728x90 AdSpace

Hot
Menu
Zon-ol na Donate

Latest News

Makai Leh Ciamnuihna. Agelh ~ Lian Muan Kim

Makai Leh Ciamnuihna
Agelh ~ Lian Muan Kim

Photo Credit : AAUW

Ciamnuihna icih ciangin i mawk ciakciakna, i pum nuihnuih nate a gen hi zaw lo-a, Khazih sungah i neih lungdamna, lungdam theihna hanga gahkhia nuihzakna, lungtaina leh nuihzak huai tuamtuam gen a, i nuih lingling theihna ahi hi.

Mihingte' nuntakna pen kimanlah mahmah den hi. Lungnop nading zong om khollo hileh kilawm phial hi. Radio ngai in, tadensa sim in, TV en lehang kithahna, kidona leh khuahun sia tuamtuamte hangin sihna manna tampi tak om den hi. Ni dangin huihpi nung leh khuasia tuamtuamte i zangei bek a, ahi zongin tu hun ciangin i gam sung mahmah ah zong i tuakkha ta hi. Nuntakna haksa in dahna kahna tampi tak a om hangin tuate ultung sak denlo in Pasian sungah i lametnate no suak saka lungdamna tawh nisim i kalsuan ding thupi hi. Banghang hiam cih leh minute khat nuihna in dahna hun saupi vengsak thei hi. Tua ban-ah, Sebastien Roch Nicolas Chamfort in: Ni C 109 Ni Pammaih penpen ni in i nuihloh ni hi. - Chamfort pammaih penpen ni in i nuihloh ni hi, acih pen hi kasa mahmah hi. Nuih theih nading ciamnuih kisam a, ciamnuih gen siam makai khat kiang pan kitaikhia sesu nuam khollo hi.

Thugen minthang Henry Ward Beecher in: Ciamnuih bawl theilo khat pen lamphokna khempeuh a, a tuan langlang, spring neilo bawngleng tawh kibang hi, ci-in gen ngei hi. Laisiangtho in lungdam theihna ih thupina pawlkhat hong gen hi. Hih anuai-a te en le hang:

Topa sung lungdamna in ka thahatna hi (Neh 8:10).

Hong kibawlsiatna hunte beita-a, A lungdam thei mi in pawikham ding hi (Pau 15:15).

Lungdam theihna in zatui hoih hi-a, Lungsim kitapzanna in cintuiguh kangsak hi (Pau 17:22).

Mawhna sila pan suahtak khit nungsang Tapidaw piangthakte' a dingin lungdam lungnop ding leh maitai ding bek kisam lai hi. Tapidaw hi napi maigum den in a heh tawh kibang den lehang mite in i Tapidaw hihna hong eng lo, hong utpih lo in hong lunggulh pihlo ding uh hi. Tua ahih manin i Tapidaw hihna pen lungdamna, lungnop khamuanna tawh zong i lahkhiat theih ding thupi mahmah hi. Tua banga i lahkhiat na dingin nisim i nuntakna ah Topa'n hong nusia khin banga, lung patau, lunglau, lungkham sinkham a i om loh ding kisam hi. Tua banga omkha a om leh zong makai pa in a lungkim sak, a lungdamsak ding kisam hi. Tua banga hih theih nading in a hun leh a mun tawh kituak in ciamnuih siangtho zat theih ding thupi hi. Ciamnuih in a mah uklo dinga, a mah in ciamnuih uk zaw ding hi.

Ni Pammaih penpen ni in i nuihloh ni hi. – Chamfort

Ciamnuih uuk lo-a maipuam ngeungau denkeei leh mi a nuisak ngeilo-a, a taitai, a haphap makai khat kuan zui- nuam ding hiam! Thugen siamte ahi zongin makai hoihte a tamzaw pen ciamnuih hatte ahi uh hi. Charles R. Swindoll pen thu a gen ciangin ciamnuih tamlua ci-in kigensia thei zel hi. Charles Huddan Spurgeon kiangah mikhat in: Spurgeon aw, thu na gen ciang ciamnuih tam lua, acih leh Spurgeon in: Ka ip zah thei le cin hong hawlkhia khin ni teh, ci-in dawng kik a: Kikhop laitak nailang sung lusuk ngauhngauh sangin tawmvei nuihna hoihzaw tham hi, na ci lai hi.

Kum 50 sung bang Pasian nasem minthang F. J. Hallett in: Pasian nasepna sungah makai gualzo pente in ciamnuih hat simthamte leh Pasian hehpihna a telsiamte ahi uh hi, ci ngei hi. Ciamnuih pen a hoihlamin zang thei lehang i tawl hong damsak, hong suakta sak, lungkhamnate hong nuam tuam sak in i vai hong kuang sak hi. Thu thei pawlkhatte in nuihzakna pen sum le pai tawh kilei theilo, zatui hoih mahmah khat hi, ci uh hi. Makai siam Dr. Joy M. George le Dr. Do Suan Mung-te in ciamnuih siangtho zang thei mahmah uh a, vai haksa lungkham huai i sak thu pawlkhat nangawn vatun le hang baihno tak in hong dawng thei uh a, a nuisa leh a lungdamsa peuh in kiciahkik ziau thei hi.

Kikhop laitak
Lusuk
ngauhngauh
Sangin,
Tawmvei nuihna
Hoih zaw tham hi.

Topa Zeisu zong thu a gen ciangin ciamnuih a hat simtham khat ahih lam kilang hi. Mualtung thuhilhna ah: Nang mit sunga singpek kisiat zeza phawkkhalo-a na sanggam pa' mit sunga ninthem, banghang etsak na hiam! Bangci bangin na mitsunga singpek mulo pi-a na sanggam pa kiangah na mit sunga ninthem hong lakkhiat sak ning ci thei ding na hiam! acih ciangin a uanggen simtham hi-a, tualai takin a thugen ngaikha lian le hang i nuihza mahmah ding hi.

Tua ban-ah, laitei-te (Scribes) leh Pharisee-te kiangah: Mittaw makaite, thokang na dawnkhak loh nading un tui khaih tangtang napi uh cin, Kala-oh na nawmvalh ve vua…kang setsat a kizut han tawh na kibang ve vua, na ci lai hi (Matt 23:24, 27). Tua laiteite le Pharisee-te' a dingin bel thuakhak mahmah ding hi napi thungaite a dingin nuihzak huai mahmah hi. Khauh la khauh, maan la maan, nialtheih zong om khollo ding hi. Hih pen Zeisu in a gennop teng khempeuh ciamnuihna dan khat tawh helh a, a genna leh a taina hi ziau hi.

Sanhedrin mai ah Pawlu a din laitak (Nasemte 23:1- 10) in a nuihzak huai simsim thu khat hong mukhia hi. Amah a mawhpaih, a langpante ahi Pharisee-te le Sudducee-te in amah a mawhsak laitak un Pawlu in a upna uh a kibat loh lam na thei gige hi. Tua leh, Pawlu in thawhkikna a up lam hong pulaak khia ahih manin thawhkikna a-um Pharisee-te le a-umlo Sudducee-te kinial dihdih uh a, amau kikal ah nakpi buaina thu hong piang hi. Tua laitak in Pawlu nui khutkhut kha ngel ding hi. Kawlentu masa 15:8 ah Pawlu in: A maan phalo in suak ing, acih ciangin a khelpau mah mah ahi hi. A laikhak a sim Kawlentu khua mite in tua lai a sim uh ciangin nuihza mah mah ding uh hi. Kawlentu pawlpi mite a huh nading in pawlpi tuamtuam ah huhna a ngette pen ka buluh hi, ci se hi (Kawlentu nihna 11:8). Tua ban-ah, amah leh amah ngiansiam pa kici se hi (12:16).

Mipite
Thu a ngaihsun
Saksak pa sangin
A nui sak pa in
Metang
Tam ngah zaw hi.
- Malcolm de
Chazall

1984 kuma kum 76 a pha USA President Ronald Reagan in a nih veina (term nihna) mekuang a lui na ah Walter Mondale tawh hong kidem uh hi. Thu kinial Mipite Thu a ngaihsun Saksak pa sangin A nui sak pa in Metang Tam ngah zaw hi. - Malcolm de Chazall 112 masakna ah Mondale in: USA President dingin Reagan upa lua ta, a cih leh Reagan in dawng thei phalo ahih manin hong lel pian hi. Nihvei a kinial hun uh hong tung kikta-a amau tegel hong kinial leuleu uh hi. A nihvei kinialna ah bel Reagan in ciamnuih hong gen a, baihno tak in hong zo ziau hi. Dotna dawng dinga hong dingto Reagan in: President sem dingin kiging mah ing. President semlai leng USA President semngei khempeuh lak ah a upa pen ka hi ding hi. Hih kum tawm khangno lai leh tuahkhak a hau nailo mipa ahi Mondale bangin ken bel kum (khangno na, khangham na) tawh kuamah ka ko sekei ding hi, acih leh mipite nui zuahzuah uh a, kipakta mahmah hi.

A hoihlam in zangthei le hang hoih mahmah napi a hoihlo lam peuh a, i zat khak le lah a sia pen zong hongtun thei hi. A diakdiak in ciamnuihna ah kamnin, kammal kihhuai peuh i zat khak ding kidop huai mahmah hi.

Endnotes
1) Charles R. Swindoll pen October 18, 1934 in Texas ah suaka, 1963 in tuiphum sia ngah hi. 1994 kumin Dallas Theological Seminary ah Siapi sem a, tulai takin Chancellor sem hi. 1998 kumin Stonebriar Community Church phut a, tua khit a sawtlo in pawlpi mi hong khang pah hathat ahih manin US a pawlpi lian pen khat hong suak hi. Laibu bu 70 val bang gelhkhin a, tuate lak pan in bu 30 val bang pen USA laibu kikhawng pen sazian ah kihel hi. Insight for Living a kici Radio program pan nisim in thugenna neiden a, a thugen khempeuh kampau 15 in kilet den hi.

2) Charles Huddan Spurgeon pen June 19, 1834 in suaka, 1851 kumin a masa pen thugenna nei hi. Tua kum mah in tuiphum sia kipia hi. Kum 19 a phak ciangin tua hun laitak in England a tuiphum pawlpi lian pen ahi New Park Street Chapel ah pastor sem dingin kisam hi. Kum 22 113 a phak ciangin England ah thugen siampen in kiciamteh hi. January 8, 1856 in Sunsanah tenpih in tapa nih nei uh hi. October 7, 1857 in The Crystal Palace ah thugen a, mi 23,654 pha ahih manin mi tampen ni in kiciamteh hi. 1865 kuma kipan a thugente kalsim in 25,000 bang kihawmkhia hi. Nipi sima a thugenna ah ki-apna sam ngeilo a, ahi zongin nipi khuavak ni simin Zeisu a sang nuam mi, a inn a, a hawh kitalawi lo hi. 1857 kum in Laisiangtho sang phuan a, asih ma in tua Laisiangtho sang The Pastor's College pan Pasian nasem 900 bang sangkah hi. 1869 kum in Tagah Sang zong phuan hi. January 31, 1892 kum in Mentone khua ah si hi. Thugen siam mahmah ahih manin Thuhilh Siate' Pupi cih min tawh kipahtawi hi.

3) Joy M. George pen Dallas Theological Seminary, pan Th.D a man khit ciangin Asian Christian Academy, India ah Siapi sem hi.

4) Do Suan Mung in September 1, 1986 ni-in Laisiangtho sang Faith Baptist Bible College and Seminary Tedim ah hong hi. Tua zawh kum 17 khit ciangin Faith Baptist Theological Seminary, Yangon ah hong leuleu hi. Hih sangte pan in sangnaupang tampi tak mankhin uh a, muntuam gamtuam ah Pasian nasem muanhuaite suak uh hi. Hih Siapipa pen gamsung ah zong Pasian mizat muanhuai makai hoih mahmah khat ahi hi.

5) Sanhedrin icihte in Zawmah kumpite piak thuneihna nei uh a, mi khat peuhpeuh in amau deihna tawh kituak a, a gamtat kei-a leh thukhen thei uh hi. Sabbath ni le zumkhak ni longal Jerusalem ah kikaikhawm den uh hi. Palikte khawng a-ut bang un sawl thei ziauziau uh a, amau hihna ciang tawh thunei mahmah uh hi. Siampi pa makaih- na tawh Pharisee-te le Sudducee-te kipawlkhopna ahi hih Sanhedrin ah mi 70 pha hamtang uh hi.

6) Ronald Wilson Reagan pen Feb. 6, 1911 in Tampico, Illinois ah suak hi. Presbyterian pawlpi sung pan in khangkhia hi. Dixon, Illinois ah tansawm sang a kah lai 114 ahi zongin, Eureka College ah sang a kah lai pek a kipan ahi zongin mi minthang khat ahi hi. Cowboy actor a suah khitciang 1966 kum in metang 1,000,000-val ngah ahih manin California ukpi suak hi. 1970 kum in a nihveina ngah kik leuleu hi. Zi nih nei in a zite'n ta nihtuak nei uh hi. 1981 kum in 40th US president hongsuaka term 2 mah sem hi. June 5, 2004 in si a, George Washington leh Abraham Lincoln zom ah president hoihpen khat in kiciamteh hi.

Source :
Makaih Pilna. Laibu
Agelh ~ Lian Muan Kim

Laigelhpa Dr. Lian Muan Kim in Zomi eLibrary/Laibusaal ading in phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Makai Leh Ciamnuihna. Agelh ~ Lian Muan Kim Description: Rating: 5 Reviewed By: Cinpu Zomi
Scroll to Top