728x90 AdSpace

Hot
Menu
Zon-ol na Donate

Latest News

PATE NI. Agelh ~ Sya Khenpi

PATE NI
Agelh ~ Sya Khenpi
Editor. Upna Laigil

Kum simin pawlpi ciat in Nute Ni le Pate Ni ki bawl hi. Tukum in June 18, 2017 ni PATE NI in kiciamteh a, biakinn kikhopna mun ciatah Pate pahtawina le Pate thupina tampi tak kigen hi. Hih Pate ni hong pian pen a beisa kum tampi a kipanin ni thupi in kiciamteh  hi.
           
PATE NI in, Nute pahtawina le Nute tawh kisai la ki phuak tampi a om hangin Pate la ki phuah pen tawm mah mah in, ki za ngeilo phial hi. A hi zongin, innkuan sung le mimal  khat ciat nuntakna pen Pate a thupi lua mahmah a hihna ki phawk a, PATE NI cih bangin kibawl ahi hi. Ih pate pahtawi ih hih manin, ei tate in ih pate tungah bangci bangin lungdam kohna ih nei thei hiam? 

Mipilte in lai gelh uh a, naupang khat in a neu lai in, a pa pen leitungah a hatpen, a pilpen, a siampen a melhoih pen dingin ki ngaihsun hi. A hi zongin, tate hong khangto in, kum 15-25 kikal khawng hong phak ciangin, pate pen mi lak ah zumpih thei hi.  
           
Tate hong khangto uh a, kum 30 hong val uh ciangin, pate thupi na le kisapna hong phawk sansan uh hi. Kum 40 hong val uh ciangin, thu khat peuhpeuh ah pate dot ding hi hong ci thei kik ta uh hi. Tate in aneu lai in pate muang mah mah a, tua khit ciangin, amau sangin thei zaw le siam zaw peuh kisa kha thei hi hang, a tawp lam ciangin ih pate mah in thei zaw mawk veh ee cih hun hong tung kik hi.

           
Tu in, tate in hong pahtawi uh PATE in zong, ih tate tungah, amaute nuntak gamtat kalsuan nading bang zah ciang lam lakin thuhilh ih ih hiam cih ih gen suk ding hi.   Lai Siangtho  sungah naupang khat a paina ding lampi man hilh le cin a khantawn in piallo ding hi ci hi. (Pau.22:6)Tua ahih manin, pate in ih tate tungah kam tawh ih genna ahi zongin, gamtat na tawh ih lah khiatte a hi zongin, innkuan sung om zia tawh ih lahkhiatte a hi zongin, hun khat ciangin tate tungah hong kilang khia kik ding hi, tua hun ciangin ih lungkim takpi ding hiam cih ki ngaihsun kawm ding hi hang.

            Joshua 4. sungah,  Makaipa Joshua in mipi tungah thu gen a, Jordan gun a kantan uh ciangin, siampite in Jordan gun a sikkhak phet-un, a nunga pai ding mipite in leikeu  tawnin gunpi kantan ding uh hi, ci hi. Tua laitak in, Israel minam 12te sung panin kiteel khiat upa khat ciat in, gun lai zang pan suangtum lianpi khatta puakhia uh hen la nitak giah phual a sat uh ciangin, tua lai ah ciangkhawm  ding uh hi ci-in vaikhak hi. Tua suangtum kiciangkhawm pen naupang te le khangsawnte in hong dot uh ciangin, Pasian in amaute vaangliatna tawh Jordan gunpi a kantan pihna na hilh ding uh hi ci hi. Tua mah bangin, Israel makai mi 12 te in suangtumte pua ciatin ciangkhawm uh hi. Teci panna hoih khat ahi hi.  

Tu ni in, pate in na tate/ tute innkuan sungah hih bang ahi hiam ci a hong dot ding uh lim le teci pan’na khat peuh ahi zongin thu khat peuh ahi zongin  ih nei kha hiam?
           
2 Khang tangthu 29-31 na sungah Hezekiah Kumpipa kum 29 a phak in kumpi seem a Jerusalem khua ah kum 25 sung mang hi.  Khangno mahmah khat a hih hangin, kumpi hoih a hih theihna thu tawm khat en suk ding hi hang. Hih a nuai a ih gensuk teng en in, tu’n PATE  in kei zong Kumpi Hezekiah in a gam sungah Pasian thu a ki theihna ding le Pasian a ki zahtaak theihna dingin, a sepnate tawh sehkak in, ih innkuan sung ciatah, innkuan pihte in Pasian thu a muh theihna ding le Pasian lamah a picin' theihna dingin bang ih seem hiam cih ih ki ngaihsut kawm ding ka deih hi.

1.Hezekiah kumpipa pen Pasian muhna ah a maanin gamta hi. ( 2 Khang. 29:2).
Mite muhna a gamtatna thupi mahbangin, Pasian muhna ah a manin gamta cih pen a thupi zaw lai hi. Hih kumpipa in a gam sungah mite in Pasian thu zui in Pasian thupha piaktaak a hih ding deihna tawh amah nuntakna sungah kikhalna na nei a, Pasian muhna ah a manin gamta hi na ci hi. Pate in ih innkuan sungah tate etteh theih ding na hoih bang ih seem hiam? Hih Hezekiah kumpipa mah bangin aman in ih kampau hiam? A manin ih gamta hiam cih ki sittel huai mahmah ding hi.

2.Topa inn kongkhak te hong hi. (29:3)
Hezekiah kumpipa in, a gam sung mite le Pasian hoih tak a kizopna ding deihna tawh, kumpi a sep kum lian mah in Topa inn kong khak pite hong khia hi. Bang hang hiam cih le ama mai a kumpi semte in Biakinn kongkhakte kalhcip in biak piakna te kibawl nawn lo hi. Tua in Pasian lehdona le Pasian tawh kigamlatna lim hong lak hi. Hih kiumpipa in biakinn ah mite in Pasian a biak theihna ding, gamsung mite in Pasian mah a biak theina le Pasian thu a zuih theihna ding uh lampi hon sakna ahi hi.

Pate in zong, ih tate in Pasian a biak theihna ding Pasian thu tawh a nuntak theihna ding uh a hi zongin, Paisan nasep na lam ah hong ki piak theihna ding uh a hi zongin bang teng ih seem khia hiam?

3. Topa Paisan Pawi bawl hi. ( 30:1) 
Gamsung mite in, Pasian hangin gual zawhna a ngahnate uh ahi zongin, thupha ngahna a dawldawl a om te a phawkkik theihna ding uh le Pasian tungah a lungdam theihna dingun pawi lianpi a hi 'Paisan pawi' bawl sak hi.  Taanglai a Pasian teeltuamte Egypt gam a sila hihna pan, a suahtakna uh pawipi na bawl uh hi. Hih pen Pasian hong gupna thu teci panna tawh ki bang hi.

Na innkuan sungah Pasian hong gupna thu, Pasian in na lamdang a bawlna thu, thupha hong piaknate na genkhia ngei hiam? Tuate na gen khiat kikkik ciangin, na innsung a tate in Pasian um thei in, muang thei in, Pasian nasep ding lunglutna hong nei ding uh hi.

4. Gamsung a dawi biakna tau teng suksiat sak hi. (31:1).
Kumpipa in, ama uk hun sung gam mite in a nungta Pasian mah hoihtak a biak ding uh deihsak a hih manin gam sunga Pasian biakna nawngkai sak thei ding dawi biakna taute suksiat phelsak sak gawp hi. Tu hun ciangin, kamsang vak kawikawi pawl khatte in dawi tampipi hawl khia thei uh hi. Ih innkuan sungah dawi biakna tau dawi-lim khawng a om pah loh hangin, Pasian na biak theihna ding hong nawng kai sak van le vaii tuamtuamte a om le tuate dawi biakna tau hi pah hi. Mi pawl khatte inn sungah lim tuamtuamte ki suang thei hi. Innteekte in a deih a suan' uh hi in, amau inn a hih manin amau thu hi, ahi zongin tua lim le na kisuangte in Pasian upna le Pasian it-theihna ding lamah hong kalsuan pih hiam cih ngaihsut huai mah mah hi. 

Pasian tawh hong ki gamla sak ding na khat peuh peuh pen hepkhiat huai mah mah ding hi. Tua bek thamlo-in, inn sunga ih sepna khat zong milim suak kha thei  ding hi.  Thu um mi khat sep ding a kilawmlo na tampi tak kisem kha veve in Pasian thu sangin thupi koih zaw lian ta kei le cin, kin bawl zaw na hih manin, dawi biakna hi pah lel hi. Tuate na hepkhiat ding kisam hi. Pasian gam le Ama dikna zon’ masak ding hi zaw hi.

5. Siampite, Levite mite in nasep zom kik hi. (30:2)
            Biakinnpi sungah nasem dinga kiseh Siampite le Levite te in, a beisa kumpi gina lo te hun sungin nasep nei nawnlo uh hi. Biakinn sungah amaute nasep ahi ‘meihal biakpiakna’ a kipan biak piakna tuamtuamte a om ciangin Pasian deihna hi a, Pasian lungkimna zong ahi hi. Hezekiah kumpipa in a gam sungah mite in Pasian a up theihna ding, Pasian a muan zawk theihna ding a kipatna ahi biakinn sung panin biakna ngeina teng hong seem sak kik hi.

6. Kumpipa in a neihsate biakpiakna ding khenkhia hi. (30:6)
            Kumpipa ama nuai a nasepte a kam bek tawh sawl hi lo in, amah mah in zong a neihsa sung panin biak piakna ding khenkhia in, pia khia pah hi.
           
Levite mite in, Biakna nasem dingin ki tuamseh a hih manin gam le leitang nei lo uh hi, lo le huan zong nei lo uh hi. Mipite cit piakna le biakinn a kipia neektheih tuamtuam amau innkuan tawh kizui in ngah uh a, tua tawh nungta in ahun khempeuh uh biakinn sungah a zangte ahi uh hi.

Hih a tung a ih gen teng a tom mahmah a ih gen hi. PATE NI in,  biakinn ciatah Pate kipahtawi hi. Tu in, Pate in zong tua pahtawina tungtawnin, na innkuan sung le na pawlpi ahi zongin, Pasian nasepna ding ahi  zongin bang na seem thei hiam?  Hezekiah kumpipa in a gam sung a mite le Pasian hoihtak a ki zop theihna dingin a tung a teng seem khia hi. 

Tu ni a PATE in ih innkuan sung ciatah Pasian thu in hong zawhna dingin, bang teng na seem khia hiam?  Tu laitak a na taneute, tu zawh kum 15-25 ciangin, tu ni a nang om dan le gamtat dan bang tektek in hong gamta ding uh hi, na lung a kim ding hiam?
•           Mimal khat ciat in Pasian ih upna kip le
•           Innkuan ciatah Pasian kithupi sak ding hi
•           Innkuan ciatin Pasian thupi pen in koih thei khit ciangin, pawlpi sung nasepna mavang ding hi.
•           Pawlpi nasepna mavang le ih pawlpi sepkhiat ding a hong ki sawl mission nasepna zong taangzai zaw ding
•           Mission nasepna taangzai le ih Gam sung Pasian thu in hong tawk zo pan         ding hi.

•           Tua dingin Innkuan sung aa PATE in mawh puak ih nei gige hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PATE NI. Agelh ~ Sya Khenpi Description: Rating: 5 Reviewed By: Cinpu Zomi
Scroll to Top