728x90 AdSpace

Hot
Menu
Zon-ol na Donate

Latest News

KILAWMTATNA (Fellowship). Agelh ~ Kap Za Khai (Photoh)

KILAWMTATNA (Fellowship)
Agelh ~ Kap Za Khai (Photoh)


Kilawmtatna cih kammal pen a khum mahmah khat hi a, kipawlkhopna sungah zong a kizang mun mahmah kammal hoih khat ahi hi. Kilawmtatna in kipawlkhopna, sepkhopna, kithutuakna, gualzawhkhopna hong pia thei ahih manin thupi mahmah hi. Kilawmtatna hangin a kithei ngeilote bang kitheihlawh hi. A kimu ngeilote bang kimuhlawh, kimeltheih lawh uh hi. Lang khat lang khat hong kitelsiamsak lai hi.

Kammal A Khiatna
Lai Siangtho kigelhna Greek lai in kilawmtatna kammal pen koinonia kamml kizang hi. Hih kammal akhiatna pen mikang lai-in “communion, fellowship, sharing in common, leh partake” cih hi. Khristian zia bang hileh Khrih sungah hawmkhopna, nuntakna khopna cih hi a, innkuan bang hileh innkuan sungah neih bangbang tawh nekkhopna, sepkhopna cihte ah kizang hi.

Ngimna
Kilawmtatna ii ngimna in, kha thu in hileh Khrih leh thu-ummite kipumkhat nading ahi hi. Thu-ummite kilawmtatna zong thu-ummite khat leh khat kipumkhat in, lawng khat sungah luang khawmin, Pasian’ gam tangzai semsem nadingin semzawh nading ahi hi. Khat leh khat lungsim kitel nading, i deihna kitheih pih nading, sepzia bawlzia kithei semsem bek tham loin sepzawhna tha kibehlap nading cihte zong a ngimna ahi hi.


A Thupitna
Pasian Minthan nading:
Kilawmtatna pen Pasian mahmah in a bawlkhiat kizopna thupi khat ahi hi. Mihingte Ama’ limlemel sunin hong bawlna tawh ei leh amah kikal kilawmtatna hong nei bek tham loin, Pa, Ta, Kha Siangtho cih thumgawm Pasian khat ahihna tawh Amau kilawmtatna hong lakkhia hi. A Tapa Jesuh mawhneite hong tatkhiat sakna tawh Amah leh eite kikal ah kilawmtat hong bawl hi. Pasian in kilawmtatna tawh Ama’ deihna le ngimnate hih leitungah na hong sem hi. Hih bang ahihna khempeuh pen ama minthan nading ngimna ahi hi (Jn. 17: 20-23; 13:34-35).

Ei leh ei kisam ihih manin:
Kitangsapna bekbek tawh kidim mihingte ihih manin khat leh khat i kisam den hi. Pasian in eite hong it in, ama ading kisam hong sak bangin, eite in zong Pasian mahmah kisam den bek tham loin Ama hong kepcipna leh thupha piakna i kisam hi. Jesuh Khrih’ thukham thak ahi, Pasian pen lungsim khempeuh, nuntakna khempeuh leh pilna khempeuh tawh it ding leh i pumpi i it bangin i vengte it ding (Matt. 22:37-39; Mk. 12:30-31; Lk. 10:27; Rom. 13:9) cih in; ei leh ei kithapiak nading, Khrih kiangpan i pialkhiat loh nading, i lungkiat thanem hun in kithuakpih, kitheihpih nading, khat leh khat Pasian’ limlemel kilakkhiat nading ahi hi (Efe. 4:4, 11-16; 25).

Kuate tawh Kilawmtatna Bawl Ding
Pasian tawh:
Andrew Murry in a genna ah, eite in mite tawh kimumu loin kong khakcip in Pasian tawh kilawmtatna bawl ding kisam ci hi. Topa Jesuh zong leitungah a nuntak sungin nisim in a Pa tawh mimal kilawmtatna nei den hi. Tua mah bangin eite in zong i biak Pasian tawh nisim in kilawmtatna i neih ding thupi hi. David Brandnard in zong, Pasian tawh nai khat sung hunlakna pen hih leitunga nopna khempeuh sangin tehzawh loh in manphazaw hi na ci hi. Pasian tawh kilawmtatna pen leitungah a manpha penpen ahi hi. Pasian tawh kilawmtatna loin leitungah lungnopna, kha muanna, daihna, gualzawhna leh lawhcinna om thei lo hi. Pasian mahmah in zong leitung mite amah tawh kilawmtatna bawl ding pen a lunggulh pipen hi ding hi. Tua manin a Kha Siangtho hong buasuk hi (Sawl. 2:8). Jesuh min zong Emmanuel ci-in eite tawh hong om khawmsak ahi hi. Topa Jesuh mahmah in zong vantung a kah ma-in a mite kiangah, hun bei dongin note kong om pih ding (Matt. 28:20b), ci-in a vaikhakna in amah leh a mite a tawntungin kilawmtatna nei a hihna hong lakkhia ahi hi. Tua ahih manin eite hong bawl Pasian tawh ahi zongin, i mawhna pan hong tankhia Jesuh Khrih tawh ahi zongin, tuni dongin hong ompih leh hong makiah den Kha Siangtho tawh ahi zongin nisim in kilawmtatna bawl den ni. Topa tawh kilawmtatna pen amah a zahtakte ading hi a, a thuciamna amau tungah kitheithangsak hi (Late 25:14).

Thu-ummite tawh:
Pasian tawh kilawmtatna bawl bek tham loin Pasian a ummite tawh zong kilawmtatna bawl ding thupi hi. Topa Jesuh in thukham a lianpen nihna a genna ah “nangma pumpi na it bangin vengte na it in,” cihleh “keimah in note kong it bangin note zong khat leh khat na ki-it un” a cihna in thu-ummite khat leh khat kilawmtatna neih den ding hong deihna ahi hi. Mother Teresa in, thu-ummite pen thu-ummite mah tawh kilawmtatna neih huai ahih manin hunpha a om laitak kilawmtatna nei un, na ci ngei hi. Paul in zong, Thesalonika thu-ummite kiangah,... tu laitak-a na omzia uh mah bangin khat leh khat kihanthawnin na kihuh ciat ta un (1Thess. 5:11), ci hi. Thu-um masate zong thusin khawm, kikhawl khawm, an ne khawm, thungen khawm cih bangin khat leh khat kilawmtatna na nei uh hi (Sawl. 2:42; 1:14). Rick Warren in Pawlpi khantoh nading a kisam thupi nga a genna sungah ‘kilawmtatna’ zong kihel hi. Tua ahih manin tuhun ei thu-ummite in zong khat leh khat kilawmtatna i neih den ding a thupi leh a kisam ahi hi.

Kimlepaam tawh:
Singkung, ganhing leh mihingte in Pasian’ inn vanuai leitung tengah a kizop diamdiamna thu pen kimlepaam (Ecology) hi ci-in Dr. Do Sian Thang in pulakkhia hi. Kimlepaam pen mihingte tawh kilawmtatna nei dingin Pasian bawl ahi hi. Tua ngimna tawh Pasian in leitung leh mihing hong bawl ahi hi (Pian. 3:23). Pasian in Adam pen Eden huan kho-in a kem dingin a koihna in mihing leh kimlepaam kilawmtatsakna ahi hi (Pian. 2:15). Leitang zunlo, kimlepaam kep lohna pen Pasian’ bawlsa suksiatna hi a, amau bawlpa Pasian thusim loh lahna hong suak hi. Kimlepaam tawh kilawmtatna in Pasian lungsim muhna hi a, i nuntakna nopsak khuasuah nading zong ahi hi (Rom. 1:20a).

A Phatuamnate
Pasian’ zia hong telsak:
Pasian pen itna ahih bangin Thumgawm Pasian hihna sungah Pa, Ta, Kha Siangtho kilawmta den bek tham loin leitung mihing thu-ummite tawh zong hong kilawmta den uh hi. Thumgawm Pasian hihna in amau mahmah kilawmtatna Pasian ahihna uh hong lahna ahi hi (Matt. 3:16-17; Jn. 16:5-8; 2 Kor. 13:14). Tua mah bangin ei thu-ummite khat leh khat kilawmtat denna in i biak Pasian’ zia bangin tatna leh zuihna hi a, hih hangin i biak Pasian’ ziate thu-umlo mite’ mu ding ahi uh hi. Jesuh Khrih hong sawl bangin leitung adingin ‘ci bang alna leh khuavak bang tangna’ ahi hi (Matt. 5:13-16; Mk 9:50; Lk 14: 34-35).

Nuntakna ngah:
Pianthakna cih pen mawhna tawh kikhenkhia in, Topa Jesuh tawh kilawmtat ding khentatna tawh Jesuh Khrih upna hi a, Pasian hong hehpihna hangin upna tawh Khrih’ hong piaksa tawntung nuntakna ngahna ahi hi. Mawhna hangin Pasian tawh a kikhensa mihingte Topa Jesuh in a sisan tawh a Pa leh mawhnei mite kikal ah palai semin hong kilawmtasak kik ahi hi. Pasian in mihingte a Tapa hong sawlna tawh kilawmtatna hong neih bangin, Jesuh Khrih in zong a Pa’ sawlna mangin a nuntakna kipiakna tawh Pasian leh mihing kikal ah kilawmtatna hong piakik ahi hi. Tua mah bangin Pasian’ itna thei a, Topa Jesuh umin thumgawm Pasian tawh kilawmtatna a bawlte khempeuh nuntakna thupha a ngah ahi hi.

Deihna kitheiteek:
Kilawmtatna neihna in Pasian tawh aihleh Pasian’ deihna hong theisak in, mihingte tawh aihleh mihingte’ lungsim puakzia leh a deihna uh hong theiteelsak hi. Khat leh khat kitheihteelna hangin ki-itna, kideihsakna, kihehpihna hong piangsak a, khat leh khat kilungkimna zong hi pah hi. Khat peuhpeuh ii lungsim puakzia, a deihnate theihtheih nadingin a baih pen lampi in amah kilawmtatna ahi hi.

Kipumkhatna pia: Kipumkhatna pen kilawmtatna gah hi a, kilawmtatna hoih in kipumkhatna kip hong piangsak hi. Thu-ummite khempeuh Pasian sungah kilawmtatna in Khrih’ pumpi ahi Pawlpi cidamsak, khangto sak bek tham loin Khrih leh thu-ummite hong kipumkhat sak mahmah hi. Thu-ummite kilawmtat denna in zong Pasian’ gam tangzai nadingin a kisam kipumkhatna thaguipi hi a, kipumkhatna tawh haksatna khempeuh kigualzo thei hi.

Sepzawhna pia: Nasep khat peuhpeuh khatgia bek sep sangin kilawmtatna tawh kipawl khawmin sem le’ng sepzawhna tha zong khawh in kigualzo baih hi. A diakdiak kilawmtatna hangin zong nasep haksate sep dan ding leh sepziate hong theisak hong mukhiasak hi. Tua hangin company-te ahi zongin, kipawlna khempeuh in nasep kipat ma-in meeting tukhawm ahi hi. Tutkhop, kikhawlkhopna tawh pilna leh theihna tampi kingah a, sep theihna leh sep zawhna tha zong tampi kingah ahih manin nasep haksa kici khempeuh ol takin a kisem zo ahi hi. Kilawmtatna in sepzawhna tha hong piangsak taktak hi.

Kilamsak:
Kilawmtatna hangin khat leh khat a kithei ngeilote hong kitheisak in, hong ki-itsak in, hong kipawlsak in mihing kipawlna hong kilamsak thei hi. Mun tuamtuam ah kibawl kilawmtatnate panin kimu a, kingai in a kiteeng nupa khop tampi ki-om hi. Tua bangin na a semkhawm company tampi om hi. I gensa mah bangin Khrih’ pumpi ahi Pawlpi cidamin picinna ah a kilamsak zong thu-ummite’ kilawmtatna hang ahi hi. Tua bangin kilawmtat in hong kilamsak ahi hi. Thukhun le ukzawhna tawh aana in mite ukna sangin itna bulphuh in kilawmtatna tawh ukna gam kilamsak zaw hi.


Kilawmtatna pen Pasian leh mihingte kikal ah ahi zongin, mihing leh mihingte kikal ah ahi zongin, mihing leh kimlepaam kikal ah ahi zongin neih loh a phamawh, a thupi mahmah kammal, tatna leh zuihna thupi khat ahi hi. Kilawmtatna loin mihing kipawlna sungah nasep khopna, geelkhopna, daihna leh gualzawhna kingah thei lo hi. A diakdiak in Pasian tawh kisai thute ah kilawmtatna loin piangthei lo hi. Tua ahih manin eite in kilawmtat thute lim ngaihsun in thupi sa-in, Pasian tawh ahi zongin, khat leh khat ahi zongin, kimlepaam tawh ahi zongin nisim in lungsim takpi, itna takpi leh utna takpi tawh kilawmtatna bawl den, nei den ni.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KILAWMTATNA (Fellowship). Agelh ~ Kap Za Khai (Photoh) Description: Rating: 5 Reviewed By: Cinpu Zomi
Scroll to Top