728x90 AdSpace

Hot
Menu
Zon-ol na Donate

Latest News

A THEIHHUAI THUCIIN 300. A kaikhawm leh a gelh ~ Pu Pau Za Mung

A THEIHHUAI  THUCIIN 300.
A kaikhawm leh a gelh ~  Pu Pau Za Mung


Thupatna.
Hih Thuciin in, taanglai in a ki um mahmah hi. A ki up zahkhat in zong amaan, a tung takpi hi. Pu Ngul Khua Lian in, “Pupa gualgen,hemlam sinthu  tuuktaang   bang tunglua  sang,”  Khial hi,  cihna ding peuhmah a omkei hi. Ahi zongin, tulai khang, tulai pilnate in a  umkei aa, zong asaang zokei hi. Adiak   diakin, Pasian um a kici te abngin, a um nuam ahih leh, a langpan anial zaw hi. Na pen, upna tawh a ki sai mahmah hi.  Ih up leh hi takpi aa, ih up kei leh a hi kei hi. Gtn:- Sikha a umte in, zong muthei takpi liang in a om hangin, a um hetlo te in,    a zonzon, a tawnghtawngh hangin a muthei kei uh hi.

1. A guta te tawh ki khawl kei in. ( Guuktat na in hong lawh ding hi. )
2. A kamsiam khempeuh um kei in.(Siatna ding kamsiam zong hi thei hi)
3. A mel hoih bekin teel kei in.( A taktak na hoihlo thei cihna hi.)
4. A pianpih mittaw kheelbai te ko lo ding ( Ei  tung hong tuthei cihna hi.)
5. A uisan te tawh ki thawl kei in.( A uisan un hong lawhkha ding hi.)
6. A zuauthei te tawh ki khawl kei in.( Zuau theih in hong lawh ding h.)
7. Aak khadawn ne kei in.( Khuadam ki thuak lah thei cihna hi.)
8. Aak khebom ne kei in.( Lokhawh haat ding. Khualak vak hat ding cihna hi.)
9. Aak lungtang ne in.( Zingsang in lol aa, nasep khempeuh zo thei hi.)
10. Aak tawphun ne kei in.( Phun hat thei cihna hi.)
11. Aakgil, buuk, bu na bawl teh, veih sang  lo ding.( Aakte giat nuamlo hi.)
12. Aakgil, buuk, buu na bawl teh, veihnamkhau zang lo ding.( Aak giat nuamlo hi.)
13. Aak gilzial ne kei in.( Aak gilzial nete tuantual cihna hi.)
14. Aaklui suang ne kei in.( Mimai ah  maipha ngahlo in, ki maimawl thei hi.)
15. Aakno tuitaa a site sa ne kei in.( Khuadam ki thuak lah thei hi.)
16. Aak oplai tuii lawn saklo ding.( Aaktuii te dah thei cihna hi.)
17. Aaksin ne kei in.( Aaksin nete meidawi uh cihna hi.)
18. Aaktui a pumin ne kei in.( Na lung mawk ding cihna hi.)
19. Aaktui adahte neekloh  hoih hi. .(A nete  thadah thei uh cihna hi.)
20. An neek laitak ankeu kiatsuah lo ding.(Ki vaak zo lo thei cihna hi.) 2
1. Anneek laitak ki tawng theilo ding.( Ki itna omlo, Pasian in deihlo hi.)
22. Anneek laitak zawhngeu lawng ke’n.( A mul leh an ne khawm le cin, haihuut ki veithei.)
23. An neek laitak ankuang uum mi sim theilo ding.( An liau in ki khamlo thei )
24. An huana thukkhuuk toktok lo ding.( Gil na thei cihna hi.)
25. Ankhing peuhpeuh bua mawkmawk lo ding.( Kial tung thei.)
26. Ankuang ah ki tailo ding.( Kaamsiat na leh cidam lohna ki om thei hi.)
27. Ankuang kantan thei lo ding.( An hauhna in hong ma thei cihna hi.) 28. Ankuang nuak theilo ding.( Khantawn in ki cimawh thei cihna hi. )
29. An laaklaitak hau nung ci theilo ding.(An apha ding zah phalo in kizawng thei cihna hi.)
30. An neekna kuang khe tawh sui theilo ding.(Ankuang in nuntakna hiaa, zahtak ding).

31. An sukna sumhtung ah tu lo ding.( Tawbo ah meima om thei cihna hi.)
32. Antang ki mawlna aa zang lo ding.( An hauhna in hong ma thei cihna hi.)
33. Baalke sau ne in. ( Na sam hoih aa sau ding.)
34. Beelmang kang ko kei in. ( Na ciphual in thak ding hi. )
35. Buhkhit na tui dawn den in. ( na cidam ding  hi. )
36. Buhtei in an ciam kei in. ( Gul ki tuak thei cihna hi. )
37. Buhtei in mi saat kei in. ( Vakhu suak thei vihna hi. )
38. Buipi sa ne kei in. ( na khangual pha zo  lo ding hi teh. )
39. Buipi vaak na tuah leh pelin.( Ki kamsia thei cihna hi. )
40. Bumleh ki thawih na ah pai kei in.( Ei tung hong tu thei cihna hi.)
41. Ciampeek in kuamah saat kei in.( Nupi-dawi ki vei thei cihna hi.)
42. Ciiltat luat ding ngaihsun dah in. ( Mi tawh hong ki khen sak thei.)
43. Ciil baan siat mawkmawk kei in. ( Mi ginalo lim lahna hi.)
44. Cina na vehteh, sini teh ci kei in.( Cina lungneu in si takpi thei hi.)
45. Cingh in mi huhin.( Nang zong hong ki tuacih ding hi. ) 
46. Gamlak ah nitum kuanin nahteh muut(tum) lo ding.( Dawi in hong zui thei.)
47. Gampi dawi thawihna ah, tuanvai te khat peuhpeuh in zukham theilo ding. ( (Cina dam zolo thei)
48. Gamsa innsa mittang ne kei in.( Mit tho vaiin bawk nuam deuh cihna hi.)
49. Gamsung giahna ah khe pheek lo ding.( Dawi in khiim thei cihna hi.)
50. Gamsung giahna ah khuuk  tung lo ding.(Ngalkhawhang vasa-in tu thei cihna hi.)
51. Gamsung leh lote ah ihmu mawkmawk lo ding.( Dawi in man thei cihna hi.)
52. Gamsungah gulphiit tum thei lo ding.( Gulpi, Ngalkhawhang ten delh thei.)
53. Gan khaukhih laitak paupha lo ding.( Gan ki khaksuah thei,  ki man zolo.)
54. Gan suak zolo aa si te sa numei no te’n ne lo ding.( Nau suak zolo thei.)
55. Ganhing peuhpeuh khel bawl kei in.( Sihsia aa ki si thei hi.)
56. Gaamtaam tang ne in.( Na ha to in ngoo ding hi.)
57. Gaataam tui sial dawn kei in.( Phukhong ki vei thei cihna hi .) 
58. Gawphel( Saili) khe tawh kantanh theilo ding.( Vasa ki man theilo cihna hi.)
59. Gulpi na thah leh genlo ding.( Gulpi in phu la thei cihna hi.)
60. Gulpi samnei, gul meitawng, tang  luka leh mihing kilu na tuah leh, daaitak in pel zaw in. ( Kamsiatna lian teng ki gawmna ci hi.)
61. Guta thei te tawh ki thuah kei in.( Guuktak in hong lawh thei cihna hi.)
62. Ha na bawh teh, Thankiik aw, nang hahoih leh kei hasia kikheek ni ci in inntung lamah lawnto ding. ( na hahoih pokik ding cihna hi.
63. Hong ki pia khempeuh ne pahpah lo ding.( Cihtakna lim lahna hi.)
64. Hong mudahte na thukkik kei in. ( Pasain in thupha hong pia ding hi.)
65. Hualsing awnsan aa lupna bawl theilo ding.( Nupa ki khen thei.)
66. Huansung dawithawih na sa innah ciah pih lo ding.( Cina damlo ding hi.)
67. Ih lawihsa inn, kumkhat sungin ki luutkik theilo. ( Luutkik leng, ih luangin sawng thei)
68. Inn a kisuan leh innkhang lam suanlo ding.(Khantoh na khak thei.-Luangin sawng thei.)
69. Inn katna aa ganhing kanglum te sa khangno te in ne lo ding.( Ki kamsia thei.)
70. Inn lam na dingin, mupi buutna sing lalo ding.( Ki kamsia thei cihna hi.)
71. Inn nuaiah mei-eek, meikuang khia lo ding.( Sikha in hong khem thei hi.)
72. Inn nunglam(Phaitamlam) tawtawn lo ding.( Mittaw limbang cihna hi.)
73. Innsak innkhang huang umna keek theilo ding.( Huaiham na hi.)
74. Inn tenna sa inn mailam bek khan thei ding.( Mihing nuntak na lim hi.)
75. Inntuan sate innpi ah lutkik nawnlo ding.( Inntal sii kici in, kamsiatna hi. Ki cidamlo.)
76. Innveeng te huan daai keek saklo ding.( Pasian in awilo hi.)
77. Innka aa ki pho thau kantan theilo ding.( Thau muilim na bei thei hi.)
78. Inn leh mi kaang, lo hal  te a zingciang kaangtang ding.( Kampha ding.)
79. Innnuai ahi zong lupna tung pan ahi zong ui khia lo ding.( A khiate mah ki khiakik thei)                80. Innpi singkhuam dingin singkaa khempeuh zanglo ding.( Tolo ding hi.)
81. Innsung munphiat teh, vante suilo ding.( Eimah ki-upat na hi.)
82. Innsung vakna( panmun) nei te khawlsak lo ding.( Kamsiatna hi.)
83. Inntual phungmai kho siangtho sak ding.( Ta na neihteh amel hoih ding.)
84. Inntuan sa te innpi te tawh,  lo ki taanglo ding.( An zawng thei hi.)
85. Kahneh keiin.( kahneh te sikha in man thei.)
86. Kamsia na pau leh( Sial na liau ding hi.)
87. Kamsiam lecin na daupai ding( Sial lei ngah ding.)
88. Keenah suang mawk khuuklo ding.( Beengngong thei cihna hi.)
89. Keubawm khe aa sui theilo ding.( Nausuah haksa thei cihna hi.)
90. Khangno te’n zu leeplo ding.( Khanghaam nu leh pa te nungta lai hi.)
91. Khinkiing kaang kawkaa kolo ding.( Ciiphual in meigau ki vei thei.)
92. Khuasiat teh, daaideek omna singphung beello ding.( Keek in deeng thei.)
93. Khuadaak sa in lam pai kei in.( Na ki suikha ding.)
94. Khuado kheekleh ni aa mopii lo ding.( Nupa ki tullo thei cihna hi.)
95. Khuai na muh leh genlo ding.( Khuai na lal thei hi.)
96. Khuaidawk na laak leh, na suan teh a ngat nalam ki bangsak in.(Lalkha thei hi.)
97. Khuakhal lai khualna zin aa gam naphak leh tuithawl pua in.(Mipil limlahna hi)
98. Khuakhal ni satlai lui dungzui leh ciklak ah pailo ding.( Gul om thei.)
99. Khual na zin teh zehphi kei in.( Min hong gaam ding hi.) 1
00. Khualzin ding teh ki tawngsa aa vai dinglo ding.( Tuahsia thei cihna hi.)
101. Khualzin leh gamvaak khawm lawmta ki nusia lo ding. ( Thumaan lahna hi.)
102. Khuam peuhpeuh a bullam pan bek aa phut ding.( Sing dawn polo cihna hi.)
103. Khuamual ah ki ciang suang phahte susia keiin. ( Na tuahsia ding hi.)
104. Khuang a ki betna lamah tulo ding.( Khuang tumpan hong bengkha ding hi.)
105. Khuasaat gui hi ngei lopi aa khuasaat lo ding.( Pilna ki patna hi zaw hi.)
106. Kuul tawh laitakin uut bang aa ciamnui lo ding.( Mikha dah ding hi.)
107. Lamgei aa puak dinga a kikoih mi sing puaksak in la, khuamual ah koihsak in. (Pusa in siam hi.)
108. Lamkaa bomah zun leh eek tha kei in.( nattom in kisi thei cihna hi.)
109. Lam lianpi laizang ah lum theilo ding.( Mihing misi kha in man thei.)
110. Lampi( taang lampi)  nin sak kei in.( Mi phisam na tawh na ki pelh ding hi.)
111. Lampi gei(kil) ah eek tha thei lo ding.( Natsia in kisi thei cihna hi.)
112. Lampi khawlmu aa sawl kiphah te tungah tu kei in.(Zawl-ai leh bumh om thei cihna hi.)
113. Lampi laizangah zun leh eek tha kei in.( Meima gilo ki veithei cihna hi.)
114. Lawm-anneekna ah zampi nakpi in tumh kei in.( Huihpi nungin khuasia thei cihna hi.)
115. Leitawi hong ngwente pia in.( Nang zong hong ki pia ding hi.)
116. Lo tawtuan(keek)lo ding.( Ki kamsia hamtang.)
117. Lo na khawh ciangin, na maa khel kei in.( Kawng na thei cihna hi.)
118. Lo khawh ciangin a khung lampan panlo ding.( Lo ki lel thei cihna hi.)
119. Lolai tangnuai kho siangin.( na tate a mel hoih ding hi.)
120. Lopawi  laitak khaici lonawl ah paipih lo ding.( Khaicii te sia thei.)
121. Lopawi laitak zusa vasa thu gen lo ding.( Khaicii te nemang thei.)
122. Lopawi khit ciangin suangpum kap kei in. (An potuung te ki sia thei.)
123. Lotawm lam pan ki panin lokhung lam ah hial in.( Ante hoih in ki hau hi.)
124. Lui aa ki dawh lei singte ansing dingin tomlo ding.( Kamsiat na hi.)
125. Lukhung lam panin lupna zuanlo ding.( ki mang sia thei.)
126. Lupna tungah nupa ki tawnglo ding.( mangsia hi aa, nupa ki khen thei.)
127. Lupna tungpan leh  inn nuaiah  uino khia theilo ding.( A khiate ki khiakik thei cihna hi.)
128. Lupsa in an nelo ding.( Thadah na lim hi.)
129. Manta pum neek kei in.( na ki mangngilh  baih  thei cihna hi.)
130. Meiphuakl zun peeklo ding.( Zuntei ki vei thei.)
131. Mi anneek laitak va pai kei in.( Mi in uisan hong ci ding hi.)
132. Mi gensia peuhmah kei in. (Nang zong hong ki gensia ding hi.) 
133. Mi ginalo te kosia peuh mah lo ding.( Eitung hong tu thei.)
134. Mi huan sungaa anteh theipuam ahong piakloh pi in lawhsak kei in.( Guta na suak taktak ding hi.)
135. Mi inn hita leh lo hi ta leh halsak kei in.( Ki inn mang thei hi.)
136. Mi inn-aa na hawh teh, innteek pa tutna ah tu kei in.( Pil hong sa lo ding hi.)
137. Mi inn  na hawhteh, kongkiu/heemnawl/ kihiil masa in.( Phalna ngetna leh om omlo theihna hi.)
138. Mi kau nei in ko theilo ding. ( Mi tawh thu neihna suak thei hi.)
139. Mi khuai muhsa laaksak kei in.( Mi tawhy thu ki neihna hi. )
140. Mi maiah cil mawksiat lo ding.( Mi gina, mi ki cian lim lahna hi.)
141. Mi mai ah naap niit nuainuai lo ding.( Mi thupi, mi dan nei cihna hi.)
142. Mi  maingat kawmin kam humlo pi’n khuhkei in. TB leh  buukkhuh natna ki lawhthei).
143. Mi maiah veih sang theilo ding.( Mi ginalo te dan hi.)
144. Mi melsia te ko theilo ding.( Ih ko te tenpih thei or ei tung hong tu thei.)
145. Mi nakhat peuhpeuh guksak lo ding.( Gamtat hoihloh na hi aa zong liau ki tuakthei lai)
146. Mi na kholhsa an nekik kei in.( Aakpi’n na tawh hong tu ding hi. )
147. Mi na khutmekawwk  in kawk kei in. (  Nang na khutme lii in hong kawk ding hi.)
148. Mi ngawi dawhna aa a kia ngasate matsak kei in. ( Guta te pianzia hi. )
149. Mi nih kiho laitak tuhkhia kei in. ( Mihai hon ci ding hi.)
150. Mi singhaamj(singhalh) guuk saklo ding.( Haansingin ki mang thei.)
151. Mi tawh lo ki galsai in lokho kei in. Hauhna, kaam lal thei)
152. Mi tawh na kiho leh a kam en gige in,( Miciimte pian daan hi).
153. Mi tawh na lo kigii uh keeek kei in.( Zawn leh cihmawh ki patna hi.)
154. Mi thangsiah na aa a awkte suut sak kei in.( Guuktaak ki patna hi.)
155. Mi van na kawm leh hong kan main piakik pah in.(Hong kawm nuam den ding hi.)
156. Mi’n anne ding aa a hong sawl leh mangpah lo ding.( Uisan hong ci ding hi.)
157. Mi’n zu hong hawh aa na teepsak leh, leihkik sak teekteek in.(Ki husam thei hi.)
158. Mi’n zukhaihsa ahong piak leh,  a tungtham bua masa inla, tuateh dawn pan in.         ( Zawl-ai/ bumhna te atung ahih kei leh anuai a om ahih manin, a laaizang bek kidawn leh ki suakta thei  cihna hi.)
159. Miphaak site kuasah sa khangno te in ne lo ding.( natna in lawh thei).
160. Mi poite ko in simmawh lo ding.(Pasian in hong awiilo ding).
161. Misi galna aa a ki ngaite ki teenglo ding.(Nupa kitullo ding cihna hi).
162. Mite na kawm ding phallo kei in.( Ki khansih thei hi).
163. Mite vaang el theilo ding.(Ei tawh ki el lhawm thei cihna hi).
164. Mo laak na aa zu, khangno sabeng njuam ten nelo ding(Muiliim lo, sa manthei lo cihna)
165. Mothak in ama kenh sa nelo ding(Ki niamkhiat, maizum lim lahna hi).

166. Mothak in zasan  tam meh theilo ding.( Migi ding lim lahna hi).
167. Muh peuhpeuh ne pahpah lo ding( Guihtheih khamtheih guu om thei).
168. Mual na suahteh hemnawl masa in( Dawite na taai ding cihna hi).
169. Munphiat aa ki saat theilo ding( Ki kaamsia thei).
170. Na ankuang nuak theilo ding( Na  kaamsia in na zawng ding hi).
171. Na ci baan siat kei in( Ki cinlohna nam khat hi).
172. Na kam leh na naak humlo pi in, mi maiah hehchiai kei in( Mi haite daan hi).
173. Na khuhteh mainul in na kam humin ( Mi thupi te pianzia lahna hi).
174. Na khutaa an na neek leh mi maiah na khut sing kei in.( Min hong kih ding hi).
175. Na lawmgual te mah lawm ci in( Mi lakah pilna lahna namkhat hi).
176. Na nau’ gual te nau mah ci in(Itna lahna hi aa, mipil daan hi).
177. Na nu’ gualte nu mah ci in(Mi’n mipil hong ci ding hi).
178. Na pa’ gualte u ci kei in(Mi’n tagah hilhloh bang hong ci ding hi).
179. Na pa’ lawmte pa mah ci in(Nu leh pa zahtak aa pahtawi na hi).

180. Na pa’n pa a cihte pa mah ci kei in.(Hai ki latna nam khat hi).
181. Na pa’n pa a cihte pu ci in.( Na pa tawh kiguallo hiteh).
182. Na pi’ gualte nu ci kei in(Mi’n mihai hong ci ding hi). 
183. Na pu’ gualte pa ci kei in( Na nu leh na pa selpho na hi).
184. Na sa-ik leh mi mai pan ki hem in(Mi’n muh thadah huai hong sa ding hi).
185. Na sawm-giahna ah zun teh theilo ding( Sawm zunteh ci in min sia ding).
186. Na tate hoih sicia, pil sicia ci in( Hoih in pil takpi ding hi).
187. Na tate mihai ci kei in( Hai takpi ding hi).
188. Na theihlohte mi dot ding zum laak kei in. Pilna a ki taw mah ahi hi).
189. Natu, na ding zongin ngaihsun in( Khial ngeilo ding cihna hi).
190. Na u  gualte lawm ci kei in( Nu leh pa hilhloh ki latna hi).
 191. Na zaak khempeuh gen pahpah kei in( Mi muanhuailo lim lahna hi).
192. Nahtang peeng nelo ding( Na tate peeng thei kici hi).
193. Nausuahna hang aa si numei kawsah sa numei te in nelo ding(Tuahsia thei)
194. Nauluai a hawmpi aa veilo ding( Naukha lau thei cihna hi).
195. Naupaai aa suakkuan numei khual zinlo ding(A suahhun saupi kipelh ding)
196. Naupaai laai numei in manta meh nelo ding( Naungeek’ taw vom thei)
197. Naupaai laai numei in zawngsa nelo ding( Naungeek a mul tam thei)
198. Naupaai laai numei singkung kahlo ding( Nau meidawwi kha ding).
199. Naupaai numei in a lupna khello ding( A nausuah hun ki pelh thei)
200. Naupangin aak gilzial nekei in( Gam lakah khaugui palsat lahthei, tuantual lua ding).
201. Naupang in aaksin nelo ding( Ki meidawi thei)
202. Naupangin buisa nelo ding( A kahngual phazolo ding cihna hi).
203. Naupang leh zawng a omkhopteh,’Hong petin teh,’ cikei in.( Pet takpi ding hi).
204. Naupang lumlaai, khetawh kaantanh thei lo ding( Khan ding zahaa khang theilo ding).
205. Nga-guu deng aa na kuan ciangin, sunaan meh pua kei in( Nga tam kima thei zaw).
206. Niik leh  puan zusa peh / a kangbaang te nupa kop nungta laaiten zanglo ding( Nupa ki khenna leh tuahsiatna lian lim lahna hi).
207. Niiksia thaupuan aa zanglo ding( Thau muiliimlo in sa man thei lo)
208. Nu leh pa lungkim sak in( Leitungah mi nuamsa na hi ding hi).
209. Nu leh pa thu amngin( leitungah na khan sau ding hi).
210. Nuak ngei kei in.(( Na nuak leh na citungah siklik hong po ding hi)
211. Numei in salawl ne lo ding ( Siam agaat ciangin ccip theilo ding).
212. Numei nausuak thak te’n siam baangin gaan theilo ding( Naukha baan, gatnelh thei)
213. Numei ten tuga heiga tutphah aa neilo ding.( Nau suak lah thei).
214. Nungak lai ten taamnaai tumlo ding(A niin uh tam pailua kha ding)
215. Nungaakno laai te in sam tanh lo ding(Samtanh na in khuaval na limlah na hi).
216. Nungakte in tuuciilsa in anne ding( Agil uh neu in akawng uh geekding cihna)
217. Nungakte kaalkaa sa aa tulo ding( Kaalkawm ki dawk thei cihna hi).
218. Nupa kima theilo ding( Pasian’ deihloh na hi).
219. Pa tutna ah tate tulo ding( Pa zahtaak na leh pate nungta laai cihna hi).
220. Psal veilam ah azi lum ding( Numei pen, pasal veilam naakguh cihna hi).
221. Pasal puan baanna ah numei puan baanglo ding( Pianzia kitheihna hi).
222. Phalna ngahlo opi in mi lupna khanah luutlo ding( Mi ginalo te tatazia hi).
223. Pheituam, niik leh khedap te lukhung lamah koihlo ding( Ki kamsia thei).
224. Pute kongmai santakah tuute  teenglo ding( pu leh  phungkho ki neh zolo)
225. Sakhuak  ne kei in.( Na naap tolh den ding hi).
226. Sabeng  ding aa kuanten, pausia theilo ding. ( Sa ki man lo thei)
227. Sagil bawl thanuam in.( Sungte mai mu ding cihna hi).
228. Saguhngeek nelo ding( Ha zel thei)
229. Sailii aa mi kaaplo ding.( Vasa ki man theilo).
230. Sakal ne lo ding( Mi lampai ki phazo lo).
231. Sakhi, sazuk, sazaa lu kikheuh nailo maiah tulo ding( Cilbu mutpuak thei)
232. Samuuk nedah in.( Samuuk nete naptui kaai den thei).
233. Saseng leh(putu) aa ki ten hoihlo.( Ki cidamlo, ki kamsia)
234. Sasin neek ki dawmin.( Sasin nete teekbaih thei).
235. Sazaa leh lawikaangte lungtang ne kei in.( Ki lungtom thei cihna hi).
236. Sialkhum kua na tawh ciangin akhung lam ah omlo ding.( meihol suak thei).
237. Siamnuaiah lum kei in.( Na khang thei kei ding hi.
238. Sihna lo buangah lapi kisa lo ding.( Kisi takpi thei).
239. Singhang na vei leh, singkang lom  khai in.( Singa na vei dampah ding).
240. Singhang sing ansing  ding aa tomlo ding.( Singhang ki vei thei).
241. Singkhuah a bullam pan na cih leh( Ki lung ziingthei).
242. Singno na suan ciangin nitanna lamah omkei in.(I liim tawh ki suankhawm thei)
243. Sual duingzui in lum kei in.( Misite ki sial dan hi).
244. Suang tawh mi inn deng kei in.( Gitlo na hi aa, mi tawh thu neihna hi).
245. Suang tawh eek siak kei in.( Suangin hong aat thei).
246. Suangtaat  tungah  tu lo ding( taw ah meima gilo po thei).
247. Taaksing tangpo phuk kei in.( Ki inn mang thei cihna hi.).
248. Taangpi tot  lampi   khaaktanh saklo ding.( Nuntaak na hui ki tat thei).

249. Takuunsi( nausuak tuung site0 inn ah khangnote zanhaklo ding.( Aman lawhin sithei)
250. Tangmai um leh maino te kawklo ding.( Muak thei uh hi.)  
251. Thallam cil siat theilo ding.( nang tung mah ah hong tukik ding)   
252. Thang na vil teh leh villo ding.( Dawisia kausia tawh ki tuak thei).
253. Thau leh hiam khat peuhpeuh tawh ki ngimlo ding.( Ki khutkhial thei). 
254. Thauvui sukna ah, numei pasal  thu vai tawh, ciamnui theilo ding( Thauvui phalo thei, sa ki manlo thei, khut kikhial thei.).
255. Theinuun saattanh lo ding.( Ih nute nawi zu kangbaih thei).
256. Thusiam tawntung in( Mite nang tugnah hong thusiam ding uh hi).
257. Tual that kei in. ( Ki inn amng thei hi).
258. Tuga tawh mio saat theilo ding.( Dawi in ei honglehsaat thei hi).
259. Tuga, heiga leh ciangte lampi ah kaai lo ding.( Sikha in zui thei).
260. Tui laakna tuizawlkaa  ki  khaktanh saklo ding. ( KI kamsia thei hi).
261. Tui sungah cil sia theilo ding.( Mukah meima gilo om thei hi).
262. Tuikhuk tawhthak na ah, galthu, zawlthu, sathu sihna thute gen theilo ding. ( Tuikhuk tui sianglo ).
263. in cidam na pialo thei cihna hi).

264. Tuilii sungah zun leh eek tha theilo ding.( Kheltat na hi aa, ki si baih thei hi).
265. Tuinaak tuizawl leh luitui luangte muk tawh huuplo ding.( Muk meima thei, naak sungah liit zong hong tum thei). ).
266. Tuinaakah zun leh ek thathei lo ding.( Tui in mihing nutakna hi aa, siatna khempeuh in beel thei).
267. Tuul tuh kei in.( Ki khan sih thei hi).
268. Tutang suangtaat tungah taatlo ding.(Lo khawhteh a  kitaat kawm hipah hi).
269. Tuuklaai aa khualzin khualak vak ten, lukhu keng ding.( Guahzu thei hi cih theihna hi).
 270. Uiphuk mawk that kei in. ( Nute dammawh zawngkhal thei hi).
271. Uipi gaai a kawng saatsak lo ding.( A ta tawlh kha ding hi).
272. Uisan thei lo ding.( Min hong gimneih hi).
273. Uisante tawh ki khawl ken.( Hong lawh kha thei hi). 
274. Ulian tawh ankuang na uumkhop leh, sawk masa kei in.( Gamtat hoih lahna hi)
275. Um keu liang lampan an nelo ding.( Galte kha in khem thei hi).
276. Unau ki nuphal theilo ding.( Ki suun thei, ki mangmawh thei).
277. Upate zahtakna pia den ding.( Pasian thupha saan na hi).
278. Vaiciah nunung hong kisap leh dawng ke’n.( Ngalkhuahang khetbuk tawite hi thei)
279. Vaikuan ciangin, vainung kei in. ( Ciampal tuak thei.)
280. Vakhaat lua kei in.( Thadah na  zawntatna in hong  lawh thei).
281. Vakhu nupa bang vevua.( Nupa kiho thei, ki thutuak ding cihna).
282. Vakiangsa ne kei in. ( Ki zawgawp thei hi).
283. Vankawm na mansak, na ki siatsak leh lohkik in.( Thumaan lahna hi).
284. Vankawm te hong ngen ma in pia in. ( Hong kawm nuam den ding hi).
285. Veih mawk sansan lo ding.( Mi lakah ki tehin ki ami zum thei hi. Veih a suah leh taikhia aa sang ding. Mi kician te gamtat na daan hi).
286. Vengte logi keeksak lo ding.( pasian theihna hi).
287. Vok sankuang sungah zuntha kei in.( Numei leh pasal van meima in damhak thei hi). 288. Vok-huuk na bahteh khe tawh sui theilo ding.( Gaai theilo ding).
289. Vok muksa ne kei in.( Vok in hong pet thei ).
290. Zawlthu ah, vompi sahangin ki ciam theilo ding.( Taangtung takpi thei hi).
291. Zehtang te’ zeh na phi kei in.( Zehtang ten hong gaam thei.)
292. Zin leh leengdo siam in.( nang zong min hong tuaci bawl ding hi).
293. Zing lohong  ding aa na lol leh,  lokhung pan awngmasa  in.( Dawi leh ganhing gilote na taai ding cihna hi).
294. Zingutng aa vakiang haam hoihlo.( Misi ombaih thei cihna hi).
295. Zingan nitaak an neek hun maan ding.( Thusia lasia, patau kaangmei  in lap thei).
296. Zingsang thekhuan ma teitei in tho in.( The in hong khim thei).
297. Zo ankuang aa na sawk leh mimai sawksak kei in.( Guktak na nam khat hi).
298. Zu na teep aa na dawn a hi zongin, valhpah lo in muanphot in.( Zawl-ai leh bumte zusungah om thei ahih man hi). 
299. Zuauthu gen kei in.( Mi in hong gimneih ding cihna hi).

300. Zupeng in mi saat kei in.( Zu lung ki veithei cihna hi).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A THEIHHUAI THUCIIN 300. A kaikhawm leh a gelh ~ Pu Pau Za Mung Description: Rating: 5 Reviewed By: Cinpu Zomi
Scroll to Top