728x90 AdSpace

Hot
Menu
Zon-ol na Donate

Latest News

MINAM ITNA PEN NAMDANGTE MUHDAHNA HILO. Agelh ~ Mr. Filip TEDIM

MINAM  ITNA PEN NAMDANGTE MUHDAHNA HILO.
Agelh ~ Mr. Filip
TEDIM


Tg. Cinpu (Zomi Laibusaal,USA) pan article khat gelh nading sapna ka ngah man in kakipaak hi. Tuhun khangnote sung pan hibang in lailam kiva pilna saang hong om theih man in khangto mahmah khin ihhihna kilang hi. Zomite sung pan mipil-misiam tam mahmah na pi’n lai lam kiva om phalo ihhih man in hun sawtpi sung mi pha zolo in ki om a, tuhun ciang ahih leh lailam kiva khangno hong om ta ahih man in midangte sang’ niamzaw nawn lo ihhihna kilang hi. Kawlte in “alingma sa hma sihdi” acih mah bang un pilna sangpipi ih nei phial zong in lai lam ihkin keileh, laisim ih-uuk keileh apilzo taktak nailo ihhi a, mite aban zo nailo ihhi veve hi.   

Minam ih-it man in kimlepaam a minamdangte tawh “koici kizom thei ding?” cihpen tuhun khangnote ading kisam mahmah khat ahi hi. Minam itna cihpen telkhiallo a, dinpih khiallo a, minam ih-it man in kimlepaam tawh hoihtak a kizop theih nading deihna bulpi tawh hih lai a kigelh ahi hi. Ih mipihte it in, namdangte tawh zong ih kipawl theih leh ih khangto ding a; minam picing leh minam lian ihhi ding hi.

Minam Itna ihcih bang hiam?
Mimal itna pan minam itna kipan hi. Mimal itna omlo minam itna pen kineihkhemna hiding a; minthannop man leh minhoih deihna khawng hilel ding hi. Mundang gamdang ih zin khiat ciang kitel phadiak hi. “Eimi hiveh” ci-a kilamnaih thei pah ihhih man in, tua in, minam itna hipah hi. Tua bang a mimal 1,2,3 cihbang a ih kigawm tohtoh ciang in minam hong piang ahi hi. USA ah kha 3 val bang (Nov. 2016- March, 2017) ka om man in, minam itna, athuk zawdeuh in ka tel thei hi. “Hi thei leh ka pheisa zong ong eu nuam ing” ih cihcih pen amaute piakkhiatna ah ka mu thei hi. States 10 bang kazin thei a, eimi Pawlpi tuamtuamte tawh ka kimu kawikawi thei hi. A pianna uh khua le tui phawk mahmah thei uh ahih man in kimuh phet in nuamtuam sa thei mahmah uhi. Alim theithei hong pia uh a, zinpaakte hong pia in, “Sia aw, hong pai kik in” hong ci lailai uhi. Ki khawlkhawl ngei khin hilo napi’n pianna khua le tui, Pawlpi a-it man un hong noptuam uh a, tua pen, minam itna ahi pah hi. Pil pen ta kei leng, minthang takei leng “eimi khat hi” ci a ong ngaihna uhpen thupi kasa mahmah a minam itna athukzaw in katel thei hi. Pilpen ta kei leng, minthang lua ta kei le hang “eimi khat hi” cihna tawh ki-it kingaihna pen athuk mahmah minam itna hi a, ataangzai minam itna ah kalsuanna ding khekhap masa zong ahi hi.

Taangzaisak zo leng
“Tedim mi taktak kuateng hiam?” ihcih khakleh minam khenkham ihhi ding hi. Awsuah, awkaih tawmtawm kilamdang ahi—Sihzang, Saizang, Teizang, Zo, Dim, Khuano, Losau, Vangteh, Phaileeng … avekpi’n Tedim mi kici khin hi. Tua teng kigawmkhawm a Tedim khuapi sung ah teng khawm, nungta khawm thei-a ih om hun pan kipan taangpi’ zat Tedim pau hong piang khia ahi hi. Tedim khuapi sung ah kigawmtuah a, kiptak a, ihten theih hun (1810) kim pan, civilization kinei-a, Tedim pau cih hong piangkhia ahi pan hi (Zolus Journal no.17, 2013). Tedim mi taktak cihbang a om hituan lo a, awsuah leh awkaih tawmtawm kilamdang taleh, ngeina kibang teng kigawmkhawm a Tedim mi akici ihhi hi. “Tedim mi taktak ko teng hi ung” ci in khua nih le thum khawng kiciam phial lengzong minam khat a din zawh ding hi thei lo ding hi. Kilamdanna pawlkhat aom hang in ih ngeina kibang ahih man in Chin State (Zogam) ah Tedim mi ci-in minam khat-a ading zo ihhi hi.

“Zomi taktak kuateng hiam?” ih cihcih khak le zong kipumkhatna pan kikhenkhapna lam manawh a kalsuan ihhi ding hi. Mintap neiteng Zomi ih ci a, a taktak in ci leng, Chin State sung a minam khempeuh ih pianna ihbulkat ciang in Zomi in huamkiim hi. 1953 in Rev. S.T Hau Go in ZBC ong phuankhia a tua ZBC sung ah Chin State sung a minam khempeuh – Tedim, Falam, Haka, Matu, Mindat, Kanpetlet, Paletwa teng a huamkiim ahi hi. Kawlte in Chin ong cih hang in ei le ei Zomi ci-in min ihkivawh a unau laiguizom vive ih hi  hi. Hiteng vekpi Kawlgam laizang pan khamtung a kahto vive ihhi hi. Sia Tuanno laigelhna khat ah A.D 1300-1500 kim pawl a Khamtunggam kitungto hi acih mahbang in (Zolus Journal no.14, 2010), Anawratha kumpi hunlai (A.D1044-1077) in Zomite Pagan ah na omkhin a Pagan tawh kinai Popa mual zong Pupa mual kici masazaw ahi hi (Zolus Journal no.16, 2010). Tuate tawh akibang veve khat mah ahi, pawlkhatte genna-ah: 1300AD in Mandalay kuam ah kiteeng ngei hi napi’n Arakanese leh Kawlte, Manipure-te kido zel ahih man un nawngkaai sa in Khamtung gam kitungto cihbang a akigenna zong April 16, 2017 Facebook a kipost khat ahi hi. Bangbang hileh Khamtungmite minam tuamtuam tawh ihkibat hang in Khamtung ihtun ma hunkhat lai-in mun khat a teeng khawmte hihang cihnopna hipen hi. Chin State sung a Khamtung mi khempeuh ih omna kigam la –in, pau le haam kilamdang in, ngeinate kibanglo himah taleh ih paikhiatna “akibang, mun khat” cih ding ahi hi. Hih thu tawh kizom in ZBC hun (1953-2012) lai-a Zomi cih kammal in Chin State sung a om khempeuh huam ahihna pen ih piankhiatna tangthu tawh kituak mahmah hi. Tuhun khangsawn momnote in mi muanhuai, makai dinmun ihlak zawh nading Khamtung gam a om minam khempeuh ahuamkiim ngaihsutna ih neih theih ding kisam mahmah ta hi.    

Zomi cih kammal pen pau nam khat bek tawh kiciangtan theilo hi. Biakna khat bek tawh zong kiciangtan theilo hi. Zomi tading biakna cihbang om theilo ding hi. Bang hang hiam cihleh minam khat sung ah biakna tuamtuam— Buddhist, Islam, Christian, Hindu, Laipian cihbang in om kiim lel ahi hi. Nainganyi party khat bek tawh kiciangtan theilo ding hi. Minam khat sung ah nainganyi party tuamtuam om ciat hi. Pawlpi khat sung nangawn ah party tuamtuam om ahih man in ei party vai khawng gen kha leng akikhial mahmah ding dan ahi hi. Bang hang hiam cihleh party vai ah pawlpi kitam thei ding thu ahi hi. Pawlpi cih zong akibanglo mitampite kigawmtuahna mun khat mah hi a, kibanglo pipi mah Khazih mintawh anungta khawm thei ihhi lel hi. Minam khat ahi ei Zomi sung ah zong kibatlohna tuamtuam hong om hi. Biakna tuamtuam, nainganyi party tuamtuam, pau namkim hong om hi. Minam khat sung ah hicidan kibatlohna tuamtuam om thei ahih hang’n kibanglo pipi mah tawh gam le minam phattuam nading ihsepkhop leh minam itte ihhi ding hi. Pau kibangteng bek ki-it leng ih citawm ding a ih khuasuak zo kei ding hi. Nainganyi party kibang teng bek minam khat in ih kingaihsut leh ih gualneeklah ding a ihkhuasuak zo kei ding hi. Citawm in pawl neilo in ih om den ding a; gualneek lah in ih om tawntung ding hi. Tuam om denkeei hi nawnlo a midangte tawh kipawl khawm a, ih tunna peuh (gamsung, gam pua) ah makai dinmun ih lak kik zawhna ding tuhun khangno te’n ngaihsutna thak neihhuai ta hi.      

Koici Khangto Thei Ding?
Sumlepaai, neihlelaam, innlelo, ngunlekhamte zong thupi mah hi. Ahizong in “khangto” ih cihciang in lungsim hi masazaw hi. Khantoh nading ngunlekham sang in ih lungsim mahmah thupi masa zaw ahihna media tuamtuamte ah Daw Aungsan Suuhkyi thugenna zong om zel thei hi. June, 2015 Zosuan Tuailai khawmpi ah nitak masa Sia Enno’ thugenna tawh kituak mahmah hi. “Inn le lo, motor …. cihte zong thupi mah hi. Topa’ thupha hi. Ahizong in ‘khangto’ cihciang in ih lungsim mahmah hi masapen hi. Ih khantohna midang tading siatna hisak lo-in, ih pilnate midangte tawh kitotna, kilangpanna in zangkhalo-a midangte tawh kipawl siam a, midangte phattuam nading ihzat theihleh, tua in, khantohna ahi hi” ci-in lungsim puakzia lim gen pen hi. Minamdangte tawh ihkipawlkhop theih leh ih khangto ding hi. Ih pau ihhaam kibang ta keileh khangto nuam ihhih man in kipawl theih ding hanciam huai hi. Adiakdiak in, ei sang’ ahat zawte, apilzawte tawh kipawlkhawm thei leng ih noptuam lawh ding hi. Khantoh nading lamdawt kitawn thei lo ding hi. Zingkal, nitakkal hi theilo ding hi. Hun sawt simsim mah lakkul ding hi. Ngalhawk-khan, tuita-khan cihbang nam hilo ahih man in kimlepaam tawh kalsuan khawm a, sepkhop ding ahi hi. Akisap leh zong kiniamkhiat a hanciam mahmah kawm a sep ding ahi hi. Sia Do Sian, Rev. Dr. Do Sian Thang cihdan tak in manlang tak a sepdante hilo-in atawntung a sepdante pawl hizaw hi (Do Sian Thang, Nunman Damman, 2016).

Mah-Sah-Lah hunlai in Khamtung gam saklam teng in makai dinmun la ngei a, 2010 khit ah nainganyi kikhel ahih man in ih lawm te’n makai dinmun la leuleu uhi. Nasak luatding hilo aci nuam ihhi hi. “Mite’ nung ihzuih hun om ding a, makai dinmun ihlak hun zong om veve ding” cibang hilel ding hi. Bangbang hileh tu tadih in khantoh nading leh hamphatna khat peuhpeuh amau’ recommendation ihkisam hi. Gentehna: Tedim-Tongzang lam ah khantoh nading khatpeuh amau’ panpihna ihkisam a; kumpi mahmah’n Khamtung gam vai khempeuh amau’ khut sung ah ap hi. President Pa U Thin Kyaw, Tedim ong pailai tak in District vai Upa te’n pulaak uhi. “Pyine Vuankyi pa’n hoih asak leh hithei ding” acih ciang in Pyine Vuankyi pa in “Chin Pyine saklam ah District kisam nawn lo, khanglam ah khat kisam lai” cipah lian ahihna March28,2017 Facebook a kipost thu khat na om hi. Kiniamkhiatna kisapna mun ah kiniam khiat a, hanciamna dingte ah zong hanciam a ngaklah lo- a sepding ahi hi. Khantoh nading ih tungsiahte’ recommendation kisam tawntung hi. Falam, Hakate ihtungsiahte ahi uhi. Kumpi lampan amaute ei sang’n alianzawte ahi uhi. Nidanglai pekpan eisang alian masa, apil masa te ahi uhi. Ih pilman in ih liat man in ei mai-a a pil masa, alian masa-te kikantan pah thei sam lo hi. Biakna lam, leitung lam: tungsiah kinei tawntung hi. Cial nihna ihtun ciang in amau cial thumna na tung uh hi. Amau tawh kipawl theileng amau tawh ih kikim ding a; ihpicing thei pan ding hi.    

Ih lawmte’ mai ihmuh leh ih khangto ding hi. Minam it nading huhau in ih lawmte tawh kipawlkhop theihloh khak ding patauh huai hi. Secular lam mipil misiam ih tam mahmah phial zong in, mihau milian ih tam mahmah phial zong in ih Zomi pihte tawh lawngkhat in ih luankhop theih keileh ih guallel tawntung ding a, ih khangto ngei kei ding hi. Ihpil mahmah zong in ong pawlpih ding lawmlegual ihneih kei leh ih guallel ding hi. Mipil milian tampite, mi thahat tampi te’n pawl aneih kei uh leh guallel veve ding uhi. 2012 kum in Chin State ading Distict khat ong kia a Tedim in siau ahih man in Haka te’n zong siau pah uhi. Haka tawh kituh in vote 5 vote 11 tawh Haka in District ngah uhi (The Siyin Baptist Vol.57 June 2012). Pawl hauzaw uh; e’n pawl haulo ihhih man in nakpitak a kilel hiding hi.  

Tedim le Tonzang lobuang Chin State a Myone khempeuh amau khut sung ah om a; Kumpi in zong a neumuh hetlohte ahi uhi. Khamtung gam ading vai khempeuh amau’ khut sung ah Kumpi’n ap khin ahih man in amaute tawh kikhen loh ding, kitelkhialh loh ding thupi mahmah hi. Ei mintap neiteng bek, kampau kibang teng bek cici nawnlo in Khamtung gam a om minam khempeuh huam a thu ihgen theih ding kisam ta hi. Mi tampi ahuam kammal ihzat theih ding phamawh ta hi. Zomi huang keek ding ahi ta hi. Ih Zomi huang khiam lo-in tangzai sak zawh semsem ding ahi hi. Zomi cihpen neuseek nawnloh ding ahi hi. Ih neuseek leh mi te’n hong simmawh ding a ih gualle semsem ding hi. Mi gam mi lei bek hi lo-in ei’ gam sung nangawn ah Zomi te’n simmawhna ih thuak a; Kawlte’ khutlum tawh asi bang ih tamta hi. Citawm ong sa uh a mi tawh kipawl theihlo ihhih lam ong theih man vua ong kihtalo uh a hi zen hi. Ei sang’ ahat zaw, alianzawte tawh kipawl thei leng minam lian ih hiding a; ih muhdah khakleh ih daaipaam semsem ding hi. Ih huang sung ah sial khat onglut ciang’ ih ui te in mudah in naaknaak in tawng gawp uhi. Sial in awl mawh lo hi. Minam itna hang ah ih lawmte mudah in, telkhial in tawngtawng le hang sialtal pi anaaknaak Ui no tawh ihkibang lel ding hi. Amau patau lo ding uh a; atawpna ah ei ading supna hizaw ding hi. Biakna thu ah ihpaikhialh ciang’ leitung thu ah zong kiguallel mahmah thei hi. Ahihhang kipawlkhawm in na ihsepkhop theih leh amaute tawh liangko kikim in minam picing ihhi thei ding hi. Ei kihtaak zah a kihtaak huai hisamlo uhi.

Mahialna
Mailam maikai ding khangno te’n ngaihsutna thak ongneih ding kisam hi. Minam itna kibulphuh semsem hi. Lungdam huai mahmah hi. Minam itna neuseek kha lo-a taangazai sak mahmah ding ahi hi. Pau le haam kibang ta keileh, ngeina kibang ta keileh khamtung gam a om minam tuamtuamte Zomi ihhi ciat hi. ZBC hunlai (1953-2012) mahbang in amaute zong ih Zomipihte cih theih ding kisam hi. Kawlgam sung a om minam tuamtuam te’n khamtung gam a om mi khempeuh minam khat in ong mu uhi. Ih pianna ih bulkat ciang’ ahi takpi ahi hi. Ei’ ki minvawhna tuamtuam aom hang in midangte hong muhna ah minam khat ihhi a; Kumpi lam pan zong minam khat mah in hongmu lel uh ahi hi.

Khantoh nading ahih naakleh biakna tuamtuam, nainganyi party tuamtuamte  kipawlkhawm a nasep theih ding hun hong hita hi. Ihsep khop theih leh ih khangto ding a minam picing ihsuak kik ding hi. Kibatlohna tuamtuamte bulphuh lo-a, kipawlkhawm a nasepkhopna: apicing khinsa minamte pianzia ahi hi. Tua in, makai dinmun zong ahi hi. Makai dinmun a la ngei khin Zomi te ihhih man in ngaihsutna lui khel in ngaihsutna thak ah kalsuan ding hihang. Khantoh manawh hunthak khangsawn momno ta ding ngaihsut huai thulian khat ahi hi.       


***************************************************

Siapa Rev. Sian Ngillo Lian(Sia Liantaung)

Myoma, Tedim in Laibusaal / Zomi eLibrary ading in hong piak ahi hi.


from:Sian Ngillo Lianliansian.ttc@gmail.com
to:cinpuzomi@gmail.com
date:Thu, May 4, 2017 at 7:56 AM
subject:article
mailed-by:gmail.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MINAM ITNA PEN NAMDANGTE MUHDAHNA HILO. Agelh ~ Mr. Filip TEDIM Description: Rating: 5 Reviewed By: Cinpu Zomi
Scroll to Top