728x90 AdSpace

Hot
Menu
Zon-ol na Donate

Latest News

SUKTE BEH PIANKHIATNA

SUKTE BEH PIANKHIATNA

Photo Credit : Gin Kim Mang

            AD 721 kum Tazekhittaza khua pan Pyu, Kanyan, Tet minampi thum in a kikhen uh ciangin pawlkhatte Nyaungoo gam ah lokho in nateeng uh hi. Nikhat ni-in Pagan kumpipa Tinko sabeng dingin gamsung ah pai a, Nyaungoogam atun ciang agil kial lua mahmah ahih manin, Tet (Chin) te khawhna lolai a, tangmaigah lo in aneeksak hi. Loneipa in Tinko pen kumpi ahih lam theilo in “Banghangin ka tangmai gu-in hong neeksak na hiam?”  ci-in asatlum hi.

Kumpipa nungzuipa Myinkhan in loneipa kiangah “Kumpi thatte kumpi asuah ngeina om bangin kumpi suak dingin hong zui-in” ci-in asam hi. Loneipa in zong zuipah a, Pagankhua atun uh ciangin loneipa (kumpi thatpa) kumpi puan silhsak in kumpi hong suak hi. Lokhopa kumpi asuah ciangin amin Nyaungoo Sawrahan kiphuak hi cih thu, Hmanna Yazawun Volume 1, laimai 227 ah kiciamteh hi.

AD 932 kum Nyaungoo Sawrahan in kumpi hong sep ciang Biakna nasia takin hong puahpha hi. Tua hun lai-in Kawlgam khanglam ah Buddhist upna omkhin a, Shwedagon tattung zong kilam zo hi. Kawlgam saklam tengah India, Bengal, Tibet leh Chinagam te panin upna tuamtuam zong hong lut hi cih thu Daw Thein gelh “A Concise of Burmese History”  sungah kiciamteh hi.

Tibetgam panin Tung kici Dawibiakna, Assamgam pan Naga (gulpi) biakna, Chinagam panin Azikyi upna tuamtuam hong lut hi. Nyaungoo Sawrahan in Tazekhittaza khua a lilam tattungte etteh in, Dawi lah hilo, Pasian lah hilo milim pawlkhat abawlsak hi. Azikyi upna thupi aspen ahih manin gamsung khempeuh ah Gampi, Gunpi, Mualsangte na bia uh hi. Nyaung Sawrahan kumpipa in atangmai lo ah milim 5 bawl a, tua milimte maiah zu, sa, an tuamtuamte tawh na bia hi. Tua biaknate khempeuh Anawrathasaw kumpi hong khan ciang hong phiat a, ahi zongin Kawlgam, Zogam mun tuamtuam ah tua upnate tu dongin kimu thei lai hi.

Nyaugoo Sawrahan in Tinko (athat luppa) nau nemei thumte zi-in a nei hi. Azi upen gilsung ah Kyisoe khakua aphak laitak, azilai gilsung ah Sukte khaguk aphak laitak in Nyaungoo Sawrahan in sihsan hi. Nyaungoo Sawrahan kum 45 aphak laitak in kumpi sem a, kum 33 sung kumpi a sepkhit ama kum 78 a phak ciangin asi hi. Nyaungoo Sawrahan asih khit khal khat sung Sol (Leitung) 8 kibuptuah in, Pagan kumpi innsung ah Ngalkhawhang (Dawi) laangin khemden hi cih thu leh, atangmai ciinna Nyaungoo mun lo min tapin Nyaungoo Sawrahan kici hi cih thu Hmannan Yazawun Volum 1, laimai 227 ah kiciamteh hi.


Nyaungoo Sawrahan a sih ciangin Kwansaw Kyaungphyu in kumpi sem a, Nyaungoo Sawrahan zite luah in ateen pih hi. Kwansaw Kyaungphyu in azineu pen tawh tapasal khat nei a, Anawrathasaw a phuak hi. Anawrathasaw asuah hun in Kyisoe leh Sukte tangval ta uh ahih manin Biakna innte phatak in a puahpha uh hi. Nikhat ni-in amau unau lungkimna tawh a pasel Kwansaw Kyaungpyu kumpipa pen kumpiza nusia a, Yahan suak dingin na zolkhia uh hi.

Kwansaw Kyaungpyu Yahan asuaksak khit AD 987 kumin Kyisoe in kumpi a sem hi. Sabet uuk ahi manin Chindwin gungei Bancihse gam ah buuk khat lamin, tua munah sazuk beng dingin a paizel hi. Nikhat ni-in midang sazuk bengpa khat in sazuk sihzuan, a pan laitak in Kyisoe vapai kha a, sazuk in Kyisoe amuh ciang lau in atai hi. Sazuk pang-a om sabengpa in Kyisoe amuh ciangin kumpi ahihlam theilo, hehlua mahmah ahih manin thal tawh a kaplum hi. Kyisoe asih ciangin Ngalkhawhang in nuikawmsa in Pagan kumpi-inn khalang sung leisektang tawh deng den hi cih thu Hmannan Yazawun volume 1 sungah kiciamteh hi.

I. PU SUKTE KUMPI SUAHNA
Kyisoe kumpipa asih ciangin anaupa Sukte in kumpi hong sem hi. Pu Sukte in kumpi hong sep ciangin a gamsung hoihtak in puahto a, gamnuam gampha asuahsak laitak in anuneu Anawrathasaw nutawh hong kiteng uh hi. Tua hun in Anawrathasaw teitang khin a, anu leh Pu Sukte kiteen along kimlohna thu apa Kwansaw Kyaungpyu kiangah agen hi. Tua ciangin apa in “Ka ta aw, Popa gam a ka khah ka dawisakol hih kazungbuh lak lecin namanzo dinghy, tua sakol tung tuan nasiam khit ciangin, Dawi kiangpan kangah hih ka lum leh ka teite tawh Sukte sim-in” ci-in thu amuam hi.

Apa thumop bangin Anawrathasaw in sakoltung tuan asiam khit ciangin Pu Sukte kiangah kamtai khat sawl a, “Na kumpiza hong piazaw ding na hiam; ahih kei leh kisim zaw ding i hiam” ci-in dongsak hi. Tua thu azak ciangin Pu Sukte in “Zanmahmi kamsung nawigim theng nailo khatin hong ngap nahih leh eitegel kisim ni”  ci-in kisimna ding mun leh ahun ding a vaikhak pah hi. Tua thu Anawratha in a zak ciangin lawptakin a kisim ding hun ngakin a om hi.

A kisim ding niciam hong tun ciangin Pu Sukte lawplua ahih manin kisim nading nunah apai pah hi. Anawrathasaw zong apa piak dawigalhiam tawi-in dawisakol tung tuang a hongpai, Pu Sukte in amuh ciangin vadawntuah hi. A kisim nading mun Tamathilui hong tun uh ciangin, Anawrathasaw in Pu Sukte kiangah “nang upazaw nahih manin nang hong khawh masa in”  a ci hi. A cih bangin Pu Sukte in a teipi tawh akhawh leh ateipi paisuak lo-in ama tuanna sakol lu ah akiasuk hi. Tua ciangin Anawrathasaw in Pu Sukte kiangah “Nanghun beita in kei hun ding hi limtakin na kiging in” acihkhitteh a teipi tawh a khawk leh Pu Sukte tuanna sakol khawhlim ahih manin, Pu Sukte atuanna sakoltawh ken ah akia suk hi. Tua akiat namun pen Myinkaba ci-in kiminvawh a, tu dongin kimuthei lai hi, cih thu Pu Vung Za Kham taangthubu ah kiciamteh hi.

II. PU SUKTE CHITTAGONG TUNNA
Pu Sukte a sakol tawh lui dung a kiat ciangin Anawrathasaw sim kik nawnlo a, kumpiza akia hi. Pu Sukte kum 28 aphak in kumpi sem a, kum 25 sung kumpi a sepkhit ama kum 53 aphak laitak in Anawrathasaw alelh ciangin a nungzuite tawh AD 1044 kumin gal tai a, Chittagongkhua a tung hi. Chittagongkhua a teensung un Shindus mi Neih Tong tawh  a kiteeng uh hi. Tua khua ah sau veisim ateen khit uh ciangin a nungzuite tawh hong lal kik uh a, Zogam Saizangkhua huam Cimnuai hong tung uh hi, cih thu Dr.Neihsial Tual Cin Ph.D. gelh “India Kawlgam bul a, Singtaang mite Dinmun”  laibu leh Pu Vung Za Kham taangthubu sung ah na kiciamteh hi.

Zomite in 5th century (kum zalo 5) pawl in China nisia in Kawlgam hong lut uh hi. Kawlgam pan khen thum in kikhen khia kik uh a, khen khat Indiagam (Manipur, Mizo District, North Cachar hills, Tripura) ah teng uh hi. Khenkhat te Pakisatngam (Chittagong hill tract leh Arrkan) ah teeng uh in, khenkhat te Kawlgam ah teeng ciat uh hi, ci-in Vung Do Thawng B.A.(Hons) gelh “Singtaang mite Khangthu”  1963 laimai 4 a ciaptehna tawh kizui-in Zomite India Kawlgam leh Pakistangam sungah a teenna uh ki mu hi.

III. PU SUKTE MUALLENG KHUA TUNNA
Pu Sukte, azi leh anungzuite tawh Cimnuaikhua ah tawmvei sung ateen khit uh ciangin tuhun a Suangpheigam Mualleng khua ah hong lal leuleu uh a, tua khua ateng sungun tapa khat nei a, amin Sukzo aphuak uh hi. Pu Sukzo aneu lai-in apa Pu Sukte in asih san hi. Pu Sukte asih ciangin azi Pi Neihtong in, apasal Pu Sukte Pagamkumpi sem in, aliat aphatna anuai a bangin la a phuak hi.
            (a) Phul e phul e, Neihtong phul e, pal e pal e Neihtong pal e,
            (b) Neihtong na innphal lei lua lai keu, phualva namei pha leilua lai am; na ci hi.
Pu Sukte hong sih khit ciangin asuan akhakte in apu min la-in, Suktebeh kici uh hi.

IV. PU SUKZO BANGZANG KHUA (MUALBEM GAM) TUNNA- AD 1150 KUAM
Muallengkhua ateen hun sung un apasalte un Meiteigun kan tan in Bangzanggam sungah thaang siahin a paizel uh hi. Amat uh zusa le vasa sungkuate leisung ah phum in tua mun ah Baal atuh uh hi. A paikik uh ciangin a baal tuhte uh lutang cia cia apha hi. A ciah uh ciang baal apua uh hi. Inn a tun uh ciang azi at ate un tua baalte gol sa lua ahih manun tua baalciin-na mun ah teeng le hang ankham in nuam sa mahmah ding cih ngaihsutna tawh Bangzang zuan dingin Muallengkhua pan na lalkhia uh hi. Pakzang khualu Tumangkhua ah tawmvei sung aom khit uh ciang Bangzangkhua atung uh hi. Bangzangkhua ateen sungun Pu Sukzo leh Pi Khuang Ban a kiteeng uh hi.

V. KHUALUI (MUALBEM GAM) TUNNA – AD 1200 KUAM
Pu Sukzo te innkuan a nungzuite tawh Bangzangkhua pan Seekzang, tuapan Khualui ah na lal kawikawi uh hi. Khualuikhua ateen sungun Pu Sukzo in ta pasal khat nei a, amin Mang Cin aphuak hi. Khualuikhua ateen sungun ankham in nuamsa mahmah uh hi. Nisim in zu le sa tawh kidiah in lokhawh singpuak ding nangawn phawkkha lo uh hi. Tua bangin zule sa tawh nuamsa in a om uh, nikhat ni-in Gitta in inntual Tonmung tungah tangvui tuah a aom, a muh uh ciangin lohon hun a hih lam aphawk pan uh hi.

Lopawi hun hong tun kik ciangin taang ahum a i vawh ciang ahum mahin pianga, i sukna hamsa lua hi. A tangsa in vawh lehang a tangsa in hong piang dinga, suk kul nawnlo ding cih ngaihsutna tawh, atangsa in avawh uh leh an ahau lai ve ve uh hi.

A kumkik lo pawi hun ciangin taang atangsa a i vawh hangin ahum mah piang ve ve ahih ciang, nganhul sa in vawh le hang, atangsa in hong piang ding cih lametna tawh nganhuansa in a vawh uh leh taang po neilo in a zawng uh hi.

An neekding a neihloh uh ciangin an zong dingin kikhenthang uh a, pawlkhat te meiteigun lam zuan in tuaksuk uh a, gun pan sakhingawng mual zuito in Saizanggam Cimnuai a tung uh hi. Mi hong tam ciang anneek tuidawn kicing nawnlo a, pawlkhat tu laitak Saizang buzungdeek gamsai omna mun ah teeng uh ahih manin Sihzangmi kici hi. Pawlkhat te Saizanggam sih omna ah teeng uh ahih manin Saizangmi kici hi. Pawlkhat te Lamzanggam Losau ah teng uh ahih manin Losaumi kici hi. Mualsang lam zuan a, apaikhia te Zote kici a, Khulpi zuan a apaite Thahdomi kici hi. Pawlkhatte Pangsak gam Temtah mualdung zui-in lal khia uh a, tua mite Hualngomi kici hi.

VI. TEIZANG KHUA (MUALBEM GAM) TUNNA – AD 1350 KUAM
Tua bangin anneek ding aneih loh hun ciang Pu Mang Cin leh apawlte an zong dingin khualu lam zuan un apai uh hi. Aisa sawkkawm in apai pai uh leh, zaangtam munhoih khat tung uh a, tua mun ah khuasaat in ateeng uh hi. Tua mun ah Teising tampi po ahih manin tua khua pen Teizang khua kici a, tua khuamite Teizangmi kici hi.

Tua hun in Mualbemkhua na omzo a, tua khua ah Sinte, Pante, Kawngte, Hualzong leh Khupsonbeh te a teeng uh hi.

Teizangkhua ah lokho gankhawi tawh nuntak nuamin na nungta uh hi. Tua khua a teen hunsung Pu Mang Cin leh Pi Za Nei te in tapa khat nei uh a, amin Mang Tun aphuak uh hi. Tua khua a teen hun sung Pu Mang Tun leh Pi Mun Ciin a kiteng uh hi.

Source :
Sukte Beh leh Tedimgam Tangthu (Laibu).
Khenpi II.

Zomi eLibrary / Laibusaal in Hanciam in aki tei/type kik ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SUKTE BEH PIANKHIATNA Description: Rating: 5 Reviewed By: Cinpu Zomi
Scroll to Top