728x90 AdSpace

Hot
Menu
Zon-ol na Donate

Latest News

KHANGNO HUN A THUPITNA. Agelh ~ Rev. Dr. Kam Khaw Thang

KHANGNO  HUN  A  THUPITNA
Agelh ~ Rev.  Dr.  Kam Khaw Thang


Lai Siangtho : Timoti Masa 4:12 “Khangno lai na hihna thu hangin mite’ simmawh dingin om kei inla, kampauna, gamtatna, itna, upna, le sianthona ah thu-um mite’ etteh dingin na om in.”

Thupatna
Ei Khristiante in Nute’ Ni, Pate’ Ni cih kum simin i nei a, a hong kipatzia a tangthu zong a om thei ahi hi. Ahi zongin Leitung bup Tuiphum Khangno Thungetna cih pen akipatlam ka thei kei a, a kipatna a tangthu zong ka thei tuan kei hi.

Ahi zongin tu hun laitakin i khangno pawlkhatte’ omzia ka muh ciangin khangno tawh kisai-in nakpi tak ngaihsutna i neih ding kisam hi, ci-in ngaihsutna ka nei hi. Tu laitak-a khangnote pen mailamah i makai dingte ahih manin khangno gina hong hi kei leh uh i mailam makaite zong a gina lo ding hong hi mawk hi.

Mihing khan khat sungah dawl li bang om thei hi.

1. Naupan lai hun: Naupang laite pen a mailam ding uh makaihna khempeuh nu le pate’ khut sungah om hi. Ngaihsut tawm siamna nei lo uh ahih manin nu le pate in makaih siam peuh leh thu a mang thei uh ahi hi.

2. Khangno lai hun: Khangnote pen thu a ngaihsun tawm thei tate ahi uh hi. Khantawn nuntakzia ding pen hih hun sungtengin a bul a kiphut ahih manin a thupipen hun hi, ci lehang kikhial lo ding hi.

3. Khangham hih hun: A ngaihsutna a kip khinte hi a, a khangno lai-a a bul a patkhiat bangin a nungtate hi ta hi.

4. Piteek puteek hih hun: Pumpi tha hat nawnloin a limin a nungta liamliam lelte hita a, amau a en ding khangnote le khanghamte mi hoih ahih leh a teekte a hampha hi a, mi hoih ahih kei leh a teekte mi hehpihhuai mahmah ahi hi. Tuni pen leitung bup Tuiphum Khangno Thungetna Ni ahih mah bangin khangno lai hun a thupina ngaihsun ni.


I. Khangno Hun A Thupitna
Nuntakna sungah hun khempeuh a thupi ahi zongin khangno hun pen mailam thu dong a kikhensatna hun ahih manin nuntak hun sungah a thupipen hun ahi hi.

1) Pilna le siamna zon hun ahi hi. Na khempeuh in hun a nei ciat hi a, a hun lai-in thu i phawk ding kisam hi.

(i) Khangham khit ciangin pilna le siamna bangmah kibehlap zo nawnlo hi. Khangno lai-a pilna le siamna ngah teng bek a kizang hi lel hi. Khangham khit ciangin pilna le siamna a kisinte zong kip loin maimang pahpah hi.

(ii) Khangno lai-a kingah pilna le siamnate pen kip paisuak a, khang tawntung adingin man nei hi. Tua ahih manin hih hun sungin pilna le siamna tampi ngah ding kisam hi.

2) Khantawn-a pianzia ding khangno hun lai-in a kikhensat ahi hi. Tua ahih manin khangno hun a thupipen ahi hi.
(i) Mihing manphatna pen ganhingte bangin a tuk kiteh, a ki sauna kibulphuh, a tawi phazah a kibulphuh hi lo hi. Mihing pen sa nek ding nam hi lo ahih manin pumpi golna le tawi tampi phakna a thupipen hi lo hi.

(ii) Mihing manphatna pen na manpha bangzah semkhia thei hiam cih tawh a ki-en hi a, na manpha sep theih nading pilna le siamna pen khangno hun lai-in a kingah thei ahi hi.

(iii) Khangno hun lai-in na manpha sep theih nading pilna le siamna a ngahte a khantawnin mi gina hi a, khangno hun manpha a mawk valsakte a khantawnin mi gina lo a suak ahi hi.

3) Khangno hun pen lungsim le pumpi a thahat mahmah hun laitak ahih manin mi gina suah theih nading pilna le siamna ngah zawh nading hun hoih ahi hi. Tua mah bangin tua hun hoih a sialamin kizangkha leh siatna lianpi piangsakin innkuan bup le behlephung bup tungah lungkhamna le maizumna a tun thei ahi hi. Tua ahih manin i hun hoih a manpha lamin i zat theih nading hanciam ding thupi hi.

II. Khangnote Mi Thupi A Suah Theih Nading Nu le Pate In Tavuan Nei
1) Khangnote in pilna a ngah nading nu le pate in hanciampih ding kisam hi. Pilna sin nadingin hun le sum tampi bei ahih manin nu le pate in a hanciampih kei leh hi zo lo hi.

2) Khangnote in sanga sin pilna bek hi loin siamna a tuamtuam a sin theih nading lampi zong nu le pate in zonpihin lamlah ding kisam hi. Sanga laisin pilna bek a kicing hi lo hi.

III. Khangnote Mi Thupi A Suah Theih Nading
Amau Mahmah Tungah Tavuan Om
1) Nu le pate’ deihsakna le vaihawmna bek tawh tangtung thei lo hi.

2) Khangnote mahmah in lawpna, thanopna, le deihna lungsim a neih ding kisam hi. Khangnote in hanciam nopna lungsim a neih kei uh leh nu le pate’ hanciamnate a mawkna suak lel hi.

3) Khangnote in tua bang lungsim a neih theih nadingun thungetna le Pasian tungah ki-apna kisam hi. Amau mah a hanciam tawm kei uh leh bangmah tangtung thei lo hi.

4) A hun hoih neih lai-un hoih takin a zat theih kei uh leh a khangham uh ciangin a kisik ding lamtak uh a theihkholh theih ding uh thupi hi. A theikhol thei lote mihai ahi hi. A khangham uh ciangin mi gina lo a suah uh leh amau’ khialhna ahi hi.

IV. Khangnote’ Omzia Ding
1) Khangnote a hun uh awngthawl loin bang khat peuh semin a manlah den ding uh thupi hi. Sep ding thei loin, “Cim ing,” a cite pen a zumhuai mahmah ahi hi. Bangmah sem loin tu mawkmawk, vak mawkmawk cih pen mi batlohna ahi hi. Sep ding thei loin a awngthawl mite pen mi sia suak tawntung hi.

2) A manlah theih nadingun siamna tuamtuam a sin ding uh kisam hi. Na tampi sem thei lehang omkhong cih om thei lo hi. A omkhongte pen na tampi sem thei lote ahih manin a zumhuai mahmah ahi hi.

3) Mihingte pen a tang om ding hi loin lawmlegual tawh a kikhawl dingte ahih manin khangnote pen a khangualte tawh kiho thei, kikhawl thei-in, a kimawl khawm, na a sem khawm dingte ahih lam a phawkhuai thu ahi hi.

4) A kuamah peuh biakna a kinei ciat ahih manin khangnote pen amau’ kihel theihna peuhpeuh ah kihelin a hun le a thatang a pia dingte ahi uh hi.

5) Hun awngthawl om het loin manlah denna pen thatang beina le supna hi loin thahat semsemna le mi gina hihna a kilatna hi zaw hi. I paunak ah, “Thatang ciahkik,” kici hi. I thatang i zat manin i hatna a bei hi lo hi. Omkhongna pen thahatna kholna nam hi lo hi. Sep ding thei loin a om mawkmawkte pen mi gina lo hi zaw hi.

Thukhupna
Paul in Timoti a vaikhakna ah a gen bangin mite’ simmawh dingin om loin, kampauna, gamtatna, itna, le sianthona ah mite etteh tham dingin i nuntak theih ding a thupi ahi hi.

Tua mah bangin i om theih nading pen ama thu-in hong piangtawm ding hi loa, mi gina hih nopna lungsim nei-in i hanciam ding kisam hi. I hanciam nak leh Pasian in hong huhin mi gina suak thei dingte vive ihihna phawk ciat ni.

Nu le pate in i ta khangnote mi gina suah theih nadingin pilna le siamna a neih theih nading uh i hanciampih hiam?

Ei khangnote zong mi gina suak nuamin a hanciam takpi mah ihi hiam? Ei mahmah ki-en pha ciat ni.

Innkuan sung, behlephung sung, le pawlpi a min daisakte hi loin a minthangsakte ihih nadingin thu ngenin i lungsim i pumpi kiap pha ciat ni.

Source :
-        (Rev Dr Kam Khaw Thang’ gelh, Khristian Lamlak Thu Laigil, Kalaymyo: ZCLS, 2006, Pp. 173-176 pan hi a, ZCLS phalna tawh a kiteisawn hi.)


-        Khangno Lamhilh’ laibu.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO HUN A THUPITNA. Agelh ~ Rev. Dr. Kam Khaw Thang Description: Rating: 5 Reviewed By: Cinpu Zomi
Scroll to Top