728x90 AdSpace

Hot
Menu
Zon-ol na Donate

Latest News

Zang thum a Kiheek Khauhual. Agelh ~ Pau Sian Lian

Zang thum a Kiheek Khauhual.
Agelh ~ Pau Sian Lian


Zomi te-in leitung nuntakna kikhelna tuihual pi thum (waves of social change) ih nawk laitak ahi hi. Hual masa in gamdang pemna (wave of immigration) hi-in 2005 khit lam a kipan mipi tul tampi Malaysia, India le Thai gamte tawnin leitung bup gam tampi ah ih kithehthang ngeingai hi. Ngimna gam tungkhin le lamkal ah tam lai honpikhat ki-omhi. Hualpi nihna in gamvai kikhelna hual (wave of political change) hi-in 2010 khit a kipan Myanmar gam ah democracy ngeina tawh kiteelna kinei-in gam ki-ukna ngeinate thakhat in kikhel gawphi. Myanmar gampua lam tung khin Zomite zong democracy ki-ukna zang gamte vive kitung ahih manin a kibat sitset loh hang minam bup ihtuah khak gam ki-ukna kibang pian veve sam hi.

Hualpi thumna inthu kizakna hualpi (wave of communication) hi-in 2010 madeuh a kipan leitung bupah social network a khuahpai mahmah san laitak leh Myanmar gamah private company te telecommunication lamah septheihna phalna a ngah uh kituak lian ahih man in media lam hong khauhpai semsem pahhi. Zogam khuatawng pen ah om tale hang India/Myanmar phone tawh leitung bup nuamtakin kizom thei, leitung bup mun khempeuh ah thupiang bangbang lupna tungpan sim hithiat theihhun hong suakhi. Zomi te leitung mun kiu tuamtuam ah ih ki thehthang zongin olno takin online pan minam bup-in thu kizasak, kikum, ih kinial ngeingai theita hi. 

Zomite in hih nunzia nawhsa takin hong khel hualpi-te ih tuahkhak laitak ahihi. 2016 kum beikuan in USA ah conference kah kawmin Malaysia le US khua tuamtuam a om Zomi kipawlna le mimal pawlkhat tawh tawh ki mukhawm khathei hi. Minam sung hong khel hualpi thumteng nawk khatin nawk kha Zomi khangthak te kihi ahih manin, minam vai, gam vai te ah vei le lawp mahmah na khat kinei-a minam vai mailam kalsuan zia ding lungmang simsim zong tam kasa hi. Ki muhkhopnate pan ka sinkhak thute panin minam bup mailam kalsuan khopna-ah lampi man tawnin picin semsem theih nading le thakhauh semsem theih nading in  Laisiang tho sung-a kigelh zangthum a kiheek khauhual thu ka phawkkha hi. Zomi te ading tua zangthum kiheek khauhual in bangteng hiam cihleh makaite (leaders), mipi(people)te le mipil(intellectuals)te hingelngel dinghi ci-in ka mukhia hi.

Hih zang thum kiheek khau hual te lakpan mipi te dinmun genkhin ih hih manin mipi te dinmun tawh kituak in makaite le mipilte kigin dan ding ka muhna kong kumnuam hi. Tu khang-a Zomi te in mailam minam vai sepna-ah a muan, zahtak ngiat dinguh le mailam ah tuahkhak ding kikhelnate a na mukhol thei,  tuate ading kician tak-a geelna a neikhol makai hoih ki lunggulh mahmah hi. Zomi te ki makaihna-ah tangtawng thului teng sut thapaih tawh lem nawn hetlo ding a hih lam kician mahmah hi. Mipite mailam ading geelkholhna, muhkhopna nei vision driven leader, ngimna te tangtun theihnading kalsuanzia geelna (strategy) hoih tuamtuam a nei Makai kilunggulh mahmah hi. Mailam adding geelkholh luatna omlo bing phut miaimuai ding pen mipi te ki patau mahmah hi. Mipi te mit hong kihong sak (convince) le lungsim hong lawpsak zo (inspire) le a pilvang (smart) makai tampi ih kisam hi.

Tua kawmkal mahah makai te lampan in mipi tetawh kizopna-ah kidop huai honkhat hong omhi. Democracy ngeina-ah ulian makai cih pen mipite sungpan mipite ading mipite teel te hi-in mipi te pen sawltak, sila, nungzui cihbang hi masa hetlo hi. Amau pen to (boss) hizaw tahi. Tua ahih manin hih hun-ah makai a kici peuhmah le mipil te-in mipite haibawl, neu-et hetloh in amau aw, thumna, lungkhamnate va ngai-in tutpih, kuppih hun hizaw tahi. Zomi sungah MP semngei khattawh a mimal in ka kiho kha-a minam vai kal suanzia ka dotleh, eimi tebel online peuhah awngawng pong, lampi man tawnlo hi, hong cingei hi. Ka lungsim sungah, a dan thei taktak hile cin mipite lungsim pholakna online hi-in line ta keileh va kanin a mau deihna te va ngaihsak, mipi te telkhialhluatna a omleh zong va gencian ding hizaw ve cin, ka ci khinkhian hi. Mipi te in amau a delhdelh ding a salai na himawk hi. Makaite pahtawi siamin panpih ding ahih samhang mipi te in makai te delhdelh, mai-et hun hinawn lohi. Sumbawlna ah customer is always right cihmah bangin democracy hun ah people's voice hun taktak hizaw hi. Tu laitak MP a sem pawlkhat bangin mipi-te hawmthawh nuam-in bangmah thu nongkoh loh uh cithei hi. Democracy ngeina ah makai tein nunniam pente(grassroots level) dong va banin thu-le-la va kan, vai kaikhawm tawmin thunei te kiang gensak, kohsak, vaihawm saktawm ding hun hizaw tahi.  

Minam kalsuanna-ah mipilte panmun dingzong etphat huaihi. Tu laitak-a ih hamsat na, Zogam le Myanmar gam zawn ngauna, gentheih haksatna hangte encian lehang galkap kumpi ukkhialhna hang vive hong hi masa-a galkap te-in a mau kivakna (professional) hihiau lo gam makaihna lamah hong ki tulmawh takuh teh gambup a ki kiam dikdek ahihi. Gam makaih na-ah mipil te kinawlkhin khak na gu a kithuak na hi gige hi. Mipil te cihpen leitung bup thu khempeuh 100% theikhin, Pasian zah a muanding ahih samloh hang amau kandiak (specialise) thu-te ahih leh a sinlo tesang thei zaw mahmah veve uhhi. Ukna (hobby), lunglutna (interest) cihte le siamna (specialization) kibang lohi. A uk khat in ama kanzawh ciang tawh theihna ahiciang khat nei-a ahi zongin a sin ngiatngiat temah in telcian zawsam hi. Myanmar gambup ah gam kimakaihna a uk tam mahmah-a tel le a siam taktak kitawm mahmah laihi.

China gampen democracy ngeinna zanglo-in Communist party khatbek uhna nuai-ah a om zenzen uhhang khangto mahmah in leitung bupah a haupen ding gam hong suakta hi. Communist kumpi-in khangno a pil, kiva, pilsinna sang neite zol bawlin tuate kivak na bangbang uhtawh kituak in panmun pia in na semkhawm ahih manun gam bupin hamphat lawh pahuh hi, cih mipil te in mukhia uhhi. Ki-ukna kihelna (political change) cihpen a mi kikhel, makai kikhelna ciangtawh lungkim ding hilo in a pilzaw, siamzaw, kiva zaw makai thakte tawh kilaihna ahih ding thupi a mipil makai ahih keh mipil tetawh kithuah makai kisam mahmah hi. Zogam pen zawng in keu mahmah a, pil sinna te niam kawmkal mahah federal deih mahmah ih hih manin sumbawlna (business), kimlepam kepsiamna (environment), mipi khantohna (social development), ki-ukna lam siamna (political science), thukhun lam pilna (law), thugeel thuvan siamna (management), khuapi khantohsakna (urban development), mihing thuneihna lampilna (human rights), sang pilna (education), lokhawhna (agriculture), kenkawm suangkawm a om ih inn te le lampi te hoih theih nadingin engineer pilna cih pilna-te Zogam Zomi-in ih kisap loh pilna khatzong om hetlo hi.


Mailam kalsuan na-ah hih mipilte aw, ngaihsutna, geelna te ih kisam pha mahmah hi. Thu kikupna te ah ei theih, ei vei le zaknop tengbek tawh hun bei sak thapai lo-in thu kancian mipil zawdeuh te zong zahtak bawlin thu sungsak, amau ngaihsutnate dot bawlin kuppih in mau thu zong mang hun tahi. Zomi te pen Pasian khitteh pilna a thupi masa sak minam hihding hanciam hun mahmah tahi. Mipil zaw deuhte zong mipi te tawh tonkhop theihkei leh ih pilna-te man nei takin kizang theilo ahih lam phawk huaihi. Tua ahih manin movement ih ci-a bangmin ih phuahzongin mailam minam kalsuankhopna-ah picin semsem nading le mavan semsem nading in hih zangthum kiheek khauhual (mipi, mipil le makaite) hual khatin tonkhawm sak hamtang tani.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zang thum a Kiheek Khauhual. Agelh ~ Pau Sian Lian Description: Rating: 5 Reviewed By: Cinpu Zomi
Scroll to Top