728x90 AdSpace

Hot
Menu
Zon-ol na Donate

Latest News

MANGKANG TAWH KIDONNA (1887-1894). Agelh ~ J. Gin Za Tawng Naulak

MANGKANG TAWH KIDONNA
(1887-1894)
Agelh ~ J. Gin Za Tawng Naulak


Zomi Innkuan Laibu
 (History of Zomi Family)

Khen Lina

A sunga Om Thulu note :
Taisun Leh Tedim Kop
Khamtung Lak Ding Kilimpat
A masa pen gal panna kulhpi
Leisan kulhpi
Hankhanglu
Siallum Kulh                                                       
Tonzang te’n Kap Leuleu
Mangkang tawh Kido La
Sakta-te.
Thantlang-te
Taisun Te
Lusi Saklam So
Tedimte Kipan Kik                  
Myo-ok Suamna
Kapteel La Ding Kuan
Phong Dawh Kipan
Gal Van Khia
Ukpite Zangkong Hawhpih
Kawlgam Tawh Gawm
Gal Kiging Sim
Ukpi Nasep Pia
Kamciam Bawl
Tua hum lai tak in:

***************************************************************

45.  Englan Kumpipa in Kawl Gam khanglam teng a lak khit ciangin, Kawl Gam sak lam teng zong a la hi. Kawl Gam sak lam teng a lak khit uh ciangin, Khamtung Gam zong lak ding a sawm uh hi. Tua hun lai-a Kawl kumpipa’ khua Ava khua ahi hi.

Mangkangte Kawlpi ciang a tun nah un in Kawlpi ah Shan mi tampi a om hi. Gam uk nuam mi nih a kituh-a, tua lai takin Mangkangte a tun’ ciangin, tua a kitawngte lak ah khat, Khamtungah a tai hi.

1887 December kha in Captain Raikes leh a pawlte Kawlpi a tung uh hi. A tun phet mah in, Khamtunga Sihzang ukpi teng a sam pah hi. Captain Raikes in Sihzang ukpite kiangah, “Tu in, Mangkang kumpite in, Kawl gam pan in Khantung gam pailet in India gam Chittagonr dong ah lampi khat sial nuam hi. Tua hun ciangin Khamtung mite-in lam hilh ding leh kuli ding in kong la ding uh hi,” a ci hi. Sihzang ukpite in, “Khamtung lam pailet in lam hong sial kei ta un. Ka mite uh hai lua mahmah uh ahih ciangin, lampi ah hong suam ding uh lau huai hi,” ci-in a phal kei uh hi.

1888 Janaury kha ni 3 ni-in, Phalam gam Taisun ukpite tawh Angteeng (India) ah kituah leuleu uh hi. Tuate kiang ah, Sihzang ukpite kianga a gen bang teng mah a gen leuleu hi. Taisun ukpite in, “Khamtung gam pailet-a lampisial ding ka thukim zo kei uh hi. Nong pai teeiteei uh-a, a liam a bai na om uh leh, bangmah kong theihpih kei ding uh hi.” Ci-in a kikhen uh hi.

Tua khit ciangin, Captain Raikes in, Kam Haul eh Sukte ukpi teng sam leuleu in, Khamtung gam pailet-a lampi sial ding thu mah a genpih nuam ahi hi. Ahih hangin, tua Kam Haul eh Sukte ukpite in thu don lo in a pai kei lel uh hi.

Tua khit ciangin, Khalkha gam ukpi teng zong a sam ding mi 6 a paisak hi. Khalkhate in, tua mi 6 lak ah 3 man in, 2 that uh-a 1 a tai suah uh hi. Tua a suakta pen Lusi gam lam zuan in India ah, India pan inZangkong dong a tai suak hi.

Khamtung ukpite tawh kikhopna a man teng in, mepi tawh kaih 500 gam la mun galkapte a kap sak hi. Ama deih na ah, thu mang lo a om leh, hi bang a thuak ding uh hi, ci-a a lak pian a hi hi.

Captain Raikes inukpite thusim khol lo hi. Ahi zongin, ama thu sim khol loh bang lo in, 1888 sungin Mangkangte’ gal vai hawmna khempeuh a lumlet gawp zo uh hi.

Taisun ukpipa Son Pek in, Mangkang kumpite’ uk ding ut lo in, do ding na kipan hi. Kawlpi pan-a a tai gam uk nuam kituhpa tawh Taisun-te kikop in India (Angteeng) sim suk in, Kale Sawbwa pa man in ciahpih uh-a, amau tawh kipawl-a tualgal kipat ding a thukim khit ciang in a khah kik pan uh hi.

Tua Kale Sawbwa pa in, Chinduin saklam gam-a om gal hang, gal siam 200 khawm in, Taisun simkik dingin a kithawi uh hi. Ahi zongin, a ngaih-sutsut ciangin, Taisun gal tuak ngei khin-a a lauhuai mahmah uh cih thei ahih man in dap takin a khawl kik hi.

Taisun Leh Tedim Kop
Taisun leh Tedim kikop in, ni 2 sung Kale valley sung teng va sim uh-a, mi12 thatin, 112 a hing in a man uh hi. Thau lawng 4 leh laa 4 zong a ngah uh hi. Tua gam mite in, gal ki lem nop na in, Zam 5, Puanza 5, Thambeel 5 leh puanteen 120 tawh a thuum uh hi. Ahi hangin, hi pen, a tungtham thu hi bek hi, a lungsim uh i theih sa hi, ci-in a saang kei uh hi.

Galkap hi ta leh, Palik hi ta leh bang tak hanciam in a do uh hangin Khamtung mite in a hanciamna uh khiam tuan dek lo uh-a a nasia tektek zaw lai uh hi. Tua ahih man in kum 6 sung tawntung Mangkangte in si le naai tawh a sim uh hangin Khamtung a la za kei uh hi.

Khamtung Lak Ding Kilimpat
46.   1888 guahtui sung teng, a kua a kua aadingin haksa ahih ciangin ci-in, Captain Raikes, tua sung teng thu ngaat takin a pai hi. Thu a ngaat seemseem ciangin, Khamtungte a kipawlna uh a khua seemseem hi. Tua bang thu India kumpi in a zak ciangin a lung himawh mahmah hi.

Captian Raikes in July kha-a kipan Khamtung mi kuamah Kawl gam sung a pai theih lo dingin ki khakcip zo leh hoih ding hi, ci-in, tua bang khaktan zawh na dingin, Pauk, Pakokku leh Myingyan-a  om galkap 470 General Faunce in a puak dingin a ngen hi. Captain Raikes zakhang in Major a suak hi. Major Raikes, Gurkha galkap 300 tawh Kawlpi ah a om hi.

India kumpi in, Tilin, Gangaw, Kan Sihaung, Kambalu leh India teng hoih takin galkap in cing zo peuh leh Zomite tum zo lo ding hi, ci-in um uh hi. Ahih hangin, tua bangin amau ngaihsut bang ahi zo tuan kei hi. October 17 leh 29 sung in 12 sang-a tawmzaw lo, Khamtung mite in that in, 122 a hing in sal-a khawi dingin a man uh hi.

Tua banga a cihmawh uh ciangin, General White in, India Kumpi kiangah, galkap Battalion khat leh Assam kuli 2000 a manlang tak-a ama zat dingin a vaikhak hi. Tuate, 1888 November kha 18 ni pan in, puak ding thukimna a ngah hi.

47. General White ngimna pan in, Shihzang khua teng leh, Thang mual pang langkhat a om khua teng sim masa in, galkapte General Faunce in makaih leh, ci-a a vaihawmhawm kikal teng un, Khamtung mite in, galkapte’ gal vilna mun teng leh gal madawk teng a sim pahpah uh hi. 1888 December 7 ni-a kipan Khamtung mamawh-a lam sial a kipan teng a kap gawp uh hi. Phalam Taisun mi 1000 khat in zingsang nai 4 in Sihaung a sim uh hi. Tua ni mah in, Tedim te in Kangyi a galkap omna pjuak a sim uh hi. Tua pan kipan lam sial peuhmah ki kap ngelhngelh den hi. A zawh masaksak uh sing lianpipi phuk in ki khaktan den hi. Sun ahi zong, zan ahi zong, lam sak pan in na buksim in a suak masasa ki kap lum den hi.

48.  A masa pen gal panna kulhpi
Leisan kulhpi ahi hi. Tua mun ah, ki nasia do mahmah hi. Tua ki do na ah, Zebaw Hau Khaw Zam in, phual khat ah gal 3 that hi. Tua tawh kisai in hi bangin la a phuak hi;
(a)   Thah ban sap lai hen bang sap lai lei do phuk cil kei hing e,
(b)   Vang khua al bang man lai tak a, sang lian phuk cil kei hing e.          
      
Tua kido na phual ah Mualbeem te 3 a sih ciangin, Mualbeem khua teng in, mi si luang teng tawh ciah-a, limtak-a a khua ah a vui nuam uh ahih man in misi luang tawh a ciah uh ciangin, tua mun galten luahzo pan hi.

49.   Leisan kulh khit ciangin, Hankhanglu ah panmun a bawl leuleu uh hi. Tua mun Leisan sang in a hoih zaw lai hi. Gal panna mun teng meii in tuam in, galte a suah ciangin, suangtum zong khiat theih na ding mun ahi hi. January 31 zingsang khua vak ma diak tak in Panjabi galkap te a suak a, tua mun ah nasia takin a kikap uh hi.

50.  Sir. George White, General Faunce leh Major Raikes kikop in, 1889 February ni 4 ni-in Khuasak khua a la uh hi. February 13 ni-in, Khuasak khua nusia in, Thuklai ah a kikhiin uh hi. Thuklai ah GalkapPhualpi Omna dingin a bawl uh-a, Sir George White’ min pua in, “Fort White” kici hi.

51. A nunung pen Khamtung mite’ gal nanna kulhpi, Siallum Kulh ahi hi. Tua mun ah nasia takin kikap hi. Tua kulhpi pen ngiakua bangin, phih kineisak kawikawi ahih man inm galte in luh hak sa mahmah uh hi. Galkap Mang 3 leh galkap 83 a kap lum uh hi. Captain khat leh Surgeant khat liam hi. Tua Surgean pa in a nung ciang V.C. a ngah hi. 1889 May ni 4 ni-in luh zo pan bek uh hi.

52. Tedim gam-a thau lawng khempeuh Sila a om khempeuh, leh dangka tul khat (Rs, 1000) a manlang in hong puak taun ci-in thu a kipiak ciangin, Tedimte in za nuam lo in do zaw ding, ci-in a khensat uh hi.
        
Tua thu a theih uh ciangin, General Faunce zang a galkap teng tawh, Thuklai pan kipan in, Vangteh lam tawn in, Saizang a la masa dingin a pai uh hi. Vangteh tawh tawmvei a kikap uh hi. Vangteh pan in Saizangte lam zuan in a paina uah, Saizangte in a to pai lam ahih uh man in haksa asa mahmah uh hi. Saizang in na dawm mahmah lo uh ahih man in haksapi in Saizang a lo za bek uh hi.

53.   Major Raikes in, Thang pan in Tedim 1889 March kha sunga lak dingin a sawm hi. Tua laitak-a Tedim innpipa Khaw Chin ahi hi. Tua hun laitak in Tedim inn 300 a pha hi. Thauvui thautang a kicing tak in Tedimte na kithawi uh-a, khua kiim ah gal panna dum leh kulh a to uh hi. Galkapte Tedim la nuam a pai ciangin, lim takin na pang uh hi. Gal madawk pawl tawh Lawibual zangah a kikap uh hi. Tua tak ah galkao 50 si in 12 a liam hi.
      
Gal madawk pawl zong nungkik in khua nawl-a gal panna dum kulh-a gal panga a omsa te tawh kikap leuleu uh hi. Tua dum leh kulh pan in na kap ngelngelh uh-a, sun khat leh zan khat sung a kikap uh hi. Galkap 120 si in 70 a liam hi. Tua kilh leh dumte tu dong kimu thei lai hi. Tua a kikap sungteng in, khua sunga numei naupang khempeuh Tonzang lam zuan in a heemkhia masa uh hi. Tua Tedim teng khempeuh Tonzang ah a teeng uh hi. Galkap a site’ han, tu laitak-a Lt.Col; Swan Do innmun teng ahi hi.
       
1890 October kha sungin innpipa Khaw Chin a si hi. A sih ciangin, ama inn luah dingin a pano Hau Pum’ tapa Hau Chin Khup kikoih hi.
                                                     
Tonzang te’n Kap Leuleu
54. 1890February in 11 ni-in, Tedim pan in, Major Rundall, galkap 215, thaupi 2 leh Gurkha kuli 300, Sihzang kamphen khat, hi teng tawh Tonzang la nuam in a dingkhia uh hi. Ni 3 sung a pai khit uh ciangin Tonzang a tung zo pan uh hi.
       
Tonzangte in, a khuakiim uh kulh tawh a um uh hi. Amau inn ciat gawl sang sing muanhuai mahmah vive tawh a um uh hi. Tua ahih man in galte a khua sungah a tum mengmeng zawh na ding a baih kei hi.
        
Major Rundall leh a galkap teng tawh Tonzang a tun tak ciangin, Rundall Mangpa omna ah, thau tawi tampi a va hawh uh hi. Rundall Mangpa in, kumpite’ hong nget teng na piak kei uh leh na khua uh mei tawh hong halsak in, thau tawh hong kap ding hi ung. Tu-a kipan kikum un la, tua zawh ni 3 sungin hong za sak kik ta un,” ci-in khua dang ah a zin khia hi. Ni sim in a thukhenna uh bang hiam ci-in a dongsak den hi. Ni 3 khit ciangin a tungkik hi.
      
Tonzangte in them zong a olmawh tuan kei uh hi. Bangmah zong a gen kei uh hi. Rundall Mangpa in, “Na khua uh galkapte in umcih khin hi. Na gen meng kei uh leh na khua uh hong ki kap ding hi,” ci-in a lau theihtheih na dingun a pau hi. Mepi khawng a muhna uah a lawn sak hi. Tonzangte a bil uh a phe tuan kei hi.
     
Tua banga a tawtawn ciangin, zing sang khat, khua zak man diak tak-a kipan in, khua sung pan in, khua kim-a galkap om teng a kikap uh hi. Kamphenpa in, khua mite kiangah, “Tai heek un, tai heek un,” Sihzang kam-a a cih ciangin, Tedim kam in, “Tai keek un, tai keek un, a cihna sa in, a tai seemseem uh hi.
        
Sun khat tawntung a kikap khit uh ciangin, a makai teng galkapte in a man uh hi. Pasal 3 numei 3 a man uh hi. Tuate:
          Tebaw Hau Chin Khup
          Yebaw Thang Khaw Pau
          Yebaw Gin Za Thang
                  Leh
          Yemey Zel Cing
          Yemey Vung Mang
          Yemey Nia’ng Vung
         
Kawlpi ah kum khat dektak a omsak khit uh ciangin, numei teng ciah sak kik in, pasal teng Zankongah Kumpite’ hauhna, liatna teng ensak dingin a pai pih uh hi.
       
Pasal teng Zankong pan a ciahsak ciangin, hausa laipi khat tek tawh a ciahsak uh hi.

Mangkang tawh Kido La
(a)Tuitaw tuaimang nong khan leh Sial lum puak siam, tuanglam pheiphah, mizataan len nan nei e,
(b)Sing bang khansia hi bong e khan kum hing e, tung Pasian le nuai-zin aw ong awi ve aw.

(a)Zang vuisai leh milsi psitem bang kithuah, zangmang tawithang, a khu lenvui kai sang e,
(b)Sial lum thangsa, neem kha vak ka cih man in, heikik ing e, tomte khawl sak ngawn veng e.
                                  
                                   ----------------------------------------------------------

Sakta-te
55. 1890 bei kuan ciangin, Khamtung teng kizo khin bangin a ngaihsut uh hangin, Sakta-te in “Cik mah hun in ka lut ngei mahmah kei ding uh hi,” a ci uh hi. Khalkhate in, “Galkapte in a an uh gai peuh le uh ciahkik lel ding hi,” ci-in um uh hi.
     
            1890 November ni 30 ni-in, General Symons, Vuandokmang Nabb, Palikmang Wetherell, galkap 40- Sakta sim dingin a pai uh hi. Sakta te-in na kap uh-a Palikmamhpa leh Vuandokmangpa a si hi.
       
Galkapte in a khua dong a delh uh hangin, a khua kim ah kan hoihtakin bawl uh ahih man in a la zo pak kei uh hi.
      
1891 ciangin, Khalkha leh Gangaw pan in, galkap 300 leh thaupi 2 tawh Sakta-te sim dingin a kuan uh hi. Sakta-te in nasia takin a na do uh hi. Galkapte in mei tawh a inn uh a hal gawp sak khit uh ciangin Sakta-te a lut pan hi.

Thantlang-te
56. 1891 March 29 ni -in, Thantlang khua sim dingin galkapte a kuan uh hi. Lampi ah mi tampi tawh a kituak uh hi. A dot uh a dawnna kibang khin sak uh hi. “Thantlangah kikhawm ding,” a ci kim uh hi.
         
Glakapte Thantlang pan Khalkha lam zuankik dingin a ciah uh ciangin, lampi ah na pang uh-a, galkap 2 a si hi. Galkapte in a delh uh hi. Lui khat a tun’ uh ciangin, lui gal kheensang pan in, sing beel, suang beel in na pang uh-a, galkapte a pai ciangin nakap ngelngelh uh-a, galkapte in acih na ding uh thei lo in a cimawh uh hi. A thautang uh she thum suah she khat (1/3) bei ta hi. Ni 2 sung neek ding bek an a nei lai uh hi. A nai penpen-a a huh thei ding, Thatlangah galkap a nusiat uh tawm bek ahi hi. Mepi tawh kap in, keen pang mualheem lam khiang dinga a delh uh ciangin, a na taimang khin uh hi. Galkap 5 si in 15 a liam hi. Haksapi in Khalkha a tung uh hi. Thantlang te gal siam dan pen, galkap 500 bang cih nading thei lo in a cimawhsak thei uh hi.

57.  General Symons in, Thantlang te kiangah, dangka dan tul nga Rs.5000 ni 5 sungin Khalkha ah a puak na dingin thu a pia hi. Tua sum a piak ma un, Thantlang hausapa Khalkha ah va pai a, galkap Mangpa in, “Hi banga gal nong do uh, a makai teng leh a neihsa teng ki matsak in, a khua uh mei tawh ki halsak ding hi,” ci-in a gen ciangin, Thantlang hausapa a nui hiuhiau bek hi.
          
Thantlangte in, bangbang a kigen hangin a olmawh tuan loh uh ciangin, Thantlang sim dingin, 1891 May ni 2 ni-in a khuan kik uh hi. 1892 April ciang bek in Thantlang a uk zo pan uh hi.

Taisun Te
58. 1892 Taisun te zong a lutnuam mahmah kei uh hi. Mi tam uh ahih man in a deih hun hun un, mi 10,000 bang a kaikhawm pakpak thei uh hi. Taisun khuapi Phalam khua pen galkap te in ama omna phualpi dingin a deih uh hi.
      
Ahi zongin a kikupkup uh ciangin, galkapte do lehang, ki sum zaw ding ahih ciangin,lut mai lehang z cih uh ciangin, Zahaute in, “Mangkangte hong pail eh, ka ciangkhut tawh ka hawkkhia lel ding hi,” aci uh hi.
      
Phalam, Ngawn, Zahau, Hualngo, Tedim, Sihzang- thau tawi 300 leh thal tawi mi tampi om khin ahih ciangin, galkap te tawh a ki sim uh hi. Tua ki do na ah Kam Suak in galkap Mang khat a that hi.

Lusi Saklam So
59.   Innpipa Ni Khuai makaihna tawh Lusi Saklam teng zong a so litlit hi. Innpipa khua limtakin ki umcip hi. Major Forests Walker leh galkap te in, innpipa kiangah, thau lawng 25, temtawng 25, a thahsa uh gal lu 5 a suan teng uh manlang-a a piak na dingin thu a pia uh hi. Ni Khuai in a piak nop loh ciangin, a khua galkapte in a la uh hi.

Tedimte Kipan Kik
60.   Me.Carey in, Mr.Fowlwe kiang pan in lai khat, 20 September 1892 ni-in a ngah hi. Tua lai sung ah, Tedim te in Mangkangte do sawm hi, cih thu a muh ciangin, a sun a zan in Mr.Carey Phalam Mangpipa kiangah a pai hi. Phalam Mangpipa in tua bang thu bangmah a na thei kei hi.

“Thau lawng teng leh, sila teng puak ding,” cih thu, Saimun, Heilei, Kapteel (Gungal lam teng) kikum in, zu ne in a om laitak in, nidang-a Thuam Thawng sila, ama kiang pan-a tai khia, Myo-ok pa a beel, a min Me Thang pen, Myo-ok pa kiang pan tai kik in, apu Thuam Thawng kiang zuan kik dingin a pai hi.
        
Tua bangin, Gungal teng Heilei ah thu kikum in, zu ne-a a om laitak in Me Thang hong pai a muh ciangin Thuam Thawng in, zu neekna phaul ah a kap lum hi.
        
Thuam Thawng in, Sihzang Khai Kam kiangah, “Kipawl in galkapte sim khawm ding hi hang, galkapte i gam pan in nawhkhia khin zo lehang, i thau lawngte taan nawn lo ding hi hang. Khuakiim khuadangte zong thu zasak peuh lehang hong kipawl pah ding uh hi; tua ahih ciangin, kuamah a kinusua om lo ding hihang,” ci-in kamciam a bawl uh hi.
        
Tua bang thu a om laitak in, Thuklai a galvilte khat in, Thuklaite khat na kap lum hi. Thuklaite zong pai pah vingveng in Tulsuk-a galkap khat va that pah hi. Hi kithahna thu teng a kan dingin Myo-ok pa kisawl hi. Tua ciangin, a kuama peuh ki lauthawng pah in, galkapte do ding a kipan uh hi.
       
Tedimte in, “An sangh kaihkhop khit mateng kipan nai kei ni; tua kikal in, khua kiim khua dang teng thu za sak ni,” aci uh hi. Mun khempeuh ah thu kizasak pah hi. Gungalte in, “Taisun te in zong galkapte deihlo uh ahih ciangin, ei zia hong za peuh le uh hong pawl pah ding uh hi. Ei I kipat phot ding bek kisam hi,” aci uh hi. Hausa pawl khat in kido ding hoih asa kei uh hi. Ahi zongin Thuam Thawng in, “Kipan khin phot lehang kipawl lo cih bang hong om thei lo ding hi,” a ci hi.
        
Tua ciangin Thuam Thawng leh Khai Kam in gal sim zia ding a hawm uh hi.

61.   A masa pen in, Myo-ok pa leh Kam phenpa suam ding. Tua bang ahih theih na dingin Vuandokpa kiangah, kong ki ap na dingun bangthu teng kisam hiam, ci-in kidong sak phot ding, ci-in tua bangin a dong uh hi.
      
Ahi zongin, Limkhai Mang Lun in Vuandokpa Fowler kiangah, tua pen hong kheemna uh hi, um kei in ci-in a hilh sim hi. Ahih hangin Phok La Mangpa (Fowler) in, bang bang hi leh ci-in, Myo-ok pa a thu kan dingin a sawl hi.
      
Myo-ok pa leh Thuam Thawng a kimeltheih ngei uh-a, thu dang zong nidang in a kikum khawm ngei zel uh hi. Thuam Thawng in zong, Myo-ok pa kiangah Pumva khua ah kituah dingin thu a zasak uh hi.

62.   Tua ciangin, galkap 30 tawh, Palik tampi tawh, Myo-ok pa Pumva pai dingin a kithawi uh hi. Sihzangte in Thuklai ah na dawn uh-a, “Thuam Thawng in Pumva ah hong ngak in om khin zo hi,” a cih khit uh ciangin, Thuklai pan Pumva paina lamdawt zui in tai mengmeng uh-a, Thuam Thawng a hilh khol ding bang pian in a ma pai uh hi.

Myo-ok Suamna
63.   Tua a pai masa teng Thuam Thawng gen khol ding hi lo-a, amau ciat panmun ding ah a bukkhol dinga pai masa ahi ih hi. Myo-ok pa leh a pawlte in, kuama thu thei lo in, pi lam mah zui in a pai uh hi.
       
1892 October 9 ni, Pumva lam zuan a pai, Pumva leh Thuklai kikal Suangbum a cihna mun tengah, lam kiim ah buk in Myo-ok pa leh a pawl teng, phawnkhat kisuah in a na kap uh hi. Galkap 3 bek a suak ta hi. Tuate tai in Thuklai ah a thu teng a ko uh hi. Tua khit ciangin, Tedim le Gungal teng in, Tedim-a galkap teng, Sihzang in thu kizakna sikkhau kikhung peuh mah suksiat ding tavuan a hawm uh hi.
       
Ahih zia ding pen uh, gal kisim ngei na bangin hih lo in, galguk nasep bekbek tawh, nawngkaisak den ding a, galkap antang nawn peuhmah suam den ding hi. Tua hi leh a sawt ciangin hong cimtak ding uh-a Khamtung khatvei teitei a nusiat loh in ki phamawk ding hi, ci-in a um uh hi. Tua banga sep khiat ding pen 1892 October kha pan in kipan ding ci-in a khensat uh hi.
      
Guah tui a tawm ciangin, galkap ki puak beh in, Khamtung galkap a ciah nuam ahih leh, a tam semsem hi. Ahih hangin, Khamtung mite gal hang mahmah ahih man in a lungkia tuan kei uh hi. General Palmer khut nuai ah galkap 2500 leh mepi 2 a om hi.
     
General Palmer in, “Khamtung mite gal hangin, gal siam lua uh ahih ciangin, gal sim ngeina tawh cik mah hun in a ki zo thei ngei ding hi lo hi. Tua ahih ciangin, zawh theih na ding lam khat bek om hi. Lo kho sak man lo ding, a-an neek ding teng uh lak sak ding, tua hi leh bek Khamtungte kizo thei pan ding hi,” a ci hi.
      
Galkapte a tam uh hangin, a cimawh uh hi. Bang hang hiam cih leh, gal guk bekbek tawh, galkapte ki suam sim den ahi man in, theih loh kal in galkapte si den hi.

Kapteel La Ding Kuan
64. 1892 December kha-a kipan in Gungal gam, Thuam Thawng khua Kapteel sim masak dingin a seh uh hi. Lei om lo ahih man in gungal kah na ding phong bawl a sawm uh hi. Tedim pan in Manipur gun dong lam a sial masa uh hi.

Phong Dawh Kipan
65.  1893 January ni 10 ni-a kipan in gun gal kah na ding phong bawl a kipan uh hi. A phong ding in, zuhangbung hawm (rum barrel) 40 gual in singpeek tawh a kilh uh hi. Tua pen sikkhau saupi khung in, tua tawh hau vawhsawmin, gun gal a lang leh a lang pan in a kai ding mi a kiseh uh hi. Mi 6 bang 7 bang pai khat in a tung thei hi. Galkap, La leh a van, thauvui, thautang, neek ding antang-tua teng khempeuh gun gal puak khit na dingin hun tampi a bei hi.
       
January 11 ni-a kipan in ni 13 ciangin gun gal langkhat ah a ki nawnkhia khin zo pan uh hi. Kapteel te in a na gal kap den uh hi. Kapteel te in, galkap te pai cih a theih uh ciangin, numei naupang khempeuh heemkhia meengmeeng in, galkaptein a khua uh a lak ma in tai khia khin uh-a, a inn teng uh mei tawh hal in nusia uh hi.
      
Tua pan ki pan in, kuamah inlo a kho man lo dingin, galkapte’ an tang pua dingin kuli bekbek in la den in, thaman bangmah pia lo in, a puasak lai uh hi.

Gal Van Khia
1893 March kha ciangin, lo khawh hun ding hi ta-a, “lo ki kho kei leh, ki puksi khin ding ahih ciangin, ci-in bangbang ahi ta zongin, gun gal teng a lut hi phot ni,” ci-in a thukim khit uh ciangin, gal van a khia uh hi. Lo khawh sak loh na ding ngimna pen lo khawh man na ding a suah veve uh hi.

Ukpite Zangkong Hawhpih

66. 1893 October kha ciangin, Mr.Carey in, Ukpi 49 Zangkong ah a hawhpih hi. Mangkangte’ hauhna, liatna teng a va lak kawikawi hi. Viceroy pa in, Mr.Carey kiangah, Khamtung na tun kik ciangin, Khamtung leh Manipur gamgi na bawl ding hi, ci-in thu a pia hi.
        
Tua mah bangin, 1894 January kha leh February kha sung teng gamgi khen in Mr.Carey a kicinglah mahmah hi.
        
1894 May ciangin, Yebaw Khup Pau, Yebaw Khai Kam leh Yebaw Mang Pum in zong gal van a khia hi.  Ahih hangin, tuate Kindat thong ah a puak uh hi.
         
Tedim, Khalkha, Phalam ah galkap a koih uh hi. Tedim, Phalam, Khalkha, tua teng kizom in sikkhsu tungsak uh hi.
         
Khamtung gam-a thau khempeuh khawm uh-a, tul sagih (7,000 ) Mangkangte in hong khopsak uh hi.

Kawlgam Tawh Gawm
1896 ciangin, Khamtung Gam pen, Kawlgam tawh gawm in, gamkhat in ciamteh uh hi.

Gal Kiging Sim
1898 kum ciangin,  a mun a mun ah a simtham in gal van kiging kik a, 1899 ciangin tual gal kipan kik hi. Ahi zongin, galkapte in phawkbaih kha ahih man in, a makai mi 9 te in gal van khia in a lut uh hi.

Ukpi Nasep Pia
67.   1901 March kha pan kipan in, thongkia teng khah in, pawl khat Ukpi-za Mr.Tuck in a pia hi. Khamtung ah mipi teel kul lo in, a ngah masa photte’ tapa in a luah pahpah ukpi ki-ukna tawh Khamtung mite hong ki uksak hi.

Kamciam Bawl
1901 ciangin, Mr.B.S. Carey in, Ukpi teng tawh, gal kilemna Kamciam bawl in sial ngawng a ban uh hi.
          
Sial si sungah sialmei diah in, tua sialmei tawh a kivat uh hi. Tua ki ciamna: “Gal le sa-a kinei om lo ding: Gal lel sa lel om leh kihuh ding: a ciam peel peuh sialmul pulh bang ding: sailsi luang bang luang ding,” aci uh hi.

Tua hum lai tak in:
Kam Hau uk sung khua 107 pha hi;
Sukte uk sung ah khua 20 pha hi.
Sihzang uk sung ah khua 16 pha hi.

Kam Hau uk ah Ukpi khat om hi.
Sukte uk ah Ukpi sagih om hi.
Sihzang uk ah Ukpi sagih om hi.

1949 hun ciangin:
Kam Hau uk, uk 8 kisuah hi.
Sukte uh, uk 4 kisuah hi.
Sihzang uk, uk 3 kisuah hi.
Hualngo uk, uk 1 kibehlap hi.
A vekpi in Myo-ok khat hi.

1965 hun ciangin, Myo-ok nih kisuah-a, Tedim Myo-ok leh Tonzang Myo-ok in kikhen hi.

------0O0------

1962 -    Tawlanzi Kawngsil
1963-71   Chin Uzi
1972-73   Chin Tahlahkah
1974 -     Pituh Kawngsil

--------------------------------------------

Zomi elibrary/Laibusaal in hanciam in aki type/tei kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MANGKANG TAWH KIDONNA (1887-1894). Agelh ~ J. Gin Za Tawng Naulak Description: Rating: 5 Reviewed By: Cinpu Zomi
Scroll to Top