728x90 AdSpace

Hot
Menu
Zon-ol na Donate

Latest News

ZOMITE' MABAN. Agelh ~ GSPau

ZOMITE' MABAN.
Agelh ~ GSPau
Photo : Cope Topa

Khatvei khalam ah a lawp mahmah Zomi Khristian khat in mangmu a, vantung mi in vantung gamah tawmvei sung va paipih hi. Vantung gam a lut phetin sangmangpa J.H.Cope mah zon' masak penin a neih leh hong kimu takpi uh hi.

Zomipa: Hei! Hei! Hei! Ka pa uh Cope topa hilo na maw?

J.H.Cope: Hi mah veeng ee. Nang lah na Tedim pau setset a, nang koi pan hong pai hi a, bang hangin pa hong ci laizang na hia?
           
Zomipa: Kei pen Tedim pan hong pai Zomi khat hi ing. Khalam leh pilna lamah kote hong pantah ka pa taktak uh na hih manin pa hong ci hi veng ee.

J.H.Cope: Oh! lungdam ei. Tu'n ee leh Zogam ah Khristian a tam ta hia?

Zomipa: Nangma' tuh khaicite dam damin hong popo ta a, tu-in Zogam ah Khristian 90% bang pha ta ung. Lawki cih taktak ki-om nawn lua kei. Zogam pen Khristian gam (Christian Land) kici thei phial ta hi. 1999 kumin Hakha khuapi ah Zogam ah Pasian'  khuavak hong tun' kum 100 cin' pawipi, 2004 kum in Hakha khuapi mahah Zomite Khristian suah zawh kum 100 cin'na pawipi, Kum 2010 kumin Tedim khuapi ah nangma' nong puak Khristian hong tun' kum 100 cin'na pawipi zong thupi takin na bawl hi ung.


J.H.Cope: Hih thu ka zak theih lungdam mahmah ing. Zomi Khristiante' omzia tawm nong gen thei dia? Za nuam keei veng ee.

Zomipa: Ko Zomite in nangma' tungtawnin a nungta Pasian ka muh uh ciangin kha thupha leh leitung thupha ka sang khawm uh hi. Pilna lam, cidamna lam, hauhna lam, leh liatna lamah ka khangto uh hi. Ka leitung nuntakzia (Living standard) mahmah uh zong hong kilaamto hi. Kawlgam sung-a Pasian' mizat a tamzaw pen Zomite vive ka hi ta uh hi.

Kawlgam sunga pawlpi  leh Lai Siangtho sang a tamzaw zong Zomite' makaih vive mah hi. Leitung lam pilna leh biaknalam pilna ah Doctrage degree ngah tampi mah ka om ta uh hi. Kawlgam sung tengah Zomite ka kizeel  khin ta  uh a, Yangon khuapi sung bekbekah zong Zomi innkuan (1000) bang ka om ta uh hi. Kawlgam sung ciang bekah hi nawn lo-in leitung gam tuamtuam ah zong ka kizeel uh a, Pasian' naseem tampi ka om ta uh hi.                                   

Nangma' pian'na US gam ah zong tampi mah ka tungta uh a, Pasian' naseem tampi mah ka om ta uh hi. Hih teng pen nangma' khaici vive mah hi.

J.H.Cope: Hih teng ka zak theih lungdam ing. Zogam ah kum 30 sungvilvel ka gim ka tawlna teng  mawkna hetlo cih ka zak manin ka tawl bang dam tuam pah lian hi.

Tua ahih leh kei' kong bawlsak Zolai ee leh na zangzang mah uh hia?

Zomipa: Ko Zomite in tawlkhat sung Zolai thupi sa zo taktak lo hi ung. Khangthakte bang in neumuh kha-in zanglo hi ung. Ahi zongin tu nai ciangin Zolai a manphat lam leh a a it huaizia kitelthak a, kisin ta hi.

J.H.Cope: Koici danin maw?

Zomipa: Zolai pen Roman Alphabet A,B,C pan nong bawlsak ahih manin siktawlai, Press leh computer cihte tawh Zolai deih bangin ka khen thei uh hi. Zolai zangin email tawh leimong khat pan mong khatah hun tomno sungin ka kithuza thei uh a, a aw bek kiza lo-in meel mahmah kimu ngiatin ka kiho theita uh hi. Zonet panin a kitawng bang ka om keei ta uh hi. Hih pen nangma' tungtawn-a ka ngah uh thupha hi.

Zomi sungah laisiam tampi mah ki-om ta a, amaute in leitung bup-a laibuhoih minthang tampite Zolai-in hong letkhia uh ahih manin Mikaang lai leh Kawllai a siamlo, Zolai bek a thei tampite in ka na phattuampih mahmah uh hi. Tua tham lo-in Zolai tawh a kisin Lai Siangtho sang khawng zong hong om ta hi.  Hih zong nangma' tungtawn-a ka ngah uh thupha mah hi ei. Kumpi sangte ah Zolai hong kisin sak nawnlo ahih manin biakna lam pan vaihawmin ka sinsak uh hi.

No Zomite pen Pasian' teeltuam thupha ngah minam na hi gige uh hi. Ni dangin dawi na biak man bek uh hi a, na pian'pih lungsim ngiat uh hoih hi. Na thuman teltalzia uh, na cihtakzia uh leh na thukhualzia te uh pen Pasian' deihzia tawh kituak pha mahmah hi.                         

A thupi ah Topa' ading na kipiak ngam nak uh leh Topa in Kawlgam sung ciang bek hi lo-in, leitung bup dongah hong zang lua ding cih pen sawtpi lai pek-a ka muhkholhsa mah hi.

J.H.Cope: Hih teng ka zak khak lungdam mahmah ing. Minam khat a kip theihna pen lai, pau, leh ngeina cihte hang hi. Leitung ah minam mangthang pawlkhat om a, tuate in Lai kician a neihloh man uh hi pen hi. Tua ahih manin na Zolai uh a manthan' loh nadingin na kepsiam mahmah un.

Zomipa: Ko Zomite in tawlkhat sung Zolai thupi sa zo taktak lo hi ung. Khangthakte bang in neumuh kha-in zanglo hi ung. Ahi zongin tu nai ciangin Zolai a manphat lam leh a a it huaizia kitelthak a, kisin ta hi.: Hong phatphat pong ke'n la, nangma' muhna ah ko Zomi Khristian te bang kisam pen hong sa na hiam, cih hong gen dih ve.

J.H.Cope: Thudang tampi gen luat ding thei tuan ke'ng. Kei' kong muhna ah no Zomite in zawn' puazo napi uh cin, hauh pualah uh teh. Gentheih thuaksiam napi uh cin, thupha puaksiam kei uh teh. Hih in na thupha ngah ding uh tampi hong dal gige sa ing.

Zomipa: Ko Zomite in tawlkhat sung Zolai thupi sa zo taktak lo hi ung. Khangthakte bang in neumuh kha-in zanglo hi ung. Ahi zongin tu nai ciangin Zolai a manphat lam leh a a it huaizia kitelthak a, kisin ta hi.: Lungdam ei. A nunung penah Zomite' maban ding nong deihsak a om leh hong gen ve.

J.H.Cope: Khatna ah no Zomite pen lungdamna thu in hong laptoh minam na hih manun lungdamna thu mah gengen un.

Nihna ah na minam uh a man'than' loh nadingin Zolai kepsiam un.

Thumna ah kiim leh pam kizosak kei un la, na pianken' uh thumaanna lenkip un. Tua hi peuh Pasian in khang tampi sung  hong zang ding hi.

Hih teng khit ciangin a mangmuhna pan hong khan'lawh kik leh  a omna mun pen vantung gam na hi nawn lo-in Tedim na hi a, a gei-a tute zong Cope topa na hi lo-in a innkuanpihte na hi ta hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE' MABAN. Agelh ~ GSPau Description: Rating: 5 Reviewed By: Cinpu Zomi
Scroll to Top