728x90 AdSpace

Hot
Menu
Zon-ol na Donate

Latest News

Inn Sunga Tuuvom Khat I Hiam? Agelh ~ Kap Za Khai (Photoh)

Inn Sunga Tuuvom Khat I Hiam?
Agelh ~ Kap Za Khai (Photoh)


Tuuvom cih pen tuu kangte sangin a gilo, a lampial, kimlepam a nawngkai sakte tuuvom a kici ahi hi. Mi khat peuhpeuh pen innkuan ading ahi zongin, kimlepam ading ahi zongin, a tualtatna peuhpeuh ah ahi zongin tuuvom hi thei hi. Khat veivei ei leh ei tuuvom i hihlam zong kithei mello thei hi. Hih a nuai-a thute tawh a kituak leh ei leh ei pen innkuan sunga tuuvom i hihlam kitheih pah ding hi.

Lungkituak lo den:
I innkuan sunga om nulepate tawh ahi zongin, u le nau sanggamte tawh ahi zongin thulela khat peuhpeuh, vai khat peuhpeuh ah amau tawh lung kituak den ding cih pen a haksat hangin, lungkituak ngeilo den i hihleh, tua pen i thanemna hizaw a, ei pen amau adingin tuuvom i hihna ahi hi. Innkuan vai khempeuh ah thukimna i neizo kei zongin luangkhawm theih ding hihang. Tua bang loin innkuanpihte hihna, geelna khempeuh ah thukim lo bek tham loin lungkituak ngei keileh ei pen innkuan tuuvom hita cih phawk ni.

Ei muhna bek tawh ding nuam:
Innkuan sunga i neih den ngeina leh tatziate awlmawh loin eima muhna leh hoihsakna bekbek tawh i om nop leh tua in ei pen inn sung tuuvom hong hisak hi. Nulepate’ hoihsak leh amau deihna zuih lohna, sanggamte thu manglohna cihte hi. Innkuanpihte thuhilhna, makaihna, deihsaknate thusim loin ei muhna bek tawh i kal den leh inn sung tuuvom ihihna taktak phawk ciat ni.

Buaina piangsak den:
Innkuan sungah buaina i piangsak denleh ei pen inn sung tuuvom hi. Inn sunga innkuan vai buainate inn pua lamah nawnin i tuntunna ah buaina piansakna ahi zongin, a pua lama buainate peuh inn ah hong ciah pihin inn sungah buaina piansakna ahi zongin, bangbang tawh buaina i piangsak zongin, inn sung ading hoihlo ahih manin ei pen inn sung buaisak tuuvom ihihna phawk ni.


Ngimna nei loin nuntakna:
Innkuan sunga tate ngimna nei tawh nuntak ding pen nulepate’ lunggulh hi a, ngimna nei takin nuntak lawhcing ding pen amau teng ii hong lametna ahi hi. Ahi zongin bangmah kin leh uk nei lo, ngimna bangmah nei lo pi-in lung nuntak bangin i om thapaih denleh ei pen inn sung niin bang hilel a, inn sung tuuvom zong i hihna phawk ni.

Min hoihlo tawh sap ngahna:
Nulepate le sanggampihte in “mi gina lo, dawi, mi sual” cih banga hong sap leh ei pen innkuan tuuvom hita cih kilang mahmah ta cih theih ding hi. I it leh ngaihte min ngaih mahmah tawh kisam hi. Innkuan sungah min ngaihlo tawh hong kisap, kivawh leh i dinmun phawk ni.

Thupisimna ngahlo:
Innkuan sungah ‘amah a om loh hang bang phamawh diam, hong kihel keileh hoihzaw lai, amah tungah dot kul kei ee’ cih bang genna leh thupisim lohna i ngah leh ei pen inn sunga tuuvom ihihna hong kilangsak mahmah hi. Tuuvom ihih manin hong thusim lo, hong nawlkhin ahi uh hi (source-lovepanky).

Inn sung kiamsak:
Inn sunga van leh nate zuaksimna, suksiatna tawh innkuanpihte buaisak denin innsung i kiamsak den leh innsung tuuvom ihi hi. Guihtheih khamtheih zat nadingin inn sung van leh nate zuak, in Nulepate leh sanggamte in innsung zeemin, innkuan khantoh nopsak ding a hanciam laitak amau nasep leh hanciamnate i mawk suaksak den leh tuuvom ihihna kiphawk ni.

Kha thu lunglut lo:
Nulepa leh sanggamte in i pianthak loh lam hong thei in, i pianthak ding hong deihsakna tawh camp leh crusade, leh gupna tintan khat peuhpeuh hong kahsak ciang ‘ut ke’ng, piangthak khin ing, Pasian thu khawng ka theih loh om kei, no va kahzaw vou’ i cihcih leh ei pen inn sunga tuuvom i hihna kilang hi. Kha Siangtho leh Kha Siangtho bekmah kigawmkhawm thei, kikhawl thei ahih bangin Kha Siangtho neite tawh i kisaisai leh ei tuuvom ihi pah hi.


Hih a tunga thu teng pen tuuvom hihna hong kilangsak thute hi a, i innkuan ading tuuvom i hihlam i kitheih leh kipuahkik in lampi manah ciahkik ding kisam hi. Innkuanpihte in ei pen tuuvom dingin hong deih peuhmah lo hi. Tua sangin Pasian in hong deihsak lozaw kan lai hi. Ei pen Pasian ading leh i innkuan adingin i nuntak sungin tuu thumang, tuu siangtho, tuu ngaihbaang, mite leh Pasian maipha a ngah tuu ihih ding a thupi ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Inn Sunga Tuuvom Khat I Hiam? Agelh ~ Kap Za Khai (Photoh) Description: Rating: 5 Reviewed By: Cinpu Zomi
Scroll to Top