728x90 AdSpace

Hot
Menu
Zon-ol na Donate

Latest News

Zomite Lawm ki Ngaih zia. Agelh ~ Rev. Thang Siam Lian

Zomite Lawm ki Ngaih zia.
Agelh ~ Rev. Thang Siam Lian

 Photo : Laigelh Rev. Thang Siam Lian te nupa.


A sunga om Thute:
ZOMITE LAWM KI NGAIH ZIA.
KITENNA THU
KI LEINA
TAU THU:-
MAN THU:-
MUAL KHUP:-
TUM BUL:-

A min: Khiatna:
Van khai tam:-
Liang ziat:-
Liang vei:-
Tum bul:-
Zang:-
Sa san:-

TA NEIHNA THU
INN TUANNA THU
A LA KHIATNA:

Nungak tangval khat a kingaihna thu amau' mithek zia-in ki thei hi. Tua bek tawh kingai taktak cih kithei lo a, zawlla, zola peuh a sak khawm a kikhakna panun a kingai a hih lam uh ki theithei hi.

Nungak leh tangval a kingai hi, cih a ki telna a om ciangin tangval in, a ki hotuahpih mahmah khat sawlin angaihna va dong sak hi. A lawm dong pa nitakin va hawh a, meipamah va tu hi. Innteekte in, "Nidang a hong hawh ngeilo, tu nitak a nong hawh zenzen ut nei khat hoih na hiam aw," ci-in lamdang sakna tawh dong uh hi. Lawm helpa in, "Hongt hawh mawkmawk hing e, a cih hangin nungak in na zetheih p ian pah a hih manin, a ciah ciangin tuuibuk tawh zui khia a, Tuibuk nuam aw, a cih ciangin, lawm hel penin thungen pih nuam ahih manin, inn sungah sang pah loin, "Duh nai ke'ng lah cilo, duh ing lah ci loin paipai a, nungak in zong zuizui hi. Innka a tun ciangun a lawm' sawlna thu teng nungak' tungah gen hi.

Lawm hel pen in a lawm' vaikhakna (sawlna) bangbang a siam tawpin a gen ciangin ngaihsut kicing lo ahih leh mang pah peppep a, ngaihsut kicing ahih leh, a tak sang lo bang keek khatin kibawlin, "Na cih takpi uh hi ken cia lam kim mual tenga mi' ciamnui guicinna peuh ding hi lel in teh hong mang ngam ke'ng, na kamsiam uh hi lel in teh," ci-in na dek bawl phot hi.

Lawm helpa in, "Nang tua bang ci na hih ciangin a it lo, a ngailo hi nicin, a hi zongin ka lawm in bel nang hong itna sawtpi hi khin ahih manin kei nong khualna-in ni nih ni thum bek ahi zongin hong mang ta peuh in, ka lawm' kiangah bang ci gen kik hong ding ka hiam," ci-in gen hi.

Tua ciangin nungak lungpilnu in ngai napi a dekna bek ahih manin, mang kik a, tua bang na cih ngaungau leh lah "Hi ta ve" ci kik hi. Lawm helpa in zong, "Tua ahih leh tu a teng bek zong ka lungdam mahmah in, zing tak ciangin ka lawmpa tawh hong hawh kik nung in tuibuk umta khat hong pua nung ei, tuibuk na tep in maw," ci-in ki vaikhak uh hi.

Tua ciangina lawm in lawm hel dinga a sawlpa mah tawh kithuah a, tua a ki thuahpihpa pen, "Bawmta" kici hi. Bawmta pa tawh kithuahin nitak simin nungaknu' innah va hawh uh a, "Lengkhawl" kici hi. Lengkhawlte in za-ip no khat leh tuibuk umta khat pua-in bawmtapa masa-in va hawh uh hi. a nihun meipamah tu uh a, bawmta pa sak nungin, a lawm ngaipa khangnung hi. Tua ciangin nungak in ankhing pia a, a bawmtapa' angah pai tektek hi. A ciang ding uh ciangin a lawm ngaipa masa-in a bawmtapa nunung hi. Ciah suak sam lo uh a, innka-ah na khawl uh hi. Nungak in zong tuibuk theipi khat tawh a nungah zui hi. A kiang a tun ciangin a bawmtapa in a tuibuk umta puak pen nungak pia hi. A nungak in zong khuamial lakpi mahah na sangin tuibuk thun sak a, a siamte in seh thum suah seh nih bang thun thei hi. A piak kik ciangin nungak pil ahih leh a puanak mong tawh umta kawt nul keu sak phot a, tua khit ciangin pia pan hi. Ngaihsut kicing lo nungak ahih leh a khawtpi-in pia hi.

Tua bangin nitak siminhawhhawh uh a, zawlthu gen tuan nailo uh hi. Kha thum kha li bang a phak ciangin a nungak in hong ngai taktak ahi tam, ci-in ze-et a, " Hi tanvai kei kiang ahong hawh a, kamsiam takpi zong za lo, na it na ngaih kiang a na paiding kei hong khaktan suak ing, tu-in hong hawh nawn kei le ucin no adingin hoih zaw ding hi," a cih ciangin a lawmpa in, "Ke'n lo buang it dang ngaih dang peuhmah nei ke'ng ka tal tangin nong sawn kha liang zongin hong hawh teitei ding hi'ng," ci-in thukkik hi. Hi bangin amau gel ki ho theih nadingin kha thum kha li bang a phak ciangin a bawmtapa in zui nawn lo hi.

Ki-it kingaihna lungsim uh aki tel taktak ciangun, a lawmpa in thuciam a, "Tu-in nang na sih leh kei zi si hi ding hi'ng, tua mah bangin kei ka sih leh nang zong pasal si hi ta ding na hih manin kuamah a lungkia om kei ni, mittawh khelbai-in ih om zongin kuamah ki nusia nawn lo ding hi hang," a cih ciangin nungak in zong, Hi mah hen o a cih leh tua ni akipanin a kiteng khin sa zah mahin kituah pah uh hi. Hih zah tawh a thu a kikhin om a ahi zongin zuthawl a zangte in zuthawl pia lai uh hi. Hi zah a kamciam kip a neih khit ciangun a lawm a gual lakah zukham sul bek ahi zongin, midang tawh gen banna a om ding ut nawn lo uh hi.


KITENNA THU
Bawmtapa in alawmte gel ki-it kingaihna "Kip" hi cih a theih ciangin, a lawmpa' nu leh p a' kiangah, "Mo" na deih uh leh pi ve vua" ci-in ciamnuih leh cihtak thuahin gen hi. Tua banga a va gen ciangin a innkuanpihte lungdamin "Tua banga a it a ngaih om thei a hih leh nuam ve hange," ciin a nitak ciangin thallohpa leh tanute in zu bel khat tawh a pi dingin va kuan pah uh hi. Nungak leh tangvalte ki-it kingai thei zenzen uh ahih manin na tuu leh na hei uh hong kawm hi ung ei," ci-in nungak' nu leh pa' kiangah zu bel khat tawh va kuan uh a, a thu gen ding teng uh a man khit ciangin inntekte in zu bel khat mah pua kik sakin mo tawh ciah uh hi. Mo pen a lawmpa' inn a va tun ciangin meipam khuamial lakah tu khilkhialin mo zu phuak a nek khit uh ciangin numeino aom leh mo tawh lumkhawm sak phot uh a, zingsang khuavak ma deuhin a naw lamah ciah kik phot hi.

Zingan nek sungin thallohpa va hawhin, numei khat tua mo zui dingin seh hi. Tua a seh nu lokuan van teng tawh kithawi-in mo vaikuanna peuhpeuhah va khuanpih a, anitak vai ciah ciangin mo tawh mo neipa' innah ciah khawm uh hi. Sing puak khat tuak tawh vai hong ciah uh a, mothak zong innteek suakin an ne pahin an neek bawlin zingtui, zing sing la-in tui tawh ding teng aman khit ciangin mo zui nu tawh a pate' innah va hawh khawm uh hi. Tua banga a va hawh ciangun a nu a pate in thukhualna leh deihsakna tawh, "Numei vak ciah hak hoih lo hi, ciah hak lua kei un, tu mahmahin ciah un," ci-in sawl zaw uh hi.

Tua ciangin zi leh ta a a ngaihsut huh uh hi ta a, ahi zongin lumkhawm sak pah nai lo uh hi. A kipi zawh uh kal khat a cin ciangin siampu sam uh a, ak khat tawh "Ak mit etna" cih nei sak phot uh a tua khit ciangin lumkhawm sak pan uh hi. Tua ak multe awh dingin bawl uh a, a innkuanun ok sak uh hi. Hi bang a a bawl uh pen a thupi mahmah khat a a ngaihsut khat uh hi a, "Kha hualna" kici hi. (A kha uh gawmkhopna khat a a ngaihsut uh ahi hi.) Tua nitak tak ciangin a lawmte in thei ngawngaw uh ahih manun a sawm panun pum zawn uh a, a lupna ding vua a bawl thak dawhdanah sialin ciah san uh hi. (Nidang lai-in tangvalte a inn vuah lum ngeilo-in mun khatah tangval teng giahkhawhman nei uh a tua pen "Sawm" kici hi.) Mo nu pen a innkuanpihte khempeuh a lup khit gaih matengin a lawmpa zuan ngam peuhmah lo hi. Tua zan ngawngaw ciangin lumkhawm uh a, nupa suak taktak pan uh hi. Nidang lai-in tangval khempeuh sawmah giak uh a, zi a neih matengun a sawm uh lawi ngam lo uh hi. Zi a neih ciangun a giahpih a sawm lawmte in, "Nong nutsiat man" ci-in zu bel khat liau sak uh a, "Ang khen zu" ci-in a sawmah ne ngeingai uh hi.

KI LEINA
A kiten hangun ki lei pak lo uh hi. Mo in nau a paai ciangin a hi zongin, a khawhsa a tun ciangin ahi zongin thallohpa vaihawmin, "Ih mo pen guak om nawnlo ahih manin, papite in, "Guhsia leh haksa" a cih mah bangun sih khat man khat tuak kha zenzen le'ng, hoih kei incin, ih sunghte' pialkhang va kawt sak ni," ci-in vaikhawmna nei uh hi. Tua ciangin zu bel khat pua-in a sunghte' innah va lup uh a, a neih uh leh sum tawm bang kiging uh hi.

A tanu pa in zu bel puak leihin a pai teng lak panin thugen dinga thugen siam khat a tonpih uh, "Tam si" kici a, tuapa leek sak hi. Zu leeppa in a zawh ciangin a tanu pa kai hi. Tanupa in ama nek bangbang inntekpa pia nuam ahih manin, zu bel pen a leeppa aa' sangin thuktum suk sak zaw deuh hi. Ama nek bangbang innteekpa in ne pah a, innteekpa nungah zubawlpa in hoih a sak bangin kai hi.. Hih amsa zuleep thum teng aki khit ciangun apina thu uh "Tam si" pa gen a tua pen "Thu sung" kici hi. Innteek lamte zong meltheih teng samin phaitam lamah kamkumna khat nei uh hi. Hih kikupna sungah innteekpa in a u a nau teng dongin, "bang zah ngen lehang kilawm sa nei vuam? ci-in a dot ciangin a sanggam sung pan a pau ngal khat in, " Tau sawm ngen le'ng hoih lo ding hiam? a cih ciangin innteepa in, "Tau sawm na cih uh zong hoih sam mah ven, ahi zoingin mi banga nikten puansilh, tuzat heizat, khi-awh taubuh, a hoih a pha a guan zo ding lah hilo hang a, a kilawm khat om ding hi,ngaihsun dih un," a cih ciangin papite in, "Mo thu leh misi thu bel innteekte' thu hi, a cih mah bangin ka tuah peuhpeuh uh a gen hi ve ung in, innteek pan nang hoih sak bangbang hi lo ding ahia," a ci-in a thukimna teng uh a kuante' lamah sung (pulak) kik leuleu uh hi.

TAU THU:- Khangluite in tau a cih pen tu hun a pek guk tawh kikim sak uh hi. Ahi zongin tau khat sang a a tam zaw a kingetna peuhpeuhah, amasa pen tau khat pek guk pai hi a, tua ahih kei leh vok tuk thum khat ahih kei leh puandum khat ahi hi. A tau dangte pek thum, pek li, pek nga cih bangin kipia thei leuleu hi. A migite in thatang khat nangawn tau khat, tau nih cih bangin zong maisak thei uh hi. Pek guk ih cih bel nidang lai-in sial khat ciangin Ks.240 bang hi a, lawi khat ciangin Ks.120 bang bek man ahih manin tua tawh tuat lehang Pek guk bek ahih hangin tam veve ding hi.

MAN THU:- Man a kiseh tak ciangin, tu a ih gensa zah gehtehna-in tau sagih bek hilo hi. Tuate banah pawl khat in "Nu man" "Tha man" cih bang zong pia thei uh hi. Nu man pen "Puandum" khat a hih kei leh pek li ngen thei uh hi. Pasal nei nu pen amau' unau sungah a u' sangin pasal nei masa zaw ahih leh, "U Kan man" kici a, a ute' nget zahzah kipia hi. Ahi zongin pek sangin tam zaw ngeilo hi. Tu hun ahih leh ut zahzah a kilawm lo phialphial a ngen zong om thei a, a ngen lo zong om thei zel hi.

MUAL KHUP:- Khua a pasal nei ahih leh mualkhup man ci-in gual thum bangin kingen thei hi. Gual khat ih cih leh dangka pek khat a kikim ahi hi. VAN KHAI:- Ta tampi anei hih leh To tam a neih manin paunakin "Liangkhai tam" kici hi. Tua Tote in min a tuamtuam nei uh a, "Liang khai" leh "Liang vei" hi a, hite gelkikimin gual guk tuak ahi hi.

TUM BUL:- leh ZANG ahih leh tual li tuak kipia hi. Sa san ahih leh gual khat kipia hi. Hihte banah a tuamtuam a om hangin hihte zaha a thupi omlo hi.

A min: Khiatna:
Van khai tam:- To tampi nei cihna hi. Tua tote in sila mi, sila numei, sila pasal nei a, a om simin a kibangin gual guk la tawntung hi. Pia zo pah lo ahih manun sik thethu ahih manin "Van khai tam" a cih uh ahi hi. A gilote a zukham ciangun a inn nuai vua vok nangawn mat sak thei ahih manun, Tanu man sik lahna hang a' cih paunak pen hih pan a hong piang khia ahi hi.

Liang ziat:- To a a neih masak penpen liangziat kici hi. Bang hang hiam cih leh Pu sa a thoih ciangun a gan gawh uh a tak lam liang a piak uh kul hi.

Liang vei:- A to nihna hi a, a tung a mah bangin Pusa a thoih uh ciangin a vei lam liang a piak uh kul hi.

Tum bul:- A To thumna hi a, Pusa a thoih ciangun, a phei tum bul a khe dawn lam a piak uh kul hi.

Zang:- A To lina hi a, Pusa a thoih uh ciangin a zang a nak thum kithuah a piak kul hi.

Sa san:- A To ngana hi a, Pusa a thoih uh ciangun To sa piak kul nawnlo a, "Tanu man" gual khat pan bek piak kul a, tua pen amakpa in a piak kul hi. (A tanu zi a a neite in piak kul cihna).

Sila pa:- Sila pasal pen in, Pusa thoihna bek hilo-in, ton sialsa pusa thoihna sa a piak mah bangin pia hi. Hih a tung a To minte pen a sa kaih mun zui a min kipia ahi hi.

TA NEIHNA THU
Nupa kitenga a zi a gaai ciangin na sep sil bawl peuhmah, amah nau paai gai ahih hangin ki map tuan lo a, a kibangin ki sem sak veve hi. A suah ding ciangin pasal hat khat domin, a gil tung panin mek suk a, a hun ngak lai zek ni, cih mel om tuanlo-in thatang hat ciamin sal khiat dingin hanciam uh hi. (Tu hun a siahuan te'n thei leh pawh bang zahin a mul uh a kim zen tam maw?)

Nau suah khiat phetin temta khat tawh nau lai tan uh a, nau lai dam sian mateng nau lai tanana temta ki zang theilo ci sak se uh hi. Nau a suah ciangin a pumpi tunga a baal vuk tawh a kibangte silsial ding ngaihsun nawnlo uh a, tua ci bangmahin puansia khat tawh tuamin tun pah uh hi. Nau a kah leh zuha muam pah uh a, luaisungah vei lel uh hi. Nau a suah ni thum a phak ciangin mi kiphuak pah hi. Ni thu ma-in kiphuak man kei leh dawi in hong tuh thei hi cih upna nei uh hi. Kha thum a phak ciangin a sam met sak pan uh hi.

Nau in ek a thak ciangin, "Toh toh toh" ci-in ui samin ne sak uh a, ui a om kei teh, maiteh peuh tawh siak ziau uh a, a nin a siang don se lo uh hi. A nap a om ciangin, a nu ahi a, a pi ahi zongin, a cing khat peuhpeuh in a kam tawh tawp sak uh hi. Ama thu tawh an a neih theih mateng an muam uh hi. Kum 12 a phak ciangin tu hun bangin sangah ki puak cih bang omlo ahih manin, a nu a pa zahin na sep siam khin pah uh hi.

Numeite in ta upa kum 12 bang a phak hun ciangin innluah ding a hih kei uh leh innpi panin inn tuan ding kipan uh hi.

INN TUANNA THU
Inn tuan zawh kum thum ma peuhmahin, zawh ta leh hau ta leh gal-aih kul sak uh hi. A haute in gan lian zang uh a, A zawngte in gan neu zang hi bek hi. A neu akici pen vok ciangin ki ai thei hi. A lian cih pen Bawng, Sial, Lawi cih bang ahi hi.

Bang hangin gal-aih kul sak sese uh ahih cih leh, gal ai kei uh leh gal-aih nungin innkuang sungah a si khat peuh om zenzen leh, lang pen puan tawh khuh thei lo hi. Khuh thei lo cih ciangin gal a aih kei leh Tang ciing, Puansan tawh khuh thei lo cihna hi. Gal a aih kei leh puan san hilo puan kaang mawkmawk bek kizang thei a, gal la zong kisa thei lo hi. Gal-ai-te ahih leh gal la sa-in si vui uh hi. Tua pen Khangluite' kidemna tungnunna, pasal taktak ahihna dan khat a a ngaihsut uh ahi hi. Tua late pen:-

(a) Hamtaang kot inge, zaangta lai lawnge, ih khang gunpi tungah hen tawh gam gul bang ka vial aw e,
(b) Zang va hong ham e, hen aw tho in nu tun a suih lung lau e, siang zingvai bang ka lap nuam hi e,

(Awi deda-in kisa se hi)

(a) Ka von tem bang na deih leh, zang ta va mat sak veh aw,
(b) Zangta na mat zawh ciangin e, na deih paalah kuah aw, (Hih pen la tung sakin kisa hi.)

A LA KHIATNA:
(a) Taang ham zo khinin kawl gal bengin man ing. Lam kalah ka gal mat tawh, gul kivial bangin ka giah pih hi.
(b) Khuavak dingin vasate hamta ahih manin, ka galmat aw tho in, manlangin pai ni, ka nu' kiang hong tunpih nuam ing.

(a) Ka tanu zi a deih na hih leh kei adingin kawl gal va mat sak phot in.
(b) Kawl gal na mat khit ciangin na deih penpen tawh hong kiteng sak ning.


>>>>>------->>>>--------->>>>---------->>>>

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomite Lawm ki Ngaih zia. Agelh ~ Rev. Thang Siam Lian Description: Rating: 5 Reviewed By: Cinpu Zomi
Scroll to Top