sawtvei ciang in Mualbemte in a kikal uh ah gallemna bawlsak in gal hong man hi.

La i cih thu ahihna la khat hangin gal nagawn a kidona hihla in honglak hi. Tua hi in Zomite ading inla pen khang tangthu na gawn a lumlet thu taktak ahi hi.

Munei Thangdal min tawh agelh.

Source :
Hunthak le Khangthak’
(Siamsin Hun sung Ka Laikung pan)
Zam Thuam

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: La in thu hi (1 – 4). Agelh ~ Zam Thuam Description: Rating: 5 Reviewed By: Cinpu Zomi
Scroll to Top