728x90 AdSpace

Hot
Menu
Zon-ol na Donate

Latest News

ZOMITE SUL. ~ Sukte beh leh Tedimgam tangthu’(1996) Laibu pan…

ZOMITE SUL.
~ Sukte beh leh Tedimgam tangthu’(1996) Laibu pan…


Amun : Sakollam Veng, Tedim Zogam
Photo Credit : Thaw Thawn


 A sunga om Thute :
I. KAWLGAM SUNG TUNNA
II. PYU, KANYAN, TET MINAM PIANKHIATNA
III.TET (CHIN) TE LUTNA
IV. TET (CHIN) TE KI-UKNA
V. TET (CHIN) TE PHUALPI PAGAN PAN KIKHENNA      
VI. ZOMI ( CHIN) TE ZOGAM TUNNA – A.D 1000 KUAM

************************************************

I. KAWLGAM SUNG TUNNA
Nidang i pu i pate in Mongolian gam pan in Tibet gam nitumna lam a om Mual sang tung zuanin a teeng, Mongot minam sungpan hong piangkhia Mongolia minam ahi hi. Tua hun lai-in sing le suangte galhiam in na zang uh hi. Gal le sa launa leh anneek tuidawn haksatna hangin munkip gamkip neilo in gamnuam gampha zuanin na lal kawikawi uh hi.

Tibet gam sung a teen hun sungun Kawlgam ah Nigarito leh Indozini minamte na teeng khin uh hi. Tibet gam ah neek le dawn a kicin loh ciangin Monkhama, Tai-Shan leh Tibeto-Burman minam lian thum in na kikhen uh a, ahun hun, apawl pawl in Kawlgam sungah na lal uh hi. Tua minam thum sungpan in Monkhama minamte in Salween (      ) gun leh Mechaung gundung zui-in Kawlgam na tung uh hi. Kawlgam ah ateeng sa Nigarito leh Indozini minamte hawlkhia in Irrawaddy, Sittaung leh Salween gundung kuam tengah na teeng uh hi. Tu hun Kawlgam sunga teeng minamte sungpan in Kawlgam ah ateeng masa pente ahi uh hi. Mi hong tam semsem ciangin kikhenthang leuleu uh a, khua tuam tuam satin na teeng kawi kawi uh hi. Tua hun khuapi minthangte in Tuhwanahbungmih (Thahton), Hanthawaddy (Okkalapa), Dagon, Bassein, Thanlyan, Twinty, Moulmein, Pegu leh Mohtama tea hi hi.

Monkhama minamte Kawlgam sung a tunkhit a sawtlo in Tibet-Burman ki-ci minamte, Tibetgam ni suahna lam a om Bramaputra gundung zui-in na lal uh a, tua pan Irrawaddy leh Talawady (Chindwin) gundung zui-in Kawlgam na tung uh hi. Tua minamte Takaung khua ah na teeng uh a, Kawlgam a tung nih na minamte ahi hi.
           
BC 100 kum pawl in Chinagam Yanyigun khanglam a teeng Tai-Shan minamte in China kumpi ukna thuak zolo in Shangam teng ah na teeng uh hi. AD 200 kum pawl in Asiagam laizang pan-in Karen minamte hong lal in, Irrawaddy leh Salweengun kikal tengah hong teeng uh a, tua lai pan pawlkhatte zaang lei ah teengin pawlkhatte mual tungah teeng uh ahih manin Zaanglei-Karen leh Mualtung-Karen nam nihin kikhen cih thu 1947 kum GE Harvey gelh “Outline of Burmese History” leh 1947 kum Daw Thein gelh “Burmese History” sungah kiciamteh hi.

II. PYU, KANYAN, TET MINAM PIANKHIATNA
Tua hun Kawl gam sunga teeng mite in a mau teenna mun ciatah a maul eh a mau ki-uk uh hi. Takaungkhua ah Abirasa in kumpi sem a, a mah a sih ciang a tapa Kanyasakyi leh Kyanyasange te a pa kumpi za a kituh uh hi. Kanyasange Kumpi a suak hi. Tua ciangin a u pa Kanyasakyi Takaungkhua panin a galkapte tawh Talawadygun (Chindwin) kantan in Bunglung khua (Zasagyo) a saat hi.

Kanyasange kumpipa a sih ciang Duatapong in kumpi sem a, Takaungkhua pan lalkhia in Tazekhittaza khua a saat hi. Duatapong a sih ciang Tamudare in kumpi sem a, gam leh lei makaih zolo ahih manin AD 721 kum pawl in Tazekhitaza khua kisia a, Pyu, Kanyan, Tet kici minam thumte hong kikhen uh hi. Pyu te Kawlmi, Kanyan te Rakhaingmi, Tet te Chin mite hi cih thu G.E. Harvey gelh “Outline of Burmese History”  ah kiciamteh hi.

Tua bangin minam thum te hong kikhen uh ciangin Pyu leh Kanyante kido uh a, Kanyan mite in Tazekhitaza khua nusia in ni tumna lam Thandwe (Sandoway) mualdung tengah teeng uh hi. Pyu minamte sungah kilem loh na hong piang leu leu in a maul eh a mau hong kido uh hi. Tua ciangin Pyute khen thum hong kisuah uh hi. Khen khatte in Ciahben minamte bel, khen khat in Tetminamte bel in, a om lai khen khatte in Tazekhitaza khua puah pha kik-in a teeng uh hi, cih thu G.E.Harvey gelh “Outline of Burmese History”  leh Daw Thein gelh  “Burmese History” sungah kiciamteh hi.

III.TET (CHIN) TE LUTNA
AD 721 kum Tamuhdare in kumpi a sep hun sung Tazekhitaza khua kisia in, minam pi thum te a kikhen khit uh Tet (Chin) minamte in Mun le gam zong dingin a sul lui uh Irrawaddy gundung zui-in khenpi nih in hong kah to uh hi.

A pai masate Irrawaddy leh Chindwingun kituahna mun a tun uh ciangin anung a hong pai anaute theih dingin Nahtangkung temtawh bantan in lampi alak uh hi. Chindwingun kantan in Sagaing, Monywa, Pagan, Nyaungoo khuate saat in ateeng uh hi. Tua gam ateen sungun Tet pan Chin min hong piang a, tua ateenna munteng “CHIN TE PHUALPI” ci-in tudong in taangthu theite in na ciamteh uh hi. Tua a kipan Talawadygun pen Chindwingun in kilaih a, tua ateenna mun uh tudong in kimuthei lai hi. Monywa khua kiang Sibani khuapan tainih na ah Chinte Tualbawlna Mualsuang Pi 13 a sang khat tudong in om lai a, tua mun pen Kawlte in “Chin Phaya (Chin God)” cihi cihthu Falamgam kum 100 cinna Magazine laibu laimai 232 ah kiciamteh hi. Sagaing khua sungah Chinsuhywa kici Chin mite kikhoptuahna mun khat om hi cih thu L.H. Tun Thawng gelh “Zomite Takkhahna”  laibu sungah kiciamteh hi.

Pagan khua min hong piankhiatna tawh kisai in zcil-in Pugamah, Pagamah (            ) cih kammal hi-in tuapan Pagan kici hi cih thu U Ba Than gelh “Kyaungtung Myanma Yazawin” taangthu bu sung leh Dr. Neih Sial Tual Cin Ph.D gelh “Guite kual a Lutna” 1985 laimai 2 ah AD 1044 a Kawlte khuapi Pagan pen i pu i pate naming phuahsa leh luahkhitsa hi ci-in kiciamteh hi.

A nunung a hong pai Tetmi (a nauzawte) Irrawaddy leh Chindwin gun kituahna mun hong tun uh ciangin apai masa a ute bantan Nahtang kungte azik suak saupi na phakhin ta ahih man in “I ute gun kantan in i delh hang pha zo nawn kei ni” ci-in patio suak uh a, Bahmawgam tengah khua saat in a teeng uh hi. Tua khit Tet pan Kachinmi kici uh hi. A pai masa a ute tawh a kimansuah na uh a phawk tawntung na dingun Tempai a bawl uh ciangin a buptuah in bawl lo in aphel langkhat bek bawl uha, Inn a lam uh ciangin i u Chinte hong tun uh ciangin a omna dingun ci-in Inn deikhat a awngin koihkhol sak den uh hi cihthu 1978 kum a kibawl “Kaalzang Suante beh Tangthu” sungah kiciamteh hi. Tazekhitaza pan a kikhen khiat a sauvei khit ciang, Kachin min piang khia pan ahih manin AD 1598 kuam in kimu khia pan hi cih thu G.E.Harvey gelh “Outline of Burmese History”  sungah kiciamteh hi.

IV. TET (CHIN) TE KI-UKNA
            Tua hunin ateenna mun ciatah amau leh amau ki-uk uh a, Kawlgam sungah Pyu(Mon) leh Tet (Chin) kumpite minthang hun ahi hi. Tua hunsung in China kumpi gamvilte tawh sum kilei sum kizuakna nei uh a, AD 750 kum in China kumpipa Kilofeng in Pyu kumpigam simin zo ahih manin Pyu kumpi neihsa teng leh galkap teng matsak in Kunming khua ah a ciahpih hi. Tua a kipan Pyu kumpi hong kiam hi. Tua hun Tet (Chin) te teenna khua singkulh tawh ki-um a, a laizang ah Kumpi inn kilam hi. Kumpi inn kiimkot ah singkhuam phut in kham leh ngun tawh kumpi inn zem hi cih thu J.H.Tun Thawng gelh “Zomite Takkhahna”  laibu sungah kicaimteh hi.

V. TET (CHIN) TE PHUALPI PAGAN PAN KIKHENNA
             AD 835 kum in Nancho kumpi khua Pagan sim in zo a, akham angunte laksak in, galkap 30000 matsak a, galkapte Irrawaddy gun sung aom Kham le ngun azong sak hi. Tette in Nancho kumpi lel ahih manin kithehthang leuleu uh a, pawlkhatte Irrawaddy gundung zui-in Prome, Thazet, Aunglan, Minbu gam tengah lalkhia uh a, tuate Plain Chin, Aso Chin, Salai Chin kici hi. Pawlkhatte Kaladan gun lam zuanin na lal uh a, Mindat, Kanpetlet, Paletwagam teng ah na teeng uh hi. Mindat leh Kanpetletgam a teengte Cho kici-in Paletwa gam a teengte Khumi kici hi.

Pawlkhatte Chindwin gundung zuito uh a, Chindwin leh Meitei gun kituahna mun atun uh ciangin gal nanna ding mun hoih sa uh ahih manun Khaman(Kale) leh Natchaung (Enden) kuamteng ah AD 850 pawlin nateeng uh hi. Pawlkhatte Chindwin gundung zuito in Mawlaik saklam ah na teeng uh a, tua mite tu hun ciangin Kuki (Tangkun) leh Naga (Phizo) minamte ahi uh hi. Pawlkhatte Pagan, Nyaungoo munteng ah lokho in nateeng suak uh hi.

Tet (Chin) mite a tun tuna munah amau leh amau ki-uk in omden a, Khaman atun uh ciang a omsa Shante uksung tungkha uh ahih manun nuam asak lohna uh la khat na phuak hi.
            (a) Minbang pianna tuantui tongdam, zongial bang khing zo ta e;
            (b) Phungtup in an bang kai ta ing, siingkhua mawng bang peming e ;
cih J.H. Tun Thawng gelh “Zomite Takkhahna”  laimai 7 na-ah kiciamteh hi. Tua gam ateen sungun Shante ngeina zui-in Langkuimual (Kale-Natchaung kikal) kumsim in Baweng khat tawh na bia zel uh hi.
           
Hih munah lokho gankhawi in kum tamsim na teeng uha, tua hun sung mahin Yasagyo (Bunglung) khua Manipur te in na sim zel uh ahih manin AD 967 kum pawl in Bunglung khua te Kawlpi ah kituah suk uha, Ukpi Sawbwa Kyityannyo khut nuai a tung uh hi. Tua Ukpipa minthang mahmah ahih manin Alaungsithu kumpipa Kawlpi Innpi ah hawh ngei hi ci-in kiciamteh hi. Kawlpi khua minthang in mi hong tam semsem a, Inn 500 bang hong phakciang Shante leh Kawlte Ukpiza hong kituh uh hi. Ukpi Kyityannyo in ukpi huang acre 234 leisek kulh a umsak hi. Tua kulh umna pan khut kitan, khe kitan nisim in khumpi (bemta) dim kitawm den hi ci-in kiciamteh hi.
           
VI. ZOMI ( CHIN) TE ZOGAM TUNNA – A.D 1000 KUAM
            Tua bangin Kulh-umhaksatna leh ukpiza kituh lauhuaina hangin Zomite Meiteigun dungzui-in nalalto uh a, Zogam natung uh ahihman un tua hun akipan a teenna mun leh gam zui-in Zomi na kici leuleu uh hi.
           
Zogam zuanin hong lalkhiat uh ciangin a thu ciamtehna te uh Guada tungah teikhia in Tuingo dung zui-in hong pai uh a, Tawivunnual a tun uh ciangin khua adak uh leh Tawivunnual sang a sangzaw Thuamvummual mu-in tua mual azuan pah uh hi. Thuamvummual pan khua adak leuleu uh leh a nutsiat uh Khamankhua kimu a hih manin Meiteigun lam zuanin tuaksuk uh a, Zawmmual atun uh ciangin khuadak kawmin mualdang zui-in apai uh hi. Mualbemkhua kiang Luika mun atun uh ciangin tua mun galvilna galbukna dingin hoihsa uh ahih manun khua saat in ateeng uh hi.
           
Luikakhua a teenkhit asawtlo in Khaman khuapan Meiteigundung zui-in hong lalto Zomi pawlkhat hong tung uh a, tawmvei sung ateenkhop khit uh ciang, tua hong tung thakte luika pan lalkhia kik in, pawlkhatte Falam gam Locom khua, pawlkhatte Laizo khua, pawlkhatte Hakha gam Zokhua satin na teeng uh hi. Tua bangin nuntak nopna zonna leh gal le sa tuamtuam kihtakna hangin muntuam gamtuam zongin a kikhenthang manun khat le khat lam le muk (Kamp au muk pau) ki theihpih nawnlo dongin om uh hi. A sauvei ciangin a teenna uh mun leh gam zui-in minam tuam tuam, beh le phung tuam tuamin kikhen uh hi.

Source :
Sukte Beh leh Tedimgam Tangthu (Laibu).
Khenpi I.


Zomi eLibrary / Laibusaal in Hanciam in aki tei/type kik ahi hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE SUL. ~ Sukte beh leh Tedimgam tangthu’(1996) Laibu pan… Description: Rating: 5 Reviewed By: Cinpu Zomi
Scroll to Top