728x90 AdSpace

Hot
Menu
Zon-ol na Donate

Latest News

KHANGNO KHAT HIKIK ZEN LE’NG. Agelh ~ Rev. Job Thawngno

KHANGNO KHAT HIKIK ZEN LE’NG
Agelh ~ Rev. Job Thawngno
Tahan Baptist Church

Thumasa:
Ka nu ka pate'n ka suahni suahkha a tel loh hangin, 1969 June kha a sangkah ka hih manin, 1963 June pawla suak dingin ka ki-ummawh hi. Kum 47 khawng ka pha ta ding hi. Pasian' na ka sep zong 1986 April 1 pan kipan ka hi a, kum 25 a cingto ka hita hi. Ka damloh zawh bekbek zong 1988 October 17 ahih manin, kum 22 ka cingta hi.

Tua manin ka naupan nop hangin ka naupang lua nawn kei a, ka khangno nop hangin ka sam hong kang pian tamawk hi. Ka sepnop lah nak tam lua mahmahin, khatveivei thum bang pha thei-in, khatveivei nga bang pha thei leng ka ut zen hi. Khatveivei khuamial thei loin vak den mai henla, ihmut suak thei loin kihaksuak den mai leh ka ut hun om tham hi.

Rev Pum Khan Nang tawh lai ka sepnopzia uh tam lua in, ka kikum zel uh a, amah in, "Sia Thawngno aw, mite'n sep ding thei lo, zong sem nuam khol lo, en lah sep ding hau mahmah, sem zo kisa hiau lo, gutate'n a guk nop teng gu man loin a tai veve bangun, i sep nop teng sem khin man lo a, si veve ding hi zen hang!" hong ci zen hi.

Hi teng ka lungngaih ciangin Cope topa pen "mi thum nasep a sempa" akicih bangin mi tampi sep ding gawmkhawm zo in sem zo leng ka ut lua a, khangno khat hikik zen leng ... cih pen ka lungsim sungah hong kilo den hi. Khangno khat hikik zen leng ...

1.     Sunday School ka kah ding hi.
Gol khit ciangin Lai Siangtho sungthu le Lai Siangtho mun kithei zo nawn khol lo a, i neulai-a hong kigen teng le i zak teng mah i khantawnin kiciamteh thei bek hi. Tua manin neulai-in thulela tampi zak ding kisam mahmah a, sin tohtoh ding kisam lua zen hi. Sunday School hoih tak a kahto khat pen Lai Siangtho kum 4 tawntung a sin Dip Th a ngah khat tawh kikim hi, kici hi. Sunday School KG pan Senior dong kah taktak leng kum 15 sawt hi (5x3=15). Lai Siangtho bekbek vial 4 khawng a lumlet suak uh hi.

Tua manin khangno khat hikik zen leng ... Sunday School hoih tak ka kah dinga, hong kigen thulela khempeuh hoih tak ka ciamteh ding hi. Thunget, lasak, sumpi piak, kikhop ... cihte hoih tak ka kisin dinga, siam ding ka hanciam pha mahmh ding hi. Sunday School pan a picing hih ding ka hanciam ding hi.

2.     Pilna ka hahkat ding hi.
Tan 10 dong Tedim ah sang ka kah a, ka ong zo kei hi. Hahkat mawh lo, thei zong kisa mawh lo hita leng ong lo ka hih manin a tung kikah thei nawnlo hi. Namgimtui (zinan) tawh laisim in, hunawng sungah naang ka phan hi. Tuhun bangin Tuition, Boarder cihte bangmah om nai hiau lo hi.


Tuhun ciangin Tuition, Boarder tam mahmah ta a, Cassette, CD, VCD, ... cihte nangawn tawh laihilhna om zo hi. Zaktheih muhtheih laihilh nam tampi om a, nute pate in zong pilna manphatna thei in, tate pilna sin nading deihsakin sumlom pailom zang ngam pha mahmah ta uh hi. Tuition kikahsak ziahziah, Boarder kikoih ziahziah ta hi. Siate zong siam semsem uh a, MC, Engineer, ... cih line hoih tuamtuam kitung ziahziah ta hi. Nidanga lai deih zahin kideihin kihanciam hi zen leh dinmun sangpipi kinak tun lua mahmah ding hi. Nidangin pilna manphatna kithei lo, zong kimu ban lo hi.


Tuhun ciangin haina kisapna om lo a, pilna kisaplohna om lo leuleu hi. Bawlungsiamte nangawn thatang le siamna i sak hang, pilna neite bek in nuntakna-in nei uh hi. Galkap nangawn zong galhanna le thahatna i sak leh pilna neite bek in minleza nei uh a, thau lawn loin Bo le Mang suak zo bek uh hi. Sumbawl paibawlna ah zong pilna neite bek mah in met nading, akip akho ding thei-in, lawhcingzaw tham mawk uh hi.


Gamdang pai veve zong pilna nei lote'n thatang ngaltang suangin sun tawh zan tawh nasem uh a, pilna neite'n a sep leh zong a uk a makai lamin pangin thamangin khasum tamzaw tham lai uh hi. Pil semsem leh nasep ol semsem in, khasum tam semsem zawlai mawk hi.

Biakna sungah zong Pasian' nasem veve Degree sang semsem kideih semsem a, by-law nangawn ah kikoih ciat ta hi. Biakna sungah Mangkam tampi tak kizang mawk ta a, Pastor, Minister, Deacon, President, Secretar y, Treasurer, Solo, Duet, Choir, Meeting, Agenda, ... cihte khempeuh Mangkam manglai hita hi. Pilna tawm a neih kei leh tuhun in Pasian' nasepna zong upna bek tawh uukna bek tawh hi thei nawn mahmah lo ta hi.

Tua manin khangno khat hikik zen leng ... bangbang ka sem nuam ahi zongin pilna mah ka sin masa, ka kan masa photphot ding hi. Hahkat cihtakin ka hahkat dinga, ngimna le tupna nei-in, lai ka simsim mai ding hi. Pilna nei photphot peuh leng bang kim kisem thei, kuama peuh in zong hong deih ding, cih theikholin lai ka hanciam pha mahmah ding hi.

3.     Solfa, Staff notes, Guitor, Keyboard ka sin ding hi.
Sangkahin pilna sin ding teng ka man khit ciang biakna lamah ka kipia dinga, pelh loin Solfa, Staff notes, Guitor, Keyboard, ... cihte sinna theihna ciang bek hilo, siam pelmawh dingin ka hanciam ding hi. Lasa thei bek ka ut kei a, solfa thei le guitor tum thei ka ut lai hi. Lasa thei bek ka ut kei a, laphuak thei le a hilh thei zong ka ut lailai hi. Lasakzia laphuahziate zong ka sin toto ding hi. Maizum loin ka siam mateng a siamte ka dongdong mai ding hi.

Zogam sung bekah Solfa kizangin mundangte ah Staff notes hita ahih manin, Staff notes zong ka siam dong mah ka sin ding hi. Tua banah guitor le Keyborad zong ka sin dinga, siam ding ka hanciam ding hi. Solo sa thei khat in guitor hong tum theih pen etlawm mahmah a, Keyboard tum thei lailai leh etlawm zawkan lai hi. Lasak theih bek sangin ala zong lotngah, notes tawh pia thei ziahziah, Music tuamtuam tum thei cih pen tuhun tawh akituak hi pan mawk ahih manin, tua ciang dong ka hanciam ding hi.

4.     Computer, E-mail, Internet zatzia ka sin ding hi.
Tuhunin hih leitung tawh ki-levelin i nuntak nop leh pelh loin Computer, Internet, E-mail, Fax, .. cihte zat siam kul mawk ahih manin pelh loin ka sin dinga, siam loh theih lohin ka hanciam ding hi. Tua ban ah Computer neih ding ka hanciam lai ding hi. Nipi kal khat khatvei internet ka tu ding hi.


5.     Tua ban ah
a.     Lawmhoih tawh ka kikhawl bek dinga lawmhoih lo ka pelh ding hi. Lawmhoih lo in hong siatlawh a, hong lawhbaih mahmah lai hi.
b.     Video, TV cihte akilawm bangin ka en dinga, mitsiat nading le gamtat hoih lo namte bel pelh theih bangin ka pelh lua ding hi.
c.     Kampau ka kidawm mahmah dinga, mi ka mawk gensiat, ka ko kei ding hi. A khangno lai a mot paupaute a gol ciangun daupai ka sa het kei hi.
d.     Paktatna peuhmah ka zang het kei ding hi. Tuhun ciangin paktatna tam mahmahin natna zong tam mahmah ahih manin ka kidawm ding hi. Paktat lohna lamah Josef ka etteh dinga, nekledawn ah Daniel ka etteh lian ding hi.
e.     Hun zahtakna ka nei mahmah dinga, nai khat bulhin tua bang lianin ka zang ding hi. Khangno lai-a hun zahtakna a nei lote a gol ciangin a zah tampi-in zekai uh hi.
f.      Ka zi/pasal ding thungetna tawh Pasian apin, a tawm penpen kum 3 bang a zia a tong ka en masa phot ding hi. Minam kibang, biakna kibang le dinmun kibang, nute pate hong itsak ding, mihoih ka sawm hamtang ding hi.
g.     Ka nu ka pa thu ka mang dinga ka simmawh het kei ding hi. Nu le pa simmawhte a daupai om kasa kei a, kamsiatlawh ciat mai uh hi.
h.     Khut le khe zang loin, kuamah tawh zong ka kitawng het kei ding hi. A khangno lai-a a kisimmawh khatpeuh nidang ciangin muanlesuan suak mawk thei a, kimaizumkik ngiau thei hi. Migitlam ka tum ding hi.
i.       Zuau in a khap tawn ahih manin zuau ka phuak ngei kei dinga, thumaanna le cihtakna ka nei hamtang ding hi. Hih pen kampauna le ka gamtatna tawh ka kilangkhiasak ding hi.
j.       Ka neulai-a kipan nuntak nading, sep ding bawl ding, ngimna le tupna nei kholin, tua ciang ka tun mateng ka hanciam tentan ding hi.

Gengen ni cile’ng gen ding tam lua ahih manin, tu-a tan tawh hialbawl phot ni. Lungdam hi.

Source ;
Khangno Lamhilh’ Laibu.

Theih ding : Nambatpi 2 tak laimal kim lo ahih man in hong guang thei nai lo hi ung. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

  1. Thupi mawk ei, Sya Job Thawngno pen bel, hi khangno khat hikik zenleng tawh aki zui in Khangno le Thal tang acih pen hoih phadiak sa ing. Topa thupha hong piaksak hen.

    ReplyDelete

Item Reviewed: KHANGNO KHAT HIKIK ZEN LE’NG. Agelh ~ Rev. Job Thawngno Description: Rating: 5 Reviewed By: Cinpu Zomi
Scroll to Top