728x90 AdSpace

Hot
Menu
Zon-ol na Donate

Latest News

REV. DR. KAM KHAW THANG, B.Th; D.D; F.D.C.S KEI THEIH leh CIAPTEHNA DAN (October 17, 1927 – March 30, 2017). Agelh ~ Prof. Dr. C. Thang Za Tuan

REV. DR. KAM KHAW THANG, B.Th; D.D; F.D.C.S
KEI THEIH  leh  CIAPTEHNA DAN
(October 17, 1927 – March 30, 2017)
 Agelh ~ Prof. Dr. C. Thang Za Tuan


Thupatna
            Mangkang icihte thuciin khat ah “Mi pawl khat mithupi ding in piangpah a, pawl khatin thupitna tangtunzo hi”acih pen thudik mahmah khat hi. Sia Thang ci-in ilawhziau Rev.Dr. Kam Khaw Thang, pen ei Zomi sungah mi thupi dingin piangin, ama khanphat sungin mithupi leh I etteh ding khat hi in ka thei a, a zahtak huai leh ettehhuai ahihna ka theihsun tawm tawh zahtakna kapia nuam hi.

Mi thupi icihte in…
            Mi thumaante, diktatte, kuhkalte, zuau gen lote, aciiltatte,a siangtho gamtatte leh  thuhoih ah a thumangngiatte ahi uh hi. Tua banga mite muantak, suantakte’ etteh tak in mithupi akici ahi hi.

Thumaanna:  Leitung ah mithupi akicite peuhmah thumaan ngiatte hi. Thumaan icihte in thu muhsiam in aman asak pen amuhna bangin gen, agensa bangin kheel themthum lo-in agamtate hi. Kamciamsa akheel nonlote hi.  Sia Thang pen mikhat tawh Tedim aa a inn kilei ding kithukim khin hi. A zingciangin a tamzaw apia nuam khat in va kuna, ko kam kigensa hi ung ci-in atamzaw pa om gegu piakik tuanlo kici in kiciamteh hi. Sia Thangin a zuau gen aci mikhat beek kiangpan kuamah in akiza ngei naikei hi. Hih in mithupi ahihna hi. Amah thumaan ahihman in thumaan asaklohte ci-ngam giapgiap lel hi. Aheh hizenzen lo hi. Kam zol lo napi in kamsia leh mi gensiat zang ngeilo pa kici hi. Thumaan asakna ah sih dongin mittaw sialkhaulet acih bangin alen cinten asihpih ngam  pa hi.


Diktatna: A naupan lai pek akhuatheih cila kipan in kuamah khem ngeilo hi. Hih bang thudik atheihtheihna bulpi pen asuahpih ngiat ahiding ci-in ka sansat pah lian hi. Nu leh Pa hilhzawh thu ahi kei dinga, a suahpih apianpih ngiat pilna ahiding hi. Diktat ahihman in zua agen hetlo pa ahihi.

Kuhkalna: A Pa thu mangin ama ut gegu galkap tumlo zaw in Pasian nasem dingin Laisiangtho Sang kah hi. Pasianna’ sepna ah kuhkal takin sem hi. Laisiangtho Sang akah kawm in  “Naupang Lai Siangtho Tangthu (1954)” tei in laibu in bawlin hawmkhia hi. 1960 kum a kipan in i Laisiangtho Thuciam lui (Old Testament) tei in Cope Topa tei LST Thuciam thak tawh gawm in 1977 kum in mualsuah zo in hawmkhia hi. Ama teithakngiat abuppi (LAI SIANGTHO, Thuciam lui leh Thuciamthak Kigawm) pen 1982 October 17 ni in Tedim I khuapi a Cope Memorial Church ah zingsang nai 10:00 -12:00 in apkhia ngiat hi. Ei Tedim kam in tuni ciang dong i zat i Lai Siangtho ahoih pen hong guan ahiden lai hi. Tua zawh in William Baclay ii Bible Commentary Vol. 17 apha zong eikam limci tawh hong letkhiat sak hi. Hih akuhkalna hangin LST limci tak ineihna ah Pahtakna pia pha lailai ni ei!!!Mikang mipilte nangawn mipil tampi kipawl in LST letkhia uh a, amah ahihleh amah guak in letkhia sinsen hi. Lamdang hi.

Zin khel ngeilo in minthangpa hi: Siapa in Kawlpi ah a sangnaupan laipek in azintunnate ah a nasep zawh leh tuni ciangdongin zin khello in minthang hi. A zintun zawh kum 50 cinna kipahna letsong a zinte pia zawlai kicihi. Ei mi pawl khat in khatvei azinna nangawn uah zin mun nih mun thum ah kheel kawikawi thei lai uh hi.

Ciiltatna: A vanzat peuhmah ato theithei ding lei pah hi. A sabawn bawm bang a sangnaupan lai in azat siik sabawnbawm tudong zang lai hi. Sabawn neu taleh zang ciauciau suak hi.Etteh ding thukhat hipah hi. Puansilh zong tam kulsalo in tawm kha khat bek a nei lingliang lel hi.

Sianthona: A neutung akipan ama zontawm tawh Pasian thu zui in a pumpi sungah apumpi deihloh a valthaute ahi, zu, za, kuun, khaini, tuibuuk, dummuam, khamtheih guihtheih zatui zahate khat zong a sungah lutsak nailo kici hi. Hih pen Nu leh Pate thuhilh zawh hilo zaw in ama pianpih cimna pan akidaamzo ahi hi.

Thumanna tawh zineihna: Ama LST Sang akah aman kum in Ngennung a Pastor  Sia Cin Khaw Gin tanu Siama Niang Khan Ciin (India gam pan Nurse Training Zomi lak ah aman masa pen,1955) na om in, a Pa Pu Sim Tung Nung in dotsak in atapa tawh gawm hi. Amau geel khat leh khat kinial hiaulo in Nu leh Pate thumangtuak uh hi in kisang thei pah uh hi. Abilbel khat ah Tedim ah Sangmang Nelson  LST Sangah akahkhawm tuak leh akitheisa gige uh zong ahihman hikha ding hi. Amau geel pen picinna kicingtuak uh ahihman in zawllai zong kikhak selo in Siapa in,”Niang Khan Ciin aw, Pate in kiteengun ci ahihmanin kong teen pih nuam hi” acih bek laikikhak ngei uh hihtuak hi. Kilawmta mahmah uh ahihman khat leh khat aminpi mah uhtawh akiteencil vua kipan kilo/kisam gaga lel uh a, akitheisiam mahmah uh kici hi. ‘Nu leh Pa’ thumangte anahlawhpeek’ akicih mahbangin tanu khat leh tapa 8 tak nei uh hi. A kiteen ding uh mopi lai un Siapa tektek kuan in athusun khawngte zaknop kisa mahmah ahihlam kasim kha ngei hi.

Siapa tung ka lungdamphat diakna: 1977 kum May kha 31 ni in Khan Lun tawh kakiteenna uah amah teekteek in Pasian mai leh mipite mai ah Tedim Cope Memorial Baptist Church ah siangtho  kiteenna, kamciam hong kiciamsak ahihman in hampha kakisa mahmah uh hi
Tua banah 27-4-2008 kum in kei tangthu bu ahi (Piada pan Deputy Director General ah) cih laibu ah hong muhna nam 6 leh thupha hong piakna tawh lai limci tak in hong gelhsak hi. Tuabek hilo in ama’ Sermon te siktaw tawh khen ciatciat in kei honpi khat gamh hong luahsak lai hi. Kei thu nong dotnop uhleh tu a kipan in keitaang in  Thang Za Tuan nadong un acizaw lai hi. A tapa upa pen in hong ngaihsun ahi a kisuang mahmah napi in ka angtang mahmah hi.

Thukhupna:
 Ei Zomi sungah amah bangin mi muanhuai, etteh huai leh pahtak huai tam i nei het kei hi. I neih sunsun a om gige lam zong i phawkkha khin kholkei sawnsawn lai hi. Pilna, ciimna leh Pasian zahtaakin Ama mizat khat ahi I Zomi Biakna Sia lak ah hong nuntak pih sungah akhangham pen hikhading in kamuangmawh hi. Ama damlai in hih ama’ thu katheihna leh kamuhna ka-at amuhkhak lai hampha kakisa hi.  Ei Zomi bek hilo in Kawlgam bup ah 2000 February 15 ni in Doctor of Divinity pahtawina minpha kipia in  2002 March 16 ni in Kawlgam LST Sang minthang pen Myanmar Institute of  Theology, Insein pan in  Fellow of Distinguished  Christian Service-FDCS, Biakna lam pan kipahtawina a sangpen angah Zosuanh Tapa minthang khat ahi a i angtangh mahmah hi. Gam thupite ah a mi minthangte uh a kepna Innpi (Hall of Fame) bang nei hilehang ei Zomite lak ah akephuai mi tnupi ahi hi. Topa in khansauna thupha hong piaksak lai tahen!
(Hih Siapa thu ka-at pen amah kapia khin a tu’n ama ong nutsiat ciangin kongpulak kik hi.)

May 31, 2016                                                                          C. Thang Za Tuan

*******************************************************************

from:Dr.Tuan thuphagah21@gmail.com
to:Cinpu Zomi <cinpuzomi@gmail.com>,
Hau Mung <hau.mung@gmail.com>
date:Sat, Apr 1, 2017 at 5:14 AM
subject:Rev.Dr. Kam Khaw Thang
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: REV. DR. KAM KHAW THANG, B.Th; D.D; F.D.C.S KEI THEIH leh CIAPTEHNA DAN (October 17, 1927 – March 30, 2017). Agelh ~ Prof. Dr. C. Thang Za Tuan Description: Rating: 5 Reviewed By: Cinpu Zomi
Scroll to Top