728x90 AdSpace

Hot
Menu
Zon-ol na Donate

Latest News

KHANGNO LEH KUM ZALOM 21st. Agelh ~ Rev. Dr. Thang Cin Lian

KHANGNO LEH KUM ZALOM 21st.
Agelh ~ Rev. Dr. Thang Cin Lian
Theological Education Department
Myanmar Baptist Convention
Hibang hunpha hong pia ih biak Pasian tungleh MOMNO makaite tungah lungdamna thu kong ko masa hi.

Leitung khantohna manlang mahmah in, tai kidem bang liangin hong makhialh vangvang hi. Tuhun pen nidang hun bang hinawnlo in, thatang hat thu tawh nasep hun hinawnlo a, tu leh hei te tawh nasep hun hinawnlo, pilna siamna leh setvan bekbek tawh nasep hun hong hita hi.Tua ahih manin leitung mipil te’n tuhun pen IT (Information Technology) hun ci uha, kammal dang khat in gen leng Cyber-Cafe/ Cyber-age hun, internet leh Computer tawh na kisep hun hita hi. Tua ahih manin nidang lai a, ih nuntakzia leh ih thungaihsutte tampi hong kikhel in, leitung lian ih sak mahmah zong tuhun ciangin khuatano khat tawh hong kibang ta hi.

Leitung mun tuamtuam tek ah ih om hangin, omna mun tek panin kihokhawm thei, mel kimu thei-in khuakhat sung, innkhat sunga om mah bangin setvan tuamtuamte tawh kizom theita hi. Tua ban ah na neuno cik (khut meno cia) khat tawh na tampi tak kipua kawikawi thei ta hi. Tua ahih manin leitung pen nidang hun tawh kilam dang mahmah a, sun leh zan in kikhel in khangto ta hi. Leitung khangto ih cihtak ciangin leitung pen lian semsem cihna hilo a, leitung a om mihingte theihna pilna khangto semsem cihna hizaw hi. Hi bangin leitung in sun leh zan khantoh lam manawh in a tai laitakin ei khangnote zong bangci bangin, leitung tawh kalkikim in khangto thei ding ih hihiam cih lungngai kawmin khangnote tha kong pia nuam hi. 


1.     Pilna, Pau leh Lai:
Lai Siangtho in pilna kipatna in Pasian theihna hi ci hi.Tua ahih manin Pasian athei, a umte pen khathu ah mipil penpen te hi. Tua ban ah leitung laipilna leh khantohna apiangsak pilna siamna tuamtuamte sin hamtang ding kisam hi.


Mihing nuntakna ah a thupi mahmah khat pen kampau ahi hi. Tuhun khangno khat adingin kampau tuamtuamte ihsin ihsiam ding kisam hi. Leitung ah kampau namtampi tak om a, tuate sungpan peello in eimi khangno khat in theih huai kasak pau leh lai namthum:

(1) Khatna ah Zomi ih hih manin Zopau leh Zolai (Tedim) siam kul hi. Banghanghiam cihleh Minam ihcih pen ei uttel hilo a, Pasian hong piansakna mun minam ah a kipiang ihi hi.Tua ahih manin ihpau leh ihlai theihsawm siamsawm hamtang ding hihang.

(2) Nihna ah Kawlpau leh Kawllai ih theih ding kisam hi. Banghangiam cihleh eite pen Kawlgam mite ih hih manin ih gam ii pau leh lai pen ih theihloh a phamawh thu khat ahi hi.

(3) Thumna ah Mangpau leh Manglai ih theih ding kisam hi. Banghanghiam cihleh leitung ah Mangpau leh manglai ih theih lohin leitung minam tuamtuamte tawh ih kizop theihna dingin theihkul hi. Tua ahih manin eimi khangno khat in peello in theih hamtang ding in hih pau namthum leh lai namthum te kisam kasa a, tua ban ah paudang laidang tampi theihbeh zoleng zong hoihzaw semsem lai hi

2.     Nuntak siangtho:
Nuntak siangtho ih cih tak ciangin mite muhna bek hilo in, kuama hong muhlohna munte ah nuntak hoih nuntak siangtho ih hih ding thupi mahmah hi. Mipil mihau leh ulian makai a suaknuam khangno khat adingin nuntak siantho ding pen a thupi mahmah hi. Ut bangbang in gamta nungta in mipil misiam, mihau, leh mi thupi suak cihbangdan kiza ngei khollo hi. Tua ahih manin Pasian it in zahtakin, nuleh pate it in thumang in , nisim Lai Siangtho simin thungen den khangno khat pen a sawtlo in eite hong makaih leh ihsuan ihmuan ding khangno khat hong hiding hi. Mi khemnpeuh in amaute amakai dingin ahizongin, a zi ding, a pasal ding ahi zongin, alawm ding ahizongin nuntak siangtho gamtat hoih, mi citak mah kideih kimciat hi. Tua ahih manin Kum 21st sungah a kalsuan ding khangnote in, nuntak siangtho gamtat hoih in citak thumannate khahsuahlo in tuate ih ngawng ah ok in ih lungtang tungah gelhin (Paunak 3:3) nuntak siantho ding hanciam ding hihang. Ih minam, ihgam ihlei in khangnote ii nong makaih ding uh haibang hong ngak uh hi.

3.     Hunzatsiam in hanciam ni:
Leitung mikhempeuh ih hun neih zah kibang a nikhat in nai 24 kinei kimciat hi. Kalkhat in ni(7); Khakhat in nipi kal(4); kumkhat in kha (12), Nipi (52), ni (365) kinei kimciat hi. Ih hun neihzah kikim a, a zangsiamte’n natampi sem manin, azang siamlo te’n ih hunte mawk beibei lel hi. Khangno te’n hun zahtak in, hun thupi sa a, hun tawh nasem in, zekai daldal cih omlo in, hunlap setset in, ih nuntak ding tha kong pia nuam hi. Leitung ah gam khangto ihcihte pen hun thupitak in a zangte hi uh a, mihingte khantohzia pen a hun zatzia tawh kiteh thei hi.A thupi mahmah ih hunte mannei tak in zatsiam in, tua hunte sung mah ah ihsep peuhpeuh hanciam teta in, lungkia lo, nung kiklo in ma ih nawt ding hi. Mi khempeuh anu gil sung panin a pilsa, asiamsa, ahausa, na khempeuh atheikhinsa in asuak cihbang kiomlo hi. Na khempeuh pen ihsuah khitteh ciangin akisin, akikan, akizong, akihanciam tawm vive ahi hi. Tua ahih manin hanciamna omloin leitungah mi gualzo cihbang om theilo ding hi. Mihing khuak hatna, ciamteh theihna pilna khat leh khat kikimlo kha mah ding hi. Bangbang ahi zongin leitunga mi minthang migualzo te pen a sepna khat peuh uh ah lungkialo, nung kiklo a asem teitei te hizaw uh hi. Gentehna in Bawlung (tukpeng) siam mahmah khat pen bawlung tual sungah khatvei a kimawl bek tawh asiam hizenzen lo uh hi. Bawlung siam khat asuak theihna dingin ahun tampi pia in, gim leh tawl tampi athuak khit dikdek ciang bek in, bawlung siam mi minthang khat hithei pan hi.

Tua ahih manin khangnote aw na khat peuhpeuh nasep na uh ah, lungkialo in cihtak thuman takin na hanciam teta lehang gualzawhna in eite mai ah hong ngak gige hi. Lungkia ngeikei ni, hanciam in sem teetei ni, tua hileh ih gualzo ding hi.

Thu khupna ah ka gen nop thu in Khangnote aw na khangno hun sunguh nuamsa unla, cihtak thumanna tawh pilna tampi hong sin un, tua pilnate ihgam leh minam adingin hong zong kik un. Na hihna khempeuh uh ah Pasian phawk unla, na khat peuh nasep uh ciangin Pasian tawh panin, Pasian mah tawh khup un. Pasian in eite lungsim takpi tawh Amah ihup ihmuan ding hong deih ahih lam phawk kawm in, kum zalom 21st sungah leitung tawh kalkikim in ih kalsuan theihna dingin ih biak Pasian tungah citak thumanin Ama deihna bangin kampau gamta nungta in, nisim nuntakna leh na sepnaciat ah cihtakna leh thuman nate a kang ngeilo ciktui bangin luangkhia sak den in (Amos 24), khat leh khat itna tawh khut kilen in mainawtkhawm ciat ni. Khangno khempeuh Topa Pasian in thupha hong pia kimciat tahen!

Source :
MOMNO
June 5, 2011

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHANGNO LEH KUM ZALOM 21st. Agelh ~ Rev. Dr. Thang Cin Lian Description: Rating: 5 Reviewed By: Cinpu Zomi
Scroll to Top