728x90 AdSpace

Hot
Menu
Zon-ol na Donate

Latest News

KHANGNO LE KHANSAUNA. Agelh ~ Evan. Langh Do Khup

KHANGNO LE KHANSAUNA
Agelh ~ Evan. Langh Do Khup


Innkuan Sungah Na Pa Teektangsak In A innkuanpihte a hawlkhia thei Pa pawlkhat a om theih mah bangin, a innkuan sungah a Pa lengla a bangsak thei ta pawlkhat zong om thei leuleu zel hi. A Pa thusim lo lua ahih manin a Pa in a hopih ciangin zong a leh a makin a dawng gawpgawp ta pawlkhat om thei hi. Tua bang innkuante pen a tamzaw a Nu un a Pa uh na thusim loin, zahtak lo lua ahih manin a tate in zong a Pa uh zahtak thei lo uh hi.

Innkuan sungah a nu in Siapi semin vai khempeuh hawm zuauzuau vial thei hi. Hih bang innkuan sunga a omkha Pa pen lungleng mahmah a, zi le ta a neih pen hampha kisa zo loin, a dap khasiat giugiau Pa pawlkhat zong om hi. Innkuan sunga Pa pen a khasiat nak leh innkuan sungah daupaina, mavanna cihte hong zual nawn lo pahlian hi. Banghang hiam cih leh Pate’ lamah Pasian pang tawntung ahih manin Pa a khasiatna innsung pen Pasian in thupha pia nawn lo hi.

Innkuan sungah na Pa teektangsak inla, thu kikuppih hamtang in. Na hih ding na sep ding khat peuhpeuh na Pa theisak masa hamtang in. Innkuan lutang, innkuan sung Pa takpi, zing vai nitak vai theikha loin koih het kei in. Na Pa sangin na pil zawkkhak leh zong, na vaihawm siamnate na Pa theisak masa inla, amah thukimsak phot in. Tua hi leh Hauhna leh Khansauna Thusim nangma-a hong hi taktak ding hi.


Nu Le Pa Khitui Luangsak Kei In
Absalom in a pianna a Pa hehpihna lungsim nei loin, khe guakin lam paisak a, Olive mual kahtohna ah a lu tuamsa-in le kap kawmin lampaisak hi (2Sam 15:30). Khatvei leh a Pa puan balkek liangin lungkhamsak a, khatvei leh a Pa lam pai kawm nangawnin kapsak hi. A Pa khasiasak mun lua ahih manin, kuama thangsiah lohpi-in tawsaw hiang ah a lu awkin van le lei kikalah kikhai geigai hi.

Tua ciangin galkap mang Joab hong pai-in Absalom’ lungtang sungah thaltang thum hong siat hi. David in a thuk zawh loh le a thuk nop loh hangin, a Pa a simmawh peuhmah Pasian in awi lo ahih manin, Pasian in Absalom pen tawsaw tungah a khai ahi hi. Si nai lopi hing gegu sa-in lungtang sungah thaltang kisiat cih pen na lua mahmah ding a, Absalom in thu tampi lungngai mankha ding hi. A pianna a Pa takpi a dokhak pen kisik mahmah sam ding hi.

A tuahsiatna a ngawh ding thu dang om thei lo ahih manin ka Pa ka khasiatsak hang hi ding hi a cih loh phamawh hi. Ka Pa ka simmawhkhak manin kei sanga nauzawte sangin si masazaw ding ka hita ve maw; a khansih ding lah ka hita mawk a, ci ngeungaukha ding hi.

A melhoih lai, a tha hat lai-in pawl hau mahmah napi, haksatna a tuah ciangin kuama’n honkhia ngam tuan lo uh hi. A muan a suan teng in nusia uh a, amah bek sih ding ngak-in koih uh hi. Amah a that dingin kiging sa-in a om tangval sawmte a et kawmin, ka Pa hi leh hong that het lo mah ding hi ven, hihte peuhmah in lah hong mulkim hetkei ven cin maw, ci ngeungaukha ding hi.

Joab’ thupiakna bangin tangval sawmte in hong sat takpi uh a, a melhoih mahmah khangno Absalom hong si ta hi ... “Topa na Pasian un note hong piak leitang tungah na khan uh a sau theih nadingin na nu le na pa uh zahtak un ” (Pai 20:12) ci ahih manin Nu le Pa a simmawhte a khansih ding mah ahi hi.

Tate In Nu Le Pate’ Itna Telkhial Thei
Ta’ dinmun ah i om laitakin Nu le Pate’ hong itna kitelkhial baih mahmah a, Nu le Pa tungah kikhasia baih mahmah hi. Hong it luatna uh i telna in hong nehnosakin hong khasiasak baih ahi hi. Khangno ihih laitakin innkuan sung haksatnate kithei khin het lo hi. Nu le Pate kiangh sum i deih zahzah i nget laitakin, Nu le Pate in leiba a hauh mahmah laitak khawng uh na hi thei gige hi. A tate uh nikten puansilh hoihpen mah hong silhsak nop uh hangin leiba tam lua ahih manin hong guan ngam lo uh hi. “Leiba zong din zo ngap lo, a tate uh puan hoih pipi silhsak” a kicihkhak ding a maizum hun nangawn uh om thei hi. Innkuan sung haksatna khempeuh Nu le Pate in thuak khinkhian uh a, tate hong theisak ngam lo uh hi.

Tua bangin innkuan sung haksatnate theikha lo na hih manin, nang deihzah sum hong piak zawhloh uh ciangin khasia pah kei in. Nang nget zah hong piak zawh kei uh leh zong kikhasiasakin khitui luang pah se kei in. Kitom gawp, hang gawp sa-in inn panin na taikhiat ciangin na nungah na Nu le na Pa bang zah takin a lungsim uh na ahi hiam cih phawk in. Nu le Pa in khua-ul khua-sa kai-in a thalawhsa uh sumlepaai khempeuh nangmah hong khualna uh hi a, nang adingin na khat beek itsik lo uh hi.

Neihlelam kicing hi peuhmah leh mi-a’ sangin a hoihzaw tham hong guan nuam uh hi cih phawk gige inla, mi nek sangin zong a limzaw hong nesak nuam uh hi cih mangngilh ngei kei in. Sum om nai kei hong cih uh ciangin zong um pah lel in. Na lawm na gualte lakah puan hoih lopenpen na silh ciangin, nang sangin na Nu le na Pa in nasazaw hi. “Nikten puansilh hoih nong guat nop loh uh hong it kei lua uh teh” ci ngei kei in. Tua bang na cih khak leh na Nu le na Pa’ lungtang siktul tawh a sunliam niloh na suak ding hi.

Khatveivei ciangin sum om gige napi, hong pia nuam lo uh hi na cih hun zong omkha thei ding hi. Innkuan khat sungah sum zek nading tampitak om den hi. Sum neih khempeuh nang deihpen lei nadingin kizang leh a kicin hun zong omkha mah ding hi. Ahih hangin na nek na dawn ding zong kisam a, na sangsap ding zong kisam hi.

Inn le lo neih zawh nadingin sumlepaai cil mahmah ding a kisap hun zong om thei hi. Om gegu napi hong kipiak loh ciangin zong nang hong kikhualna mah hi veve hi. Nang deihteng hong piak lohna uh pen na Nu le na Pa in nang hong it luatman uh hizaw hi.

Khatveivei ciangin na utna khempeuh ah hong paisak loin, hong kihelsak lokha thei ding uh hi. Tua bang hun ciangin tate in Nu le Pate’ itna telkhial thei hi. Nang ut bangin hong zankhah leh uh zulesa, khamtheih guihtheih tawh na kidiah pah ding a, AIDS natna vei-in na khansih lel ding hi. Tua bangin hong khahzau loh nangawn uh a sia mahmah khangno tampi mah i om lai veve hi.

Zo ngeina zangin Nu le Pate in, numei peuhmah nitak vak ding hong khamcip nangawn i zawlngai zo lai veve hi. Leitung thute ah suakta semsemin kikhahzau semsem leng mawhna le minsiat mindaina tam semsem hi. Ahih hangin Pasian thu ah suakta semsem leng gamtat hoih semsemin kiminpha semsemzaw hi. Tua ahih manin na Nu le na Pa in na ut bangbangin hong zankhah het lohna uh pen nang hong itna uh hizaw hi.

Zomite In Zong Ngeina Hoih I Nei Hi
Lai Siangtho in hong hilh bek tham loin, ei mai ah tate, mote in i duh i deih teng kibalmal thei lo hi. Sasin salung peuhmah Nu le Pate hong piak lohin kimotnek ngei lo hi. Innkuan sungah a haampenpen Nuteek Pateekte’ ading ahi hi. Inn sungah zu a kiluup ciangin zong papen in a tep ma-in tate in tep ngei lo hi.

Papen in kamkhat tep photin valh loin siakhia phot hi. Zu lakah natna satna a piangsak thei dawi le kaute nasepna teng a phihkhia phot ahi hi. A duhgawh thei dawi le kaute phuisamnano khat tawh zu phihin a hawlkhia ahi hi. Lam khat pan ngaihsunkik leng, zu lakah sih nading gu a om leh zong tate sih tangin Papen si ngam cihna ahi hi. Tua ahih manin i Zo ngeina ah Nu le Pa in a nek masak, a ciap masak lohin tate mote in bangmah kimot nek ngei lo hi.

Hih ngeinate pen a thupi lo a bat hangin, Nu le Pa zahtakna ahih manin thupi mahmah hi. Tu hun piangthak hun, Kha Siangtho hun sungah i nak zat semsem ding hizaw hi. Kha lamah i dinmun sang semsem hi i cih leh, innkuan sungah i Nu le i Pa, i teeknu i teekpa i zahtak semsem ding ahi hi.

Pasian in Moses makaihna hunta a sak ciangin a nuntakna laksak hi. Moses a sih khit ciangin Joshua makaisak pan hi. Tua mah bangin innkuan sungah zong Nu le Pa a dam laiteng Pasian in makai dingin a dang hong deih nailo hi.

Pasian in makai dingin hong deih hun ciangin Nu le Pa hong laksak ding a, ut ta lecin ut ta kei lecin innkuan sungah makai hihna za na liangko tungah hong suan ding hi. Tua hun hong tun masiah Pasian in nang a makai dingin hong deih nailo hi pah hi. A hun cing nai lopi-in makai na ut teitei leh phak natna nam khat ahi, mite nawlkhin le pampaihin na om ding hi.

Kumpi Uzziah in a ma sep ding ahi het lopi paknamtui biakna tau tungah paknamtui hal dingin Topa’ biakinn sungah lut hi. Ama sep ding ahi lopi a sem, Uzziah tungah Topa heh ahih manin kumpi Uzziah hong phak hi (2Khg 26:16-21). Hih thu i ngaihsut ciangin ama sep ding ahi lopi a sem teiteite tungah Topa heh hi cih hong musak hi. Pasian in paknamtui hal dingin Siampi Aaron’ suante a koihsa ahih manin a dang khat in a mot sep ciangin Topa lungkim lo hi. Tua ahih manin Topa hong koih lohna, Topa hong seh lohna mun ah na i sepkhak ciangin Topa lungkim lo hi.

Uzziah pen Pasian in kumpipa dingin a koih hi a, Siampi dingin a koih hi lo hi. Ama dinmun lopi ah gamtangkha ahih manin kumpi Uzziah hong phak takpi hi. Tua mah bangin nang zong Pasian in ta ding, mo dingin hong bawl hi napi, teek’ nasepteng sem nuamin innkuan sungah thu nei nuama na omkhak leh na phak ding hi.

Mi pawlkhatte in a teeknu a teekpa damlai gegu napi, innkuan sungah thu neisak lo, khut zangsak loin lengla bangsak giaugiau lel mawk uh hi. Piak tuak a sak teng uh Nu le Pa dong loin pia uh a, zuak khiat tuak a sak teng uh Nu le Pa dong loin zuak ziauziau uh hi.

Nang makaih sep ding hun tung nailo napi, makai nuamin thu nei nuam a, na khutpal luatkhak leh na phak ding hi. Na dot loh manin Nu le Pa khasia thei uh hi. Ahih hangin dong lel lecin “Nang hoihsak bangbang hi” hong ci ding uh a, nang deihna mah tangtung veve-in thupha na ngah ding hi.

Gamtatna Tawh Nu Le Pa Zahtak In
Innkuan sungah na tate muhin na pa tutna suankhia ngei kei in. Mi pawlkhatte in a nu le a pa ui hawl ngeu hawlin hawl kawikawi thei uh hi. Pate tutna khawng suankhia gawpin “Na paikhia lenglang sin! dongkholh teh, lai gelh nuam ing” ci-in hawlkhia thei uh hi.

Tua bangin na gamtatnate na tate in hong mu uh ahih manin lai a sim nop uh ciang le tutna a zat nop uh ciangin a pi a pute uh tutna suan ziauziau uh hi. Tua pen nang pattahna hi a, na nu le napa a sih khit ciangin nang le na zi tungah hong zat ding uh ahi hi.

Mi pawlkhatte a nu le a pa mai ah ngongtatin gamta thei mahmah uh hi. Meh limsa kei leh uh an nekna sabuai (table) khawng lawnthal gawp uh a, a nu le a pa lau lua-in lingsak keuhkeuh tanghial uh hi. Zasan kuang khawng lei denna-in inn sungtengah pakaan (kuang) leng bawl thei mawk uh hi. Nu le pa in an lim meh lim huan nuam mahmah napi uh, huan ding meh lim om lo ahi hi. Meh lim na duh leh nu le pa kiangah sumnu sumpa tun lecin, nu le pa in zong meh lim huan nuam mahmah uh hi.

Sumnu sumpa tun zo lo napi cin, na kitom ciangin hat mahmah laidep na hih manin nu le pa lungkham mahmah hi. Meh lim duh a, na kitomna, tha teng tawh sum thalawh zen lecin meh lim, an limpen na ne zo takpi ding hi. Na nu huansa peuhmah lim nasa kei zongin, “Nu aw, na an huan lim lua” ci den lecin na nu hong lungdam mahmah ding a, na zin na vakna ah lawhcingin an limpen na ne zo den takpi ding hi. Na nu le pa lungdamsak mahmah peuh lecin Topa in thupha hong pia ding a, an limpen mah na ne zo den ding hi. (Jer 31:12,14)

Ka khualzinna khua khat ah a lungtom, a ngongtat thei mahmah papila khat om hi. Khua lak vak hong ciah ciangin a nu in an na huan man nailo hi. A nu in “Bawi, ken an na huan nai kei mawk veng e” a cih leh hawk beba liangin, “Huan! thuuk!” ci-in an huanna thuk le an nek sabuai kawk khawm mawk hi. Ni khat a nu in an nawisak luakha ahih manin “Bawi, tu ni an nawisak luakha ing e” a cih leh “Teek zawzen ta a, tu dong an huan thei nailo lawmlawm, a hul ding na deih leh antang na khah ma-in a tui diit” ci zawzen hi.

Ka tuahkhak a dang papi khat pen piangthak kineih khat ahi hi. Ni khat biakinn panin kikhawm a ciah leh a zi le a nu na kitawng uh hi. A Lai Siangtho bu a lenuai-ah tep letlatin a kitotdan uh ngai phot zawzen hi. A zi itzaw ahih manin a nu mawhsakin “Innkuan sung buaina khempeuh nang hang hi” ci-in diang phei zengzangin a nu diip tuatsak hi.

A nu lei lak kidenna pahlian hi. Nak thei pak lo ahih manin kisaan leekleek zawzen hi. A nak theih ciangin “Na si e maw bawi, tu-a sangin hong piangthakzaw lai lecin pawh si ta mai ning ma taw!” ci-in tau ngeungeu hi.

Piangthak pawlkhatte in a nu le a pa thudonkha lo mawk uh hi. I pianthakna nu le pa in zong hong noptuampih ding uh ahi hi. Biakinn sungah lamlam diangdiangin na om zongin na teeknu na teekpa na it theih kei leh na pianthakna na kisit phat lai ding ahi hi.

A piangthak nailo, zu khamin a kitomtom thei lai mi khat na hihkhak leh zong, na nu le na pa mai ah kitomkha het kei in. Tu hun pen pilna le hauhna kidem hun hita ahih manin, zu khama kitom hun hi nawnlo hi. Mi lakah na gilo mahmah kha zongin na nu le na pa zahtak mahmah lecin, na mai lam hun adingin lametna om hi. Na sih ma-in piangthak in. Pasian mizat khat le mi nuamsa khat na suak ding hi.

I kiim i kianga om minam dangte in a nu le a pa uh zahtak mahmah uh ahih manin thupha sang uh a, Khristian hi lo napi uh hau mahmah lel uh hi. Nu le pa zahtakna pen leitungah nuamsa-a khansau nading ahih manin biakna tawh kisai loin nu le pa a zahtakte Pasian in leitung thupha pia hi.

Source :
Hauhna Le Khansauna Thusim laibu
~ Evan Langh Do Khup’


(KZBA Youth’te hawm Khangno Lamhilh laibu pan akila kik ahi hi. Laigelh Sia Evan Langh Do Khup in KZBA khangnote tungah phalna pia in KZBA te phalna tawh LAIBUSAAL pan hong kisuah kik ahi hi.)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO LE KHANSAUNA. Agelh ~ Evan. Langh Do Khup Description: Rating: 5 Reviewed By: Cinpu Zomi
Scroll to Top