728x90 AdSpace

Hot
Menu
Zon-ol na Donate

Latest News

BANGHANGIN PUANTE PAU THEI LO MAWK HIAM? (Tangthu tomno)

BANGHANGIN PUANTE PAU THEI LO MAWK HIAM?


Fiction of the Week-Why Aren’t the Clothes Speaking?

(Tangthu tomno)

Tuni pen kiginni hi-a, van zuakna innpi khat ah ka om hi. Hih vanzuakna innpi pen lianin thupi mahmah ahih manin nisim i kisapteng zong a kicing hi. Kei pen van tuamtuam lei ding a pai  ka hi-a sai ahih leh sun le zan nai 24 sung kihong suak hi. Ahi zongin zingsang lam inn nasep, inn hah tawh buai lua ka hihmanin nitak ka kai pian kha hi. Ka inn sung teng hahsiang, mawtaw sawp, inn kim gampate vat, anhuan buk lam khawng nawt siangin lengna khan zong hoih takin ka koih sitset hi. Nipi ni nangawn na sem kuan ka hihmanin inn puah man ding hun zong ngah lo, Sanini a sep dingin ka khol demdam hi.

Dendeuh mahmah in hih vanzuakna innpi a lut pan ka hi hi. Pasal puan kizuakna lam a vante’n ka mit ong la pah ahih manin lunghiang hetlo in tua lam-ah ka pai phei pah hi. Tua leh tua puante tungah aman zah kisuang zong ka mu hi. Naakhoih thei lua! Ka lungsim sungah tua aman zah ka tuat pah leh minute nga sung ka thalawh zah khawng bek na hi-in puan silh 4 bang lei zo ding dan ka hihi. Tua ahih manin puan silh 4 la pahin ka van sung ah ka koih hi.

Van ka lei ding honkhat om lai napi’n tutna khat tungah ka tu dihdih hi. Tua tutphah tungah ka tut kawmin tuipeek a tui sung ka kibual lai khawng ka lungsim sungah hong suak dandan dihdih hi. Hih hun laitaka ka om dan pen lai a atkhiat dingin zong haksa mai in sai vanzuakna innpi sunga kikhai puante en kawmin nunlui hun leh tua laitak hunte ka ngaihsun ngeungau hi.


Hih puante’n ka neulai hunte nangawn hong phawk sak kika, khua vanzuakna sai ah khuano tuamtuam pan van lei ding midang ong pai khawng ka phawk kik hi. Tua vanzuakna sai pen kal khat in ni 2 bek kihongin ko khua pan tai nga gamla a, van lei ding ciangin khe tawh ka pai uh kul hi. Ka neu lai a ka nu tawh ka pai khop hun khawng zong ka phawk kik hi. Tua bangin van lei ding khat peuhpeuh ka neih uh ciangin ka nu’n antang khawng zuak masa in tua tawh ka lei uh hi. Hih bang ka naupan lai-in puanthak khat lei nadingin kum khat dekdek bang ka ngak hunte zong ka phawk kik hi.

Nuntak haksa ka hihmanun ak bangin muhtawm ne tawmte ka hi uh a, sum muhna neilo ka hih manun ka pa kiangah, ‘Pa aw, puan ong lei sak in,’ ka cih hangin zong ong lei sak nuam ngeilo hi. Ka nu kiangah ngenin ka nu’n ka pa kiangah ong ngetsak sawn ciang ngah ol zaw deuh thei hi. Hici bang nuntakna tawh puanthak neih khak ding pen haksa mahmah a, puanthak neih nadingin lungdambawl kumthak mah ngak toh kul zel hi.

Ka pa’ kiang panin phalna ka ngah khit uh ciangin puanthak lei dingin ka nu’n sai ong pai pih thei hi. Bombi khat le puan thak khat bang ka lei uh teh ka nuam dan zente pen zong gen siam kei ing. Ka nu’n pekkhat peknih a hong kholsak thiamthiam sum tawm tawh soklek/ muamkhum zong lei in tua khit ciang tui tampi dawnin, tua khit ciang inn lam ka zuan uh hi. Ka lungsim peuhmah pen tua van leina innsungah om nawn loin ciah mengmeng ding, lampi ah zong nawh pai mahmah a ka lawm te kiangah puan thak leh bombi thak ka neih lam ka gen kal ding ka ngaklah lua ta hi.

Inn lam zuanin ka ciah kik ciangun zong ka nu nung mah ka zuih kawmin gal phual a gal kidona pan galzo a ciah bang liangin ka ki ngaihsun a, ka puanthak neih pen ka lung lah kimin ka nuam mahmah mai hi. Tua ni pen ka mai a suak ka muh peuhpeuh hoih ngiat hi mai, buan lakah pai nangawn nuamsa in zong hoih ka sa lel hi. Tua ni pen puan neih bek zong hi loin a hun mahmah zong hoih ngiat in nuam hi.

Van namkim kizuakna innpi sungah om in, puan silh 4 bang ka lei liang hang ka lungkimna pen ka neulai a ka nuam bang dan hilo mawk hi. Tua hun lai a ka lawp bang danin ka lawp thei nawn het kei hi.

Hici bang innpi pan a van lei pen sum piak ding ciangin zong sum piakna mun va zuat kul tuan se loin om nana pan ei le ei in card tawh piak theih lel hi. Hizah cianga nop, vai ol mahmah hang ka neu lai a ka lungkim bangin lungkim thei tuan lo hi. Tua puanteng bek mah lei lel in a dang bangmah ka lei nawn kei hi.

Ka nisim nutakziate pen zingtung in kipanin zankim ciang nasep khawl pan ka hih manin set tawh kibang liang mai hi. Ka hun nuam pen ding ka cih hun ding ciangin zong ka neu lai a nop bangin nuam thei nawn taktak lo hi. Khat veivei ciang tua bang dan a ka lung nop nate, ‘Ka khua vuah nusia hi ning,’ ka ki cih hun bang om liang hi.

Tun khitteh ka mawtaw ka hawl hi. Ka mawtaw nung lam tutna a ka koih ka puan leite’n ka lungsim ong la zel, neulai hunte ngaihsun zel cih bangin ka om hi.

Neu lai in puanthak ka lei ciangin ka dawm mahmah a, a diakdiakin a kiu, a khuk, a taw cih khawngte dawm kei leng sia baih mahmah ahih manin dop kisam hi. Himah taleh ko lei zawhte tamman lo ahih manin silh cih takin silh leng kha nih kha thum khit teh kisia ta lel veve hi. Puan dang tawh laih nading kinei tuanlo ahih manin khat ka silh pen a kizomin kha khat sang a sawt vei zaw dong bang ka silh hun om lua hi. Tua bangin silh zom leng kha nih, kha thum khit ciang a taw, pambawm leh a kiu khawngah hong vangin kilet ta hi. Ka nu’n ka pa bombi tual sia kem in puan kikek a om ciang tua tawh phop zel ahih manin ka puante tua banga, a kek hong om ciang ka nu genin ama’n hong phop sak hi. Ka nun phim bawm leh setkhau bawm khat nei den hi.

Tua bangin ka nu ka gen ciangin ama’n ka pa’ bombi tual sia a kep tawh hong phop sak zel hi. A keknateng ka nu’n hong phop sak khit ciangin a thak mah hong bang kik lel-a ka nuam mahmah mai hi. Hici dan puan kiphop khat neih lel tawh ka nuamna pen gen zawh loh liangin lamdang a, ka lung zong kim mahmah hi. Himah taleh tu laitak ka dinmun tawh puan kek khawng silh ding cih pen hithei ngiat ding hilo hi. Nung kal sung bekin bombi teen sawm ka pai hi. Sia in kikek ta ci-a ka paih hi lo a, sawt sa lua ta, ning mai ka hih manin ka paih hi lel hi. Zong cimtak mai, ka neu lai a iplah bang lo ahih manin ka paih hang zong pammaih ka sa het kei hi.

Tu lai tak ka nuntak na ahih leh nik le puan cihte pen ansai khawng a um le keu zat bang a ka neih hi lel hi. An sai a anne ten zong a zat laitak bek mah donin a nek khit leh tua ansai pan a pai khiat khit ciangin phawk le ngaihsutin nei kha nawnlo hi. Bek tham loin a khang un tua kuang le keute peuhmah ngaihsut le phawkin nei nawnlo uh hi. Ahih hangin tua ka neu lai a ka puansilhte ken ka gol zawh ciang dong nangawnin mangngilh thei loin ngaihsun kha zelzel hi’ng. A taktak in ka phawk pipen leh ka lungsim ong khoih kha pen ahih leh ka haksat luat uh leh zawn luat man hi lo zaw in ka innkuan sung nop dan, ki-it kikep leh kikhual ziate hizaw hi. Hih hun lai a ka puanteng in ka nu’ khut ma nei kim a, ka nun ong kep pih ngiat in itna tawh ong donpih hi.

Puan kiphop teen ka nu hong phawk sak kik mahmah in hihte tungtawn in ka nu ka itna lian semsem hi. A kiphop cihte pen puan sia hizaw loin ka nu’ hong itna mah hizaw hi. Puan sia nam tuam tawh phopna tungtawn in ka nu itna mah ka mu hi.

Kum sawtpi khit ciang bekin tua puan phopte akhiatna ka telsan a ka puante siacip in aki silh theih nawn loh zawh nangawn a ka paih nop lohna hang zong ka khuanung tel san hi. Ahi zongin tun ahih leh nik le puan ka paih hangin pammaih sak na le itna ka nei kei hi. Tuma kum tampi lai a nik le puan ka it bangin zong ka it thei kei hi. Ahang inah tu a ka puante in ka nu’ khutma nei nawnlo, ka nu’ itna ngah kha nawnlo ahih man zong ahi hi. Tu in ka phawk thak khat ah tu laitak a ka hauhna sangin tua hun lai a tun le zua tawh zawn khilkhialna pen manpha zaw cih thu hi. Gentheihna tungtawn in itna leh ngaihna kilak thei hi. Tutak in sum le pai pen kei buaipih hi nawnlo mah leh ka nu’ khutma leh a itna pan hong kai khia hi.

Van le na zong a kicingin tun ka nei hi. Ka deihteng lei in ka deih nawnloh ciang ka pai lel hi. Tua bang a ka paih ciang zong pammaih ka sa se kei hi. Ka puan lei thakte ka et zelzel hangin zong amau hong hopih tuan peuh mah lo uh hi. Hih puan silh 4 ka leite zong ka lupna sungah om lel in hong hopih lo uh hi. Himah taleh ka neulai puante pau thei mawk uh a a kammalte ka lungsim sungah teeng den hi.

A short story by :
Bishwa Raj Adhikari

Translation by :

Dong Mung

Source :

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: BANGHANGIN PUANTE PAU THEI LO MAWK HIAM? (Tangthu tomno) Description: Rating: 5 Reviewed By: Cinpu Zomi
Scroll to Top