728x90 AdSpace

Hot
Menu
Zon-ol na Donate

Latest News

KISIK HET KENG -MIT ka kah lai-. Agelh ~ Rev. Khoi Lam Thang

KISIK HET KENG
-MIT ka kah lai-
Agelh ~ Rev. Khoi Lam Thang



Thu patna
A thulu ding “Kisik het keng” bulh photphot dih ni. MIT (Myanmar Institute of Theology) a BD (2001 kum in M.Div tawh laih) ka kah lai (1990-1993) thu pawlkhat hi. Ahih hangin sang ahn sunga ka sin Pasian’ thuthukte hi lo hi. Sang siate’ hong hilh Pasian’ thugilte zong hi lo hi. Sangkah kawma ka ngah beh ka kisikloh thute hizaw hi. A masa pen in Yangon-Insein a sang ka kah khak limlim ka kisik hetloh a khatna hipah hi. Tua banah ka sangkah sung ka nuntak ka khuasakzia ka lungngaih kikkik ciangin, keilekei kihawmthawh a ‘lawmlawm’ ka kicihna tampi kawmkal ah thu pawlkhat hangin lungkim in, ka angtan khiinkhian pawlkhat zong om veve hi. Tua bang thute siksan in kisik het keng a ci ka hi hi. Pan sukpah leeng:

1. Yangon - Insein ah BD ka kah khak kisik het keng
A masa in Yangon - Insein a om MIT ah sang ka kah khak limlim hampha kisa ing. Clark Theological College - Mokokchung pan B.Th ka zawh phet in BD kah ding ka kithawi pah hi. Field Experience a tawm pen kum nih kisam ahih manin Pawlpi ah hong ciah phot ka hi a, tua hi kei leh Pune a om UBS ah sang kah nading ngetna lai ka khiat khitsa ahi hi. Ahi zongin Kawlgam kong tunkik ciang, ka lungsim hong kihei in, Yangon-Insein ah MIT kah ding bekbek ka ut hi. 1988 kum in MIT kah ding ka hanciam a, vai tuamtuam hangin lemtang nailo in ka dinkhawlkik hi. Pasian ka ngaklah den zel a, ahih hangin amah zekai ngei lo hi. 1990 kum ngawngaw ciangin kah theih nang phalna ka ngah hi. India sang pan MIT a kah masa pen hi dingin kilamen ing. Tua ci zah a Yangon-Insein a om MIT ah ka kah nopna thute in:

1.1 Kumpi’ khua sungah kum 3 sung a tengkha hi ding:
Yangon pen Kawlgam Kumpi makaite’ tenna khua hi a, tua khua ah kum 3 sung sang kah leng, kumpipa tawh khuakhat ah kum 3 sung a tengkhawm hi mawk ding cih pen thupi ka sak mahmah khat ahi hi. Insein pan khuapi sung zuan a vTwfawmf innpi mai khawng Bus 48 tawh ka kantan vangvang ciang, kuama theihpih lohpi in ka nui hiiuhiau den hi. Mimal kimuhpih ngei loh leitung kumpite hizahta a, thupi ka sak dihdih: i Topa le i lawm a hi Jesuh Kumpi tawh nikhat ni caing khut kilen ding, vangam nuam ah a tawntung mangkhawm ding bangzah in a nuam zentam!

1.2 Kawlgam ading kongpi ahi Yangan ah tualtel ding:
Yangon khua ah tualtel mahmah ding kisam hi cih ka ngaihsun hi. Bang hang hiam cih leh Yangon pen Kawlgam a ding kongpi ahi hi. Khuamuh nading sangkil ahi hi. Tua hi a mite in Yangon khua sung Bus nambat khawng gen ziahziah dingin ei’n thei kilkel lo ding cih pen khankhat ah khangkhat a zekai bangin ka ngaihsun hi. Mite in tif;pdef? ajreDukef;? ausmufajrmif;? ql;avbk&m;? yef;qkd;wef; khawng a gen uh ciang ka mitkha ah a luai pah zuaizuai ding ka utpi khat ahi hi. MIT ah sangkah leng tua ka sunmangte a tangtun bek dingin ka ngaihsun hi. Kum thum khitciang khuasung tualtel ding a haksa mahmah lam ka phawk pan hi. Ka muhkhak thute bek thei in, ka totkhak zawi bek a zui thei ka hi hi. Ka theih nailoh thu tampi a om lam ka phawk hi. A phual ah om leng kinei a, a om lohna phual ah a haute nangawn in neilo hi cih thu zong ka phawk hi.

1.3 Kawlgam sung Pasian naseppih khangual tampi tawh kithei ding
Khan in gual nei kici hi. Lawm hoih i cih sumlepai tawh leitheih hilo hi. Tua ahih manin minampih le minamdang Pasian naseppih khangual tampi neih ding hamphatna khat a ka ngaihsut ahi hi. Tedim gam khuata mikhat a dingin mun tuamtuam pan lawm tampi neih ding pen a ollo thu ahi hi. Falam Lai Siangtho sang ka kah lai in Zogam mun tuamtuam pan sangkahpih lawm tampi ka nei a, ZBC makai tampi ka thei kha hi.

Tua hi a, MIT ah kum 3 sung sang kah leng Kawlgam mun tuamtuam pan lawmlegual tampi nei kha ding, tua ka lawmte nikhat ni ciang ka naseppih hong suak ding cih ka ngaihsut ciang MIT ka kah nopna khang hanhan hi. Khangluite in “Sakhi in a tat nang kuamkua a khual” a cih dan in ka ngaihsun hi. Kawlgam mi Kawlgam sunga Pasian nasem ding khat in Kawlgam sunga khanpih Pasian nasem tampite tawh kitheih ding pen thupha taktak hi ding ci in ka lawp mahmah hi.

Tua ban ah Yangon a om MBC, MCC makai tampite a mau hong theihtel loh hangin ke’n ka theih khak khinkhian ding ka ut mahmah thu ahi hi.

2. Pasian ka muanna le Ama nasem ding a ka ki-apna kiphungvuh hun ahi hi.

Leipi Pawlpi ah hunbit Pasian nasem, Pawlpi in khasum bit tawh sangkah ding a hong sawl ka hi hi. Pawlpi mite tawh nuamkhawm dahkhawm, sunlezan manlahna nasepna pan MIT ka kah ciangin a tawlnga pak bangin ka kingaihsun hi. Ahih hangin sumlepai thu ah ka buai mahmah hun ahi hi. Hih bang kawmkal pan hih hun sung pen Pasian ka muanna leh Ama nasem ding a ka ki-apna zungthuk a khak hun hi ci in ka ngaihsun hi.

2.1 By faith cih ciang Bingphut (fut) cihna:
Pawlpite hong piak khasum pen innah ka nu ka pa le ka naute zantaakan dingin ka nusia hi. Tua ahih manin ka sangkah nading sum kisam pen Pasian le thu-ummite muanna tawh phuttawm ding hong suak hi. Tua sawnsawn ah sangkah ding a ka kuankhiat ding petmah ciangin bangkua vai sum leiba 30000 (tul sawm thum) val thu hong kikausiphum dihdih hi. Ka vai bing a, ka mai khing hi. By faith cih ciang Bingphut (fut) a hihna kumthum sung ka sin hi. Ningani (Friday) sim pen kuamah ka gen loh antan thungetni ahi hi.

Pasian in ka sangkah sung khempeuh sum kisapna hangin hong bakvatsak lo hi. Hong zawttawm sak ngeilo a, hong giautausak ngeilo hi. Pasian’ mite tungtawn in van manna ka sang den a, leiba omsa teng ka loh khit ban ah, leibalo in sang ka mansiang thei hi. Pasian in a hunhun in tha hong pia ding, hong vak ding vantung mite hong sawl den hi. Pasian pen Jehovah Jereh taktak hi cih ka ciam kha hi.

2.2 Devotion pelh lo ding hamciam
MIT nuntak pen hong ki-picing uk hi. Upa makaih in hong kimakaih hi. Tua hi a, zinglenitak kikhop (Devotion) hun pen “Lo theilo-pelmawh” cih bang om lo hi. A utlote nakphehkhau pan kikailo hi. Tua ahih manin sangnaupang pawlkhat in hahtang ngaihsut lo in, zangkhai ngaihsut uh hi. Zing thohak piante ading devotion hun sung pen Daw Kyi sai a niangtui dawn hun ahi hi. Tua bang kawmkal ah damloh hun le manlahna dang a om hun lo ngal kum thum sung zinglenitak devotion pelh hetloh dingin ka hanciam hi. Thu kigente a banban in ka ciamteh a, tua ka ciaptehna laidalte a bu in khui in ka kem hi. A hun lai in thupi ka sak khollohte nangawn a nung ciangin ka simkik ciang thupi ka sa phapha hi. Tua laibu pen ka Spiritual Dairy hong suak hi. Pasian tawh ka kizopna hong citaksak hi. Hong thumansak hi. Hong kuhkalsak hi. Tua bangin devotion ka pai den ciangin, keikia bek le Pasian a kizom hi lo in, siate le lawmte tawh a hon in Pasian tawh a kizom tawntung ka hi hi. Midang tawh kitheihna zong khangsak hi. Pasian in zong a kikhawmte minsam (attendance la) gige hi ci in ka um hi.

2.3 This world is not my home, but the world is my Parish.
Ka MIT kah hun sung teng ka lungsim hong sukha kammal nih om hi. Tuate in Jim Reeves lasak “This world is not my home” cih le Methodist Pawlpi kipatna makaipi ahi John Wesley’ kammal “The World is my Parish” cih te ahi hi. A thu kilehbulh tawh kibang hi. Ahih hangin ka gawm ciangin a khiatna thuk ka sa hi

Leitung pen i tawntung inn hilo a, tomkal khualzinna bek ahih lam ka thak phawk mahmah hi. Khat veivei bang haivai phial kisa ing. Zan ka ihmutna pan zingsang khanglo nawn kei kha leng, ka lupna, ka sabuai, ka puan khaina, ka laibute en in mite in kei thu a bangci gen tam cih khawng ka ngaihsun theizel hi. Ka kithawi den, ka kiging den hi. Tua ci pipi mah in, i omna hih leitung pen Pasian in i loma (Leenggah huan) dinga hong piak hi ci-in ka um hi. Ka lungsim hong vut, ka nuntakna hong zo hih kammalte nih “This world is not my home, but the world is my parish” ci in ka gawm vet hi. Laimal gol in ka gelh a, ka lupna lukhung ah leitung gamlim khat tawh ka suang khawm hi. Hih kammal nih in Pasian tawh ka kizopna hong ciipsak a, leitung bup kimvel a Pasian nasem minthang ka suak kei phial zongin a omom na ah Pasian’ deihna a pulak dingin lungsim kip hong nei theisak hi. A kiplo leitung ah muanna tawh nuntakzia ka sinsin hi. Kei ka ginatloh hang hong zang pa Pasian a liatna ka phawk a, mailam a ding lametna lianpi tawh thu hong ngensak thei hi. Mokokchung ka kah lai a, ka thubulphuh ka phawk kikkik hi. Tua in :Surely there is a future and your hope will not be cut off (Paunak 24:14) cih ahi hi.

3.Panmun le vai a tuamtuam tawh nasep kisin hun a hi hi.
Sangnaupang hun sung pen Pasian’ na a sem ding a kisin hun, kithawi hun ahi hi. Ahih hangin i sep theih sunsun Pasian mai ah, kisinna maimai hi lo hi. Sangkah hun sung zangsiam leng siate hong hilh khakloh siamna tampi kisin thei hi. Sangsap piak kullo University khat a kikahkah tawh kibang hi. Sangsung kimakaihna tuamtuam pan ka hamphatpih diakdiak te:

3.1 Student’s Council
Ka kumkhatna pan kipan sang sung nasepna ah Publication Committee, Messing Group leader, English Speaking Club, Evangelism Committee, Class monitor cih bang in ka kihel kawikawi a, ka kum thumna ciangin Student’s Council Secretary tavuan ka len hi. Hih bang panmun tuamtuamte in pawllelawm hong zonsak hi. Manlah le lungap hun a om zeuhzeuh zel hang sia, siamate tawh kitheihna, lawmte tawh mapankhopna hun pha ahi hi. Ka ngah kik nawnloh ding hamphatna na a hi hi. Ei mite pen sem thei ding pipi i sem nuam kei a, a semte nasep i gensia siam phadiak hi. I lawmte pawl khat siam tase kei leh lut taitai in kisin nuam uh a, a dangte in thapia in dinpih uh hi.

Sangnaupang makai hihna tawh hampha ka kisak phat diak khat gen dihdih leng: Khatvei Student’s Council min tawh biakna makai khanghamte zahtak piakna program khat ka vaihawm uh hi. Tua hunpi ah, Thra Moller, Thra Aung Din, Dr Chit Maung te hong kihel thei uh hi. Biakpiakna man khit ciangin amau teng thum le Siapi nu Dr Eh Wah tawh maan ka kilakha citciat hi. Tua maan pen kei adingin vangum, gho manpha khat in ka ngaihsun hi. Tuni dong ka kem hi. Cikmah ciang ka ngah kik nawn ngeingei loh ding, midangte in zong a neihloh ding maan manpha khat ahi hi.

3.2 Seminary Chin Student’s Fellowship
Seminary Chin Student’s Fellowship ah Secretary panmun mah ka len kha hi. Kawllai sang (MICT) le Manglaisang (MIT) a, Zomi (Chin) sangnaupang pihte kilawmtatna ahi hi. Nopna dahna, minam lam tuamtuam lahnate le vaituamtuamte ah Chin Student’s Fellowship hong kikonlawh den hi. Ko zong khat veivei ka kiphamawhsak mahmah thei uh hi. Khat vei Zolam sin ngeingai in kei a lam hi lo napi, thapia lua kisa ka khut a bet ziahziah leh ka naikhau (Steel khau) hong kitat hi. Naikhau tat liang a, khutbetna tawh thapia pa ka hih lam kei bek mah in ka thei hi.

3.3 EIMI pan ZONO Gospel
Lai Siangtho sang khat a kahkhawm khate i ki-it diak hi. Paltan tumte training kahkhawm a, numberly a kicite zahmah ihi hi. MIT ah minam dangte tawh lawmta bangin i kithei a, eile-ei bel sanggam bangin i ki-it hi. Sa lim leh a ki-eu ngam tanghialte ihi hi. Utut in i kiciamnuih ngam hi. Zusate gualtung gualnuai a om bangin MIT ah eimite zong a khangkhang i kah hi. I sangkah khop hunsung a, i sunmangte mah i nuntakpih hi. I gengen a, gen kikkik in, i cimtak thei kei hi.

Tuma kum 16 lai Tedim kamphen a kullo eimi a kahkhawm khate: a masa in EIMI ka kici uh hi. Thungenkop (Prayer Partners) a kopkop in ka kiseh uh hi. Kal khat khat vei vekpi in kimu khawm in thu ka ngen khawm lingling uh hi. Ka kihuh theihte uh kihuh in, theihpih ding a kisamte ka kitheihpih uh hi. A kisam bangin kipahtawi in, a phatmawhna zui in ka kithuhilh uh hi. Hih bang a kimuh khop zelzelna tungtawn in, a sawt lo in ZONO Gospel khaici hong kituh hi. 1992 kum khuakhal sangkhak sung Yangon pan kipan Mandalay, Monywa, Kawlpi, Sihzang kual, Tedim gam le Tonzang gam Tuimang khua dong ka pha uh hi. Saizang khua le Tuimang khua ah thusinna, Pasian thu genna (Cialpi) ka bawl uh hi. Zogam mun thupi ahi Thuam Hang le Pau Suan tuikiphumna, leh a luphumna han, Zomite lamkiat masakna Ciimnuai tualsuang cihte a phual ka sik uh hi. CCOC galhang Vungh Khan Kham’ inn (Tedim), Cin Khaw Thawn’ inn (Tungtuang), Ngai Za Siam’ inn (Cikha) te ah pai in a innkuante uh tawh thu ka ngen khawm uh hi. Tonzang khua Rev Vial Nang’ zi Pi Don Khaw Man kiangah zong ka hawh uh hi.

Zono Gospel paina hangin Saizang khua ah lawki inn 3 phiat in, mi 5 tui hong kiphum uh hi. Gospel-te hong muh ciangin a lungsim uh sukha a, Topa a ding a ki-ap khangno tampi tak a om lam a nung ciangin ka ban theihtheih uh hi. Ko le ko kikal kitheih siamna hong khangsak a, ki-itna hong kipsak hi. Hih bang hun manpha cikmah ciang ngah nawn dingin ka kilamen ngam kei hi. Hampha ka kisa mahmah a, ka kisik deksuai kei hi.

Zono Gospel a paite: Siama Cingh Lun Niang (Lashio), Siama Dim Hau Cing (Thailand), Siama Ciin Lam Niang (Tedim) , Siama Niang En Lian (Yangon), Rev Suang Za Nang (Sezang), Rev Cin Khan Pau (Muizawl), Rev Vungh Suan Mung (Tedim), Rev Kam Sian Thang (Lashio), Rev Vungh Suan Kham (Tedim), Rev Khoi Lam Thang (Yangon), Rev En Khan Hau (Kawlpi), Rev Go Lian Thang (Tedim) te ka hi uh hi.

Ciimnuai kipawlna pen keima deihkaih thu in EIMI cih mintawh ka thungetkhopna uh le ZONO Gospel ka paikhopnate uh maban hi ci in ka angtang mahmah hi. Eimi sangnaupang masate’ thungetna le deihsaknate a tangtunna hi ci-in ka um hi.

Thu khupna
Hih a tung a thu teng pen ka phutkhak nuntakna, a kantan tangthu taktakte ahi hi. Ko khang masate hun sangin tulai khangthakte adingin sinbeh ding theih beh ding tampi om hi. Kong zapi kihong hi. Tuma kum 16 lai thute a nuihzakhuai ding hi ta hi. I sin buaih bekmah a ciahpih kik ding hileng hamsia lua ding hi hang. Hamphatna i cih nihvei hong tung kik lo hi kici hi. MIT sang naupang hih sung hamphatnate nosuaksak ding kisam hi. Metbawl siam ding kisam hi. Sente in paunak khat nei a, “Tien wei yu tien” ci hi. ‘Vanmong galkhat ah van mah om lailai hi’ cihna ahi hi. Siamkhin siat, theikhin gai, telkhin kikeuh, a khong dong tung cih bang om theilo acihna uh ahi hi. Khantohna ding lampi kibingkhak ngeilo hi.

Kisik het keng


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. Thupi lua uh cei Topan zomi kawlmi tampi tak Ih biak Pasian kiang atunpih zo dingin thupha hongpia ta hen

    ReplyDelete
  2. Kisik huai hetlo thupi te himah ei, lungdam huai.

    ReplyDelete

Item Reviewed: KISIK HET KENG -MIT ka kah lai-. Agelh ~ Rev. Khoi Lam Thang Description: Rating: 5 Reviewed By: Cinpu Zomi
Scroll to Top