728x90 AdSpace

Hot
Menu
Zon-ol na Donate

Latest News

JERUSALEM BIAKINN KISUKSIATNA THU TOMKIM. A kaikhawm: Thang Khan Lian

JERUSALEM BIAKINN KISUKSIATNA THU TOMKIM
A kaikhawm: Thang Khan Lian


Biakinn Masa (First Temple):
Jerusalem Biakinn masa (First Temple or Holy Temple) pen Kumpi Solomon in 957 BC in a bawl ahi hi. Egypt kumpi Pharaoh Shoshenq I in kum sawm tam lo (after few decades) in suksiatsak hi. Pawl khat a kilamphat kik zawh tei hangin kizo khin lo a, Judah Kumpi Jehoash' ukna kum nihna in a bawl kikna ding sum hong kaikhawm a, 835 BC in kilam kik hi. 701 BC in Assyria (tu-in Syria i cih) kumpipa Sennacherib in First Temple buluh a, a sunga kham leh gun khempeuh Assyria gamah pua hi. Jerusalem biakinn Masa pen Babylon kumpi (tu-in Iraq i cih) Nebuchanezzar in 589 BC in umcih a, 587 BC panin Babylon ten suksiat kipan uh a, 586 BC a vek in suksiat sak in, Jerusalem khuapi khempeuh zong la-in Jerusalem' hauhsatna khempeuh Babylon gamah pua uh hi. Nebuchanezarr in Judahte a tamzaw leh Judah kumpi leh a tate zong galmat in man a, Babylon ah sal in ciahpih hi.

Biakinn Nihna lam Kikna:
Thuciam Lui en leng Ezra bu ah Cyrus Kumpi Lian (The Great) in Jerusalem Second Temple kilam kikna dingin 538 BC in phalna pia a (Babylon kumpi tuk ma kum khat lai-in), kum 23 sung biakinn kilam kik in, kizo siang hi. A kizawh ni pen Adar kha ni thum ni hi a, Darius Kumpi Lian ukna a kum gukna (12 March 515 BC) in kizo a, Judah gam uk sawn (governor) Zerubbabel tungah ki-apkhia (dedicated) hi. Ezra leh Nehemiah bu sung sim leng Second Temple lam kik theihna dingin phalna lai (edicts) kumpi thum in pia hi. Kumpi Cyrus in 536 BC in a kilam kik theihna dingin phalna a piakna Ezra 1 sungah kimu hi. Tua khit in Persia (tu-in Iran i cih) kumpi Darius in a kilam kikna dingin 519 BC in phalna na pia kik hi cih Ezra 6 sungah kimu hi. Tua khit a thum veina dingin Persia Kumpi Artaxerxes I in ama' ukna a kum sagihna kum 457 BC in phalna a piakna Ezra 7 sungah kimu hi. A tawpna dingin Kumpi Artaxerxes mah in a kilam kikna dingin 444 BC in phalna na pia kik hi cih Nehemiah 2 sungah kimu hi. Biakinn Nihna a kilam kik zawh hangin Solomon' lam zah-a thupi in kilam kik zo nawn lo a, Persia mite thuneihna (suzerainty) nuai-ah om den hi.

Macedonia (tu-in Greece gam i cih) kumpi Alexander the Great hong hat a, amah pen pasian a kisuahsakna (deification) Judah mite sang nuam lo uh ahih manin Alexander thangpai a, 332 BC suksiat sawm a, ahih hangin a suksiat ma (last minute) in midangte hosiamna leh kamsiat zangin Judah ten lungkimsak zo uh ahih manin suksiatsak lo hi. Alexander' sih 13 June 323 BC khit nungin Ptolemies ten (Egypt-te genna) Alexander' kumpi gam hong satkham (dismembered) gawp in, Judea gam leh Jerusalem Bianinn hong uk khum hi. Ptolomies ten Judea gam a uk lai-un Judahte mipi suahtakna nam tuamtuamte (civil liberties) pia in, ama ukna nuai-ah Judahte lungkim sak in ukkhum uh hi. Ahih hangin a sawt loin Seleucids (Greekte) kumpi Antiochus III in Panium ah Ptolemies-te 198 BC in zo hi. Tua khit nungin Antiochus in Judahte Greek biakna, ngeina leh siamna sinsak ding (Hellenize) hong sawm a, Jerusalem biakinn ah Greek pasian leh nusiante biakinn ah koih ding hong sawm ciangin Judah ten kiphinna nakpi takin hong pan pah uh hi. Antiochus' ukna deih loin Judah ten kiphinna (rebellion) hong pan uh a, Antiochus in thagum tawh mulkimna bei-in bengdai zo pah veve napi Jerusalem biakinn ah Greek pasiante koih ding sawm nawn lo hi. 187 BC in Luristan ah Antiochus si a, a tapa Seleucus IV Philopator in a pa' za laih hi. A pa nasepna maban bangmah sem man loin kumpi a let khit zawh kum khat in kithat (assassinated) pah hi.

Seleucus IV Philopator' sanggampa Antiochus IV Epiphanes in ama za laih a, Seleucid kumpi tokhom hong luah in, a pa' hanciamna Greekte ngeina khempeuh midangte zuihsakna ding "policy of universal Hellenisation" hong pat kik a, Judahte Sabbath tan ni leh vun ki-atna (circumcision) thukham in phal lo hi ci-in thukham hong bawl ciangin Judah ten kiphinna hong pan kik leuleu uh a, ahih hangin thagum zangin bengdai zo pah hi. Antiochus in Greekte pasian Zeus Jerusalem biakinn sungah hong tung a, Greekte pasiante biakna dingin vokte tawh biak piakna Greek siampute a piaksak manin Judahte lungso diak uh hi. Greek ulian khat in Judah siampi Mattathias kici kiangah Greekte pasian biakpiakna pia dingin sawl a, Mattathias in a sawl ulianpa that hi. 167 BC in Mattathias leh a tapa ngate makaihna tawh Judah ten kiphinna hong pan uh a, Seleucid-te thuneihna panin suahtakna hong ngah uh hi. Mattathias' tapa Judas Maccabaeus (tu-in "Sek" ahih kei leh mangpau in "The Hammer" a kicipa) in 165 BC in Jerusalem biakinn siansuahna nei a, tu ni dong Judah ten hih phawkna ding Hanukkah Pawi kici zang den lai uh hi.

Judas Maccabaeus in 164 BC in biakinn siansuahna nei kik hi. Roman kumpite uk lai-in biakinn sungah Roman galkap lian Pompey kici lut a, siampite bek kum sim in khat vei bek a lut theihna Siangtho pen Mun (Holy of Holies) sungah 63 BC in va lut in, biakinn va ninsak in, buahsak (desecrated) a, ahih hangin biakinn bel susia lo hi. 54 BC in Crassus in biakinn sumkholna (Temple treasury) va buluh a, a deih teng la hi. Ahih hangin 53 BC in Parthia-te tawh Carrhead Kidona ah Crassus si hi. Khangluite tangthu ah Crassus pen a gawl ah kham tuisa (molten gold) kisunsak in, kithat hi kici hi. Crassus' kithahna thu Judah ten a zak ciangun Roman kumpi ukna deih loin hong kiphin uh a, ahih hangin 43 BC in kibengdai hi.

20 BC kiim in Herod in Jerusalem biakinn lim takin puahphatna bawl pha kik (renovated) a, a min dingin Herod' Biakinn (Herod's Temple) ci-in a min laih hi. 66 AD in Jedah Kem leh Hute "Jewish Defenders" Jerusalem biakinnpi luah uh hi. Judahte leh Rome kumpi kido masakna (First Jewish-Roman War) ah Rome galkap ten Jerusalem khuapi la dingin Rome galkap general leh mailam hun-a Rome kumpi ding (future Roman king) Titus leh ama nuai-a second-in-command Tiberius Julius Alexander sawl a, February – August 30, 70 AD kikal in la zo uh a, Judah nautang 3,600 lomthah uh hi. Titus leh Tiberius Julius Alexander in Sept. 70 AD in biakinn suksia in, haltum uh hi. Judah mi ten Rome kumpi a langpangna uh a nasiat luat manin Titus in susia in, a haltum ahi hi. Jerusalem Biakinn Masa leh Nihna kisuksiatna kum sim in Judahte an ngawl Tisha B'Av kici hun tengin dahni leh phawkni in zang den lai uh a, Titus in Jerusalem leb biakinn a suksiat zawhna ciamtehna dingin Rome kumpi in Rome khuapi ah a bawl "The Arch of Titus" kici tu dong om lai hi. Roman kumpi ukna deih loin Bar Kokhba kiphinna (revolt) hun 132–135 AD/CE hun lai-in Simon bar Kokhba leh Rabbi Akiva in a lam kik nop hangun a kiphinna uh guaksak in lawhsam (failed) a, tua loin Tisha B'Av kicihna losiah Jerusalem khuapi sungah Judahte lut ding kiphal lo ahih manin a lam kik zo lo suak uh hi. Rome kumpi Julian in biakinn lam kikna ding phalna pia napi 323 AD in Galilee ziinling in a lam kiksate uh suksiatsak a, tua khit nung a kilam kik sawm hangin guaksuak den hi.

Muslimte hong hat khit nung un kum zalom 7 AD in Jerusalem khuapi la uh a, Umayyad Caliph Abd al-Malik ibn Marwan kici in biakinn omna mun ah Islamic-te pasian, piankhiatna pu leh pate, ngalliamte (ancestors), martyr a site leh misiangthote (saints) phawkna dinga kibawl mun siangtho (shrine) biakinn "Dome of the Rock" kici a kibawlna dingin thupia a, kibawl pah hi. Dome of the Rock pen 691 AD dong ding zo a, tua hun mah in tua kiim-a kibawl al-Aqsa Mosque kici bel tu dong ding velval lai hi. Solomon in Jerusalem Biakinn a bawlna mun The Temple Mount kicihna leh Jerusalem khuapi-a Khuapi Lui (Old Jerusalem) kicihna mun teng pen 1967 in Arab gamte leh Israelte Ni Guk Gal - “Six-Days War” kici ah tua mun thuneihna nei Jordante khut panin Israel in laksak zo ahih manin tua mun ah Judah ten thungetna nei thei kik uh hi. May 14, 1948 in Israel in suahtakna hong ngah phet in Jordan in thakhat thu-in East Jerusalem sunga siangtho mun kicihna Temple Mount a lak pah hi a, Jerusalem mun dangte pen Israel ukna nuai-ah ah om hi. Israel in 1980 in Jerusalem Law kici tawh East Jerusalem zong Jerusalem dangte tawh pumkhat a suahsak (officially united) hangin United Nations Security Council Resolution 478 in Jerusalem Law in lei leitung thukhun (international law) palsat hi ci-in sang lo hi. Hih thu hangin Temple of Mount sung pen Jordan pansan Muslim Waqf in vaihawmna leh thuneihna (administrative control) tu dong nei lai a, UN thukhun bangin Jerusalem Biakinn omna leh mun siangtho mun omna teng Temple Mount pen Israel ukna hilo hi.

Jerusalem Biakinn omna lian ngaihsutna, lungsim a tuatna (theory) nam li om hi. 1. Tu-a Dome of the Rock kici omna mun a om hi a ci om hi. 2. Dome of Rock leilu lam a om hi ci-in Professor Asher Kaufman in ci hi. 3. Dome of Rock omna nisuahna lam a om hi ci-in Professor Joseph Patrich, Hebrew University in ci hi. 4. Mount Ophel kicihna a Temple Mount omna leitaw lam a om hi a ci zong om hi. A biakinn omna mun kician tak nangawn a kithei nawn lo suak cihna hi.

Tu dong hih mun kituhna Judah leh Muslimte kikal ah piang den a, al-Aqsa Mosque kici pen Muslimte lak panin Sunni Islamte adingin mun siantho pen thumna in ngaihsun uh a, nung kum a kipanin Israel police ten al-Aqsa Mosque ah Muslimte lut ding a phal loh man un buaina hong piang kik a, mi za tampi in sihna tuak khin zo hi.

Ref:

Wikipedia and Christian History

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: JERUSALEM BIAKINN KISUKSIATNA THU TOMKIM. A kaikhawm: Thang Khan Lian Description: Rating: 5 Reviewed By: Cinpu Zomi
Scroll to Top