728x90 AdSpace

Hot
Menu
Zon-ol na Donate

Latest News

THAWMTE MANG KHAN KHIAT NA TANGTHU. Agelh ~ Thang Khan Dal

THAWMTE MANG KHAN KHIAT NA TANGTHU.
Agelh ~ Thang Khan Dal
Photo credit : Ever Zomi @ Ginkimmang

(a). SAIZANG  KHUA  AH  PU  MANG SUUM(THAWMTE) HAUSA SEP NA.
Pu Kul Suangin tapa Mang Suum le Sawm Sing nei hi.Pu Kul Suang in Guite khua ah a ten sung un Guite Pu Vum Mang ta nu (Pu Guilun ni) Kom Kim tawh Mang Suum kiteeng sak hi. Hih hun lai tak in Guite Tedim khua ah khang nih na teeng khin uh hi.

Pu Mang Suum khan ciang in Sai Zang ah teeng uh hi. Saizangah Pu Mang Suum in hausa a sep hun pen 1600 kum kim dingin kiciamteh hi. Pu MangS uum leh Pi Kom Kimte in tapa 7 leh tanu khat nei hi. A ta nu pasal pen  Songphut beh Nuam Tut zi hi kici hi. Pu Mang Suum pen pil le vaihawm siam a hih man in khua kim khua pam pan in ki bel ciat hi. Pu Mang Suum in a inn teeng te om na ding a huang sungah inn tampi lam hi. Inn teeng hau in neih leh lam zong a hau in thang vangvang hi. A inn teeng te a tawl ngak a ki neih ciangin gun a piau suang pua sak hi. Zomi te’sungah “Inn om tha in gun suang pua” cih paunak hong piaan khiat na Pu Mang Suum inn teeng te in  a inn om uh ciangin nasep ham penpen gun suang pua in a sawl na pan a hong piang khia a hihi.

Sai Zang khua ah Pu Mang Suum a man laitak in inn 700 bang pha in mun 9 ah tual biakna kibawl hi kici hi. Pu Mang Suum in a ta tum Zang Luah sial cing sak hi. Khat vei sih lui a cih na ah a sial te cing hi. Huihu nuai khat ah Kolnuthep a kici nungak mel hoih mahmah khat na om hi. Zang luah in tua nu hoih sa lua a hih man in a inn ah ciah pih a, zi-in a nei hi. A kiten ua kipan nisim in a sial uh ki beh lap den hi. Sial hau mahmah uh a, a sial ek tui luang in Sialtang lui ban suk zo hi. (Sai Zang pan Sialtang lui tai nih gam la hi.). A sial tal khat gol mahmah a, a ki heng sungah baak kua hi. A mau gel kiten a kipan inn nuai suutpi bul ah gulvom sam nei khat sun ciang ki vial a, zan ciang a pai-na kithei lo in mang hi. Sial hau lua in, a inn teeng te in a khah ngei na sih lui gam kuam kicing zo nawn lo a, Leilum gam ah khah hi.

Khua vum ah sahang a hawk ciangin Kolnuthep in “Ka pa ten zin nei hi a ui-in tawng” ci thei zelzel hi. Sakhi tuihuup a om ciang “Ka pa te gal beng ciah hi, a dial uh pho” ci zel hi. Pi Kom Kim in hih peuh mah mihing taktak hi kenteh, dawi hi ding hi ci-in a pasal a ko hi. A monu pau a zakzak ciang Kom Kim in dawi numei te a na uh ki phei khit cih phawk hi. Zing sang khat vok an ding gatam hawng huan hi. ”Ka vok an huan suan in la vok kuang ah sungin” ci-in sangkil nuai ah a monu na en dingin thal lup hi. A hih hangin a monu nawh pai a hih man in mu thei lo hi. A zing ciangin huan ah za nah lo leuleu hi. A mah a vok gol phungah dingin “Ka za nah lawh hong sang in” ci-in a monu sam hi. “Ki ban zo kei hang vok gol tung hong sik suk in” ci sawnsawn hi. Tua ciangin a monu na mu pet mah hi. A monu na kiphei khit takpi a,t ua ni a ki pan Kom Kim in a monu deih nonlo hi. Nisim in a monu ciah sak nadingin a pasal huau tawntung hi. A mo in thei a, ”Nute pate aw ta ka neih loh hangin hong mudah tuan kei un, no lak ah kei ka om nak leh kua mah ih si kei ding a, ih neih sa zong bang mah kiam nonlo ding hi, ei teng si nonlo in ih neih sa zong kiam non kei peuh leh pha zo hilo a hihiam” ci-in a thum hangin Kom Kim ut lo hi. Zing sang khat Kom Kim in, thuk tung ah a ngan bel suang to in, ngan bel ah tui sung dingin a sawl hi. Tui a so ciangin Kom Kim in ”Nanu napa kiang va zuan kik in” ci-in a monu a sawl leuleu hi. A monu in zong a cih nading thei lo-in,phuisam a, mimbeem, taangbeem teng a khe muk in ban suih koikoi hi. Tua khit ciangin a bel suan khia in suutpi phungah tuisa sung suk hi. Inn nuai suutpi bul a, gulpi vom buak kha hi. Tua ciangin gulpi ham in, a vok gawl ah phu let a, tai mang pah hi. A sial te uh patau in, kising pah hehu uh hi. A inn kuan un lam dang sa uh a, innka dawn ah en uh hi. Tua bangin a et lai tak un, Kolnuthep in sial kong hong a, kong biang pua lam ah na pang hi.S ial teng tai khia ngeingai uh a, sial gol pen tungah Kolnuthep tuangin, a sial te uh gamlak manawh in a honhon in a tai ziahziah uh hi. Sasawm mual a tun uh ciangin meiilum in tha khat in tuam a, sial teng leh Kolnuthep a tun na uh ki thei lo in mang diam uh hi.

A sial neih te uh a hawl kik uh hangin, a vekpi in hawl kik zo nonlo uh a, a khe bai leh a zawng khal teng bek hawl kik zo uh hi. A dang teng gam lak zuan in gamsial suak uh hi. MangSuum heh a, a sial tai te kiangah ”Ka kep ka cin ding ut lo na hih uh leh thal tang khat in si un, na sik na tuat un, Sai Zang ta peuh mah si kei hen” ci-in van lam ah tui phih in phuisam hi. Tua ahih man in tu nidong Sai Zang mi peuh mah zangsial siik leh tuat in  a si om lo hi ci-in ki gen hi.

Ni khat Pu Mang Suum in sawng hong beng hi. Gitmual a tun uh ciangin Pu Mang Suum in ”Vang ka neih lai leh meisan in hong pai pelh ding hi” ci-in aak kiaklo po na lak a om thei kung tung ah kah to hi. A khang lam pan in a inn teeng te sawl in aak kiaklo hal sak hi. Tua lai tak in Pakzang khua kiang lam pan kipan in pingpei hong nung a, tha khat in aak kiaklo sem a zial gawp in, thei kung a tuang Pu MangS uum peinelh hi. Pu Mang Suum nasia tak in liam gawp a, a tapa Suang Let in pa aw “Nuntak ngap hetlo na hi hiam?,’ci-in a dot leh “Nuntak ngap keng” ci-in dawng hi. Tua a hih leh na thando pih dingin, sa va beng nung ci-in a inn teeng pa Nial Nang tawh gun gal lam ah sa beng dingin kuan khia uh hi. Meitei gun Sumkuangli tungah sing luang khat na kiphei kham a, tua tung tawn in gal kah uh hi. Sun  niloh Pak Zang gam sung teng sa beng uh a, khat zong man lo uh hi. Nitak ciangin giah buk sat uh hi. Meiphualpi cih uh a, mei awi dimdiam in a om lai tak un Nial Nang in ”Mataw pute tu zing a ii sing luang leii tot in mit tang nih nei veh aw” a ci hi. A pute in ”Sing luang mit nei za ngei khang” a cih san uh hi. Gam a vak uh hangin bang mah man lo uh a hih man in ciah kik uh hi. A pai lam in a tot na uh mah sing luang na om lai a hih man in, tua sing luang tung mah zui kik uh hi. A inn teeng pa uh masa in a nungah Pu Mang Suum ta te in zui uh hi. Singluang mong a tun ciang un a innteeng pa’n ”En vevua pute”cih tawh thuah in teipi tawh a mit tang a sut leh gulpi kihei in tuili sungah kia uh in a si khin uh hi. (Hih a kan tan uh tuili pen pawl khat in Ngatan lui leh Sial tang lui ki tuah na khang lam hi ding in ciamteh uh hi).

Pi Kom Kim in a tapa teng a vui khit ciang nuakik ning cin ngaih sun hi. A khipi awh lai bot sat sim in maulawng ciang khut sungah thun hi. Nuai suk daakbu lasim nuam leuleu in,seng sia buptuah khat sungah guangin a tungah gataam sun nelh hi. A Pasal leh a tate a vui khit ciangin SawmSing kiangah” Ka om na peuh ah vok no khat beek ka khawi kul ding a hih ciangin aak bubah leh gatam hawng hong pua sak in,lampi ah ka puk gawp loh nadingin hih ciang khut zong hong pia in”ci-in ngen hi. Sawm Sing in bang mah omlo sa in a nget te pia a,keel tal geh khat zong kai sak lai hi. Hih bangin Pi Kom Kim a nua kik ciang Zomi ten’ paunak in ih nei a,”Tapasal 7 nei Kom Kim zong nuakik” ih ci hi.

(b). SONGPHOT BEH CIAPTEH NA. (Dr. S. Ngul Za Dal ciapteh na).
à.1.|-1.Songphut.-->1.|-2.KikSong.->1.|-3.LaiSong.>1.|-4.LaiTuang.>1.|-5.TuangPau.
                     2.|-1.Thawmte.     2.|-2.CingZui.                                                             2.|-5.LamDong.
                    3.|-1-TuangDo.     3.|-2.KimSel.                                                               3.|-5.TunLuah.
                                                   4.|-2.Numei.
                     2.CingZui.-->1.|-3.LimZui.-->1.|-4.ManZong.--> 1.|-5.ZuHawi.
                                                                                                       2.|-5.ZuGoih.
                     2.KimSel.---> 1.|-3.SelKim.--> 1.|-4.LamHen.--à1.|-5.NiangSel.
                                            2. |-3.SelLam.     2.|-4.LamKai.        2.|-5.CinSel.
                                                                        3.|-4.LamSel.

Pu Song Phut beh te ciapteh na ah Pu Songthu tui zong a, a pai na ah vasa vom khat leilak pan leengkhia a muh ciangin, tua vasa vom phawn khiat na  a et leh tui kicing mu-in vavom nu tui khuat ci-in min vawh hi. Tua zawh kum tampi khit ciangin sampha tui ci-in min vawh hi. Khua dang pan in sampha deih numei te in zantam liangin tua tui tawi uh hi ci-in ki gen hi.

Ciim Nuai khua ah Pu Song Thu a teen lai-in a kim a paam; sak lam; khang lam cih te ah kua mah teng nai lo ahih man in gal kido cihte om nai lo hi. CiimNuai khua kim ah Ziltui khuk(cikhuk) khat mu uh a, tua Ziltui tawi in ne uh hi. CiimNuai khua ah kum sawtpi a ki teen khit ciangin kikhen thang uh hi. A kikhen thang uh a sua vei ciangin gam leh lei kituh in kisim kido na a piang pan a hihi. (Song Phut beh tangthu 1977:5).



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THAWMTE MANG KHAN KHIAT NA TANGTHU. Agelh ~ Thang Khan Dal Description: Rating: 5 Reviewed By: Cinpu Zomi
Scroll to Top