728x90 AdSpace

Hot
Menu
Zon-ol na Donate

Latest News

KHANGNO NAMLI. Agelh ~ Dong Za Mung

KHANGNO NAMLI
Agelh ~  Dong Za Mung


Thupatna
Khangno ih cih te pen naupang hihna pan uham, piicin ma hun sung teng kikal hi a, hih hun laitak a khangnote pen leitungah amau hun khat ciat sungin mi minthang leh a nasia mahmahte ahi uh hi. Benjamin Disraeli in “Gamsung a khangnote pen thusai dingin a muanhuai a kiseh teng hi” na ci hi.

Pasian’ zat theih ding a kiphal khangno Pasian zatte Laisiangtho sungah mu thei hi hang! Tua bang khangnote Joshua, Moses, Gideon, David, Daniel leh Joseph cih bangte hi-in a khangno cil akipan Pasian in na zang to ciatciat pah hi. Pasian in a zat nop nak leh khangmoi, uham cih kisai lo hi. Ahi zongin khangno tampi takte’n a piangsakpa phawk nawn loin a kipiansakna hang nangawn don in nei nawnlo uh hi.

Na khangual teng lakah khangno hoih pen na suah nadingin a thupi mahmah theih ding leh seploh phamawh om hi. Khangnote kihel lohna mun ah kipawlna cingtaak om thei taktak lo ahih manin mi manpha pente hi. Gamsung, khua leh pawlpite ah ngimna gelna banga tangtungsak pen hih khangnote ahi hi. Khangno om lohna gam ahi a, kipawlna khat peuhpeuh pen mainawt zo loin khantohna nei lo hi.

Khangno khat na hih na tawh kizui in hih thuman lampi na tun nai kei leh nang deihna bang in hong tangtun a na lawhcin ding haksa mahmah ding hi. Leitungah khangno namli om hi. Tua khangno namlite’ thu en khawm dih ni.


Nam Khatna--- A Kipumvak Khangno
            Dr. Mike Murdock in a genna ah, “Na ki kholhpih lawm gina lo teng tawh na ki thuah nawn loh ciang na nuntakna sungah thusia piang nawnlo ding hi,” ci hi. Khangno nam li sung pan nam khat na in “A ki pumvak khangno” ih cihte hi. A ki pumvak khangno ih cihte pen a tawntung a midangte tungah kinga, na khempeuh ah midangte sepsa teng muang in amau lah bangmah sem lote ahi hi.

Mi khat lai-at na ah, “A ki pumvak khangno cihte pen vai kempeuh ah siatna vive phualpi hi,” ci a, ahi takpi mah hi. Mailam nuntakna ding ziate ah koici leng mainawt in khangto ding cih limlim ngaihsun ngiat lo hi. Nuntak zia ding gelkhol cih genloh siatna ding bekbek ngaihsut in nei zaw hi.

A ki pumvak khangnote nuntakzia:
1.      Mi tungah kinga!
2.      Lungsim gamtat siangtho lo!
3.      Ngongtat!
4.      Angsung pil!
5.      Thadah!
6.      Mi vakvai!
7.      Thumang lo!

Nam Nihna--- A Zawngkhal Khangno
Bros Jones Snr in, “Kimanna nei lo pi a nuntak sangin vai khat peuh hang a sihna in manpha zaw hi,” ci hi.

Zawngkhal cih kammal pen sepzawh nei lo, thahat loin thazaw cih na hi. Hih bang dan khangno zawngkhal ten a piang bangbang tungah lungkim ahih manin midangte sep leh bawl khat peuh  asia apha hita leh langpan se lo, lah nial tuanlo in poisak neilo uh hi. Tua ahih manin kilamdanna nei lo khangno ahi uh hi. Sep lah nei se lo, khantoh na lah om lo, ki puahphat na om lo ahih manin nuntak pih ding nei lo uh hi.

Ki lamdan na nei lo, lunglut lah om lo in kihel na bangmah  nei lote a zawngkhal khangno ahi hi. Biakinn, kipawlna leh gam tuamtuam te ah khangno tam mahmah na pi in khantoh na dingin bawlkhiat leh sepkhiat bangmah nei lo uh hi. Thumanpha, thuthak zakna nei mah ta le uh ahoih lam peuhmah a zang thei tuan loin a ngei mah ngei veve uh hi. Nuntak na ahi tai kidemna na sungah hi bang khangno zawngkhalte’n a nawl pen leh a nung pen luah uh hi.

A Zawngkhal khangnote nuntakzia:
1.      Thalawp luat neilo!
2.      Paulap zong!
3.      Muan cing thei lo!
4.      Thunget thadah!
5.      Thadah!

Nam Thumna--- A Mangthang Khangno
“Ahih hang in a tapate amah bang in gamta lo uh a, sum ngah ding lam bek kin uh ahih manin sumgolh la in thuman heikhia uh hi” (I Samuel 8:3).

“Ni tawm khat khit ciang in a nauzaw pa in ama neihsa teng zuak in a sum tawh inn pan in gamlapi ah paikhia a, a sumte phengzat gawp hi” (Luke 15:13).

A mangthang cih ciang in kimu zo nawn lo cih hi lo a, sum leh pai, hun le nite akipan tha le ngal, van leh nate thangzat cih na hizaw hi. Tua ahih manin ih gen nop in a mangthang khangno cih pen ngaihsut na nei lo, don leh kep le kikhual na zong om lo-a, a lunggam nuntak khangnote ahihi.

Khangno hi bang pawl pen thu-um innkuan sungah piang in Pasian thu tawh hoih taka kipantahte, sia leh pha, nek ding leh nek loh ding a kipan a ki hilh sate hi napi’n leitung gualnop na lam lunggulh na hangin a paikhialte hi phazaw hi. Lemet na banga hong pian ding zong ut mahmah na pi un a hunlap tak a khensat na nei thei lo uh hi.

A mangthang khangnote nunzakzia:
1.      Leitung nate lunggulh na!
2.      Lawm ginalo tawh kikhawl!
3.      Lungsim kip nei lo!
4.      A simtham a gamtat nuamsa/zongsang!
5.      A tawpna ah kisik kik!

Nam Lina--- A Lawhcing Khangno
“Ama tot na ding lampi a thei khangnote ading in leitung bup in lampi bawlsak hi” ci’n Mike Omoasegun in gen hi.

Mihing ih nuntakna sungah nih ih neih den om a tua in: nuntakna leh sihna; a sia leh a pha; mainawt leh ziakai cih gel hi den hi. A tunga nam thumna ciang ih gensa pen siatna vive hi a, a hoih lam bangmah om kei ta leh tun a nam lina pen lawhcin theih nading leh Pasian lungkim na ding hi. Pasian deihna bang a gamta a, ama thusungah nuamsa in a piangsakpa Pasian a phawk mi in “A lawhcing khangno” hi.

Khangno lawhcingte pen kimanna zong hau, ngim leh sawm zong nei tinten uh hi. Mun khempeuh ah hih bang khangnote om kawikawi uh hi. Gam lian in neu hita leh hibang khangnote nasep na kimu a, siatna pen hoih na lam ah Pasian minthanna dingin laih uh hi. Tua mah bang in inn kim ah ahi a pawlpi kim ah ahi zong in hi bang a lawhcing khat ahih kei leh khatsang tamzaw om ciat hi. Bang bang in leitung a sia a, a thanghuai a, thuman na leh cih tak na a om kei zong in nang pen na ut nak leh Khangno Lawhcing hi thei hi teh.

“Pasian in na hih theih loh leh na siamlohte awlmawh lo a, na kiphalna leh na kipiakna deih zaw hi. Pasian deihte pen masuan khat a tangtun theihna dingin haksa leh maizumnate phamawh sa loin a sem teitei-te hizaw hi,” c’in Tommy Barnett in gen hi.

A lawhcing khangnote pen khangto a, a tawntungin piakhia, pungsak, ngaihsut na tak tawh tangzai sak hi. Lungkia het loin a ngimna bang a tun dong hanciam, Pasian muang in amah leh amah in zong hanciam hi. Midangte’n hi theilo ding hi cih bekbek tawh kinga uh a, aman pen piang thei ding hi ci-in a pian dong sem hi. A lawhcin ma in tampitak sawm pah se lo a tawmno tawh damdam in tampi piangthei hi ci’n um hi.

A lawhcing khangnote nuntakzia:
1.      Kisikik theihna tawh nungta!
2.      Pasian tawh kilawmta!
3.      Khensatna kician nei!
4.      Lungkim thei!
5.      Ngimna nei!
6.      Kihilh thei-in thumang!
7.      Zeisu lim leh mel sut ding hanciam!
8.      Siangtho nuntakna nei!
9.      Mimal khantohna tawh kalsuan!
10.  Mite ading thupha suak!

Thukhupna
I theihsa mah bangin gamvai, minam vai, khuasung vai, pawlpi vai leh kipawlna tuamtuamte ah khangno kihel loin om theilo hi. Tua khangnote sungah a tunga I pulak mahbangin namli a om hi. Tu-in nang a nam bangzah na ah om na hiam? Nam khatna pan nam thumna sungah om na hih khakleh bel dahhuai sim mahmah a; ahi zongin nam lina ah na om leh bel Pasian lungkim in na minamte angtang dinga a manpha khangno na hiding hi.

Tua ahih manin I khangno hun tomkal sungin a manpha khangno I suah theih nadingin kipuah phat ding kisamte kipuahpha in, paihkhiat ding kisamte paikhia a, sep tuakte sem in, gamtat tuakte gamta leng a manpha khangno I suak ding hi.
A gah pha khangno ahi dingin Zomi khangnote Topa’n thupha hong pia tahen!

Reference:
-        Olu Mike Omasegun,
-        Be The Best Youth of Your Generation (Nigeria: Omasegun Global Link, 2009)

Source :

ZOLUS 2016.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO NAMLI. Agelh ~ Dong Za Mung Description: Rating: 5 Reviewed By: Cinpu Zomi
Scroll to Top