728x90 AdSpace

Hot
Menu
Zon-ol na Donate

Latest News

AMANPHA PU LE PATE’ NUNTAKNA (Precios De Vita Patres) .NGENZO BEH HENKAI(Tomu )BAWNGTE TANGTHU


AMANPHA PU LE PATE’

NUNTAKNA

(Precios De Vita Patres)

NGENZO BEH

HENKAI(Tomu)BAWNGTE

TANGTHU

2016
Limited Circulation
------------------------

Laibu thu:
Laibu kaikhawm:
Lam Suan Thang

Laikhen:
Thuam Khan Thang

Laibu bawl:
Mang Za Dal

Laibu Min-
NGENZO BEH
Henkai (Tomu) bawngte Khang Tangthu

Laibu bawl hun:
June 15, 2016

Laibu bawlzah:
Bu 500

Laibu Mailim:

Thantha Ngiaseh:
Pu Suan Kai in akhansung nikhat, ngamsung avakleh Thantha bu mu hi. Kahto-in a etleh, Vasa namkim mul tawh a bu bawl hi.

Pu Suan Kai inzong, hih Thantha inzong Vasa namkim tungpan siahla ahih leh keizong kala ding hi ci-in siahlak kipan hi. Kaalzang khua ah Khangkua sung siah la hi.

A SUNGA OM THUTE
                                                                                      
            Thu masa
I. PU le Pate Khamtung Zogam Tunna       
1. Khua satna leh khua munte                      
2. Khaman’ khua satna                                 
3. Luika khua satna                                      
4. Ciimnuai khua satna                                            
5. Simzang leh Tumang                                          
6. Pu Ngen Zo sihna leh Zopheikhua tunna 
7. Tumang pan Botung                                             
8. Botung pan Phaipi                                    
9. Kaalzang khua satna                                             

II.         Mimal’ thu leh Behmin                                   
  1. Suan Kai leh Hen Kai                                     
  2. Kaih Thang’ thu                                                       
  3. Muang Suak leh Tomu                              
  4. Kimin-lawhna                                                 
  5. Thallohsa Piakna                                          

III.          Khua satna – 2                                            
  1. Phaipi khua Zuatkikna                                
  2. Phaipi pan Laibung                                        
  3. Tuul khenna                                                    
  4. Anngo khua satna                                          
  5. Haikawn khua satna                                      
  6. Tomu leh Sihzang                                          
  7. Anngo pan kiamna                                       
  8. Anngo leh Haikawm pan Suanzo ah  
  9. Suanzo pan Suangsau                             
  10. Suangsau pan Khuangen                             
  11. Pu Thuam Thang leh Atate                          
IV.        Khua-ngen Khua nusiatzia                               
  1. Lon Awite Unau                                                      
  2. Unau teng kikhen                                          
  3. Luh Zom leh Khualai ngam                         
  4. Tawng Lam leh Khua-ngen longam   
V.  Englik-te Uk ding utlo                                     
  1. Englik-te do ding Khensat                              
  2. Englik-te tawh Kilemna bawl             
  3. Kiciamna leh Myo-ok suamna                      
  4. Thau khopna leh Khua kigawmna     
  5. Gam leh nam a’ding Pu Thang Suak 
  6. Pu Ngen Dong leh Pu Khoi On-te Unau        
VI. Englik-te do ding kipan                                    
  1. Gam zuatna                                                    
  2. Suangkualui Kikapna                                     
  3. Galkapte in Paikhiatpih                                   
  4. Zan khat Hun                                                 
  5. Ciahkik ding Khensat                                     
  6. Khua-lam zuatkikna                                       
  7. Tedim Thong ah                                                     
  8. Amatte Khahkhia                                          
  9. Asi teng Kivui                                               
VII.       Tuahsia Hi lo …. 34
  1. Englik-te Dosawm                                          
  2. Unau khat Mapang khat                              
  3. Asi-te lerh Amat-te                                         
VIII.      Innluah thu   
  1. Ngen Zo’ suan Hen Kai (Tomu) Innpi 
  2. Nauzaw Innluah pan Uzaw Innluah    
IX.  Thu khupna       
            -Thudot leh Laibu ette          
            - Ngenzo Beh Khangsimna   

THU MASA

A beisa tuma kum 10 hunlai-in, “Suantak’ tu Ngen Zo’ Suan Henkai bawng (TOMU BEH) U LEH NAU KIZOPNA” cih laibu neu khat bawlin i nei hi. Tua in, u leh nau khang i kizopna hong tel sak tuam mahmah hi. Tu-in, “A manpha Pu leh Pate’ Nuntak hun” cih minvawhin, Suantak’ tu Ngen Zo’ beh Hen Kai (Tomu) bawng Tangthu laibu neu  khat i neithei hi.

Hih laibu in:
I khang tangthu,
I pu leh pate nuntak zia,
I pu leh pate ii thuakna-te . . .hong musak ding hi.

Ih pu leh pate: Laibung, Anngo, Suanzo, Suangsau . . . khuate ah a teen uh hun sungin mi namdangte tawh kitamhelin, teengkhawm uh hi. Tua hunte panin kimkhatte in, Kawlzaang sung (Bunglung, Khampat te pan Manipur), kimkhatte Falam gam, kimkhatte Tedim gampan Manipur (Saklam) tung uh-a teengsuak uh hi.

Mundang atung pu le pate in, Suante ahih-keileh namdangte ii behmin pua in om uh hi, cih athuin theihhuai hi. Adiak diakin Pu Thuam Lam’ sanggam pa Tulpipa Pu Hung Kip’ suan leh khakte in Pu Thuam Thang sanggam Leng-a, Se Laamte, Pu Song Khoi ii zima-tate Hong Song, Khup Hong, Thang Son leh Dawn Zongte; hih pu leh pate in a kitangkhai zawdiak, milak-a tualtang thei zaw-hiat teng ahi uh hi.

Kum sawtpi paikhinta ahih manin, mundanga om i pu le pate in a omna uh mun-ciat pan, amau leh amau uh hong kilakkikna lotawhin u le nau ikimuh-kikna ding ol nawn lo hi. Pu le pate in, a nuntakna uh, thu le late, a tangthute uh lagui tawh na ciamteh uh ahih manin, mailam ah, “I Kheltheih loh Tangthu maan” cih laibu zong i suaksak ding maban inei hi.
Hih laibusung thute, kammal zatte, laigualhzia cihte khel-a ipuah loh buang, thu dang tam i helbeh khakleh, i Tangthu Maan hi lo  ding hi.

Hih laibu na sim ciangin, “Mite theih loh Mi-manpha Nam” na hih lam na kithei ding hi.
Mite in hong thei lo zo, TOPA in hong theikei-laileh I nuntakna dah huai mahmah ding hi. Tua ahih manin, “…Nang pen na minin kong sam a, … min thak kong phuah hi” (Isa. 45:4,) hong cih mimal I hih ding thubul penin koih ciat ni.

(Lam Suan Thang)
Phunom

IH NGIMNA
(Our Aim)

            Pu le Pa te tangthu ikaihkhopna, Laibu a ihbawlna, i ngimna in;

-      Pu le pate nuntakna etteh huaite etteh ding
-      Pu le pate nuntakna zuih huaite zui ding
-      Pu le pate khekhap manphate kemcing ding
-      Pu le pate khialhnate pan kipuahpha ding
-      Pu le pate cihtakna te etteh ding
-      Pu le pate haksat thuaknate etteh ding
-      U nausung kihuai, kikhualnate etteh ding.

(Thuam Khan Thang)
Tedim
May 31, 2016
-----------------------------------

Theihsak na,

Ngenzo beh (Tomu bawng)te tangthu pen laibu in omnailo ahihman in akicianin kitello a, upmawh thuin ki-at zelhi. Tuma kum20 hunlai pan kipan in, tangthu bukhat neihding kilunggulh  a, u leh nau sung tangthu theite kiangah laibu neihding kihanthawn zel hi.

Laibu ading tangthu kaikhawm Lam Suan Thang leh laikhen Thuam Khan Thang te-in phaltak in laibu bawltheih nading hongpia ahihman in leh, Pasian in hunlem hongpia in, laibu  neizo ihhihi.

Tangthu kaihkhop pen tuma kum10 lai hi a, tu-in laibu abawlzopan ihhih manin khangsimna te ah tulai tak huntawh akisam tampi omding hi.

Hih laibu pen ihhih zawhzahin ihkaihkhop hi a, akimpen zong hinailo hi. Akisam tampi omlai ding a, laibu etkak te, thudot tezong tangthute tawpna ah hoihtak in ih suaksak hi.

Hihlaibu pen manpiakloh ding hi-a, innkim in ihneihkim ding, ih lunggulh hi. Mailam ah hihsang akicing zaw, ahoihzaw ihbawl zawh nading, ih hahkat toto lai  hi.

(Mang Za Dal)
Laibu bawl
July5.2016
   
HEN KAI’ SUANTE’ TANGTHU

Khen I.
PU LEH PATE KHAMTUNG ZOGAM TUNNA

Khua satna leh Khuamunte:
  1. Khaman’ khua satna:
Ih pute i pate in Khawlzang kici Khawlpina (Kawlpi) gamah tawlkhat khawlin teeng uh hi. Kawlmangte (Kawlpi muna omsate) kulh bawl ding athulelhna hangun, kha man sung paikhia-in khua khat sat uha, “Khaman khua” ci uh hi.
Kha-man’ khua pa’n Pu Song Thu makai-in, kimkhatte Tuingo dung zui-in paito uh hi. Tawivum pan khua-en in mual sangzaw zuan uh hi. Thuamvum ah suangthu thum phutin, “muibiak” bawl uh hi.

  1. Luika khua satna
Thuamvum pan kimkhatte mai ziatlam mualdung zui in, kimkhatte nung veilam mualdung zui in kikhenin gun lam zuan tuak uh hi. A paipai uh leh gunpi ka kici munah kituak-in, “Luika” khua sat uh hi.

  1. Ciimnuai khua satna
Luika khua mincip na hangin Pu Song Thu mah makai in, a lo zuatna uh “Ciimnuai” ah khuasat in teeng uh hi. Ciimnuai ah mi a tam semsem ciangin Bualtung, Zophei, Baangzang, Kulpi, Botung, Tuumzang, Kaalzang, Phaipi, Beellei, Muizawl, Haikawn, Suanzo, Sasih, Suangkang, Vanglai, Teikhang, Teizang, Ngaalang, Taakmual, Thanglo, Khualai, Khuangen, Engzang, Suangsau, Haikawm, Anngo, Khaukul, Zuangzang … cih bangin Tedim gam sung muntuamtuam zuanin khuasatin teeng uh hi.

  1. Simzang leh Tumang (Paakzaanggam) Khuasatna
Ciimnuai ah khang guk bang a teenkhit uh ciangin, Pu Neih Lut in Simzang ah lo zuanin khua sat hi. Pu Neih Lut a sih khit ciangin Simzang khua pan, Pu Ngen Zo in Tumang khua sat hi. Pu Ngen Zo in, tapa Khup Mu leh Suante, leh a zinung tawh Hen Kai nei hi. Hen Kai, zinung ta ahih manin beh leh phung khua leh tui in neubawl uh hi.

  1. Pu Ngen Zo sihna leh Zophei khua tunna
Tumang khua, Khuathangte in simin, Pu Ngen Zo that hi. Pu Ngen Zo sihkhit ciangin, Khup Mu leh Suante amau unau Zophei ah lal uha, a sawt lo-in Bualtung khua ah lal leuleu uh hi.

  1. Tumang pan Botung
Gal le sa launa hangin Tumang khua mi kimkhatte in, Bualtung khua zuan uh hi. Hen Kai te nuta zong, Bual tungah tawl khat sung teeng uh hi. Bualtung pan Botung zuanin, a sanggamte Khup Mu leh Suante tawh kimukik uh hi. Suante pen kaalsingpi khat ii zangah teeng ahih manin Kaalzangpa, Kaalzangte cih min ngah hi.

  1. Botung pan Phaipi
Botung khua pan Khup Mu in a sanggamte tawh kikhen in, Thanglo khua satin teeng hi. Buansiing Pu Hang Suum, Suante leh Hen Kai, leh Bualtung khua mi kimkhat kizawnin Phaipi khua sat uh hi.

  1. Kaalzang khua satna
Kaalzangpa Suante in a gamvaakna pan, lo gam khat ciamteh hi. Pu Suan Kai in a pa Kaalzangpa’ lo gam ciaptehna ah lo zuan bek lo-in, khuasat ding sawm hi. Suan Kai in a pano Hen Kai leh a khuapihte kimkhat zawnin, “Kaalzangpa’ lo, Kaalzangpa’ khua” ci-in lo zuanin khua sat uh hi. Suan Kai mahin Tual phuisam leh hausa sem hi. Kalzang khua vaangpha-in, minthang mahmah hi.

Khen II.
MIMAL’ THU LEH BEHMIN

  1. Suan Kai leh Hen Kai
Suan Kai leh Deih Uap kiteenga, tanu Cing Tun, Laak Vung, leh tapa Suang Zong, Suan Phut, Luah Lang, Suan Man leh zinungtawh tapa Mang Hil, leh tanu Phut Dim nei hi. Ngen Zo’ zinungta Hen Kai leh Suan Kai’ zinungta Phut Dim ki-it lua uh hi. Phungkhawm ding ci-in beh leh phung-in a kiteen ding awi lo uh hi. Kikhen zolo in kiteng uha, tapa Kaih Thang nei hi.

  1. Kaih Thang’ Thu
            Kaih Thang, teitang-in ngalpal mahmah hi. Zi nei in khawh leh eh, lup leh huan, vulh leh khawite ah nuamsa mahmah hi. Ngalhat in galhang mahmah aa, thah leh mat minthangin mite’ muan len suan khatin om hi. A pu Ngen Zo’ phula ding, Khuathang khua ah kuan-in gualzo takin ciahkik hi. Tuabang hinapi, a tapa Muang Suak, kum nih pawl a phak in, Kaalzangah galte’ khutlum tawh a nuntakna bei hi.

  1. Muang Suak leh Tomu
            Muang Suak, a pa sih sawt loin, a nu in zong sihsan hi. Muang Suak a papi Suan Kai in keem hi. Muang Suak tagah in genthei-takin om hi. Tei mahmah aa, mite in tagah zinung’ suan ci-in simmawh bawl uh hi. Pu Suan Kai ii thacial ni khat, mite zu ne sa ne-a a omlaitak Muang Suak, a aikhau vilna pan Vagik-baal khat ciahpih-a, a papi ang ah a tut khian leh Pu Suan Kai lungdam mahmah hi.

            Pu Suan Kai in ama’ inn pan Muang Suak zi neisakin, inn leh lo guan hi. Muang Suak in a inntuan khit ciangin sasiang in a inn pan voktal tuk nga khat go hi. Apapi Pu Suan Kai a itluatna tawh a sa, liang khat pia hi. Zu-nek an-nek sulin mite in: Thallohsa dingin sazaang kipia bek; na tokaina hi; nang, tuni To a mu hi teh, ci-in noh bawl uh hi. Tua aa kipan sihmun, nopmun te ah mite in Muang Suak pen, “Tomu pa” ci uh hi. Tua hun pan kipan-in Ngen Zo’ tu Hen Kai’ suan tengin “TOMU” kicisuak a, asawt ciangin behmin suak hi. Muang Suak ngalpal-in, bel-in, thanuam mah mah hi. Khawh leh eh lup leh huan, vulh leh khawi mite a’ eng lo hi. Kawlzang simin Kawlmangte man hi.

            Muang Suak in a khangham toh ciangin a nuntakna-sate lungngaikik in:

(a) Ka seino in vokpi tawh baalhawng ne ing, milun kisa teeng khawi in neilei ing ee.
(b) Tuizum pan maa bang pan ing, zocing dawn ah, taangin khuamual ah ka suah lei hi ee.

(a) Kangkuai taleng khuva kangkuai aw ci, maazam taleng mimva bualna aw ci ee.
(b) Khuva kangkuai honsing in selei ing e, mimva bualna beemtaang in guallei ing ee…
…ci-in,  la phuak hi.



  1. Min lawhna
            “Hen Kai’ suante zinung ta, zinung suan, meigong tagahte, namtomte…” ci-in, Hen Kai khang pan Muang Suak khang dongin simmawh nuainenna thuaklua kisa uh hi. Tua hangin nopna dahna, gal mualgial samualgial na te ah, “Ngen Zo ii tu, Ngen Zo ii tu…” ci-a kiminlawh Hen Kai’ suan te in, Suah Thuam’ khang ciangin, “Kaih Thang ii tu Kaih Thang ii tu …” ci-in minlawh minsialna zang uh hi.

  1. Thalloh sa Piakna
            Muang Suak in a inntuankhit sasiang gawh saliang a papi a piak, mite ii sialnohna tawh “Tomu” min a lam bangin, tua hun pan kipanin Ngen Zo ii tu Hen Kai’ suan Tomu te in, “Thalloh sa” dingin saphei tumbul zang uh hi. Hen Kai’ suan Tomu te in saphei tumbul a piak ciangin nam dangte in, “Suante kipia” ci-in minnei sakin kamzat in nei uh hi. Tomu beh sungah “Thalloh sa” in saphei tumbul, 1950 kum dong kizang hi.

Khen III.
KHUA SATNA-2

  1. Phaipi khua Zuatkikna
            Pu Suan Kai, Pawi galsima pai Khuangli khua ah si hi. Muang Suak in a papi a sih ciangin, Kaalzang ah teentul ding lungtu zolo hi. Muang Suak in Phaipi khua zuankik hi.

  1. Phaipi pan Laibung
            Pawi gal lelhtakin, Phaipi khua pan Phaipi mi, Buansing, Samte, Sangte, Aakte, Zil-om leh Tomu pu Muang Suak te in Phaipi khua nusia in, Zuangzang khua sat uh hi. Zuangzang khua minin vuk ahih manin, Khaukul khua sat uh hi. Khaukul khua pan Pu Muang Suak leh Phaipi mi kimkhatte in, Laibung khua zuan uh hi. Pu Muang Suak in Kaalzang nusia in Laibung a zuatna:
a. Mimbang pianna Kaaltui vang khua, ngai lo bang tuang nusiang e.
b. Mawng bang peemna Bungtui vang khua, nih thum hai bang ngaksak aw,.. ci-in la phuak hi.

  1. Tuul khenna
            Ngen Zo’ tu peuhmah u-bel in “Tuul tawi” in, nau-bel in, inn luah hi. Tua hi a Ngen Zo’ tate sungah Khup Mu in Tuul-Tawi hi. Anngo sat ding ciangin lam-gamlatna hangin, Limkhai pan Behtuulpi pa Pu Khup Mu in Tuul khen’ in Anngo khua pan, Pu Hung Kip in Behtuulpi sem hi.

  1. Anngo khua satna
            Laibung pan Pu Suah Thuam in, Anngo khua sat hi. Gam leh lei pha in, khua-hun hoih ahih manin kum khat in taang nih vei (tuuk nih vei) tung hi. Mite cidam in, tha cing uh hi. Khawh leh eh hau in, hulh leh khawi pungin nuamsa mahmah uh hi. Mite cidam in tha cing uh ahih manin, a kim a kianga mite in, “Tomu luangdawngte” ci-in kam zat leh thuciinin nei uh hi. Anngo ah Vaipheite tawh tengkhawm uh-a, inn sawm-kua vallak ah, Vaiphei te inn sawm bang om hi.

            Anngo teen sungin, Pawi gam, Bunglung gam te sim zelzel uh hi. Gam le lei hoih ahih manin thanuam uh-a, sun bek hilo zan kha taang nangawn in na sem uh hi. Mi tam kisa kawm, kigualnuam sakkawm tawh kha taang nuai-ah na asep kawmkawm un, “Tung-a alsi phe sipsip, nuai-a Tomu phe sipsip” ci-in gualnop kam na zang kha ngei uh hi.

            Anngo khua a teen lai un, “Innmai sa” a nek uh ciangin a mote uh kimkhat pai lo thei zel uh hi. “Pai ni” ci-a a kizot uh ciangun, “No ii innsik zong cinglo” ci-in kam khialthei zel lai uh hi.

  1. Haikawn khua satna
            Anngo khua ah mi tam kisa uh ahih manin kimkhat in Haikawn khua sat uh hi. Haikawn khua ah zong cidamin, nuamsa in hau mahmah uh hi. Anngo hitaleh, Haikawn hitaleh nisimin zunung, gal-ai sa-ai, ailawng-tawh in sun le zan khuang leh sialki, zam ging tatsat ngeilo uh hi. Giitta ii tangvui tuah a muh uh ciangin “Anlak hun ta ei” ci-in lo zuan pan zel uh hi.
  1. Tomu leh Sihzang
Anngo leh Haikawn phat laitak-in Sihzangte Pimpih khua ah teeng uh a, hau in nuamsa mahmah uh hi. Hau kisa nei kisatek uh ahih manin Pimpih khuate leh Haikawn khuate Tonkhuang ging  nunung kidem dingin kito uh hi.

Haikawn khua a Tomute zong kidem  kipatni pan Ton-zu Ton-sa ne in sun tawh  zan tawh tawlnga lo hial-in laam laamin, khuang gingging uh hi. Sun kua leh zankua a laamkhit uh ciangin, gimlua kisa-in khawl uh hi.

Pimpih khua  Sihzangte zong kidem kipatni pan Ton-zu Ton-sa ne in a laamlaam uh leh, ninga sungbek khom ding a neih uh atheih ciangin tawlnga phot uh hi. Tomute khuang ging nunung ngai in; khuanggin a tawpni uh a zingciang in, amau khuanggin kipankik uh hi. Tomute in Sihzangte ii pilna thusim theilo uh ahihmanin, Ton khuang kidemna (hauh kidemna) ah lel uh hi. Tua hun pan Tomu leh Sihzang zawl leh lawmin kiman uh hi.

  1. Anngo pan Kiamkikna
Nikhat nupi khat in taangpawi logit ding a kuanleh, lolai ah a taangci-um puksuahin a taangci teng buasak khin hi. A et leh taang tangsa na hi-a, a inn kuanpihte theih ding ut lo-in, lolai ah phial zak gawp hi. Tuakum, taang posiam-in an hau mahmah uh hi.

A khuavei taangpawi taanggit hun ciangin taang tangsa po-in an kihau thei, a minsa zong po lel in teh ci-in taksih min-sa pawi uh hi. An po lo ban-ah, tuahun pan khawhleh eh kiam kipan uh hi. Nisim in zu nungnung, gal-ai, sa-aiai, ailawng-tawh tawh-aa omna uh pan pulpi/ zavaat tungin mi tampi bei uh hi.

Pawite in sim zelzel banah, tawpi(humpi) laangin mi tampi mong uh hi. Tua ahih manin Pu Thuam Lam in:
a)    Mi hong laang mi hong laang e, sing suan vaipi hong lange.
b)    Sa hong laang sa hong laang e, zanga sa kamkei hong laang e.
 … ci-in hi bang in la phuak hi.

  1. Anngo leh Haikawn pan Suanzo ah
Anngo leh Haikawm pan pulnatna, gal leh sa lau uh ahih manin, Pu Thuam Lam, Pu Hung Kip te makai-in Suanzo khua zuan uh hi. Suanzo khua pen Man Lun’ suan, Suan Sing’ tu Suanzo sat ahi hi. Suanzo ah Man Lun’ suan te tawh teeng khawm uh hi.

  1. Suanzo pan Suangsau
Suanzo khua galte in sim zelzel-in, halcip uh ahih manin Pu Thuam Lam mah makai-in, Suanzo mi kimkhat tawh Suangsau khua sat uh hi. Suanzo khua ah Vaiphei mite’n zongzui uh hi.

Suangsau khua ah Pu Song Khoi’ khang dong khang li bang teeng uh hi. Suangsau khuamual pen Su-angmual ci-uha, khua khunga lampi paiphei pen Suangphei lam ci uh hi. Suangsau khua ah Thuam Lam’ hai (Suangsau hai) ci-in hai kungpi khatom hi; agah zawl in sau-a, apuam in namtui in khum mahmah hi. Pu Thuam Lam galhang mahmah ahih manin Suangsau khua a simgalte dothuk dingin, kuan khia zelzel hi.

Pu Thuam Lam in:
a. Suangmual-a sial bang ka suah leh leido lui bang lui ing e.
b. Si phu la’ng hing phu la’ng e pigua pha bang kai na e.

a. Hang ing ci hangtawh thawltang hangsem that tang khuapi suan tang Suangzaang-a mi hing e.
b. Gual in kahan gen vungvung pusial lumtawh nahsing nuaiah suangbang kapo hi e.

a. Leido a hansa vungvung saukhuam tunga naamtem kakhai lal nuaisiah kei hi’nge.
b. Pasal that khau bang ciah tang len-gual phaksap Suangphei lam ah hang sumlu khai inge.

a. Khuathang khuai bang ka suan sa hang lui tenglah tha phamta e awhkhi  ciandal ngen e.
b. Awhkhi ciandal nun tengpai ah kuahpuak bang thuk thei taleng gualtawh lem singbang ka zawng hi e.
… ci-in galla tampi phuak hi.

  1. Suangsau pan Khuangen
Suangsau khua ah Thuam  Thang’ pa Pu Thuam Lam, a nuntakna  bei hi. Thuam Thang in Suangsau pan tapa Lam Tawng, Ngah Thang, Song Khoi  te nei hi. Gal leh sahaksatna hangin Song Khoite pata makai in , Tomu inn sawmthum in Khua-ngen khua zuan uh hi.
Khua-ngen khua pen  Suante Pu Phung Lai ii sat ahihi. Suangsau pan Khua-ngen a kizuat in Phung Lai’ sanggam Lun Lam’ suan Thang Hum, Hang Lam te leh Haunung, Naulak te teeng uh hi.

  1. Thuam Thang leh Atate
Thuam Thang ii tapa u-pen Lam Tawng in tanu Lon Awi leh Nem Nuam nei hi. Khua-ngen khua ah tual phuisam sem aa; Khua-ngen khua ah a nuntak na hunbei hi. A tapa Ngah Thang in Suanmante Lam Tuang’ tanu Uap Huai tawh kiteeng a, tapa Thang En nei hi. Thang En a tangvalno in, Suangpi lo hong buk tautung pan kia in si hi. Ngah Thang in beh leh phung nusia in, Sasih pan Zong Tuang, leh Lam Tuangte ii zotna zui-in Suangpi khua sat-a, Tual phuisam sem hi. Tua ahih manin Suangpi khua Tual phuisamna ah, “…, Ngah Thang, …khua sat …” ci-in phuisam uh hi.

Suangpi khua sat khit kum a sawt lo-in, Suangpi khua ah Ngah Thang a nuntakna hunbei hi. Pu Thuam Thang leh a tate Pu Lam Tawng, Pu Song Khoite a nuntakna uh Khua-ngen ah beiuha, Khua-ngen han Kakpi ah kivui hi.

Khen IV.
KHUANGEN KHUA NUSIATNA

Khua-ngen khua bulum in nuam a sak mahmah uh hun sungin, sunphuk natna tawh mi tampi cina in, si uh hi. Sunphuk natvei hun sung mahin, Pawite in sim uh hi. Mi kimkhat manin, sila dingin ciahpih uh hi. Sunphuk nat leh Pawi gal hangin, khua nusiain, gamsung zuan uh hi. Nat a ven ciangin, khua zuankik uhhi. Gal lungmuan om salo uh ahih manin, khua nusiat ding vaihawm uh hi.

  1. Pi Lon Awi te Unau
Pu Lam Tawng sihkhit a sawt loin, Pawi gal tung hi. Azi Pi Ngah Cing leh a tanute Lon Awi leh Nem Nuam, galte in man uhhi. Lamkal pan Lon Awi te unau ciah sakkik uh hi. Khua-ngen nusiat dingsawm uh ahih manin, Lon Awi te unau in Lophei a Pu En Mang te zuan uh hi. Lon Awi a nungak ciangin, Lophei a om Naulak Do Khoi tawh kiteng hi. Moman dingin Sial khat, taang beemkhat, sing hon khat pia hi. Nem Nuam in Buanman ah pasal nei hi.

  1. Unau teng Kikhen
Dong Ngen leh atapa neupen Khoi On in Khua-ngen singhal logam neekna anuam ding ci-in, pu leh pate khuasatna gam, Thangnuai khua zuan hi. Dong Ngen’ ta u-bel Thang Phut, Luh Zom’ ta u-bel Hong Tun te in a sungte uh zui-in Suangpi khua zuan uh hi. Thang Suak in Phunom zuana, Luh Zom leh Kip Suan tein Khualai zuan in Khua-ngen khua nusia uh hi.

  1. Luh Zom leh Khualai gam
Mualbemte Kaih Mang in Khualai te Hen Kim manin, Mualbem ah ciahpih hi. Thang Son in apa’ luang tatna ding, taungo vial kua leitawi ding in, Khua-ngen khua Pu Thuam Thang kiangah hawh hi. Pu Thuam Thang in Taungo vial kua haza lo-in, leitawi pah hi. Khualai te Hen Kim luang tan dingin, Mualbem ah paipih vingveng uh hi. Keelkua sungah khumcip uh ahih manin, Hen Kim na sikhin hi. Thang Son in a tatna ding a taungo pia lo napi, Pu Thuam Thang puakkikpah lo hi. Asawt lo-in Thang Son si a, innmong hi.

Khua-ngen pan Pu Thuam Thang’ tu Luh Zom in, Khualai hausate tungah Pu Thuam Thang ii Taungo vial kua man dingin, Hen Kim’ logam teng ngen hi. Khualai hausate in zong, Hen Kim’ logam teng, Luh Zom piapah hi.

  1. Tawng Lam leh Khua-ngen longam
Khua-ngen nusiat ciangin, SongKhoi’ inn luahpa Luh Zom’ ta Tawng Lam in, Khualai pan Khua-ngen logam teng vaanin losap ne hi. Suangpi khua pan Hong Tun in, Khua-ngen logam hoihna teng Phunom te zuak sim hi. Hih thu hangin Tawng Lam in Phunom te tawh kumthum sung thubuai neihlawh hi. Tua hangin Tawnglam in:
a.     Mun inn gamlo gamzang zilza, kei in hawma taan ing e.
b.     Sesum sawmsial khuam bang kuahla’ng zu bangsia teng kei in khuam sing bang luang e…
… ci’n la phuak hi.

Khen V.
ENGLIK (ENGLISH) TE UK DING UTLO

I pu I pate amau leh amau-a suaktatak-a omkimlai, November 9,1885 ni Ava mangpa Tibaw, Englik te in man uh hi, cih thuza uh hi. January 1,1886 ni-in Englik te in, Kawl gambuppi uk ta hi, cih thu za leuleu uh hi. Hih thute hangin pu leh pate in, Englik te do ding sawmpah vinven uh hi. December 26, 1887 ni, Englik galkapte Kawlpi tung cih za uh hi. January 3, 1889 ni, Englik galkapte Thaang tung cih za uh hi.

  1. Englik-te do ding Khensatna
February 4, 1889 ni, Englik galkapte in Khuasak hal uh hi, cih thu za in, gal in neh mahmah cih a theih uh ciangin, amau ii hihtheih zah ciat tawh amunmun pan do dingin, khensatna nei uh hi.

Ei leh ei-a ding thei, suaktatak-a eimau inn leh lo ciat tawh a om, midangte ukna nuai-a a om ngeilote I hi hi. Gal a om leh, Do ding! Luh ding! Zo ding! Kuamah duallo ding! ci-in, Pu Thang Suak in a sanggam numeite nangawn thapia in hanthawn hi. January 1888 pan April 1889 sung teng Sihzang leh Sukte (Leitawhtan khangsiah teng) uk teng kipumkhat in, Englik galkapte, amunmun pan nasiatak in do uh hi.

  1. Englik-te tawh kilemna bawl
September 1, 1890 ni in, Kawlgam Tualgal omnawn lo ding; Englik kumpi ukna mang ding ci-in, Sukte Sihzang makaite in Phunom khua Sum Hang’ innah Lt. Raikes makaihna tawh kilemna bawlin, Sial mit kap in  Sial gawng banna tawh kiciamna bawl uh hi. May 1889 pan December 1890 kikal sung gal-makai leh hausa tampi, kumpi sungah lut uh hi. Athu bek hisakin Phunomte atak takin lut nuamlo uh ahih manin 1889 in khat vei, 1892 in khat vei mei tawh khua suksiatsakna thuak uh hi.[1]

  1. Kiciamna leh Myo-ok suamna
Kumpi tawh kilemna bawl ahih hangin, numei naupangte’ tung galkapte ii tatnate kuamah lungkim theilo uh hi. Tua thute hangin Kaptel hausa Thuam Thawng, Heilei hausa, Zawlnu hausa Vum Lian, Khuasak Khup Pau, Dimpi – Suangpi khua makaite leh Tomu beh makaite in, “Ki pawlkhawmin mikangte do ding hihang …” ci-in, June 23,1891 ni Dimpi khua Pau Zel’ innah sialngawng ban in khauhtak in kiciamna nei uh hi. “Kumpi sungah kong lut ding uh hi; Pumva khua ah kimutuah ni,” ci in Khai Kam leh galmakaite in, Vuandok zum ah lai pia in thu zasak uh hi.

October 9, 1892 ni Sihzang leh Sukte tawh kilemna bawl dingin, Myo-ok U Tun Win leh 1st Burma Rifles pan galkap sawmthum, Pumva zuanin pai uh hi. Thuklai leh Pumva kikal Suangbum pan, Khai Kam leh a kiciamsa galmadawk-mi sawmnga te in lamphungpangin, kapzial uh hi. Myo-ok suamna ah Phunom pan Lam Ngin, Thuk Khoi, Kip Suan leh Thangnuai pan Khoi On kihel uh hi. Galkapte leh thukante kilau ahih manin koi khua pan kua, bangzah kihel cihte imcip bikbek uh hi. Myo-ok suamkhit ciangin, kumpi sungah Sukte lutmasa, tua khitciangin Sihzang lut uh hi. Sihzang sung pan Pu Khai Kam-te pata-thum, leh Kam Suak lut nuamlo uh hi.

  1. Thau khopna leh Khua kigawmna
Englik mikang galkapte in1892 beilam leh 1893 kipatlam tengin a khuakhua ah thau-khawm thau-ap sak uh hi. Hausate in: Khoi On, Kip Suan, Tawng Lam, Ngen Dong-te in na thau uh kumpite ap un, ci-in sawl uh hi. Ngen Dong in : Thau ka ap kei ding uh hi; ‘Hih’  ka pia ding uh hi, ci-in thautang lakin hausate dawngkik hi. Gam ukna haksa sa-in Thangnuai, Zungkhua, Khualai khuate January 2, pan February 20, 1893 sungin Phunom khua ah kigawmsak hi.

  1. Gamleh nam a’ ding Pu Thang Suak
Pupa’ gamlei, mikangte I luahsak kei ding hi. Amau ii vante mah zangin, amau-mah sualna in I neikik ding hi, ci-in a kiciampihsa gal-madawk kimkhat tawh kizawn in, Suangpi pan Tedim manawh in ding khia uh hi. Englik mikang galkap te’ vanzat thau te aluhna uh pan in Pu Thang Suak in anuntak na beilawh hi.

 Galkapte in a thau la uha, aluang galkap huangpua lam ah phum uh hi. Asawt loin, pu leh pate in luang khamin  Kha-man sung zan khat Pu Thang Suak luang khuatsim uh-a, azan azan in puakhia in ciahpih uh hi.

Pu Thang Suak sihna hangin Pu Thang Ngul in:
a)    Zuathang khuai bang nahan koma, dolai ngawl bang puk aw e.
b)    Do daiteeng gua bang puk vecia, na luang naang tui bang diang e…

a)     Leidothang pat bang a saina, zua tawikawl ciang lunlai ah gilgiak ta e,
b)    Khuam ban laihna kawlciang piandang, tunga thangvan mau bang e …

Pu Tawng Lam in:
c)      Ciin aw khuai bang nahan koma, phunglam lailung muangmawh veng e, lailuang leiluanga dawng e.
d)     Lailuang leiluanga dawng e, phung-luang hon singbang sia’ng e.
 … ci-in la phuak ciat uh hi.

  1. Pu Ngen Dong leh Pu Khoi On te unau
Englik mikangte do ding, gamzuat ding vai vaihawmna kiciamciam kawmkal, ni khat unau-a gamvak-khawm Ngen Dong in a thau tawh Khoi On khutkhial kha hi. Gamzuat ding tawh kinai ahihnaleh Ngen Dong te innkuan gal sungah bei uh ahih manin, unaute kikhut-khialna ah samei kisat-theihna om nawnlo hi. Pu Khoi On sihna hangin Pu Dong Thuam in:
a)    Zuangel gua bang na hinlai-a, hen tawh mual suaksa aw e.
b)    Pazua nihngel hen mualsuahsa, tawikawlcianga vul aw e …

Pu Tawng Lam in:
a)    Sang kopkapsa sawmtang khosa kiakkum lenthal bang khat nakek zalna tuma dang aw e.
b)    Lengvan I phung zatamlai ah haizu na zawngkhawm nam aw e, dalkuang na umkhawm nam aw….ci-in la naphuak hi.

Khen VI.
ENGLIK-TE DO DING KIPAN

  1. Gam zuatna:
Pute pate in, amau leh amau-a suakta tak-a a omnopna, namdangte tawh Englik-te do ding ki ciamna omsa, Pu Thang Suak sihna … te hangin, Myo-ok suam khit asawt loin gamsung zuatpih ding zawn uh hi.

Gam sung omdan en-a thu kizakna tawh kizui-in, November 1893 sung Kip Suan, Tawng Lam, Ngen Dong, Tuang Khual, Thang Phut … unau teng kizawn-in azi ata tek uh tawh Thaangkai gam zuan uh hi.

Thaangkai gam Suangdawh mual, Suangzang lui, Suanzo tui, Zangsial tam, Suangkua lui te ah mun buliah-zawzaw luikawm, suang kawm zuanin, phualsat in kikhin kawikawi uh hi.
Gam-zuan khempeuh in Makai-pipa Pu Khai Kam, munbitpen ding ci-in Paha Lungsituah Muankua khat sungah, busak uh hi. Nisim in phual-ngak ding, an-zong ding, thukan ding kikhelden uh hi. A kum-a sawt banah numei naupang tawh, anduh gilkial tawh, gal patauh tawh lungsim pumpi gimin thasial kisa veve tek uh hi.

Myo-ok kisuamna hangin, mikang galkapte in nisimin singnuai gammual lak vil-in, vakkawikawi uh hi. A kum hong kai-a, nisim zontawm tawh kivak, lungsim galmuanna omlo kawmah Sukte, Sihzang makai bup phial kumpi sungah lutlai. Tua thute hangin, gamzuat pih mi dangdangte lungneu in ciahkikkik uh hi. Pute pate in ciampel-nuamlo, lungkia tuan lo-in, Tampi gam Suangkualui ah kikhin uh hi. Suangkualui ah gal panna ding ci-in, pasal phual leh numei phual khenin phual nih sat uh hi. Inn leh lo nusia in, gam sung singkawm suangkawm belin, mi dangte zuihna totsa satengmah zui-in, om kawikawi uh ahih manin Pi Phut Dim in:
a)    Vaimang tuanglam zata zawitot, phungin ei’ tuang lam ci e.
b)    Singta gamzang lumsuang limbuk, phungte’n ei limbuk ci e
…ci-in, gamsung a omzia uh la ngui-in koih hi.

  1. Suangkualui Kikapna
February 12, 1894 ni, zingsang khuavak phetin gam-sung vak ding, thaang vil ding, an-zong ding, khuai-at ding ci-in a ciangciang ah, kikhen ngeingai uh hi. Tuang Khual leh Ngen Dong, a zingciang-a Pu Khai Kam-te tawh kimu-a pai ding thau-puah leh phual-ngak thuahkawm-in nupi nauneenteng, leh naupang kimkhat tawh giahphual ah om uh hi.

Ni vaisaan mahiat, mikang galkap galvil-madawkte in Suangkualui giahphual san tuakkha uh hi. Pi Hung Uap, atangek Suak Hung  tawikawm-a khuai huanna tui en-a om, galkapte in kappah uh-a, anau tawikawm-sain gam leh nam a’ dinga a ap a nuntakna beisuah hi.

Gamvakte in phual lamah thauging a zak uh ciangin, a tunnatek uh pan phual lam delhtek pah uh hi. Phual-a thupiangteng mun khat tek pan daitak-in, hu-ngaih tek uh hi. Pu Tuang Khual leh Pu Ngen Dong zong, azi atate uh nupi naupang teng buliah-a limtak-a a om ding uh thupia kawmin a thau tuak zamin, mikang galkapte kapthuk pah uh hi.

Giahphual sung teng thau khu leh thautang mau kawmah, “Pasal dual kon, ei hong thata pupa gam suan nuamte; kithawi-a kithawi khit nungsang - thuk un, kap huan un,” ci-in Pi Cing Man naupomkawmsa in, a pasalte thapia hi.Galkapte kibehlap thuahthuah in thauging puakzuah zuah hi. Pu Tuang Khual, liamgawp in kihem zo nawnlo, Pi Kop Ngoih lengin a pasal a phottoh laitak leh, a nupa in gam leh nam a’ ding a piak a nuntakna aa beisuah uh hi.

Pu Ngen Dong zong ahih theihzah tawpin, galte a nankawm-ah a thautang bei sawnsawn hi. Azi’ khipi tang phuaikhia-in, thautang in thunin kap hi. Thau ging tangkanpuak bang lakah amah tha a pia azi leh a tano pukkhat suahin, gam leh nam a’ ding a nuntaknate beisuah khawm uh hi. Numeino nau-pangno teng thaugin teh laulua in, giahbuk suang-tumte kawm ah tonciip uh hi.

Giahphual sung pan thaugin a daih ciangin, galkapte in phual umcih aa luh ding a kipat laitakleh, gamkuan pasal thau tawiteng tung uh hi. Giahphual nai a naihtheihzah uh naih in, sing leh suang bih in mikang galkapte kap pah uh hi. Thau zat kikhailua banah, thau mai ah hanglua uh ahih manin Pu Ngen Nok, Pu Thang Phut te in gam leh nam a’ ding kiciam-a a piak uha nuntakna te beisuah uh hi.

Nisun lam ciangin pute pate in a thauvui a thautanguh beinaih uh ahih manun, galte kapthuk nawnlo uh hi. Vui leh tang lah bei, ei lah a bei hita hang, taikhia phot ni, ci-in a bukna santek pan taikhia uh hi. Amau tawh kihallo mun khat pan, “Pa-aw, pa aw” ci-in kapvangvang kawmsa in, Khan Dai in a pa taina delh hi. Pu Tawng Lam kilehkik-a a ta zamin nungpuak hi. Galte in kap-a, Khan Dai a ziat lam pang teng liam hi. Ahih hangin a pata un, ahing in kisuahtak uh hi.

Kikapna a daih ciangin, galkapte in giahbuk umcih in phualsung luh uh-a, numeino Ngiak Zel, Phut Dim, Niang Hung Leh Suak Hung te man uh hi.

Pu Tuang Khual, liamma leh sisan tawh kidiah-in naknaklai in om hi. Galkapte in, alu pan Phut Dim lensak in, suang dapin angawng tan uh hi. Giahbuk-a kikoih thau lawng guk leh a site thau lawng thum la uh hi. Pasal a siteng ii ngawng tannin, alu la uh hi. Pi Nem Niang, Awi Ciin leh Tuang Zen te a lawmte uh tawh kithu za lo-in, giahbuk zuansuak kha uh-a galkapte in man pah uh hi. Pu DongThuam zong Pi HungUap apuk ciangin ataileh amaiah nupikhatin lampi naphen samsam a, aniik mongteep lenin azuihzuih leh aPi DimAwi nahihi.

  1. Galkapte in paikhiatpih
Galkapte in buksung bukkiim teng limtakin pheklek uh hi. Bangmah a muhnawnloh uh ciangin, thau teng lomsawmin kisuan uh hi. Ahing mat mi sagih lakah Ngiak Zel numeino apa lutang puasak in, Pi Nem Niang adang teng ii lutang pua sak hi. Niang Hung neumahmah lai, leh Suak Hung nawi-nelai te galkapte in pua in, Tuingo lui lamah pai khiatpih uh hi.

  1. Zan Khat Hun
Gamvak tengin giahbuk zuan-ngam nawn lo-in tuiduh gilkial, lungzuang khua-ngai dipkua patau kawmsa-in, gammang tulak singziing nuai suangtum lakah hu zong sang gawh ngam lo, khitui naptui luang halh halh kawmsa-in, a-vaak a-mial mel phawk lo-in a omna muntek pan zan khat hun beisak uh hi.

Zingsang phalvak kipat ciangin, omna muntek kikan in kimutuah uh hi.

  1. Ciahkik ding Khensat
Asi tawh a kiman tawh ihih banah, thauvui thautang I neihteng leh I thaulawng teng taan ihih manin, khua-lam zotkik phot ding simloh thudang omnawn kei-ci in, khitui naptui luangin khensat uh hi. Pu Tawng Lam in a sanggamte atate thapia-in, a tangzang zawhiat tengin gal hu-ngaih kawmkawm, giahphual en in pai uh hi. Asite’ luang teng kaikhawm-in numei luang teng mun khat ah, pasal luangteng mun khat ah, mun nih ah khenin phum uh hi.

  1. Khua-lam Zuatkikna
Gal lungmuan omlo ahih manin, lampi dang tawnin khua-lam zuankik uh hi. Kuamah kikhen-lo in, Phunom innpi tun phot dingin khensat uh hi. Phunom tun ciangin, Pu Thang Lam in zu le sa tawh vai tut hi. Tua thamlo-in mim leh taang khuk tantan a pha Mualhem dang phung lociingpi khat zong zuih ding ap pah hi. Innpipa Pu Tawng Lam inn ah kinga phot uh-a, tua pan khua ciat damin zuanpan uh hi Pu Tawng Lam in a sanggamte’ luang aphumna mun, Phunom pan pai in vil zelzel hi. Tua ahih manin Pu Tawng Lam in:
a)    Ciin leh katuai gamkima thai bang katuh, dawn ciang a suan ding bangin, thaang bang veng e.
b)    Phung hen gual hen maciang suanin, zata nuaciang dal hi veng e, zua aw na min lo ing e.
 … ci in la phuak hi.

  1. Tedim Thong ah
Tuingo lui lam zui in, Thangmual manawhin paipih uh hi. Thangmual pan Thavaak tawn uh hi. A site lakah Khai Kam kihel lo cih a theih uh ciangin, Fort White (Thuklai) Mikang hanah puleh pate’ lutang teng phum uh hi. Amat teng Fort White pan Tedim ah paipih suak uh-a, Tedim thongah khum uh hi. Suak Hung nawi-nelai ahih manin galkapte in keem hi.

  1. Amatte Khahkhia
Suangkua lui kikap-na pan mikang galkapte matteng, hong khahkhiat na dingin Pu Tawng Lam in u leh nau teng tawh vaihawmin, Tedim Vuandok zum ah vangen zelzel hi. Suangkualui-a kiman teng Tedim thong pan November 10, 1894 ni in Sir Bertram Carey in khahkhia hi. Cidam in inn kitunkim Suak Hung in a sawt loin inn pan hong nusia hi. A kimante sungah Tuang Zen leh Awi Ciin, Suangpi pan Suanman behte ahi hi.

  1. Asi teng Kivui
1895 kum tuktun khit ciangin, Pu Tawng Lam in a-u a-nau teng kai khawmin Suangkualui-a siteng vai kikuppih hi. Unau teng Suangkualui ah kuan pah uh-a. Asi teng ii kul khuatkik in, a guhsia teng pua uh-a a vekpi in innpipa Pu Tawng Lam’ Inn, Phunom khua ah, tun uh hi. Pu Tawng Lam in ama’ inn pan a siteng pumphelh tan, kuasah guanin ngeina cing tawh, ni khat sungin vuikhat  suah hi. Pu Tawng Lam in:
a)    Mawng bang peemna hiangtui vangkhua, siluang ka khiatna hi e.
b)    Siluang ka khiatna hi e, kei zong tonzawi ka kaihna.
… ci-in asiteng a vuina, la tawh ciamteh hi.

Khen VII.
A TUAHSIA HI LO HI

  1. Englik te Do sawm
Minamdangte in pupa gam leh leitang tungah, thunei-a a uk ding phal lo uh hi. Pute pate in kilung kumkhawmin, mikang kumpite do ding a a uk ding phal logiat uh hi. Pute pate in kilung kumkhawmin, mikang kumpite do ding khensat sa tawhgam zuana, galdo uh ahi hi. Tua ahih manin Pu Tawng Lam in:
a)    Vangkhua suan ding leido lunmang, lenpalin ciang ning ci’ng e.
b)    Leido kaihmin luang bang hi e, ka phung luangsing bang lum e.

a)    Leido zatam alsi tawh kim, lenpal in ciang ning ci’ng e.
b)    Lenpal in ciang ning ci’ng e, phung luang honsing bang siang e ...
… ci-in la phuak hi.

  1. Unau khat Mapang khat
Ei leh ei-a a dingsate I hi hi. Kumpi a do taktak ding I hi hi. Sih leh sih, than leh than; khedang tawi thei peuh-mah kuan ding, ci-in unauteng kizawn in, a nupa kopkop in naunawiluai zong galmai ding dingin a kuankhia uh ahi hi.
Hih thu hangin Pi Dim Awi in:
a)    Ngotui luangsuk zangkuamthuk e, von aw na lung tup hi e.
b)    Na tuai huanbe bang zawn vecia, kopa simkhua zing ing e …

a)    Theihloh lenmui hong kai e, ciinngaih in zalna’n nei e.
b)    Duang kong zuih lah bal bang malloh, inn bang na heh ta nam aw …

a)    Si aw kong awi zaw diam aw e, hing aw kong awi zaw diam aw.
b)    Akop in nau bang awi ing e, luankhi leh thamtha hi e …

Pi Ngiak Zel in,
a)    Ka tun ang tawh ka zua angtawh, do in samgi bang khen e.
b)    Zua phamsa tawh tuaitheisen tawh, do sul sangbang zui ing e

Pi Phut Dim in,
a)    Tunkop ka sial zaw diam aw, zuakop ka sial zaw diam aw.
b)    Akop in nau bang awi ing e, lawkta na khuan zil ing e.

Pu Thang Ngul in,
a)    Sawmsial simsa ka tunnu aw, do anglai ah zal aw e.
b)    Phung sumlu maciang suan vecia, thamthan gawl bang puk vecia

Pu Dong Thuam in:
a)    Manawh phung zon tutawm mimphung, do in suan-gua bang mon e.
b)    Ciinkawi sumlu maciang suan e, vonsen al bang mang ta e.
a)    Pianna tunnu’n tuang nusia e, do tunnu’n al bang tah e.
b)    Nau bang ka kah tang bang huan ding, tuailia-nu mah ngai ing e .
ci-in la phuak tek uh hi.

Khua-tuam mun-tuam tekah omuh hitaleh, pute pate unau pata teng lungsim taksa kipumkhat in om ciat uh hi. Numei naupang kisiit lo-in amau hihtheih zahtantek tawk, a nuntaknate uh apiagam leh nam a itna lakin, mikangte do uh hi.

  1. Asi-te leh Amat-te
Suangkualui-a mikang galkapte tawh kikapna ah, asi leh amat teng anuai-a bangin kiciamteh hi.
Asi-te

Pu Thang Phut
Pu Ngen Dong
Pu Tuang Khual
Pu Ngen Nok

Lia Huai Ciin
Pi Hung Uap
Pi Ciin Man
Pi Kop Ngoih



Amat-te


Pi Nem Niang
Lia Ngiak Zel
Lia Niang Hung
Lia Phut Dim
Lia Suak Hung
(Nawiluai lai)
Lia Awi Ciin
Pu Tuang Zen

Aliam-te
Lia Ngiak Zel (Ataklam khutliam, nasia lo, kiman),
Taang Khan Dai (Ataklam pangliam, suakta)

Thau Amat-te
Gam a zuat ding uh ciangin, phungsung-a thau omteng a zui ding a omloh hangin, a omzah kaikhawmin masuan uh hi.
Mikang galkap te tawh kikapna ah 8si, 7 man in 2 liam hi.

Thau lawng 9 matsak hi. Tuate in:


Pu Khoi On  lawng-2
Pu Tawng Lam           -2
Pu Kip Suan    -1
Pu Tuang Khual          -1
Pu Ngen Nok              -1
Pu Ngen Dong            -1
Pu Thang Phut            -1


Hih thau lawng 9te pen asi teng a’ leh giahbuk-a kinusia teng ahi hi.
Pu Khoi On amah a om-nawn loh hangin, ama sawmna bangin a thaute galmai a ding veve ahi hi. Pute pate in a thau teng uh a taan ciangun, asite zah mahin nasa mahmah uh hi. Tua ahih manin:

Pu Tawng Lam in,
Zangkhen ka kawlciang aw e phung nih thum aw zangni suah luankhi ka luanlawh thong hi e

Pu Dong Thuam in,
a)    Zua tawi kawlciang dolai-a thaam sanglun pat bang sai la’ng e.
b)    Lung heh mana sangkop simna ning leh aisa ka sumtualah kuangtui bang gawm ning cing e.
… ci-in la phuak uh hi.

Khen VIII.
INNLUAH THU

Suantak’ tu Ngen Zo suante sungah, u-zaw in tuultawi (Siampi sem) in, nau-zaw in Innluah ngeina zang uh hi.

  1. Ngen Zo’ suan Hen Kai (Tomu) Innpi
Hen Kai’ ta Kaih Thang pan khang 8na, Song Khoi in tapa guk lak ah Dong Ngen leh Luh Zom te’ khang kisim thei hi. Dong Ngen u-zaw hi-a inntuanpa; Luh Zom nau-zaw hi-a innluahpa ahi hi.

Song Khoi innpipa (Tomu innpipa) in Luh Zom ahi hi. Luh Zom in tapa 4 nei-a: Hong Tun, Kip Suan, Tawng Lam leh Ngen Dong te ahi uh hi. Ngen Dong khang bei ahih manin, Luh Zom innluahpa (Tomu innpipa) in Tawng Lam ahi hi.

  1. Nauzaw Innluah pan Uzaw Innluah
Pasian zia pen u-zaw innluah hinapi nauzaw inn-luah i zang hi. Tua ahih manin Pasian koihsak ngeina man ah i ciahkik kul ding ci-in, Thaang sung Thaangpua kizasak in November 4, 1966 ni-in Phunom khua ah Suante-Tomu in, Nau-zaw Innluah pan U-zaw Innluah ah laihna, Pu Thang Khai innah bawngtal khat go in, Pu Thang Khai thungetna tawh kikipsak hi.

Khen X.
THU KHUPNA

Ngen Zo in tapa Khup Mu, Suan Te, leh zinung tawh Hen Kai nei hi. Zinung ta peuhmah, “Nam tomte” ci-in mun khempeuhah, kisimmawh diak hi. Zima tate in a beh min uh amau aituam in nei-a, zinung tate in ka nam min uh hong zatsak, hong tomsak hi cihnopna tawh “Nam tomte” cih kam kizang ahi hi.

Tomu te: zinung’ta, nam tomte a kicih hangin, kiciamnate kiplet a, thumanna leh cihtakna a khahsuah ngei lo, gam leh nam a ding phung leh nam beilawh zaha, nuntakna a kiphalngam sisan neite a hi hi. Leitung a ding sihna lakah, gam leh nam a dinga sihna sanga thupi zaw sihna omlo hi.

Leitung buppi amaute ii khutnuai-a a koih nuam, Englik mikangte uk ding utlo-a Kawl gam leh Khamtung mite a ding a nuntakna uh a beisuah I pi leh pute I nu leh pate,
“AMANPHA PATE’ NUNTAKNA”
PRECIOS DE VITA PATRES
ci-in pahtawina ipia hi.

Hih laibu in ipianna, puleh pate ii thuak nate, leh u-leh-nau khat leh khat kiphawk ki-it semsemna hong piangsak ding ilam-etna ahi hi.

            … khangsimnate manlahpih kei un …             I Tim. 1:4
            Note in Topa na Pasian uh mite nahi uh hi……   Thkna.14:1
______________________

Thudotte:
Pu Lam Za Dal, ……       Phunom
Pu Ngin Khua Zam,…..   Pydawta
Pu Suan Cin Khai,…..    Thangnuai
Pu Lut Khua Pau,…..     Thangnuai
Pu Tun Sing, …..            Phunom
Pu Tun Pau,….               Phunom
Pu Ngul Cin Pau,….        Suangpi
Pi Awh Niang,…..          Phunom
Pi Huai Za Niang, ……  Phunom
Pi Ngiak Za Luan,…..    Thangnuai

Laibu ette:
-Pu Khan Dai, Khang Ciamtehna Lai; Phunom: 1933.
-The Chin Hills; Vol. Iⅈ Aizawl; 1976.
-Pu Lam Za Dal, Thuciamtehna Laibu te, Phunom; 1952-2000.
-Siyin YPCES Annual Magazine, Rangoon; 1960.
-Ngin Suanh, Kalzang Suante Beh Khangtangthu, 1978.
-Lam Suan Thang, Phunom khua Tangthu, Phunom: 1996.
-Ngin Khua Mang; History Never Ends, Tedim: 2006
-Pu Tun Pau; Phunom khua Suante-te Khang Thu, Phunom.
-Tawng Lam’ Mualsuang, Khua-ngen: 1935
-Pu Ngin Khaw Zam; Henkai suante tangthu, Pydawta.

 NGENZO BEH KHANGSIMNA

ZO
(Pan Khang 10na)

Suantak

Neihlut

Ngenzo

Khupmu  -  Suante  -  Henkai

Kaihthang

Muangsuak

Suah Thuam

Luh Hung

Thuam Lam

Hung Tawn

Thuam Thang

Song Khoi, Lam Tawng, Ngah Thang

Luh Zom, Dong Ngen

Tawng Lam, Hong Tun, Kip Suan, Ngen Dong

Khan Dai

Lam Za Dal

Lam Suan Thang, Kam Ngo Lian
                         
Dal Sian Mung*, Lian Kap Tuang, Ngin Kim Mang



[1] The habitants have been collected after very great trouble and must be carefully watch on they will scatter again. They are a wild set of people as require the very strickest administration. @ The Chin Hills, Vol. II, p.xi; 1976.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: AMANPHA PU LE PATE’ NUNTAKNA (Precios De Vita Patres) .NGENZO BEH HENKAI(Tomu )BAWNGTE TANGTHU Description: Rating: 5 Reviewed By: Cinpu Zomi
Scroll to Top