728x90 AdSpace

Hot
Menu
Zon-ol na Donate

Latest News

LAIGELHTE, A SIMTE, MIPITE… Agelh ~ Thang Do Khen

LAIGELHTE,
A SIMTE,
MIPITE…
Agelh ~ Thang Do Khen

Model : Lia Dim Tawng

1.    Laigelhte in a theih teng gelha, a simte in a theihsa tawh behlapin, a gelhte sangin a zahnih in theih hau zaw ding hi.

2.     Laigelhte pen khaici kaikhawmte hi-a, a simte pen a vawhkhiate hi in, mipite pen a gah at-te a hi hi.

3.     Laigelhte in a zian (sum lu) ding zongin, a simte in meetbawl' a, mipite in a baihsa ne uh hi.

4.     Laigelhte pen kamtaite hi a, a simte pen taangkote hi-in, mipite pen a diangkhia dingte a hi hi.

5.     Laigelhte a lawhcing sak ding a simte hi-a, thu gente a lawhcing sak ding thungaite hi-in, makaite a lawhcing sak ding mipite a hi hi.


6.     Laigelhte pen a phak zawhlohna mun dongah thu gente hi a, a simte pen tutmun peuh-ah pilsinte hi-in, mipite pen pilna a manphatna a mukhiate a hi hi.

7.     Laigelhte pen khat bek nangawn a ut zahzah in a kikhen thei-te hi a, a simte pen thupha puak zin a do-te hi-in, mipite pen tua thupha a ngai-te a hi hi.

8.     Laigelhte pen innbul khuam a geelte hi a, a simte pen inn lamte hi-in, mipite pen a zi a tate a hi hi.

9.     Laigelhte in a lungtang tawh sawnkhia a, a simte in a kam tawh thehzaak-in, mipite in thatang tawh a nawt uh hi.

10.  Laigelhte leh sikseekte kibanga, a simte leh lokhote kibangin, mipite leh an la-te ki bang hi.

11.  Laigelhte' galvan in laibu hi a, a simte' galvan in a leii hi-in, mipite' galvan in thungaihna a hi hi.

12.  Laigelhte pen galvil(duty)te hi a, a simte pen gal mai dawkte hi-in, mipite pen gam la dingte a hi hi.

13.  Laigelhte in laibu tungah mualsuang phut-a, a simte in mipi tungah mualsuang phutin, mipite in gam leh lei ah mualsuang a phut hi.

14.  Laigelhte in hun-awng cih bang nei lo a, a simte in tha-awl' cih bang nei lo in, a ngai-te in zakhin cih bang nei lo hi.

15.  Galvan bawlte leh a zangkhiate thaman kikim ding a, giahbuk ngakte leh gal phual kuante thaman kikim ding hi. Tua mah bangin laigelhte leh a simte thaman kikim dinga, a simte leh a ngaite thaman kikim ding hi.

Akhai khopna:
Korin Masa 12:12-31
12Pumpi pen khat bek hinapi-in na a tuamtuam a nei hi. Pumpi in na a tuamtuam tampi a neih hangin pumpi khat bek mah ahih veve mah bangin Khrih zong pumpi na a tuamtuam a nei pumpi khat ahi hi. * 13Jew mi ihi a, Gentail mi ihi zongin, sila ihi a, sila a hilo ihi zongin, eite minam tuamtuam ihih hangin Kha Siangtho khat bek mah in Jesuh' pumpi a suak dingin ama sungah hong phum a, eite khempeuh tungah a hong kipia pen tua a kibang Kha Siangtho khat bek mah ahi hi.

14Pumpi in na khat bek neiloin nam tampi tak a nei hi. 15Khe in, “Kei, khut hilo ka hih manin pumpi tawh ka kizom kei hi,” a cihmawk hangin pumpi na khat ahihna a bei hi tuanlo hi. 16Bil in, “Kei, mit hilo ka hih manin pumpi tawh ka kizom kei hi,” a cihmawk hangin pumpi na ahihna a bei hi tuanlo hi. 17Pumpi khempeuh mit suakkhin leh bang tawh khua za ding ahi hiam? Pumpi khempeuh bil suakkhin leh bang tawh a gimnam thei ding ahi hiam? 18Ahi zongin tu-a i neih bang tektekin, Pasian in ama deih bangin pumpi na a tuamtuam a hong bawlsak hi. 19A vekpi-in pumpi na nam khat bek hi khin leh a pumpi ding koi-ah om nawn ding ahi hiam? 20Ahi zongin tu-a i neih bangin pumpi khat bek om a, na tampi a nei hi.

21Tua ahih manin mit in khut kiangah, “Nang ka hong kisam kei hi,” ci theilo a, lutang in zong khe kiangah, “Nang ka hong kisapna omlo hi,” ci theilo hi. 22Pumpi na a ginalo tawh a kibangte a kiman'na lian mahmah zawsop a, 23pumpi na bangmah gentaaklo i sakte pawl limtakin kep kul zawsop hi. I pumpi na hoih i sak khollohte pen, 24pumpi na hoih i sakte i lim et ding a kisap kholloh bang hiloin, limkep diak peuh kulzaw se hi. Ahi zongin i pumpi na thupi i sak khollohte limtakin i kepdiak ding a kisamin i pumpi a na bawl se hi. 25Tua ahih manin i pumpi nate khatlekhat kithutuak lo cih omloin a vekpi-in a kilemkim uh hi. 26Khat in natna ngah leh a vekpi-un thuakkhawm uh a, khat in pahtakna ngah leh a vekpi-un lungdam khawm uh hi.

27Tu-in note khempeuh pen Khrih pumpi na hi uh a, na vekpi-un a pumpi na khat ciat na hi uh hi. 28Tua ahih manin Pasian in pawlpi sungah mi khempeuh ama pan'mun ciat dingah a hong bulh hi. A masa-in sawltakte, a nihna-ah kamsangte, a thumna-ah laihilhte, tua ciangin na lamdang bawltheite, cina damsak theite, midang a huhtheite, thu vaihawm a siamte, leh pau lamdang a pau theite ahi uh hi. * 29A vekpi-un sawltak hilo a, a vekpi-un kamsang zong hilo uh hi. A vekpi-un laihilh, thuhilh hilo uh a, a vekpi-un na lamdang zong bawllo uh hi. 30A vekpi-un cina damsakna ding siamna neilo uh a, a vekpi-un pau lamdang pau theilo uh a, a vekpi-un tua pau lamdangte a khiatna gen theilo uh hi. 31Tua ahih manin Pasian' hong piak siamna a hoihpente deih belin na nei ta un.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: LAIGELHTE, A SIMTE, MIPITE… Agelh ~ Thang Do Khen Description: Rating: 5 Reviewed By: Cinpu Zomi
Scroll to Top