728x90 AdSpace

Hot
Menu
Zon-ol na Donate

Latest News

CHERITH LUIKEU PAN THUSINNA (Kumpite Masa 17:1-7) Agelh ~ Dr. Nang Sian Mung

CHERITH LUIKEU PAN THUSINNA
(Kumpite Masa 17:1-7)

Agelh ~ Dr. Nang Sian Mung

A sunga om Thute :
Thupatna
I.          Pasian Mipa    Elijah   (tg.1)   
II.         Pasian Sehsa  Mun-(tg. 2-4)
A.Tua Mun Min (Kumpite Masa 17:2-3)-Name of that place
B. Tua Mun Omzia (Kumpite Masa 17:3)-Nature of that place
C. Tua Mun Kitaangsapna (Kumpite Masa 17:4)Necessity of that place
III.                    Pasian Piaksa Kamciamna     (tg. 4-6)
A.    Pasian Geelkholhna (tg. 4)
B.    Pasian Sikna (tg. 6)
C.    Pasian Nopna Kicing (tg. 5)
IV.                    Pasian Geelkholhna- (Kumpite Masa   17:5-6)
V.         Pasian Lamhilhna-(tg.7)
A. Luitui Kanghta
B. A Lungkia Kamsangpa
Thukhupna: 


Thupatna
Galkap ka tumngei kei hi. Ahih hangin galkapte in a tuahkhak thute uh hong gen uh ciangun zaknopsa in sun thapaai, zan thapaai ciim hetlo in ka ngaizo hi. Zaknop ka sak pongmawk hangin galkap a tumcil vua kipan a sin (training) uh thute leh a tuahkhak uh thute baihtuak ka sa khol kei hi. Tua a tuahkhak uh thute leh sinna (training) tuamtuamte ah sikdo nading, pumpi kikhalna tuamtuam, gamtat luheek dan ding, leh thu dang tuamtuam sin uh ahih  manun haksa sa mahmah uh hi. Ahih hangin tua haksa a sak mahmah uh thute mahin galsim a a kuan uh ciangun ahuh mahmah ding leh a kisam mahmah thute vive na hi hi.

Mihing khat pen zankhat thu in abu amaang kisuaklo a, makai lianpi zong kisuak ngeilo hi. Tua bang a kizang thei a sangpi dinmun tun theih nadingin haksatna tampi phuttoh kul phot hi. Tua mah bangin Pasian na sepna ah zong mi thupi, mi lian, Pasian zat theih mi khat i suah theih nadingin Pasian taatna ahi haksatna tuamtuam i phuut phot kulkha ding hi. Tua bang hamsatna tampi phuuttohna pen thuhoih khat na hi a, mailam ah na lianpi sepzawh nading a kitaathiamna khat na hi hi. Tu laitak leitunga mi minthang leh milian tampitakte enpak lehang a tamzawte pen haksatna namkim a phuto a a na khang toto mite na hi uh hi.

Saklam gam ahi minam sawmte teenna Israel gam a uk Omri kicipa tapa Ahab (874-853 BC) in kumpi a sep hun sungin Pasian in a zat mahmah Elijah kici mi khat na om a, Pasian in nasiatak a a zatma in gamsung Cherith luigei ah na taat dikdek phot hi. Tua ahih manin Pasian taatna a thuakkha Elijah tungtawn in thu pawlkhat sin lehang ka lunggulh hi.

I.          Pasian Mipa    Elijah  (tg.1)  
Elijah pen Gilead gam Tishbeh khua pan hi a, Tishbeh khuami kici pah hi. Pasian upna lamah thahat in a ettehhuai mahmah Pasian kamsangpa khat ahi hi. Elijah min khiatna in ‘Yahweh in Pasian ahi hi’ (Yahweh is God) cih hi a, amin mah tawh kizui in a thugen pipen khatin  ‘Yahweh in Pasian hi in amah simloh Pasian dang a om kei hi’ cih ahi hi. Elijah in Pasian thu hangsantak in a gen hun sung mahin Ahab leh Jezebel in Baal pasian thu tawh kisai Israel gam sungah uanggen mahmah uh hi. Israel mite in a biak uh pasian maanlote panin kihei in, Pasian maan a zuat ding uh a nasep lianpen khat ahi hi. Kumpite masa 17:1 sungah Elijah pen Tishbeh khuami kici a, 17: 24 ah Pasian mi na kici hi. Tishbeh mi panin Pasian mi ci in a kilawh hunma sungin Pasian in Elijah nuntakna sungah thu tampitak na sinsak hi.


II.         Pasian Sehsa Mun-(tg. 2-4)
Tu in Elijah in hih bangin Israel kumpipa Ahab kiangah thu hong gen a, “Ama mai a ka dinna, Israel mite TOPA Pasian in a nungta ahih manin keima thu tawhlo in daitui ahi a, guahtui ahi zongin hong tung ding kumte sungin  omlo ding hi” a ci hi. Hih bangteng thu a gen khit ciangin Pasian mahin Ahab mai panin paikhiasak in “Jordan ni suahna lam ahi Cherith lui ah busak” hi. Pasian in kumpipa mai ah thugensak napi in busak zel hi. Pasian zia leh mihingte zia kilamdang hi. Ahab in Elijah a siatsak theih nading panin Pasian in na kemin a nungsang ciangin a thupizaw na a sepsak theih nadingin thusinna nei dingin Cherith lui ah a puak, a na busak masa na hi hi.

A. Tua Mun Min (Kumpite Masa 17:2-3) - Name of that place
Pasian in Cherith lui geiah Elijah busak in thu tampi sinsak hi. Cherith cih khiatna in “sunlet, attan, suzaan)” cih khiatna nei hi. Pasian in a hong tung ding hunte ah Elijah a thupizaw in a zat theih nadingin Elijah mahmah tuisuaksak, taatin suzaan dikdek phot hi. Pasian nasem tampitakte pen Pasian in nasiatak in a zatma in Pasian mahmah in suzaan, taat, haksatna tampi thuaksak phot thei hi. Mi pawlkhatte bangin Pasian in a sinphotnate thuak zolo in lungkia in Pasian nasepna panin a khawlkik honkhat bang om thei hi. Sumngo seekpa in sumngo taktak a kilat theih nadingin a tunga om a keekseuteng meikhuk ah khulin mei tawh a halkhiat phot mah bangin nang leh kei sung panin leh nang leh kei tungtawn in Pasian lim leh meel taktak a kilat theih nadingin Pasian in hong suzaan, hong halvui, hong tuisuaksak kulphot ding hi (Ezekiel 22:20-22).

B. Tua Mun Omzia (Kumpite Masa 17:3) - Nature of that place
Pasian in Elijah kiangah, “Jordan ni suahna lam ahi Cherith lui ah bu in” ci in thupia hi. Elijah paina Cherith luigei pen ‘bukna’ mun ahi hi. Bukna mun ahih manin mun nuamlua zong hi khollo kha ding hi. Elijah in a bukna munah lawm leh gual zong neilo in amah guak bek om hi. Hih munah Elijah ahuh ding leh a kem ding kuamah omlo ahih manin lungleeng khuangai in om a abukna mun panin Pasian muanzia ding na sin hi. Pasian in hong zat theih nadingin Pasian tung bekah kinga a, a mahmah a masa penin koihin muan ding kisam mahmah hi. A kitamzaan nuntakna in Pasian muan ngamna leh limtak a Pasian muhna hong piangsak ding a, limtak, teltak in Pasian hihna i muh ciangin mite kiangah ahi bang lianin hawmsawn, gensawn thei ding hi hang. Khat tangguak in gamdaihna munah om a, Pasian lungngai mipa in muibuntak a Pasian zat theih ding mipa, minu hi ding hi. Elijah in zong khat tangkia a a omna mun panin Pasian tawh na kinaizaw hi.

Khat veivei keikia bek hi mawk ing a, ka lawm ka gual ding zong om kei si e ci in thuumin i lungkiat hun omkha thei ding hi. Pasian na nasepna ah ahi a, sumbawl paaibawl in na zinsuk na zintohna ah ahi zongin, kumpinu nasepna ah ahi zongin khattang sawlbang na hei laitak mahin Pasian mahmah mangngilhlo in zuan lecin Pasian in ama gam aa dingin a thupitak in hong zang thei ding hi. Pasian in i omna thei a, i hihna thei hi. Pasian tawh i kizopna a maan ding thupi pen hi. Pasian in Cherith lui geiah hong puak leh zong lungkia kei in, Pasian in hong zatnopna khat om hi ding hi.

C. Tua Mun Kitaangsapna (Kumpite Masa 17:4) Necessity of that place
“…tualai munah nangmah hong vaak dingin va-aakte thu ka piazo hi” ci hi. Hih lai ah ‘tualai munah’ ci teekteek hi. Hih pen a tuam vilvel mun (specific place) ahi hi. Pasian sawlna ahilo mundang ah Elijah pai hi zenzen leh gilkial in puuksi kha ding hi. Pasian in Elijah a sawlna mun teekteek mahah va-aakte anpuak dingin sawl hi. Pasian nasemte in khat veivei pai nopna mun leh pai noplohna mun kinei thei hi. Tu laitak bangin USA leh Afghanistan khat teeiteei ah missionary pai dingin hong kiteelsak leh USA ah pai dingin kiteelzaw kha ding hi. Khat veivei ei deihna peuh Pasian deihna hi i cih hun om thei mawkmawk hi. Pasian in hong sawl hi, hong deihsak hi cih na theihtel leh mun nuam mun nuamlo ci kei inla, pai in. Pasian in hong koih khonglo in hong nusia hetlo ding a, a nungthuap hong omsak lel ding hi. Pasian in Cherith ah hongsawl leh, aman a sep ding thei gige hi (If God sends us to a Cherith, He knows what He is going to do). Pasian nasemte eite om nading mun pen Pasian sawlna mun bek ahi hi (The only place for us to be is a place where God sends us). Pasian hong koihna munah om in, gim i kisak mahmah leh zong Pasian tungmah ah kinga ngam a ama hong makaihna sin ding simloh a hoihzaw thudang omlo hi. Khat veivei gim kisa mahmah in eiguak in thuak keeikaai theimawk hi hang. Laphuakpa in ‘Zeisu kiangah vako ning’(I must tell Jesus) a cih bangin Pasian hih theihna tungah kinga in amah vako ni. Pasian in Cherith ah hong puakna pen  ama tate ahi eite kalsuanzia ding a geelsa thute sunga khen khat ahi hi (Zawmah 8:28). Tu in teel theih ding nam nih bang om a, tuate in Cherith mun mahah om in phunphun ciakciak ding maw, ahih kei leh Cherith mahah na om kawmsa mahin Pasian deihna zui in ama min phatphat ding? Elijah in Cherith mun ah a om sung mahin Pasian thu lungdam kipaaktak in na mang hi, “…amah pai in Topa thugen bangin gamta hi….” (tg. 5; Tetalawni Masa 5:18; Phil.4:6-7). Pasian in nang leh kei om nading a sehsa munkhat na nei a, tua munin mun haksa, mun nuamlo, nopsaklohna mun, a lauhuai mun hi kha thei ding hi. Ahih hangin Pasian in eite aa dingin a sehsa mun hi cih i theih leh tua banga ageel Pasian thu lungkimtak in mangciat ni.

III.                    Pasian Piaksa Kamciamna    (tg. 4-6)
A tunga tawmkhat i gensa bangin, Pasian in Cherith lui lamah hih thunih hangin Elijah na sawl hi. Khatna ah, huu ding, kem dingin (to protect), nihna ah, thu sinsak dingin (to train) a sawl ahi hi. Pasian sapna i cihpen Pasian vaakna tawh kikop den hi (God’s call is always accompanied by God’s provisions). Pasian in a vaakloh, a keploh, a khoiloh nading munah ama nasem dingin mite sawl ngeilo hi. Hih lai ah Pasian in Elijah na sawlkhia in, a kisapnateng  vaak, pia dingin na kamciam lai hi.

A.    Pasian Geelkholhna (tg. 4)
Kumpipa mai panin Pasian in Elijah a sawlkhiat ma nangawn in Pasian lungsim sungah Cherith lui ah sawl dingin geelkhol khin khangel ding hi, “tua lai ah….” Tua bek thamlo in va aakte in Elijah an a puak ding zong theikhin hamtang ding hi. “… nangmah hong vaak dingin va aakte thu ka piazo hi,” ci hi.  Pasian in na khat peuhpeuh hongsawl ciangin, a kisam ding khempeuh nangawn zong geelkholhsa in na nei hi. Eite kalsuanna khempeuh Pasian in hong thei hi. Late 37:23 ah, “mikhat kalsuannate Topa kiangpan hi a, ama lungkim banga a gamtapa amah in kipsak hi,”ci hi.  (Kawlentuh Nihna 12:7-10 sim behin).

B.    Pasian Sikna (tg. 6)
Va aakte pen vasa pilpen pawlin na kigenlo hi. Sane ganhing nam ahi uh hi. Hih va aakte in “…zingsang in anlum leh sa puak a…,” Pasian in Elijah kitaangsapna khempeuh na sik (provide) hi. Pasian deihna zui in a kalsuan a citak nasempa i hih nak leh Pasian in eite kitaangsapna khempeuh hong sik pelmawh ding hi. “Ka Pasian in Khazih Zeisu sunga ama vantung hauhna zui in na kisapna khempeuh uh hong pia ding hi” (Phil.4:19).

C.    Pasian Nopna Kicing (tg. 5)
“…amah pai in Topa thugen bangin gamta hi….” (tg. 5). Pasian sawlna bangbang i man ciangin Pasian kiang pana hong pai a kicing nopna in hong zui ding hi. Pasian deihna mang nuamlo in eima utthu in i kipeek vial leh i gim lel ding hi. Jonah pen Neniveh khua ah a pai dingin kisawl hi na pi in, utlo ahih manin amah bek hilo amah tawh tembaw tunga a tuangkhawmte  nangawn in gimna thuak lawh uh hi.

IV.                    Pasian Geelkholhna- (Kumpite Masa 17:5-6)
Pasian in vangliatna khempeuh nei in na khempeuh uk hi. Elijah in a gamtatna khempeuh ah Pasian in na khempeuh uk (God is in control) hi cihthu na sin hi. Pasian kamciamna a tangtuntak ciangin Elijah lungkim mahmah a, Pasian pen a thuman Pasian ahihna sin leuleu hi. Pasian deihsakna munah i om nak leh lungkimna om ding hi. Pasian tungah ki-aap theihna zong Elijah in na sin leuleu hi. Lai Siangtho in “tua lai ah amah pai in teeng (dwelt) hi,” ci hi. Ama thu in gamtalo in Pasian cih bangbang in mangin gamta hi. Tua in ki-aapna (submission) khat ahi hi. Elijah in Pasian mahmah muangin, kim leh paam ah hamsatna tuamtuam omphial mah ta leh a piang bangbang Pasian geelsa hi ei ci in Pasian geelkholhna a kipsak theih nading Pasian in deih hi. Elijah in, Abiahang mah bangin, upna tawh a nuntak theih ding thu na sin hi. “Midik in upna tawh a nungta ding hi” (Zawmah 1:17). Elijah in upna tawh nungta a Pasian tung bekah a kingakh theih nadingin Pasian in Elijah pen Cherith lui ah na paisak hi. Pasian in eite aa dingin a geelsa thu tampitak om a, tuate eima tungah a banban in hong tangtun nadingin Pasian in i nuntakna sungin Cherith munah hong paisak hun tamvei mahmah kha ding hi (Jeremiah 29:11). Bang bang dinmun i na om zongin Pasian muangin, ama tungah kinga ni/

V.         Pasian Lamhilhna-(tg.7)
A. Luitui Kanghta
Tu in Cherith luigei ah Elijah in hunhoih khop khat zang khinta hi. “Tua gamah guahzu lo ahih manin, tawlkhat khit ciangin luitui hong kangh hi.” Nisim naisim in luitui luang aging buabua za in, tua luitui mah dawnin, a kingakh denna Cherith luitui hong kiam hiaihiai ta hi. Tuikiam ahih manin nisim in tuiluan dante hong kilamdang hi. Nidang a a piaudim a tuiluang ziahziah pen tu in tui tawphah bang hong kidawk keeita hi. Tua Cherith luitui pen a sawtlo in hong kangh mawk hi. Elijah dinmun ah a om danin kingaihsun lehang bangci in i ngaihsun zentam? Lungkhamhuai, lungmanhuai mahmah kasa hi. Eite khat ciat nuntakna ah zong i kingakh mahmah na nakhat peuhpeuh hong sia in, i muan mahmah i lawm i gual khat peuhin hong nusia in hi leh kilungkham mahmah kha ding hi. Ahih hangin tua bang hun ciangin i phawk gige ding thukhat in luitui a luangsak theipa in kanghsakkik thei a, a kanghsak theipa in zong luangsakkik thei hi. Cherith luigei ah Elijah a puakpa mahin luitui a kan hangin ama aa dingin mun hoihzaw geelsak lai hi. Eite kingakhna luitui a kan ciangin Pasian in tua luitui sangin a limzaw, a siangthozaw eite aa dingin hong bawlkholhsak, hong koihkholhsak den hi.

Tua luitui kanna pen Pasian a heh manin hong gawtna hi pah samlo a, ama lamah i hatzawk theih nadingin Pasian in eite dawn luitui hong kanghsak na hi thei hi. Pasian na zong sem kisa mahmah, lawhcing zong kisa mahmah napi hangin zattawm ding sum, nektawm ding nangawn nei zolo in ki om thei hi. Tua bang hun ciangin Pasian lamlahna ngakzawh ding kisam hi. La khat in ‘khawl hithiat in dakin ngai dihin To Zeisu hong hopihna,’ na ci hi. Lai Siangtho lui sungah mi thupi pawlkhatte nuntakna en lehang zong amaute nuntakna ah luitui kangh bangin lunggimna, singimna a thuak hun uh na om hi. Gentehna in Abiahang in a tapa Isaac tawh biakpiakna pia dingin Pasian a ngetna, Joseph zong Potipher inn sungah a na sep laitak a tuahkhak thute, Paul zong Lystra khua ah a na sep laitak a tuahkhak thute,leh Topa Zeisu mahmah zong Gethsemane huan sunga a thungetna cih bangte ahi hi. Ahih hangin amaute nuntakna tungtawn in Pasian in na lianpi a sepnop manin hih bangteng a phuto na hi uh hi.

Pasian aa dingin kalsangzaw i suantoh theih nadingin eite nuntakna ah Pasian in Cherith munah hong puakin i dawn luitui hong kansak hun tam simsim kha ding. Ahih hangin Pasian kiangpan i ngah thupha sangin thupha hong piapa tungah kinga a, amah muan ding sin theih ding thupi mahmah ding hi.

B. A Lungkia Kamsangpa
Kamsang Elijah in luitui a kan ciangin Pasian in kei hong nusia taktak hi ve maw ci in lungkia mahmah khangel ding hi. Tua lai munah amah bek om in, a dawn ding tui kanghta, kumpipa in thah dingin zong lai cihte a ngaihsut ciangin lungkia mahmah kha ding hi. Eite nuntakna ah zong i lawm i gualte in hong nusia in, i nuntakna ah tuahphatna om ngeilo ci a i lungkiat mahmah hun om tham hi. Sanggam aw, tua bang hun ciangin Pasian kamciamte phawkkik in. Cherith luigei ah pai in luitui a dawnsakpa in “kong nusia ngei kei ding hi” ci in Lai Siangtho mun tam simsim ah hong kamciam khin hi (Isaiah 49:14-16).

Thukhupna: 
Thu lianpite ah Pasian mahmah in kamsangpa Elijah a zat theih nadingin luigei ah nuntak dan tuamtuam sin dingin na sawl hi. Baal kamsangte tawh Carmel mualah kidemna lianpi a neihma un Pasian in Elijah nuntakna na suzaan in na nuaipaat dikdek phot hi. Tua mah bangin sanggam aw, Pasian nuaizaanna, Pasian thuhilhna na thuak ciangin Pasian in na lianpi tampitakte ah hong zangnuam ahihlam phawk in. Topa zattheih dingin Pasian sawlna bangin na mang hiam?  Tu laitak a na dinmun in Pasian hong koihna dinmun hi ci in na lungkim zo hiam? Hih lai a sim kong it sanggam akua mapeuh tungah Pasian in thupha hong pia tahen. Amen.

Source ;
Upna Laigil
Volume 12,  No.6
Nov - Dec , 2010

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: CHERITH LUIKEU PAN THUSINNA (Kumpite Masa 17:1-7) Agelh ~ Dr. Nang Sian Mung Description: Rating: 5 Reviewed By: Cinpu Zomi
Scroll to Top