728x90 AdSpace

Hot
Menu
Zon-ol na Donate

Latest News

Pupa Ngeina Taangthu.

Pupa Ngeina Taangthu


Ngeina Zehtang
Khanglui i pu i pate in, omkhop na leh, kimuh kituah khopna cih te, thu kikup cih te khat peuh a bawl ding ciang in, limtak kisam kikho ciatciat uh hi. Hih bang tualbawl ahi zongin, zehhun a hi zong in khatpeuh bawl ding ciang in, zu mah tawh na ki muak, in zu mah tawh na ki uap uh hi. Annekna, Sagawhna leh Zudawnna tawh maitang ki mutuah in kamkumkhawm lungsim khaubang hual khawm in, ngeina leh nunzia na zilh uh hi. Hih kimuhkhopna te pen, a tamzaw in 'tualbawl' na ci uh hi. Pawi cihpen Zokam hilo a Kawlkam 'pue' aa kizangh ahi hi. Khangluimi zawdeuhte in Pawi cilo hi. Mopi, Mosagawh, Omkhawm, Ankuang-umkhawm cih bangin kizang zaw hi. Sih ciangin Sihpawi cilo-a, Siphual, Simun peuh kici zaw hi. Khuado-pawi, Sialsawm-pawi kicilo-a, Khuado Lawmanne, Sialsawm-Lawmanne kici hi.

Zomite in kumsimin Gualnopna-pawi pelhlo-in, a pi nih, atawm pen nihvei kinei hi. Khuado-Lawmanne leh Sialsawm-Lawm anne kici hi. Hih Lawmanneekna pen Sanggam kikaihkhopna hunhoihpen hi-a, Ngeina limci-ngeina hoih mahmah ahi hi.

Tualbiakna: Khuasiam ding, ahuu akeem ding sapna kibawl a, tua pen Tualbawl, Tualbia kici hi. Khuathak khat a ki saat na mun ah, Khuasaat ciangin, kimawksaat lo hi. Vaipua panmun len ding leh mimuan vaipei ding, ki khuasakna ding a semzo leh a do zo ding; haksat gal leh sa a om phial leh zongh a nawkzo ding cih gelna tawh a tawm pen mi9 pha lo in khuathak khat mun kisat lo hi. Khuathak saat, Khuasaat ding ciang in 1.Siampi, 2.Hausa, 3.Taangko, 4.Tuinaakkhuat, 5.Tualteek, 6.Tualtanu, 7.Siikseek leh, 8.Khuangtum, 9.Mundang khalui khat ahizongin, Tual uk Mang/Hausa' khat in etsak a, phalna leh ciaptehna neihsak; a omlohin khua kisaat ngeilo hi.


Amasa pen in, Makai pipa in, Khuathak khat a saat ding ciang in, Tua khuamun ding ah, mun leh mual, tui leh singkung gam va en ding in, Tuikhuukkhuatte kisawl masa a, tuihoih tuilim amuh ciangin khuasaat kipan uh hi. Hih Tualbiakna ah, gamsa ahi zongh in, innsa a hi zongh in, khat peuhpeuh tawh Siampi makai in tualbiakna 'munbiak' na nei masa leuleu uh hi. Hih Tualbiakna ah, Phasiam kisam a, Pasian biakna a hi hi. Dawi te leh Mihing te ki lawmtatna leh, ki do ki totloh na ding deihna zongh ahi hi. Hih a ki saatding khua, a bei ngeilo ding/ abei dong ngimna tawh, saupi gelna tawh 'nget leh piak' bawlna a hi hi. Pawlkhat te in, Sakhi peuh, kel, bawng, sial, vakhu, vok cih peuh tawh bualbiakna ki bawl hi. A hih hag in, Sakol, lawi, ui cih peuh tawh tualbiakna kipia ngeilo hi. Siampi te in a deihna leh a zilhna thei uh hi.

Tualbiakna dingin, a tamzaw in vok zangh uh hi. Tualbiakna pen Khuataangpi aa hi-a, lawhta-in zu kidong hi. Tualbawlna Vok leina ding lawhta mahin an dong uh hi. A beikhempeuh taangpi sikh ahi hi. Khua dingin gamtak leihoihna kizuan a, a lauhuai sapite leh dawi leh kau, gulsia tangsiate, ngia leh vompi sahangte, pulnatna tuamtuamte nawkkhakna panin ahung-akeem dingin Asiam ahi Khuasiam khai masa hi. Khai cihpen bia, lungkimsak, thoih cihna hi. Tua pen Tualbiak-pawi kici hi. Tualbiak nasep leh Sialsawm Lawmanneek kizom tawntung hi.

Tua Biakna ah, khuamite cidamna dingleh kithutuahna ding, guahtui hoihna ding, ankung susia thei lungnote a omlohna ding, gah leh paak hoihtak aneihna dingin kingen hi.

Zehtang:
Tualbiakni zingciangin Zeh tang uh hi. Lo kikuansak lo hi. Leigil suaksak lo hi. Singno leh lopahing sisuah lo hi. Kahna leh gamlumna bawllo hi. Kahna cih ciangin misi aneih uleh tuani-in guilo hi. Gualnopna khuang leh zam gingsak lo hi. Zehphi ci-in thukham palsat a om ciangin guahtuiluan hoihlo hi. Ngalhawk in lolai ankungte nawksia thei hi. Khuasung thusia-lasia piang thei hi. Pulnatna tuamtuam in nawk thei hi. Tua ahih ciangin Zehphi a omleh a beikhempeuh loh sak hi. Tualbiakna bawlpha kik hi.

Tualbawl-khasung or Sialsawm-lawmanneek kha huamsungin samante pen Sawngman kici hi. Sawngzu luup hi. Sawngla sa-in laam uh hi. Siampipa in tuiphih aa, Sawngmanpa leh khua-leh-tui daupaina dingin Khuasiam tungah ngen uh hi. Hun ciangtan sungin Sawngman a omleh Khuasiam lungdam hi, ci-in um uh hi.

Sialsawm (Lawm-annek):
Nidanglai-in Sialsawm Lawm-an pen lopawi man ciangin kihih tawntung hi. Guahtui luandan zui-in lopawi ahihmanin kumkhat leh kumkhat kibanglo thei hi. Bekthamlo-in Simlam leh Zolam aa teengte khuahun paidan kibanglo aa, khua khatleh khat kituak theilo hi. Ahih hangin Khangthakte in kumpi naseemte leh sangnaupangte kimhun tawh kituak dingin April kha kipatlam hih dingin kipsak uh hi.

Khuado (Lawm-annek):
Khuado Lawm-an pen anlak khit ciangin kibawl hi. Khawhsa kaikhawm khinphet ahih ciangin zu leh sa tawh kidiah pikpeekin kibawlzo hi. Kumpi naseemte leh sangnaupangte kimhun October sangkhak sung kingim hi.

Ih Pu ih Pate pen Biakna leh Ngeina tawh tonkhawmin nakalsuan uh hi. Ahih khempeuh pen Biakna tawh kitukkalh saklo uh hi. Asiam leh a Biakna mangngilh ngeilo uh hi. Khuado Lawm-an pen Sialsawm Lawm-an mah tawh a paidan kibang hi.

Meilah saatni:
Khuado Lawm-an kiginni pen Meilah saatni or Dai-an bawlni ci uh hi. Zununsung or omkhop hunsung zat ding meilah pua hi. Tuinak kipuah hi. [Han,than, san,khan] Han kipuah aa Khasapna kinei hi. A si kha hong ciah un, a hing kha hong ciah un, zu leh sa neding hihang, ci-in lobuuk suangthute saatpai-in khasam uh hi.

Khuaila, Tang suak:
Khangluite in Khuai pen thupiseh mahmah hi. Khuaipi leh khuaivahte a zu kine hi. Khuaivom, khuaingo cihte zong singheng sungah kua a, laa-in innah khawi uh hi. Tuate zong a zu kinenam mah ahi hi. Tunpi, ngalthen pen a no kine hi.

Tua khuai a mute in lopadawn tumzial vilvel a, ciangkang khattawh kawksakin ciamteh hi. Kua mah in suksak ngamlo hi. Khuaino pen Khuado-hun in taksa-in pikim a, neektaak cing mahmah hi. Khuaihawite in lakleh aih thuah thei uh hi. Khuai-aite asih ciangin siluangbawk thote pen khuai in bengkhiat sak hi, ci uh hi. Kha kapham ciang vaitho hung ding vahkhuai nangma thu hi aw, ci-in Khuaila nangawnin nei hi. Khuai-ai nuamte in Khuado Dai-an bawlni ta-in khuaila uh hi. Khuamial khit ciangin kilangam panbek hi. A ainuam aa khuaila ahihleh, khuang,zam, daktal phiit, leh Khangno Taangsuak ding honkhat tawh kuanpah hi. Khuaikhau ci-in khauhual saumahmah pua uh hi. Khuangmai aa daktal tumpa, zaamzawngte leh khuangtumpa longal khuaikhau lenin pai uh hi. A kihalna kibangin len uh a, a khut langkhat ah meilah dekim uh hi. Kigual diudeuh Guideudeu-in meide-in pai uh hi. Phiitlem kawmin khuang leh zam tawh innlamzuanin ciah uh hi. Khuasung gamlum suah mahmah hi. Inn ngakte in zubeel gual aa, tuileihsa-in nangak uh hi. Zu taksa pawlkhat zong taubeelpi sungah khol hi. Khuaino puapa a mai-ah hong masa hi. Zamzawngte in zom hi. Daktal tumpa in zom leuleu hi. Tua khit ciangin khuangtumpa leh mipi in hong zom hi. Innngakte in a tungmasasa-in zu natulh hi. Inntual kimkot tuangdung dongin laamsum pimpemin laam uh hi. Zanthapai-in khangnote gualnopa tua hunbekmah om a, Khuado hun a tunkaal kingaklah mahmah hi. Khuangtumpa mai-ah pasalno khat in daktal mong, mong, mong, ci-in ging vangvangin tum hi. Daktal-ging zaksimin Khuado kiphawk mahmah hi. Khualai-ah a veng a vengin Khangnote giahna Sawm kinei hi. A nopcipen munah kituah uh hi. Zanthapai-in Khuado-la leh Khuai-la sa in khangnote gualnuam mahmah hi. Tua hi a, Khuasungbup gamlum hi.

Kau-Hawl (Kauhawl):
Pansikni or Neekpini zingsangin kau hawl uh hi. " Dawihaang ciah oo, kauhaang ciah oo, nazun na-eek namsia ei, nani cing ei, nakha cing ei, nakhualam zuan oo" ci-in tuga heiga tawh bangsak bangkhang saatin hawl uh hi. Kongbiang a tun ciangin a tuga tawh pheiden ek mawk hi. Thau neite in thau tawh kaap uh hi.

Ih Pu ih Pate in Dawibia icih hangin Dawi hawlkhia thei mawk ahih ciangin amau lungsimtawngah dawi sangaa golzaw khat abia aa kinei hileh kilawm hi. A taktak ah tua pen, 'Pasian Phaza' na ci uh hi.

Lawm-Annake kikaihkhopna:
Lawm-an ne dingin mikhempeuh kikaikhawm uh hi. Abawngbawngin, a khil a khilin omkhawm uh hi. Dai-an bawlni zingtungin Uupipa or Bangkuapipa pen inntuamsa innlak sanggamte kiangah banhawh kawikawi a, thu-zasak hi. Sanggam bucingte pen nopci mahmah hi. Zing-an neek khit ciangin kikaikhawm uh a, an aneih bangbang tawiciat uh hi. Mihon tawmte in vok luangkhat a tampiante in luangnih bang go thei uh hi. Khuado-vok gul ding kiseh uh hi.

Ei Zomite ngeina-ah Zozu pen cikhum bawngnawi taangin kizang hi. Pawlkhat khaihin ne hi. Pawlkhatte pen pengbulhin ne hi. Anneekma sungteng khaihsa-in ne uh a, anneek khit gualnophun leh lasakhun ciangin beel angkuahin peengnek uh hi. A hawmmasak pen innkuan kim naungeek dongin tahn kipia hi. A nethei nailote in ama ngaih khat hawh hi. Tua pen zuhawh kici hi. Hawh cihpen ama neektangin nesak cihna hi. Amau mintapte hawhdiak uh hi. An a neek ciangin asasin sangoite kiciamkim sak uh hi. A ngahlo om hiam, ci-in kantel vilvel uh hi.

Anneek man ciangin Mokhak numeite amau-nualam ciatah ankhol-in vak tek uh hi. Nungak tangval lawmngaih neite Zawl-an kikhol sak hi. Ankhol aa vakkhiate hong tunkik hun khuamui kipan philhphelh pawl khawngin tangzang khat in beelpei sungah vut luakin dim a, innlim laizangah koihin meiphual sehin meilah vak hi. Khuang leh zam pusuahin lasak pan uh hi.

Sialsawm leh Khuado hunsungin sanggam ngaihna la, Nu leh Pa ngaihna la leh nungak tangval kilamnaihna zawlla ngentang sa uh hi. U-nau sanggam tengmah kikawi-in la kipaihpaih mai uh a, Ki-itna leh sanggam khualna khang mahmah hi.

Thang Ho leh Lian Do te hunlai-in Khuado omkhop ngeina neikhin uh hileh kilawm hi. Khuado madeuh-in Lian Do si hi. Thang Ho daihawhin pai hi. La khat suut a,

(a) Do nalitlit do nalitlit e gual in kumkhua do nalitlit e [Do naliingliing do naliing ee]
(b) Gual in kumkhua do nalitlit e Do khan ah nau bang vakap ing e.

Mihing kikholhna tam leh kiphawkna kingaihna zong lian hi. Lawm-an pen sanggam kimuhna leh kikaihkhopna hoihpen ahi hi. Pakzat seemseem lozaw a, puahphat ding leh thupibawl kik dingin hoih mahmah hi. Tuhun pen omkhopna-hun haksa mahmah hi. Mikhempeuh tangpek nuam uh hi. Sanggam a omkhawm liailiaite pen a kingaite ahi uh hi.

Zomite zatdan tatdan ngeina pawlkhat: Kawl huzaap tawh Pawi icih pen, Mizo huzaaplam aa omte in Lawmh cileuleu se hi. Zokam taktak tawh Ai kici hi. Zomi a tamzaw in Ai sangin Pawibawl, Lawmh ci uh hi. Zokam zong damdamin kinelhsiahin mangmang hi. Innthak ai cih sangin Innpawibawl ci uh hi. Molawm, innlawmh peuh cimai uh hi. Nauminphuak icih pen zong, naulawm, naupawi bawl ci uh hi. BA ai cilo-in BA lawmh ci sese uh hi. Midangte huzaap in hong zolua ta ahih manin ei kam pen a nuam nawnlo bang hong himawk hi.

Nauminphuak:
Namdangte huzaap hong lutma-in, Zomite in Nausian kici hi. Tuhun ciangin naupawi-bawl cilel uh hi. Zomite nausuah ciangin bangkua-siampi zangin naumin pen tuiphih uh hi. Pasal ahileh pianna Pu tamsak hi. Numei ahihleh pianna Pii tamsak hi. Azomzomin pasallam leh numeilam kihawm suk ngiatngiat a, khangsimna-in kinei hi.

Naumin pen Mizote leh Kawlte bangin utpeuhpeuh phuak mawklo uh hi. Minnei dingte dong masa hi. Naumin phuahna[minlawhna] ganno khat bangkua siampipa go sak hi. Tua pen inntek khawisa ganno hi hamtang ding hi.

Tuiphih ding zu beelta-in luup hi. Siampipa in phuisam kawmkawmin zu leihleih hi. Zuleihna tui kitakpei leh, hoih ei, ih nau pen cidamin mapai ding hi, ci hi. Amin pulakin zu teepin tuiphih hi. Huihlak aa kiphihkhia hilel napi, a tuiphih-pai pailo cih theise uh hi. Minphuahna ganno go mleuleu a, a sihdan akeeng kisaan keuhkeuh , a sin leh a gilzangte kilamdan enin, naungeek mailam masuan ding theikhol genkhol thei hi.

Naumin tangte in Nausiatna [nausian] ci-in ak ahi-a, vok ahi zongin ahihzawh zahzah gan khat peuhpeuh zangin antawi pia uh hi. Nausian kici omkhopna pen a nuampen omkhopnanam ahi hi. Naumin phuahna munah gamlum lua kideihlo hi. Khuang leh zam tat nuamlo uh hi. Gamlum lua leh naukhaa lau kici hi. Naupang kilatin zawngkhal aa cidamlo hi, ci uh hi. Ih Pu ih Pate pen zehtan thukhamteah citak mahmah hi. A up leh a biak khatpeuh tungah paubanna neilo uh hi.

Min a phuah ciangin numei leh pasal hangin buailo hi. Amin kilawh phetin numeimin leh pasalmin kikhen pah sinsen hi. Amau phulkhak gentheihna leh nopsaknate naumin panin kimu khia thei hi. Tuang Hau acihleh minuamsa hi ei, ci-in kimu pah hi. Vung Dah Ciin acihleh hehlehdah thuak ngeite hi, ci'n kithei thei hi. Ciin Za Khup acih ciangin numei hi a, Cin Za Khup acih ciangin pasal ahi hi. Lia leh Taang tawh buai ngeilo hi.

Naucing Guai:
Tuhun bangin Nursinghome , Childcare cihte omlo hi. Inntuancil ahi lukhatlaite in innpi leh a Pute kiang khawngah nau kha uh hi. Sanggam haute in nau thum ciang bang cing thei hi. Bawngnawi cikhum cihte kigalmuh ngei nailo ahihmanin naungeek-anin kawlkai-em leh taangzuha kizang hi. Lawki-hunin neusen aa kipan Zozuha tawh kikhangkhia hi. Zu zong munkhempeuh ah siakhin lo hi. Zangsiam leeng zatui hoihpen leh anhoihpen ahi a, khengvalzat kha leeng a siahuai pen gal leh gu ahi hi. Pilna tawh zat kul hi.

Amau hunin zuha piazote hampha kisa mahmah hi. Naungeekte cidamin dawng tiltel hi. Kawlkaipi zong anhoih mahmah ahi hi. Neu ngaihsut huailo hi. Tua bang teng tawh naucingte in nau nakhoi uh hi.

Naucingte pen zahtakin mai-et mahmah kul hi. Nau ii nuntakna buppi a cingte khutah om hi. Neek leh dawn lim zawdeuh amuh ciangin naucingte ciamsak hamtang uh hi. Naucingte zong kisathei a, khasia-baih mahmah hi. Tuhunin zong Nuteek naucing naneih uleh neuseh kha kei un.

Naucing guaina pen anlim mawkmawk tawh hithei lo hi. Saseh, ak cihbang kizang ngamlo hi. Ganpum lakah a neupen vok tuli sangin neuzaw lo hi. Naukha khempeuh kikumin thakhatin naucing guai thei uh hi. Salim pen leh zukhum pen tawh naucing kiguai hi.

Zukholh Pute (TuukZukholh):
Ih Pu ih Pate in zahtak-tuakte zahtak a, pahtawi huaite pahtawi uh hi. Pute zahtak pen Pasian deihna tawh kituak ahih ciangin cidamin khansau hi. " Pute leh lamphung kineh zolo" cih Paunak om hi. Naupangte a damloh ciangin Pute kiangah hawhin an kinesak hamtang hi. Tua pen gau-an kha ci uh hi. Pute kisamsia nuamlo hi. Pute tawh thu kinei nuamlo hi. Pute kikhasia sak nuamlo hi.

Khawhsa anlak khitphet in, Pute Tukzu kikhol masa pen hi. Tuhun Christian te in Thanksgiving a bawl bang ahi hi. Taangzu, buhzu zukhum pen leh aneihleh sapum zong go uh hi. Tukzu pen kiim leh paam in zong pawm a, zupinung uh hi. Zutaak [zukhaih] a, zucil kaimasa pen dawh a, inntekpu piamasa hi. A zudawn masak pen valhpah lo hi. Zutui phihin phuisam hi. Tukzu khol a tutet thupha namkim ngetsak hi. Cidamin khansauna ding, sumnu-sumpa amuhna ding, bangkua kilemna dingin ngen hi. Hih omkhopna sungah Pute pahtawina la a tampen kisuut hi.

(a) Kei ka Pute sen aa ka Pute ningzu bang khum thei naleng nuampeng phuh sak vang e
(b) Nuampeng phuhsak vang heisa bang paal thei naleng kapaal losak vang e.

Sialsawm Pawi
Thu masa: Sim lei tunga om minam khempeuh in ngeina nei ciat uh a, tua ngeinate adingin a hoih pen, a manpha pen hi-in, a lung uh a nopsak ban-ah kithutuaksakin ki-itna zong khosak hi. Tua ngeinate apu apa khang pan kipanin kem toto ciat uh hi. Ei Zomite in zong ngeina hoih tampi ih nei hi. Tua ngeinate in ei Zomite hong ki-itsakin minam kician khat hong suaksak hi.

1.     A Nuam Sialsawm Pawi:
Khuakhal ding kisa-in khuamui hong kai ci-ciai a, pengpelep ten (Keutawlek ten) hong hamsan khengkhang ta uh hi. Lopawi zong kiman ta a, Sialsawm Pawi a kibawl hong hi ta hi.

Dopi kha-in tua pawipi ading kiging kholin No bang tawh bawl sawm, ci-in khat leh khat lawp takin kidong khengkhang uh hi. Cik ni ciang kipan ding, ci-in a ni acin ding bang kingaklah mahmah ciat hi. Pawipi pen Dopi kha leh Zing kha kawmkal sung lopawi khit (April) kha pawl-in khua zang bupin kibawl hi. Sial-a kipan gan neih peuhpeuh tawh lungkim takin kibawl ciat hi.

Sialsawm Pawi Bulphuhpi:
Tang lai-a kipan i pu i pate bawl ih ngeina pen kum simin a kizom toto ahi hi. Sialsawm cih pen,

Sial = Sial (sawmsial) a cihna hi a,
Sawm = hih sawm, bawl sawm, tum cihna ahi hi.

Ei Zomite in sial pen sepna ngimnate-ah gentehna-in ih zat hi a, a lian mahmah ih cih nopna ahi hi. Sai (vuisa) bel sial sangin a liatzawk hangin lian cihna-in kizang zaw lo-in minthanna gennate-ah kizang zaw hi.Tua hi-in ih nasep ih silbawl, ih tupna ih ngimnate-ah a lian a sangpi mah (sialpi cia mah) sawm ding tum ding cihna ahi hi.

Sialsawm Pawipi ni-in siampipa in zing tungin Zotang silsel anha (anhang)-in na huanin, tua sung pan khua sung cidamna ding leh hauhna ding aisanna nei-in mai lam-a piang ding thu zong na genkhol hi.

2.     Dai Hawh leh Pu Zu Kholhna:  
Pawipi ni zing tungin innteek nupite in zu beel khat taakin Zotang sih huan a, si-pi na kang uh hi. Zingsang khua hong vak milmial ciangin innteek nupi nu in Zotang sih leh si a hel khit ciangin zu thawlno khat (dai-tawi) tawh han-ah na pai (dai hawh) in a sisate phawkna leh thugetna thupha na bawl uh hi.

Tuabang mahin naupang ten zong anu zutaaksate tawh a pute zukholh dingin pai ngeingai uh hi. Apu api ten a tute a tate cidamna ding leh neih leh lam kicinna dingin tamphuah (thupha pia) in zu tawh na do kik leuleu uh hi.

3.     Khal Lawm Kikholhna:
Sialsawm ciangin unau pata teng ahi zongin, a beh behin ahi zongin, a SawmSawmin ahi zongin ann nekkhopna kibawl hi. Zu leh sa, khuang leh zam tawh lung kituak takin gualnuamin omkhawm uh hi. Beh papi khangham thu thei ten naupangte tungah pupa ngeina, khang tangthu, leh ki-it kingaihna atuamtuamte na sut uh hi.

4.     Ngawk Satna:
Pawi ni sunkim pawlin tangvalte ngawk sat dingin a sawm ciat uh-ah kikhawmin ngawk sat khawm uh a, kibuan uh hi. Ngawk sat ciangin nau-gual nihin upa khat a buan uh hi. Tua kibuanna-ah nau-gual ten a lelh leh tu kum kizawng ding hi, ci-in ciamteh uh hi. A kibuan ma-un Sawm upate in ngawk to masa uh a, Dawi dawi, ngawk ngawk e, lui vo ci-in thum vei a to khit uh, Lui vo a cih khit uh ciangin kibuan thei pan uh hi.

5.     Nungakte Lawm-an Piakna:
Sialsawm Pawi sung pen kum khat vilvel ih khol ih kigin zu leh sa bekbek mah thupi tak nuam tak-a ih neek hun khat suak ahih manin khal lawm kikholhna kinei a, zu leh sa mah kikumkhawmin kibawl ciat hi. Tua khal lawm sungah lawm kingai a om leh khallawm papi zu leh sa a zeekte in tua lawmngainu adingin a lim zaw deuhin a tuam vilvelin bawlsakin koih tuamsak uh hi.

Nitak khua hong mial ciangin a Sawm ciat uh-ah tangvalte kikaikhawmin, mi a kim mateng ngeina late leh lam a tuamtuam tawh gualnuamin hong om uh hi. Mi a kim khit uh ciangin lawm-ann (lawmngaih ann) siim dingin a lawmngaihte kiang uh-ah hong vak khia uh hi.

Nungakte inn hong tun uh ciangin inn sung pan nungaknu hong pusuak khia a, tangvalte tawh innka-ah hong tukhawmin la sa zel ciamnuih gen zelin nuam takin om uh hi. Tawl khat khit ciangin innsung lam panin nungaknu naunu, ahih kei leh a nu zu leh sa tawh hong pusuak a, tangvalte hong lui hi. Tangval ten zong lungdam takin hong ne uh a, a gaih valte uh innsung lamah koih kik theih loh ahih manin a Sawm uh-ah ciahpih uh hi. Lawm ngaipa bel bangmah pia lo uh a, innka kiu khatah tu tuamsak uh hi. A hun khop khit ciangin a lawmte in tangval lawmngaipa ciahsanin a nungaknu tawh hong tukhawm thei ta a, kamsiam hong kipaih ciauciau uh hi. A lawmnu in zong, U nang adingin a tuam vilvela kong koihsak, ci-in zu-cil hai khat leh sate va la a, tangval pan zong zum nuih pipu-in sangin a ne hi.

Hi bangin ni sagih sung tawntung a kibawl Sialsawm Pawi in hong beisan ta hi. Nungak tangvalte zong lungzuangpipi, kikhen nuamlo pipi mahin lo lam hong zuan ta uh hi. Ahih hangin Pawi hun sunga a gamtatnate uh, a nopsaknate uh a bilkha uh-ah gingging lai hi.

Hun nuam ngeina a minthang Sialsawm Pawi pen ih pu ih pate khat leh khat kinek ngaihin, kisamin, ni sagih sung bang khallawm kikhawlin a na bawl uh ahi hi. Ahi ta zongin tu hun ciangin nithum sung bang bek ih bawl ta hi. Ni bangzah sung ih bawl ta zongin ih ngeina Sialsawm Pawi pen mangngilh lo-in khat leh khat ki-itna leh kiphawkna a liat semsemna dingin zang ciat ni.

(a) Pupa khang gui giabang zopna, Zotui Sialsawm Pawi, lambang paak leeng e.
(b) Lambang paak leeng lia leh taang aw, khangsawn ten giabang zom lai hen aw.

Sialsawm Pawi:
Sialsawm pawi a kici pen nidang laia Zomite pawi a thupi khat ahi hi. A kipat dan leh a min khiatna gen dan tuamtuam om hi. Pawlkhat ten hih pawi bawlna-ah biakpiakna om a, tua biakpiakna-ah mihing nangawn tawh a kibiak hun om hi ci uh hi. Tua banga mihing tawh biakpiakna pen naakpi taka sawm vaihawm kuul ahih manin SIALSAWM ci uh hi.

Sial pen Zomite khawi ganhing lak pan a lian pen leh tam a man pen hi a, mihing tawh kithoihna zong biakpiakna lak pan a mulkim huai pen leh man a sang pen ahih manin hih pawi pen Sialsawm kici hi, a ci pawl zong ki om hi. Pawlkhat leuleu in hih pawi pen LAWM ANNEEK ci uh hi. A diakin Tonzang khua leh a kiim a paama khua ten lawm anneek ci-in ann nekhawm takpi uh a, amau adingin pawi nuam leh thupi khat ahi hi. Sialsawm Lawm Anneek pawi in amah a hong om mawk ahi kei hi.

A ciilin gualnop pawi zong hilo hi. Biakpiakna pawi hi a, a nunglam ciangin biakpiakna sangin hong kithupi bawl zaw a, gualnop bawlna pawi khat hong suak hi. Hih pawi a taangpi-in April kha, Nipikaal nihna leh thumna pawlin kibawl deuh hi. Bang hang hiam cih leh taanglaia ih pu ih pa ten singtaang lo na kho uh a, ann August, September-in na la khin uh hi. Buh ciing ten October kha-in la uh hi. Ann a laak khit tuungun ann hau kisa uh a, lungnuamin zu sa uh a, annlaak pawipi khat bawl uh hi. Tua pen KHUADO PAWI kici hi.

Khua a kido khit ciangin kha nih sung bang tawlnga uh a, tua hun sungin innlam nasep inn puah huan bawl cihte seem uh hi. Bang hang hiam cih leh October, November pawlin gam lakah lopa saang thei mahmah a, gamlak vaak nuam lo uh hi. December kha hong hih ciangin kum thak cianga a lokhawh nading mun uh en khol uh a, a logamte uh hawmin, singnuai lak vaat siang uh hi. January kha ciangin sing phuuk uh a, a singte keusak uh hi. March kha sungin lo haal uh a, a kaangtum lote tom khawm uh hi. Tua pen Mangtom kici hi. Lo tulsa kho ten ham tom uh hi. March kha bei ciangin a loteng uh hah siang sa-in koih uh a, guahtui ngak uh hi. Khaicite zong vawh-in tuh khin uh hi. Lo khawh nasep pen guahtui a kingak nasep hi a, guahtui a hoih ciangin ann kihau a, guahtuui a ginaat loh ciangin an kihau lo hi.

Tua ahih manin, a kituh khinsa khaicite lim taka hong po, hong khanna dingin, muh theih lohte kiangah huhna na ngen uh hi. Tua muh theih loh pen KHUASIAM kici hi. Tua khuasiam bia dingin khuasunga siampi lian penpa in makaih hi. Tua banga biakna in TUAL BIAKNA kici hi. Tual ih cih pen mun zaang khat peuh hi a, kimawlna mun zaang lian pen TUALPI biakna kici hi. Innmaia zaang INNTUAL kici hi. Tua TUAL BIAKNA mun khawsung laizang, khaw nawl, ciktui omna ngei khat peuh hi nuam deuh hi. Tualbiakna kibawlna munah suang nih a tung lamin kiphut a, a tungah suang peek khat kikham phei hi. A nunglam zong suang peek khat mah tawh kidaal hi. Tua bangin a mailam bek vangin kibawl hi. Tua tual- suang omna zuanin SIAMPIPA, TUALTEEKTE, TUALPHUISAMTE, TUAL TANUTE (TUANVAITE) khawsungmi khempeuh sik leh taangin va pai uh hi. Amau bawl bangin kisaang hi. Tua tualbiakna a pai ding mi kitamsak lo hi. A diakin numeite kipai sak vet lo hi.

Bang hang hiam cih leh tual thoihna a kineih ciangin KAMPAU ZEHTANNA kinei a, mi kitam leh a zehphih kha ki-om kha ding hi. Tua banga a pai uh ciangin, a tualgam ding uh hawl pah uh a, a mun a tun uh ciangin tualgan pen Siampipa in zu phih-in khuasiamte tungah aapna nei hi. Tualgan Siampipa innah kigo a, ken ding teng tawh tualbiakna muna pai hun zong om hi.

Tualgan pen vok leh bawng hi deuh hi. Sial tampi a khawi khua ten zcng tualgan dingin vok mah zangh uh hi. Vaangteh khua-ah tualbiakna vok tawh a kibawl gige hi a, kum khat sial tawh a biak uh leh thupi kisa lua ahih manin, tua ni SIALSAWM ni ci uh hi. Tanglai Isrealten gan-gawh biakna a neih uh ciangin, tua ganhing in Topa Jesuh limla ahih manin poina leh hemna limlim nei lo ding hi a cih bangun, tual biakna-a tualgan zongh poina hemna nei lo (mittaw lo, a bil heek lo, a gial lo, a vom a hih leh vom kim vet) vive bek na zangh uh hi. Tualgan a gawh ding uh ciangin vok gawh bangin a tee (lenuai) panin Tei tawh sun/dawt masa uh a, tua khit ciangin tual tanu ten a deek panin sukpum tawh sulum uh hi. Tualgan kisem neen a, khuasiamte ading khen masa uh hi. A muuk, a lei, a sin, a lung, a kal leh a gilzang them khat ciat leh A khedawn teng kaaikhawm uh a, khuasiamte ading ci uh hi. Tualgan a kuan teng ading khenin, a om teng khuasung in milipin ki sawngsaat sak hi. Tua tualbiakna-ah khuasungmi khempeuh zongh kihel hi a cihnopna uh hi.

A tunga kigensa khuasiamte adinga kikoih tuam sa teng tualsuang nuai-ah koihin khua siamte kiangah a nuaia bangin thupha ngen uh hi.

Ka khua siam ka tui siam, ka phuhpi ka phahpi, ka Pasian ka lungzai, ka nipi ka khapi, ka mualziat ka mualzei, ka gunpi ka thangpi, ka thumapi, ka innbuk, ka Lihli, ka Ciaupi, ka kente, ka mualmau, ka pangdin, ka cilciik, ka mualtom, ka khaankha gun, ka tu tawina ka hei tawina, Ka simgam ka zogam, siam in. Cidamna mulmaamna kong ngetna hi. Tanu tapa kong ngetna hi Sin ciim, lung ciim kong ngetna hi. Teek kuun kuaikun kong ngetna hi. Miim za taang za kong ngetna hi. Siingphung pha baalphung pha kong ngetna hi. Vokno dawng, akno dawng kong ngetna hi. Sialno dawng, bawngno dawng kong ngetna hi. Guahtuui khum, guahtuui al kong ngetna hi. Sumnu sumpa kong ngetna hi. Taang guipha, be guipha kong ngetna hi. ZU HONG LUUP INGH, SA HONG GAWH INGH ci hi. Tual a kithoih ding ciangin khua kiim khua paam khua veengte kiangah Tua ni tua kha ciangin Tualthoihna nei ding hi ungh, ci-in thu ki zasak masa hi. Tua ni-in khua kiimah sawl kibang hi. Sawl kibaang ahih lam tual kithoih ahih lam thei lo-a hong luut khualmi khat peuh a om khaak leh ZEHPHI ci-in, khatvei tualthoihna kibawl kik leuleu hi. Tua banga zaaksaksa khuaveengte khat peuh in tual kithoih hi cih thei gegu napi-a hong luut a om leh ZEHPHI mah kici-in tua khualmi pen in tual kithoihna a sumbei teng liau hi.

Tualthoih ni a zing cianga kipan ni thum sung Khuazaang bupin zeh kitang ih cih ciangin, gamvaak lo, lokuan lo, sa beng lo, nga beng lo-in innah ki-om hi. Tua zehtan hun sungin ganhingte kipusuaksak nuam lo ahih manin a neek ding uh lopa sawlhiang pen kila khol hi. Zehtanga a om sungun unau sanggam teng a bawngbawng, a behbehin anhuan khawm, zuluup khawm, ann ne khawm, zu dawn khawmin beh thute suut uh a, gualnop bawlna leh kithuhilhna- in zangh uh hi. Lawm leh gual zaw deuh teng sung khat laina tengin ann nekhawm, zu dawnkhawm uh ahih manun LAWM ANNEEK na ci uh hi.

Tu hun ciangin, tual biakna kibawl nawn lo ahih manin lawm anneek hun pen gualnopna pawi bekin kizang a, a ni nih ni ciangin khua sunga thau nei teng, saben siam teng, tangval thahaat teng gamkuanin sataang haalin, sahawlin, sataang pangin, tua bangin sa beng ngeeingai uh hi. Tua ni a kimansate a khuazaangun a kicing thei dandanin huan uh a, a kul leh innsa nih leh thum tawh behlap uh hi. Huumpi, Sahaang, vompi cihte a mat uh ciangin innsa nih leh thum tawh aai uh a, gual nuam mahmah uh hi. Sabengte khua hong tun uh ciangin khawmualah nungaakte in zu khum mahmah tawh na dawn uh a, gamkuan ten a thau uh lawn uh hi. Hih bangin SIALSAWM pawi pen Zomite biakpiakna lah hi, ngeina lah hi, nopsakna lah ahi hi.

Pupa Sahawm Dan
Nopna-Dahna sungah thukhun ngeina zui-in ki-uapin nakhempeuh kiseem hi. Tua thukhun kantanin khengval leh kideihlo hi. Kisam leh zong kideihlo hi. Sanggam abul-adawn kiguang dimdiam hi. Tua zui-in sa hawm uh hi. Aphei tang ding, a liang tang ding, angawng tang ding, cih bangin min gotsa-in nei uh hi. Piakding kilawm khatzong nusia lo uh hi. Sialcingte nangawn sialneel, ci-in atawkuam teng pia uh hi.

Tua tawh kizui-in ama tanhdingaa kisehna mun lian a kipiak keileh bang hang hiam, kapanmun hong kheel hiam, kei hong manuam uh hiding hiam, hong khelbawl hiam, ci-in sittel pah tiuteu hi. Amau dinmun tawh kisai satahn bektawh lungkimse uh hi. Avaal deihlo hi. A hemzawkleh zong lungkimlo uh hi. Thumaan mahmah, cihtak mahmah uh hi.

Amau tanhding sa a piak ciangin, ne pahpah lo-in sittel masa uh hi. A kilawmlo a om ciangin nolhkik uh hi. Tua ahih ciangin Zuhawm-sahawm kidop kul hi. Sasem siam kicial hi. Apazaw-asahzaw cih omsak lo hi. A temha sawipaisak lo hi. Sa semhun ciangin Bangkuapipa leh a tei zawdeuhte in sakuang-umin encik ciat uh hi. Paubanglo dingin hanciam uh hi. Saluang munkhatzong mawkvallo dingin kiseh hi.

Sahawmdan pen hunkhat leh hunkhat munkhat leh munkhat kibanglo hi. Nopna sahawm leh Dahna sahawm kibanglo hi. Mo-sagawh leh thudangte kibang lo hi. Lawm-an neekna-ah Sanggamsa kipia lo hi. Ahih hangin a thusiamte in, Tuibuhsa ci-in Tanupi Tuitaak leh Tanu nihna ahi Sawlla a iikbup hawmsak hi. Bang hang hiam, cihleh Tanute pen kitaang sapna khempeuhah gamtaang ahihman ahi hi.

A.Mo-sagawh Sakuangkhen:
Aphei-meibaang, A iiktawn, Alianggel [alianggalkah], Akha phalkhat, Anungzuui phalkhat, Adeekguh phalkhat, Agilpi phalkhat, Abil langkhat, Angoi kawnkhat, Asin sehthumsuah sehkhat.

B.Mokhate sahawm
Thalloh or Sanggamkhatna ------- Atel leh a sungkua namkim.
Sunghpipa -------------------------- Atel sungnung leh sungkua namkim.
Tanupi or Tuitaak, or ------------- A iik leh a sungkua namkim.
Tanu-nauzaw or Sawlla ---------- Aphuuk leh a sungkua namkim.
Zinkhak, or Sanggam nihna ------ Azungzui leh a sungkua namkim. Vok ahihleh sungkua namkim kipia lo hi. Angoi tumkhat ta kizuisak bek hi.

C. Mopite Sahawmdan
Innteek ---------- Aliangbit leh sungkua namkim.
Thalloh ---------- Atel leh sungkua namkim.
Sunghpi --------- Atel sungnung leh sungkua namkim.
Tanupi ---------- A-iik leh sungkua namkim.
Tanu nihna ----- Aphuuk leh sungkua namkim. Vok ahih leh angoi tumkhat tek.

D. Gal-aih Len Sa-aihna Sahawm dan Ngenna
Hihneihna:
Ko kiangah sahawmdan namnih om hi. Teizaangtat leh Saizaangtat kici hi. Ko pen Teizaangtat zang kahihman un, namnihin kong gelh hi. Ahizongin nakpi-in kilamdang lua lo hi.

1. Gaal-aihna
Thalloh or Sanggam khatna ------ Aphei tumbul.[abultong].
Zinkhak or Sanggam nihna ------- Aliang khat.
Tuitaak, Tanupi -------------------- Anaak tangli.
Sawlla, Tanu nihna ------------- Anaak tangthum.
Sunghpi in --------------------- Angawngsa.
Pu nihna ----------------------- Ameizui. Vaksa in aliang leh a iiksa kipia hi.

2. Sa-aihna
Thalloh, Sanggam khatna -------- Apheitumbul.
Zinkhak, Sanggam nihna --------- Aliang khat.
Tuitaak, Tanupi ---------------- Nak tangli.
Sawlla, Tanu nihna ------------- Nak tangthum.
Sunghpi ------------------------ Angawngsa.
Pu nihna ----------------------- Azungzui, ameizui.
Nuphal ------------------------- Anaak' tangnih.
Vakte pen a liang leh a iik kipia hi. Gaal leh Sa thuah thei a, gan pumnih mah kigo hi. Gaalvakte in, Gaal-aihna saliang saang uh hi. Savakhte in sa-aihna saliang saang uh hi.

E. Tong (Zupinung) Ton Ciang a Sahawmdan tuamtuam
Thalloh, Sanggam khatna -------- Aphei khat.
Zinkhak, Sanggamnihna ---------- Aliang khat.
Behsabawl ---------------------- Aliang tumbul.
Sunghpi ------------------------ A awmlang.(naaktang-9 bang kipia hi.)
Pute --------------------------- Ameizui tumnih suahin tumkhat kipia.
Tuitaak, Tanupi ---------------- Amaugawh saluangkhat tutphah hi. Sialvun namkhat cingding zikkhat kipia hi.
Sawlla, Tanu nihna ------------- Sagualgawh pen innteek pialo-in amau tutphah hi.
Tulpi -------------------------- Azangsa phalkhat leh a pheisa baksagih kipia hi.
Zawl --------------------------- Sialngawng kipia hi.
Songte ------------------------- Akeng tumbul khatleh a iik phalkhat leh a sungkua namkim kipia.
Lawigawhsa --------------------- Pusa thoihna bangin kihawm hi.
Lawigawh voknusa --------------- Phaitam aa alaam cialna-in kipia hi. Zingzu leh phaitamzu site kipia hi.

F. Ton sahawmdan
Thallohpa --------------------------------------- Apheibit.
Zinkhakpa --------------------------------------- Aliangbit.
Behsabawl --------------------------------------- A zaangsa ngah.
Sunghpipa --------------------------------------- A awmlang nakguh tangkua bang.
Tanupi ------------------------------------------ Aphei tumbul.
Ama gawh saluangbup tutphah. Tanu nihna --------- Aliangtong.
Sagualgawh tutphah. Zawl ------------------------ A ngawng pua.
Pu ---------------------------------------------- Ameizui.

G. Pusa or innsungpi thoih sahawmdan
Bangkuapi, Thallohpa ----------- A liang.
Zinkhak ------------------------ Apheibul.
Tulpipa ------------------------ Aliangkhat, ahuaikhat, akhanuai.
Sabawl ------------------------- Azungzui.
Sunghpi ------------------------ Abultong.
Pu in -------------------------- Ameizui.
Tanupi leh Anauzaw ------------- Tanu ten malli ngah uh hi. Adeekguh, azungzui, a-iikmuk anawi tangkhat baang, apheisa bakkhat.
Tanu thumna -------------------- Aciangkang, azungzui, aphukka, apheisa bakkhat.
Tanu lina ---------------------- Aciangkang, azungzui, a-iik tumkhat, apheisa bakkhat.
Nuphal ------------------------- Azungzui khat. Sanggam dawnlam ten apheisa semin hawm hi.

H. Sahawmdan
Sunghpi ------------------------- Angawngtan.
Pu ------------------------------ Ameizui.
Beh khatna ---------------------- Aliang khat.
Beh nihna in -------------------- Abultong.
Beh thumna ---------------------- Azangsa nakguh-3baang.
Beh lina ------------------------ Azaangsa nakguh 2baang.
Tanupi -------------------------- Anaak tangli baang.
Akha phalkhat, Tanu nihna ------- Anaak tangthum baang.
Tanu thumna in ------------------ Anaak tangnih baang.
Nuphal -------------------------- Anaak tangnihbaang.
Tulpipa ------------------------- Aliangbit khat. Akha phalkhat.

I. Sahawmdan
Tulpipa ---------------------- Apheibul.
Thallohpa -------------------- A-iiktawn leh aliangbit, akhanuai phalkhat.
Zinkhak ---------------------- Aliangtong.
Sungpi ----------------------- Abultong.
Pu(Taangpu) ------------------ Ameizui
Tanupi leh Tanu nauzaw ------- A deekguh, azungzui, a-iiktawn khat, aliangsa
Tanu thumna leh Lina --------- A ciangkang, azungzui, a-iiktawn, aliangsa bakkhat.
Tanu ngana ------------------- Azungzui, a-iik tumkhat, aliangsa bakkhat.

J. Sihna Hanken Sahawmdan:
Tuitaak, or Tanupi Aphei, anaakguh tangkhat, vakhupeu [ asialin kipia] Anaaktangnih baang, apheisa bakkhat, angawngsa bakkhat, ahuaisa bakkhat, aliangsa bakkhat, asin, agilpi, agilkha,atuap a-ekthup, innlakte siguina aphuukka leh akopsam savaal tuamtuam kipialai hi. Sawlla or Tanu nauzaw. Aliang khat pia hi. Adangte Tanupi tawh kibangsak hi. Tanupi leh Tanu nauzaw in amau saante hawmkik uh hi. Apheisa khennih suah a, ama Thallohpa leh a Tanupi hawmsak hi. Anaakbul nihsuah a, tanu nauzaw pia hi.Thalloh leh Sunghpi. Anaak nih, apheisa,aliangsa, angawngsa, ahuai, asin, angoi, atuap, agilpi, a-eekthup, a-iik leh agilkha pia hi. Innlak guina samal(sakeng) apheikhat teelsak hi. Hih a sa saante pen amau bultengmah hawmsak hi. Apheisa bakthum suah a, Tanu-nauzaw, Sunghpi, leh Zinkhak hawmsak hi. Anaakbul pen Tanupi leh Thalloh hawmsak hi. Zinkhak leh Pu saan. Anaak tangnih baang, apheisa, aliangsa, angawngsa, ahuai, asin, angoi, atuap, agilpi, a-ekthup, a-iik leh agilkha saang hi. Savo kici asialin bakkhat tuak kipialai hi. Amau sante anaakbul nih suahin Tanupi leh Thalloh hawmsak hi. Apheisa thum suahin, Tanu nauzaw, Sunghpi, Zinkhak hawmsak hi.

Sabawlgel saan. Anaak tanggiat, apheisa, anaakbul nih, aliangsa, angawngsa, ahuai, asungkua namkim saang hi. Tua banah Innlak guina samak phei khattuak kipialai hi. Ahawmkik ciangin, anaak tanggiat tumnih suah a, amau aadingin tangli baang koih hi. Anaakbul nihsuah leuleu a, Tanu nauzaw leh Thalloh hawmsak hi. Thusageel saan. Anaakbul tangnih baang, aliangsa, angawngsa, apheisa, asungkua namkim saangsak hi. Zawl leh Nuphal saan. Anaakbul tangkhatbaang leh asungkua omlai bangbang kipia hi. Khankuang bawlte angawng phalkhat kipia hi. Nautaangte pen angoi tumkhat leh agilpi pia hi. Sungtaa. Aphuuk, angoi, agilpi pia hi. Miguina vokno malkhat pia hi. Simaisa Aphuuk asungkua namkim kipia hi. Khuangtumsa Khuangtumpa leh Daaktumte hawm dingin, anak tangkhat, apheisa bakkhat,angoi, agilpi, atuap kipia hi. Asin kihello hi. Laang'khetsa Apheisavo ki-aat hi. Innteek sa Thalloh siguina ateltawn, zungzui kaikha, aliangkhat, apheimal, ahuai, Atel leh azungzui.

Innlakguina sungpan innteek in, aliangbit,apheikhat, atel sungnung, tang uh hi. Lukhungsa kici, alungphalkhat, amuk, acingsa bakkhat, azel tumkhat, atuap, agilkha, asin, a-ekthup, aleii tumkhat.

K. Sahawmdan:
Behlamte Thalloh in apheibul. Zinkhak in anaak tangli baang. Sialbawl in anaak tangthum Tulpikai in anaak tangnih Beh ngana in tangnihmah Behgukna anak tangnihmah Tanupawl Tanupi in abul Tanu nihna in aliang deih teelsak. Tanu thumna in aliang teelloh zawkpen Tanu lina in a zaangsa teelsak Tanu ngana in a zaangsa kiteellozaw pen. Tanu nautaang in aphuuksa hawm uh. A iiksa pen khunsa-in kihawm hi. Thallohpanin panto hi. Pu pawl. Pupi in angawng sang hi. Tangpu in ameizui ngah hi. Pu dangte pen ameizui tumtanin hawm hi A kicin keileh ahuai hawmsak hi. Thusa leh Sasem Apheisa aatin pia hi. Sakuangkhiat. A lutang, a-iik, aliang, azaangsakhat, angawng kikoihsak hi. Angoi kawnkhat, asinkakhat, cihbangin kikoihsak hi.

Ei Christian ten Zuhawm-Sahawm pen kinakzat nawnlo hi. Tanu leh Thusa agimdiak agamtaang diakte bek tanh kipia a, adangdangte ngeina zui-in kihawm lo hi. Tanupi leh anihna pen tuibuhsa peuh kipia hi. Christian sungah Beh-thusa leh Veng-thusa in nasep neisimsim hi. Tua ban-ah SDA Pawlpi diakdiak Ganpum zatna tawm hi. Zong kideih khollo maita hi. Zindo nading aa kigo leh innteekmeh ding aa kigo nangawn kibuaipih tamzaw ahihmanin kazang taktak lo hi.

Hih kagelh pen Khang taangthu ciamtehna ding leh Ngeina a kannuam khangnote aading ngimna tawh katheihsunsun hong gelhkhia kahi hi. Tua zong amauzat kammalte katheihtel loh tammahmah ta hi. Ameizu, asumkuul, aciangkang, abul, atong, amal cihkhawng kazakzak hangin bangcih katelloh ngentang ahi hi.

L. Pusa or Innsungpi thoih sahawmdan
Bangkuapi, Thallohpa -------- A liang.
Zinkhak --------------------- Apheibul.
Tulpipa --------------------- Aliangkh at, ahuaikhat, akhanuai.
Sabawl ---------------------- Azungzui.
Sunghpi --------------------- Abultong.
Pu in ----------------------- Ameizui.
Tanupi leh Anauzaw ---------- Tanu ten malli ngah uh hi. Adeekguh, azungzui, a-iikmuk anawi tangkhat baang, apheisa bakkhat.
Tanu thumna ----------------- Aciangkang, azungzu, aphukka,
Zawl ------------------------ Sialngaw ng kipia hi.
Songte ---------------------- Akeng tumbul khatleh a iik phalkhat leh a sungkua namkim kipia.
Lawigawhsa ------------------ Pusa thoihna bangin kihawm hi.
Lawigawh voknu sa ----------- Phaitam aa alaam cialna-in kipia hi. Zingzu leh phaitamzu site kipia hi.

M. Pupa Ngeina Zukholh:
Kawl huzaap Zomi ten Pawi acih pen India lam Zomi te'n Lawm ci uh hi. Ahih hangin hite pen Zopau hilo hi. Zopau iin Ai kicizaw hi. Mimza ai, taangza ai, asamat ai, BA ai, kici hi. Ahih hangin Lawki-hunlai gal-ai, sa-ai cihpen zupi nungin dawibiak ngeina tawh na kizomlua ahihman, ai cihpen lawkivai-lua kisa kha ding hi.

Zomite in gualzawhna leh matutna khatpeuh a om ciangin kipahtawi uh hi. Kasangnaupan lai-in kapa in lai ka-on simin aktawh hong aihsak tawntung hi. Innkuan iin kilungkim mahmah hi. Kalai onman kei aklu hong nesak hi. Thuneuno abat hangin hanciamnopna hong khangsak hi. Nu leh pa hong pahtawina pen ki-angtanpih mahmah hi. Ka uu pen saben uuk ahih ciangin lailam haatlo hi. Ahih hangin vakhu khat amat pen kapa'n aklui khat tawh aihsak hi. Vakhu pen khuttum-cia phalo hi. A aihna aklui pen innkuanmeh cing hi. Tua bang kipahtawina in lungsim cidamsak hi.

N. Pute Tuukzuu Kholh:
Zomi lawkite in tuuktung masa anpalte zuu in sa uh hi. Puute zuu khol uh hi. Zucil kaimasa pen a puupi suah uh hi. Apuu in la-in mawkneeklo hi. A tute cidamna ding leh mimza tangza lazo ding, sumnu sumpa lamzawhna dingin thupha ngetsak uh hi. Zomi te ngeina-ah numeite in pianna nulehpa vakna ding thu ngahlo hi. Go leh gam kitomsak lo hi. Ahih hangin numei nualam pen kipuapaih tuanlo hi. Naupangte in puute zahtakpiakna leh pahtawina itna lahna ding ngeina hoihmahmah nabawl zel hi. Puute tuukzu-kholh pen numeilam pahtawina ahi hi. Puute leh lamphung kineekzolo cih paunak nei uh hi. Tua pen naupangte in nulam ahi puute pen simmawh loh ding deihna hi. Lungsim sungah ngeina kipmahmah aguansak ahi hi. Puute simmawhte damlo hi. Nuamsa lo hi. cin umsak hi. Gilsung damlote in gau-an la ci'n puute kiangah ankhing vasiim uh hi. A tute tungah khasia leh, napu ngoidok hing bang hang hong hici bawl na hiam? cithei uh hi. Ngoidok cihpen gilnathei cihna ahi hi. Tua ahih ciangin damlohna thu khatpeuh a omleh puute kiang taailoh phamawh ahihmanin puute kizahtak hi. Ki -iit mahmah hi. Thupha ngahna-naak ahi hi.

Tanu-mokhak khempeuh kiciamkholin, a zu-kholhni kibangsak uh hi. Lawki-hunin omkhawlna munah aneek uh zuu hipen hi. Anlim sangin zuu pen thupiseh zaw uh hi.Puute pahtawina la vive sa uh hi.

(1.a)Kei kapuu te sen a kapuu te ningzuu bang khum thei naleng nuampeng phuhsak vang e
(1.b)Nuampeng phuhsak vang heisa bang paal thei naleng kapal losak vang e

(2.a)Bualna ngei nuam bualna ngei nuam e, puvon siangsung bualna ngei nuam e
(2.b)Laamna ngeinuam laamna ngei nuam e, puvon pahtang laamna ngei nuam e

(3.a)Tualnuam e tualnuam e puute sumtual tualtung tualnuam e
(3.b)Gam nuam e gam nuam e pupa gamzang gamnem gamnuam e

(4.a)Pupa gamzang tangzang khat a, tangkhat suan zong simtheihloh piang e
(4.b)Tang khat suan zong simtheihloh piang a bangaa sunglawh bang kasam hiam aw

(5.a)Theisen puvon ngalliam bel aw tusuanmel haihkha na cia
(5.b)Gual sang tongdam neem zaw ding a, aduang mel hoih ding aw ee

Dawhdan saknung leh dawhdan khangnung dimin zubeel kigual hi. Zubeel khat mikhat in tutpih hi. Sak leh khang abul leh adawn kidawngin lasa ziahziah hi. Pasalnote kikhelin alai-ah tawnsak keukeu hi. Khuangtumpan akhuang saankeuhkeuh iin hong tawp ciangin, suai..suai..suai suai cin, a tangtawnpa kai-in zuu teepsak hi. A puute a itmanin tawn(laam) hi ci-in pakta mahmah uh hi. Tuukzuu-akmat ci-in ak khattek namat uh hi. Pawlkhat in sum mat uh hi. Pawlkhat in gangawh hi. Bang bang kimat taleh tukzu-akmat in sum tua zah hong pia ci uh hi.

Tuhun Christian ten zong hih ngeina paikhia tuanlo hi. Zuu tangin cikhum bawngnawi peuh kikhol hi. Antak bungkhat bungnih vapuak thei hi. Pawlkhat in anlim-tuilim vaneekpih hi. Hih pen puute pahtawina pawi limci mahmah ahi hi.Ei Christian khangthak hunin zong puute pahtawina hunnuam limci-takin kibawl thei lel ding hi.

O. Sazaam:
Japan-galma hunin saneek kisangkhaat mahmah hi. Sa-sai omlo hi. Dangka-tang ngahna haksa lua hi. Akpi khat matkhat in kilei hi. Minvawh khat neilo-in akno khat zong kigongam lo hi. Sumtawng-thoih ahihkeh huanthoih cihkhat in zang hamtang uh hi. Saneekna tawmlua ahihmanin lampi zong uh hi. Inn-4 inn-5 kipawlin banpai-in vok go uh hi. Tua pen sazaam kici hi. Vok pen bangcia go dingcih ciangtan uh hi. Pawlkhat in nekhawm hi. Pawlkhat in a kikimin sehhawm uh hi. Sa khamtakin ne uh ahihman sazaam pen ahihzote ki-eng mahmah hi. Hih kipawlna pen a cithei zawdeuhte aa hi. Meigong daipamte kihel zolo hi.

P. Tukvak:
Tanghamkin kici ankung leh kiak kikimin a omlaitak lokhawh kikin mahmah hi. Lo-lel ahihman thacial uh hi. Kialhuntawh kituak sawnsawn hi. Thacialte kivaitut zolo ahihman, tuktun(akhawhsa-tun) ciang kivaakpan hi. Tuktun ciangin thacialte kaikhawm in zuu leh sa akhamtakin neekpih hi. Thacial-vaak tawh kibangnawnlo hi. Pawibawl banglel ahihman nuamsa mahmah hi.

Hih ngeinate pen dawibiakna tawh kisai hilo hi. Amau-hun tawh kituak nuntak khuasakzia ahi hi. Tua banga kikaihkhopnate pen a kingai tengmah ahi hi. Kikholhna tamleh kingaihna leh kiphawkna zong khangpah hi.

Source :
Siantongluan

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pupa Ngeina Taangthu. Description: Rating: 5 Reviewed By: Cinpu Zomi
Scroll to Top