728x90 AdSpace

Hot
Menu
Zon-ol na Donate

Latest News

Rev. Cin Khan Dal Tangthu Tom.

Rev. Cin Khan Dal Tangthu Tom.


Pianna:          
Tedim gam Muallum khua Pu Tun Khual (Samte) leh Pi Cing Khaw Nem (Naulak)  in ta 12 aneih sung panin a 10 na Rev. Cin Khan Dal Feb 19, 1944 in piang hi.

Pianpih lai zom teng:
  1. Khai Khua Hau (neulai hong nusia)
  2. Neng Za Lian (neulai hong nusia)
  3. (Khat Khua Zam) + Vial Za Cing
  4. Khoi Sian Thang + Ciin Do Cing (tapa 2 leh tanu 3)
  5. Suan Thang + Khai Sian Cing (tanu 2)
  6. Luan Khua Dim (neulai hong nusia)
  7. Cing Za Hau + (Eng Khan Thang)(tapa 3 leh tanu 4)
  8. Niang Khan Dim + (Khai Do Nang) (tapa 4 leh tanu 3)
  9. Khai Khan Cing (neulai hong nusia)
  10. Cin Khan Dal + (Khual Ngaih Cing) + Niang Ngaih Lun (tapa 7 leh tanu 2)
  11. Zam Khan Nang + Pau Lun Cing (tapa 1 leh tanu 2)
  12. Niang Khan Do + (Lian Khan Do)(tapa 2 leh tanu 3)
Tapidaw Suahna:
Kum  May 31, 1958 ni-in Jesuh honpa leh Topa in sangin Kum  July 9, 1961 ni – in Rev. Zam Khaw Lian in tuiphum hi.

Pilna zonna:
  • Kum 1952  ciangin Mualluum pan tai thum kigam la Mualnuam ah pilna sin kipan hi. Kum 1958 ciangin Zolai tanli Sia Khai Za Ngin khut nuai pan zo hi.
  • Kum 1958 -  ’60 Manglai tan 5 leh  tan 6 Cingpikot private sangah kah hi.
  • Kum 1960 – ’61 Zomi Baptist Acedemy sangah Siapi Rev. S.T. Hau Go khutnuai pan tan 7 zo hi.
  • Kum 1961 – ’85 S.H.S Tedim ah High School final ciang kah hi.
  • Kum 1966 – ’70 Zomi Baptist Theological School, Falam, Chin State, Myanmar, pan in Dimploma ngah hi.
  • Kum 1981 – ’83 Eastern Theological College (affliated to serampore University) ah zom in B. Th ngah hi.
Zi leh Ta neihna:
Kum 1971 kum in Nanpulun veng, Tamu a teng Pu Neng Thang (Suante) leh Pi Thang Dim te tanu Khual Ngaih Cing tawh kiteng in tapa 3 leh ta nu khat nei hi. Kum Nov 29, 1979 in a it mahmah a zi  in Pa Pasian kiangah ciah san hi.

Nu Khual Ngaih Cing tawh tanu tapate
  1. Khual Deih Lian (B.Th) + Awi Sian Man (B.Th) = tapa 1 leh tanu 1 (USA)
  2. Thang Suan Langh + Cin Lun Cing = tapa 4 + tanu 1 (Mualluum)
  3. Thang Za Kai (B Sc) (USA)
  4. Nem Khawl Vum (M Dim)(Yangon)


        Kum  July 17, 1983 ni in Pu Son Kho Cin (Naulak) leh Pi Neih Za Dimte tanu Ning Ngaih Lun, beh leh phongte deihsakna tawh kiteng uh hi.
Nu Niang Ngaih Lun tawh tanu tapate:
1.     Tuan Ngaih Khual + Ngoih Man Lun Niang = tanu 3
2.     Cin Suan Mang (USA)
3.     Thang Cope Sian Mung (Malaysia)
4.     Thang Tun Tuan Khai (Malaysia)
5.     Dim Suan Kim + Nang Teng Sang = (tapa 1)(Mualluum)

Biakna lam nasepna:
  1. 1970 kum in Tamu, Napulun vengah tungin khangno khangham a kah thei teng nitak zolai sin pih in tampi tak in Lai Siangtho leh Labute sim thei uh hi. Nanpulun Tuiphum Pawlpi pan Nupi pawl in khutpham tawh huhin inn zong sap sak hi.
  2. Kum 1971 – 72 sung Tamu Valley Baptist Association ah Youth Director sem hi.
  3. Kum 1972 – 73 sung Keizang Circle Baptist Churches (KCBC) Secretary lai-atpi sem hi.
  4. Kum 1973 KCBC kumcin kikhop 27 veina ah huh sia dingin a kilak a kipan a dam sung teng Pasian na semsuak hi.
  5. Kum Feb 25, 1978  Tedim Baptist Association (TBA) kumcin kikhopna Thangsan khua pan Khua Li Baptist Churches (KLBC) inn tuan in Tua sungah Pasian na semna zom suak hi.
  6. Kum Feb 17th, 1980 TBA kumcin kikhop Zungkhua pan Siampi za (Ordination) kipia hi.
  7. Kum 1987 – 93 TBA Lai-at pi (General Secretary) term nih sung sem hi.
  8. Kum 2004 – 05  sung NTBA ah General Secetary term khat sem hi.
  9. KUM 2002 – 2008 dong Tedim Baptist Covention, Minister council ah Chairman sem hi.
  10. Kum 1980 panin hong nusiat dong KLBC ah Pasian na sem hi.
  11. Pasian lenggah huan ah na a sep kawmkawm laitak mah in sin natna tawh 8/8/2009 ni-in a pian na Mualluum khua mah panin Pasian kiang hong zuan san hi.
  12. Pasian lenggah huan ah kum 38 sung sem hi.
  13. Pasian na a sep sungin mi 581 tuiphumna pia in nupa kop 60 kiteng sak hi.

Khathu tawh Kalsuanna:
Kum 1995 November kha in Khitui Gospelte kisam in tua pan kipan Mualluum khua-ah khanlawhna lianpi hong tungin 1997 kum bei dong nitak sim phatna biakpiakna tatsatlo in kinei suak hi. Hih khanlawhna tungtawn in Kha siangtho letsong tuamtuamte leh kamsanna tuamtuam zong kingah hi.

1997 kum ciangin Tedim gam khua pawl khat leh Aizawl ah lungdamna tung tangko in ka zinkhia uh a, Pasian nasepna tuamtuam leh Pasian hoihnate ka mu uh hi.

2001 kum sungin Aizawl khuapi leh a kim khua 50 val ka zin kawikawi uh a, Tuk hun sung hi napi-in lakkal ah Pasianin huihpi guahpi hong thuak sak vetlo in  hong keembit hi.

2002 kum ciangin Aizawl, Shillong lam tawnin Guahati, Phaipi, New Lamka ka zin uh a, hatsak buaina om lo in cidam tak in inn ka tung kik uh hi.

Mualluum khua-ah Rev. Cin Khan Dal tungtawn in Pasian nasepna a lamdang pawl khat:
<A 15 veina NTBA Kumcin Khawmpi “Souvenir Magazine;2016; Page 28 pan>

Tg. En Sawm Mang gamsung pan-in amsa in inn lam hong ciah a, inn tun ciang khauphawk nawnlo in Sia Dal thu ngetna tawh Pasian in damna hong mu sak in tuni ciang dam suak hi.

Tg. Kap Suan Lian zui tha theilo cimawh in cihnang theilo in ki-om a, Sia Dal thu ngetna tungtawnin zatui zat kullo in Pasian in damna hong musak hi.

Lia Dim Sian Nem zong nitak nitum kuan ciangin lunglengin kapkap a, Sia Dal thu ngetna mah tawh a lamdang tak in Pasian in damna hong musak kik hi.

Tg. Vial Sian Khup naungek lai in in cisa nattun in nawi zong tep thei nawnlo, a kahna aw zong kiza zo nawnlo in om a, Sia Dal in thu hong nget sak ciang nawi dawnin hong cidam a, tuni ciang damna ngah suak hi.

Khantoh Nang Nasepna:
  • Kum 1993 in Mualluum leh Cingpikot kikal lamtangin zongin kito hi. Tun mawtaw lamin kizang suak hi.
  • Kum 2002 in Mualluum Tongsial kikal Mawtaw Jeep pai theihna lampi kitun hi.
  • Kum 1994 in Mualluum leh Mualnuam kikal lampi nuam zaw ding kizong in kito pah hi.
  • Kum 1990 – 91 sung Pasian’ lampi hong honsakna tawh Saklo-tui lak theihna ding kingah in inn kim ah tui-lu kikoih hi.
  • Kum 1993 June sang hon tawh kituak in Mucu sang zong kihong thei hi.
  • Kum 1994 June sang hon tawh kituak in Tan (5) leh Tan (6) kipan in Kei leh Sia Khual Ngaih Lian tawh ka sem pah uh hi. Sangkah kum 1998 ciangin Tan 8 ciang kizomto ta hi.
  • Sangkah kum 2000 – 21 sung deihsakna tawh Sangah ka kipia hi.
  • 2000 Kum in Pu Zel Khan Mang, Rev. Thang Suan Ngin, Sia Ngin Cin Khai, Sia Pum Suan Khai leh Rev. Zam Khan Nang te tawh kikum in kithu zakna dingin “Mualluum Banzal” hong pankhia uh hi.
  • Ama makaihna tawh khangsawnte et theih dingin Khuazang bup video khui thum kizaih hi.

Khantoh nang Geelna (Vission):
  1. Pupa lo khawhzia khel ding: ipu ipa pan lo I khawh toto hi a kihau semsem lo in kizawng semsem ahih manin a dan kisam hi cih ka phawk hi. Tua ahih ciang in lo pen a tul theilo ding lei hoihte guahtui in a tai thei lo ding, eklei hoih a ngah den dingin SALT system zang thei leng nuntak zia khat hong kikhel ding ka lametna leh ka hanciamna hi.
  2. Khaici khek ding: Khaici pen a leitawh kituak in a pung dingte bek cing leng kinei zaw ding hi. Inn khat in duh khempeuh lo cingkhat ah I cing sangin nam khat cingin hauh mahmah lel leng hoih ding hi. Gehtehna in Ga ih ciin leh ga bek, bal I ciin leh bal bek, Kaithum ih ciin leh kaithum bek, ….. hi in a dang I duh leh zuak in ahi kei leh kikhek leng tangzang mahmah ding hi. Ansal zong tampi bawl kullo ding a, inn zong tangzai tuam ding hi.
  3. Nek leh dawn khek thei leng:  En pen ahih bangbangin ne pah I hih manin kikhom lo hi. Vaimim ahih leh a tang mah in kine suk pah ahih manin I neihzah kikhom lo hi. Gentehna in a vui in gawi in a tuamtuam tawh hel in hi leng mi khat I nek pen innkuan khat in kine thei ding ahih manin nek leh dawn  zia zong ngaihsut huai ka sa mahmah hi.

Ka Pa (Rev. Cin Khan Dal) hong gen thu:
Ka pianna nu in hong nusia baih ahih manin ka pa in zikik nei hi. Khanglui ngeina hi leh ka Pa inn a tuan kul hi. Ahi zongin inn tuan leng ka tate tagah bangah tagah semsem ding ahih main ka tate kong itluatna in ka tuan kei hi. Nang tun khua theihta na hih manin inn tuan in nong cih leh tuan ning hong ci hi. Ahi zongin ei bek hilo in mai lam ah zong hong om lai ding ahih manin hoih ka sak loh pu pa ngeina khat ahi, hih inntuan pen inntuanloh in ei innkuan in a pan hini hong ci hi. Ken zong ka Pa cih hong ka sa a, Pa aw inn tuan kei in kei na tapa hing nang zong nong it taktak leh kei ka dam sung hong khoih hong vak sak in  ka ci hi. Tua ahih manin nukik nei pakik nei ih om leh zong pianna nu/pa mah in ngaihsun in khasia sak kei ni. Kem in cingin I don zawh nang hanciam tek ni cih hong hanthawn nuam ing.

A Kaikhawm: Khual Deih Lian  :
  1. Ka pa laibu bawl “Sih leh Hing Phawkna Mualsuang”
  2. Ama hui-ni “Bulletin” tung pan ka lak hi.
  3. <A 15 veina NTBA Kumcin Khawmpi “Souvenir Magazine;2016; Page 28 pan>.
***************************************************************

Sia Suum Do Thang in
rom:sum don sumlehdon@gmail.com
to:cinpuzomi@gmail.com
date:Wed, Nov 23, 2016 at 8:32 AM
subject:Huh nget na
mailed-by:gmail.com

Cin pu,
           Nung lam deuh Atlanta ah na om sa a konghawh leh nang Tulsa lam na pai tawh kituak in ki mu thei lo.
           Nang tangthu kaihkhop lak ah Muallum khua Rev Cin Khan Dal tangthu a ki hel khak zen zen leh nong huhna tawh hong khak ve.Pasian na kasep theih na ding ma hong patsak ka Siapa a hih man leh Agape Revival Ministry nasep na ah ka sepkhop pih Muallum khua mi Evan Kham Khan Langh tawh ka nasep na uh laibu khat  ka bawl sawm uh sung ah hel nuam ung.
           Neihsa,atsa na neih kei leh zong TBA Secretary a sep na leh Pasian na a sep na te ban ah amah tawh kisai theih huai om bangbang hong at sak le cin deih ing.Lungdam ei.

Suum Do Thang
email: sumlehdon@gmail.com
Ph 850-501-0804
Pensacola FL

hihdan in hong ngetna dungzui in Rev. Cin Khan Dal tapa Rev. Khual Deih Lian kiangah ka nangen hi.

from:khual lian khualdeih@gmail.com
to:cinpuzomi buansing <cinpuzomi@gmail.com>
date:Wed, Apr 19, 2017 at 3:42 PM
subject:Rev. Cin Khan Dal tangthu tom.
mailed-by:gmail.com

in hong khak ahi hi.

A lungdam,
Cinpu Zomi 
www.laibusaal.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Rev. Cin Khan Dal Tangthu Tom. Description: Rating: 5 Reviewed By: Cinpu Zomi
Scroll to Top