728x90 AdSpace

Hot
Menu
Zon-ol na Donate

Latest News

Singkung, Sunmang le Sunsiah. Agelh ~ Pau Sian Lian

Singkung, Sunmang le Sunsiah.
Agelh ~ Pau Sian Lian

Myanmar gam ah Kawl galkap kumpi zawhthawh thutawh kibawl 2008 constitution khat ih neihkhit a kipan Myanmar gam politic paizia pen hong kikhel hanhan tawh kibang mahmah hi. 2010 kumin Myanmar gam-ah 1990 khit a akipan a kinei kik nai ngiatlo kiteelna pi khat kinei-a a thuman hiauloh hangin democracy minpua kumpi thak khat hong piangkhia hi. 2010 khit a kipan tomgen lehang 2015 petpet takteh suakta le thuman kiteelna (free and fair) tungtawn in NLD in thuneih khempeuh phial hong luakkhia zomawk uhhi. Galkap lampan zong bangmah nawngkaisakna omlo in NLD kumpi 2016 teh panmun la in hong kipan taktak tahi. Kuama upngam pakhetloh kikhelna hong khauhpai luain mang bang lianghi.

Hih kikhelna ziazua teng a omteh ki lungdam veve-in noptuam phatuam kisa thamhi. Leitung bupin zong lamdang sa mahmah in hong lamet pih mahmah uhhi. Ahi zongin tu laitak pen 2008 constitution nuaiah ki gam tangtang ahih man in lemden samlo hi. 2008 constitution pen galkap te in thu neihna limci diak teng khauhtak in a humcip theih nading un kibawl laibu hi-a democracy ngeina taktak tawh kituak hiaulo constitution khat ahi hi. Myanmar gamvai a lunglut gamdang mite tawh ka kiho teh, singkung pen khuahun zui-in a teh sel in eng hiuhiau zeel, vul kuan in naipak zeel, vulzeel, sel zeel mah taleh a singkung a gui a kibang den ahih mah bangin Myanmar gam politic paidan zong tuadan hi. Constitution cih zungpi a hoihzaw tawh kilaih mateng mel(color) tuamtuam tawh kilaih in gam kikhel tawh a kibat hang aki deih taktak, mipi neihsa thuneihna te cik mah hun in kingah kikpak lo dinghi, ka cizeel hi.  Federal democratic gam ih deihleh hih 2008 constitution tawh cikmah hunin lunggulhna tangtung pak ngeilo ding-a gamsung buaina tengzong venglo-in kido kikapna hong khauhpai mahmah lai veve dinghi.

Hih bang dinmun kawmkal mah in 2015 khit a kipan federal democracy a deih zawdeuh NLD party le mualmi party honpi khatin kiteelna-ah gualzawh na lianpi hong ngah-uh a mailam sunmang te hong a tangtung deuh zawding tawh kibang in ki lunggeel ngam zawdeuh hi. 2008 constitution pen NLD te in zong deih hetlo-in, a langpan den khat hi-in 2012 lai a  by election a lutlai pek vua kipan constitution puahding cih a tangko den party khat ahihi. 2010-2015 kikal sung ahih lehlah parliament sungpan puahzo nawnlo in parliament pua lampan puahtheih nading in lampi hoih khat ahi, 21 Century Panglong khawmpi hong kin mahmah ta uhhi. Panglong kikupna pan a kingah khensatna tetawh constitution laih ding cih lampi teel kikta uhhi.

Mualmi thautawi khempeuh kihel thei nailo-in, picing suahlo himah taleh Panglong Conference pen zawhdong hong bawl hamtang ding uhhi. Tu laitak dinmun in mailam minam le gamthu ding ih geel teh 2008 constituion bek ki siksan (reference) thei nawnlo hi. Bangdan federal democracy gam deih in koi dan in lamkhia nuam ih hiam cihtawh mailam thu ding lungngai kawmin geel kul tahi. Tu laitak Myanmar gam dinmun pen siklom pi khat deih danin nuai (mould) theih hun dinmun in kamu hi. Siklom pen ih deih dandan in a meel ih puaksak nop leh meikhu a sa mahmah sungah khul masak a kul mah bangin gam paizia ding ihdeih dan geelna ah a khauhpai theithei, a sa velvel kiginna ih kisam a tuate pen soft power le hard power te zatna hipah hi. Ih deihna dinmun tun nading pen ol masa lo, baihlo dinghi, siklom nuai cihpen tungman nuaitawh ki banglo dinghi, ahi zongin lungkia lo in pil vangtak in phul tantan lehang lah piang thei veve thukhat ahihi.

Tua ahih manin bangdan federal democracy ngeina deih ih hiam? Bangcih lehang koidan in piang thei ding hiam? State level constitution pen koidan hihen la, national level ah koidan hileh hoih ding hiam? Koidan gamte in koidan federal ngeina zangin bang phattuam nate ngahlawh uhhiam?, cihte a hoihpen in geelin, kua ma hong pumnial, zawhthawh theih loh dingin kigin kholh sitset sa in omhuai ta kasa hi. Tua in siklom mei sa mahmah sungah tui/nem sakna nam khat ahihi. Tu laitak in eite deih federal democracy koidan hi-a kua tawh ih deihdan kibang hiam cih kanin lawm zong zonbeh kik kulta hi. Minam khempeuh in amau deih federal design ciat geelin a pulak laitak hun uh hi-in ei lampan micih bangbang mang lelding maw? Ei version neitawm ding ihhiam cihte ngaihsut huaihi. Tu laitak pen ih sunmang-te gelh khiatkik, geelkhiat kik theih hun hoih mahmah khat ahi hi. Tom gen lehang gam kikhelna pen mihing kalsuan zia tawh etkak lehang khe lang khat in 2008 constitution tungah din laitak mahin a dang khe khat in mailam a suan sawm laitak hi-in koi dan constitution tungah kalsuan nuam ihhiam cih kigin loh a phamawh hun hong tungta hi.

2008 constitution pen a hoih hetloh mah bangin tua puah mateng a kisem thei hiaulo vai thupi tampi om ahih lam ih za mun mahmah hi. Mipi-te in zong ih tel mahmah tahi. Ahi zongin ei Myanmar gam, Zogam pen hun ngah hithiat a damtakin ngak hithiat theih dinmun hilo hi. Adiakdiak in Zogam bangpen zawn ngauna tawh kidim in mualtung kenkawm khawngah hamsa takin ki nungta a,  cidamna kem zo lo, sangkah zolo in nekding neilo kitam mahmah hi. Tua ahihmanin ih makai te-in a kiallap thei ding hamphat na hong zon ding uh kisam mahmah hi. Ih kisap tampi pen constitution kipuah nailoh hangzong a kingah theilua tampi mah na om-a, minam dang tampi te in zong tua hamphat nate a luahluah laitak uh na hi veve hi.

Constitution kipuah ma bangin ngah kholle hangzong a hoihzaw tham vive ahihi. Banghang hiam cihleh tu pekin ih gam-ah ki-ukna lam panmun sang, zum thupi te tampi nei kholkhin lehang ei thutawh ki-uk tawmna (self-determination) ngah in federal constitution hoih a ki neihzawh teh ih neihsa zum te thuneihna hong khang semsem ding hizaw laihi. Thuneihna hawmkhopna (power sharing) khauhpai zaw semsem ding ahih manin a omsa zumte thu neihna(power) le hamphatna (opportunity) kah semsem ding cihna ahihi. Tua ahih manin 2008 constitution laitak in ngahzawh nading hanciam huai zaw kasa hi. Tuate in ih masuan federal gam tun ma kiallap nek ding sunsiah limci te vive hi-a hong thakhauh sak, lawpsak sak, hong ki thutuak sak zaw semsem ding thute hi-in makai te-in tangpi ading hih hamphatnate ngah zahzah hong kalh khiat dinguh kisam hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Singkung, Sunmang le Sunsiah. Agelh ~ Pau Sian Lian Description: Rating: 5 Reviewed By: Cinpu Zomi
Scroll to Top