728x90 AdSpace

Hot
Menu
Zon-ol na Donate

Latest News

Pate’ Pa Hihna Tungah Pate Pahtawina. Agelh ~ Kap Za Khai (Photoh)

Pate’ Pa Hihna Tungah Pate Pahtawina
Agelh ~ Kap Za Khai (Photoh)


Thupatna
Kum simin i bawlden Pate ni June 18, 2017 ciang pawlpite in kibawl ngeingai ding hi a, tua sungah i Pate vanlena piakna tawh ahi zongin, thulela tawh pahtawina tawh ahi zongin i hih theih zahzah tawh kipahtawi ngeingai ding hi. Nisim pen Pate ni in kingaihsun lel a, ahi zongin leitungbup in lung kituakin i pahtawi ni kineih pen a thupi mahmah ahi hi. Ms. Sonora Louise Smart Dodd in a pa’ itna a phawkna tawh Pate Ni bawl ding lunggulhna tungtawnin The Spokane Ministerial Association leh YMCA in na panpih uh a, amasa pen Pate’ Ni pen 1910 kum June 19 ni-in kibawlkhia thei bek tham loin US ah zong kinak bawl mahmahna tawh kizui-in US kumpi Doodrow Wilson in 1916 in Pate’ Ni bawl ding phalna na pia hi. Tua hun a kipanin tuni dongmah in Pate’ Ni kum simin a kibawl ahi hi.

Pate’ Pa Hihna Bulpi
Innkuan sungah nulepa cih om a, Pa cih dinmun pen hanciam tawm thu tawh a kingah hi loin Pate’ Pa hihna bulpi khat hangin a kingah hi. Tua Pate’ Pa hihna bulpi pen Pasian ii na khempeuh tungah Pa hihna hang ahi hi. Pasian in a kipat cil-a kipanin vantung leh leitung piangsak, khuavak leh khuamial, ni leh kha, aksi, singkung lopa, ganhing tuamtuamte leh a tawpna ah mihing a bawlnate hangin, Amah pen na khempeuhte’ pianna ‘PA’ hong suak hi. A diakdiak in Adam a bawlna tungtawnin Pasian in amah pen mihing ii pianna, makai, leh nuntakna bulpi ahihna hong lak bek tham loin, Adam limlemel tungtawnin a kimu theilo Pasian’ hihna i muh teeltheih nading hong deih ahi hi. Atom in cile’ng Adam pen Pa Pasian i muh theih nadingin kietna limlangneu ahi hi.

Mihing Pa hih theihna pen Adam suan i hihna hang hi. Adam ii Pa pen Pasian ahihna tawh kizui-in Pasian geelna bangin innkuan sungah mihing Pa a om ahi hi: Topa aw, nang pen kote’ Pa na hi a, nangmah in tanglai pek pan kote a hong honkhia pa na hi hi (Isa. 63:16b). Paul in zong Pasian pen vantung a tung khinsa mite le leitungah a om lai mite khempeuh’ pianna i Pa Pasian (Efe. 3:14-15) na ci ngiat bek tham loin Pasian’ Tapa Jesuh Khrih leh leitung innkuan pa kizomzia zong hong telgen lai hi (Efe. 5:23-24; 1Kor. 11:3). Pasian pen Jesuh Khrih ii Pa ahih bangin Khristian khempeuh ii Pa ahih banah (Lk. 2:49; Rom 1:7), Amah in Jesuh Khrih pen thu khempeuh lutang ding bawl hi (Efe. 1:22). Tua ahih manin mihing ii Pa hihna bulpi pen Pa Pasian leh Jesuh Khrih ii na khempeuh tungah Pa hihna hang ahihna phawk ni. Pasian hang bekin i pate’ Pa hihna a thupi, a zahtak huai, a mannei ahi hi.

Pate Pahtawi Huaina
Pate pahtawi huaina thu tampi om hi. Lai Siangtho sungah ‘pa’ cih kihelna mun 940 bang kimuh theihna in pa kammal kilawh munna hi a, tua in pate thupitna leh pahtawi huaina hong kilangsak hi. Pate i pahtawi huaina thu tampi lak panin a thupizaw pawlkhat en ding hi hang.

            (1)   A kammal ngiat in thupi hi:
“Pa” cih kammal ngiat pen a samte’ kamah khum mahmah bek tham loin zong vaang nei mahmah hi. I pianna Pa banah i biak Pasian zong “PA” mah i ci hi. I thunget simin, “vantunga om kote’ Pa aw,” i ci den hi. Tua bang i cihsim lungnopna, lungmuanna leh kipakna i ngahciat a; hong piangsak Pa, a thunei pen Pa, i bulpi ahih manin Pa a ci ihi hi. Van leh lei a bawlpa Pa Pasian pen kam tawh genzawhloh zahin a thupi bangin leitunga i pianna pa zong thupi ahihna kimu thei hi. I pianna pate bangbang ahi uh zongin (pilna neilo, sumlepaai neilo, mel hoihlo, cingtaklo), amau hihna ahi “Pa” cih min a ngahna hangin, a min bek tawh zong thupi khin lua mahmahta a, pahtawitawi huaita hi.

(2)   Innkuan lungtang ahihna hangin thupi hi:
Paul in, “Pawlpi’ lutang in Khrih ahih bangin numei lutangin pasal hi (Efe. 5:22-24),” a cih bangin innkuan sungah Pa pen a lutang hi-in zi leh tate tengpen innkuan pumpi ahi uh hi. Mihing pen lutang a om ciang bekmah nungta in gamtaang mah bangin innkuan zong Pa a om ciang bekin etlawm in kicing kisa pan hi. Pa pen numei lutang ahih bangin innkuan lutang zong hi pah a, a banzom ah minam lutang zong hipah hi. Innkuan thu leh minam thute ah buaina leh vai khat peuhpeuh a om ciangin a thuak pen, a geel pen, a sem pen cihna tawh lutang ahihna kilangkhia mahmah hi. Tua ahih manin Pa pen innkuan leh minam lutang ahihna hangin thupi ngiat in pahtawi huai hi.

(3)   Innkuan Siampi ahih manin:
Pate pen innkuan lutang ahih bangin, a lulu-in kha thu tawh kisai in zong innkuan siampi ahi uh hi. Job in a innkuan adingin nisim zingsang tungin biakpiakna a neih bangin i pate in zong ei adingin Pasian tungah thupha hong ngetsak uh hi. A tate kha thu lamah hong pantahna, Pasian thu hong hilhnate in pa ii siampi hihna hong musak hi. Tua hangin i pate pen pahtawi huai mahmah ahi hi.


(4)   Innkuan Kamsang ahih manin:
Kamsangte’ tavuan pen lamkhial Pasian mite lamman hilh ding leh Pasian kammalte genkhiat ding ahih bangin, pate in zong innkuanpihte’ khialhna hilh in Pasian deihna dingin pantah in hong makaihna hangun a pahtawi huai ahi uh hi (Kol. 3:21; Efe. 6:4; Thuhilhkikna 11:18-21).

(5)   Innkuan Kumpi ahih manin:
Innkuan lutang cihna in pate pen innkuan kumpi hi cihna hi pah a, pa in innkuan sungah thuneihna, itna leh cihtakna tawh hong uk leh innkuan nuam in nuntak nuam hi. Kumpi in a gam sung ading a kisam khempeuh a sepsak bangin i pate in zong innkuante kisap bangbang geelin hong sepsak uh hi. Tawl ing, gim ing ci ngei het loin innkuanpihte hong vaakna in ama kumpi hihna hong kilangsak ahih manin a pahtawi huai mahmah ahi hi.

(6)   Minam bulpi ahih manin:
Minam pen innkuan sungpan hong kipan masa hi a, tua sungah Pa pen pianna bulpi ahih bangin minam adingin zong Pa pen minam pianna bul kici thei hi. Leitungah mihing khang leh minam kisim ciangin Pate’ min bek tawh khang leh minam kisim in kiciamteh hi. Leitung cilesa bek tham loin kha thu tawh kisai ah zong Jesuh Khrih umin a piangthak upna tate pen ‘Abraham suanlekhak’ cih bangin Pasian ama’ tate hong ciapteh hi (Pian. 17:5; Rom 4:11; 4:16; Gal. 3:7; 3:29). Abraham pen kha lamah i pu i pa bulpi ahi bangin, Israel minam piankhiatna pupi zong ahi hi. Tuamah bangin Zomite zong Pa’ min bek tawh khanggui kisim in behlephung kisim in, thulela khempeuh Pa’ makaihna, thuneihna leh sepna tawh kimasuan deudau ahi hi. Hih hangin Pa pen minam bulpi hong hi-a, a pahtawi huai mahmah ahi hi.

(7)   Thupha naak ahih manin:
Pa pen minam bulpi ahih banah thupha naak zong ahihna i gensa hi a, innsung leh minam sungah thupha naakpi ahih takpi uh hi. Ei Zomite sungah zong Pate mahin tate thupha piazaw deuh hi. Pawlpi sungah zong Siapite mahin thupha pia uh hi. Lai Siangtho sungah zong Pate mahin thupha piazaw uh hi. Minam leh innkuan sungah thupha piak theihna mimal kiciangtan lo (i vekpi in thupha kipia theiciat) napi-in, Pasian zia ahih leh Pa a om lai nakleh Pa’ thupha piakna mah thupisak hi. Isacc in a tate Jacob leh Esau thupha a piakzia kilungngai thei hi (Pian. 27:1-40). Lai Siangtho bang hileh nulepa pen thupha naak hi pen a, tua sungah Pa pen innkuan lutang ahih bangin thupha piak theihna leh samsiat theihna a neipen ahihna tawh ‘a sia leh a pha naak’ ahi hi. Tua hangin amah pen innkuan leh minam thupha naak ahihna tawh pahtawi huai ahi hi.

(8)   Minam lutang ahih manin:
A tungah i gensa mah bangin Pa pen innkuan lutang ahih bangin minam ii lutang zong hipah a, minam thupha lutangpi cihna zong ahi hi. Israel minam khempeuh adingin Abraham pen minam thupha lutangpi ahih bangin leitunga om minam khempeuh adingin Pate pen minam ii thupha lutang vive ahi uh hi. Innkuan lutang, makai, thunei ahihna uh tawh kizui-in Pate pen cilesa minam ii lutang leh thupha lutang ahih bangin kha thu ah zong thupha lutangpi mah ahi uh hi. Pa pen thupha lutang hi a, nu pen thupha pumpi hi-in ei tate pen thupha mengkee-te ihi hi. Tua ahih manin i minambup in i inn sunga Pate’ zahtakna, pahtawi siamna tawh limbawl in amau thu mang leha’ng i minam bup in thupha kingahden ding hi. Tua hangin i pate pahtawi huaina ahi hi.

(9)   Thuneihna nei ahih manin:
Pasal lutang Khrih in na khempeuh ah thuneihna a neih bangin numei lutang ahi Pa in zong innkuan sung leh minam sungah thuneihna nei hi. Innkuan sungah nute’ theihdan leh Pate’ thuneihdan kibang lo hi. Pa’ thuneihna pen Eden huan pek panin Pasian in Adam tungah thuneihna a piakna tawh kizom hi (Pian. 3:16). Tua bangin thunei pente ahihna uh tawh kisai-in tate in Pate langpang, bawlsiat, samsiat, a thu manglo, cih bang a om leh thahna thuak ding ci hi (Pai. 21:15,17; Siam. 20:9; Thkna. 21:18-21; Pau. 20:20). Pate ii thuneihna lian mahmah ahihna kilangsak hi. Pate in innkuan sungah thunei takin geelin a sep bangun minam sungah zong amau mah thunei pen hipah uh a, amau geelna bangin gamta in thumanna in i minam thupha hong suak a, tua hangin pahtawi huai ahi hi.
(10)         Sepzawhna leh thahatna nei ahih manin:
Pate pen minam sungah a lutang, a bulpi, a makai leh thuneihna a nei pente ahih bangun, sep ding khat peuhpeuh ah zong sepzawhna a nei pente ahi uh hi. Tate bangzah in thahat in na tampi a sepzawh uh hangin Pate’ sepzawhna banzo lo veve hi. Pate pen innkuan leh minam’ thahatna ahi hi. Tulaitak i minam sunga om kipawlnate GZA, ZYA, ZCD, ZCLS cihte a huampi-in en lehang, Pate’ geel leh sepna tha ahihna siangtakin kimu thei hi. Cope Topa zong Tedim ah hong om lai-in sunlezan in nasem a, a zi sangin Zomite ading nahoih napha tampi hong sepsak ahihna i vekpi theih ahi hi. Zomite ading Cope Topa hong sepsakkhiat na lianpi tampi hangin Zomite khansuah manawh thei ihi hi. Hih sungpanin Pa’ thahatna leh sepzawhna a neihna uh kimu thei hi. Tua ahih manin Pate pen sepzawhna leh thahatna a neite ahihna uh tawh kizui-in amau ngiat pen a pahtawi huai mahmah ahi uh hi.

Pate Thupha
Pate pen Piangsak Pasian melmuh theihna limlang ahih bangin a tate tungah thupha piak theihna nei uh hi. A diakdiak in khansauna leh nuntak nopsakna thupha hong pia thei uh hi (Thuhilhkik. 5:16). Hih thuphate pen lamdawt tawh kingah thei lo hi. Pasian gen bangin nulepa zahtakna bek tawh kingah thei ahihna phawk ciat ni. A langkhat ah zong ‘khuamial’ hong pia thei leuleu uh hi (Pau. 20:20). Tua manin i pianna i pate hoih tak zahtak in a thuphate i dawh theih ding thupi hi. Nulepate zahtak lohna, samsiatna in khuamial sunga meivak kisukmit bangin guallelhna leh sihna kingah ding ahi hi (Pau. 20:20).

Thukhupna
Pate’ hihna leh a thupitnate i theih ciangin amaute pahtawi loin kiom thei nawn lo hi. Pa hihna pen thuthuk pi hi a, Pasian tawh kizomin i theihtel ding thu khat hi. Leitungah pa ginalo zong tampi mah om dinga, pa gina zong tampi mah om ding hi. Bangbang ahi zongin Pa pen Pa mah ahih manin i zahtak, i pahtawi leh i it ding hi a, hih pen Pasian deihna leh hong thupiak ahi hi (Efe. 6:2-3; Thuhilhkik. 5:16). Amau’ gamtatna tawh kisai Pasian in thukhen lel dinga, ahi zongin ei a tate’n ahih leh i pate zahtak pahtawina lo buangin i Pasian maipha i ngah nading leh i daupaai nading lampi om lo hi. Hong nuntakpih lai i pa telsiam in it ni. Zahtak bawl in pahtawi ni. Bang hang hiam cih leh a tate tungpan hihte ngah ding a kilawm Pa ahih man ahi hi. Lungdam.

Reference :
Grace Family Letter, May-June, 2011, Pate Ni Tangthu.
Kap Za Khai (Photoh), PA: MINAM THUPHA.

TEDIM LAI SIANGTHO

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pate’ Pa Hihna Tungah Pate Pahtawina. Agelh ~ Kap Za Khai (Photoh) Description: Rating: 5 Reviewed By: Cinpu Zomi
Scroll to Top